Tohkohsrahi Wolacna
Oasr Pahpah Inkuhsrao luhngse se tuhmwacsr suc e fah liye lah kuht eis mwe insewowo nuhkwewa ac ma wo nuhkwewa ma kena ac sulaclah lasr uh kuh in eis.
Kwacna siyuckyuck sin mempucrs ke Alu luhn Jisus Kraist luhn Mwet Luhlahlfongi ke Lwen-sahflah lah, “Alu lowos an siena fuhkah nuh ke alu Kristin sahyac? Inmahsrlon top ma kuht sang uh pa fohnlahiyen mwe luti lal Jisus Kraist. Ma se emet ke mwe luti se ingacn pa pwacye oasr Pahpah Inkuhsrao se tuhmwacsr suc arulacna luhngse tuhlihk Nahtuhl pwacnacng El ke kuht nohfohn in muhta ke tohkohsrahi wolacna ne tok ma pahtpaht. Yohk liki nuhkwewa, El luhngse kuht in weluhl ac Wen Nahtuhl, Jisus Kraist, muhta ne tok. El use nuh sesr mwe luti ac inkacnek in oraclah sulaclah lasr ma e ahkuhtweyac acn kuht e fahsr nuh kac ac moul kuht sulaclah uh.
I.
Ke fwackyuck kuht eis ingena kuht etuh lah sahflahiyacn mwet nuhkwewa ma muhta fin facl se inge tiac pa mwet wo e som nuh inkuhsrao ac mwet koluk e muhta hell keok ma pahtpaht. Plwacn wolacna se luhn God nuh sin tuhlihk Nahtuhl nwacnwack ma pwacye se inge suc lutiyuck sin Mwet Lahngo lasr, Jisus Kraist: “Pukanten acn in muta in lohm sin Papa tumuk.”1
Mwe luti ma ahkahlwemyeyuck ke fohlohkyak luhn Alu luhn Jisus Kraist luhn Mwet Luhlahlfongi ke Lwen-sahflah luti lah tuhlihk nuhkwewa nuhtin God—puhs inkacnek suc tiac sruhmmuhnyuck inse—e fah usrui sie sin tohkohsrahi wolacna tolu, finne elos suc “srihklac kahlwem la.”2 Tukun pacl se elos suc seahkos keok ke ma koluk lalos, suc ma keok lalos inge ahkoeloslac nuh ke ma suc e fah tuhkuh tok, elos nuhkwewa e fah sifil moulyak ac fahsr nuh ke Nuhnuhnkuh Sahflah luhn Leum Jisus Kraist. Ingoh, Mwet Lahngo sacohklacna lasr, suc, kuht lutiyuck lah El, “kaksakihn Pahpah, ac molwelah orekma nuhkwewa ke Pahol,”3 e fah suhpwaclah tuhlihk nuhkwewa nuhtin God nuh ke sie tohkohsrahi wolacna inge fal nuh ke kena ma elos ahkahlwemye ke sulaclah lalos.
Sie pac mwe luti muhtahl ma orekmakihnyuck ke Alu fohlohkyak se inge pa masap ac wuhlweacng ma ahkahlwemyeyuck ma sang nuh sin tuhlihk nuhkwewa nuhtin God inkacnek muhtahl se in kuh in wi usrui tohkohsrahi fuhlwact se emet ke wolacnaiyen tohkohsrahi celestial. Acn fuhlwact sahflah se ingacn—moul ma pahtpaht ke tohkohsrahi celestial—pa srihpac yohk ke Alu luhn Jisus Kraist luhn Mwet Luhlahlfongi ke Lwen-sahflah.
Ke fwackyuck kuht eis misenge inge, oasr yurin Mwet Luhlahlfongi ke Lwen-sahflah etuh se ke plwacn in engan luhn God nuh sin tuhlihk Nahtuhl. Plwacn se ingacn muhtacwacack ke moul lasr ke kuht nguhn meet liki kuht isuslac, ac ahkahlwemye pac srihpac ac ohiyacn fuhfahsryucsr se kuht sulaclah ke moul suhkawihl se inge ac kena lasr nuh ke acn kuht luhngse som nuh we tok.
II.
Kuht etuh ke fwackyuck misenge inge lah tohkohsrahi inge nohfohn oasr masap kac4 ac tohkohsrahi wolacna se ma kuht eis ke Nuhnuhnkuh Sahflah oreklac ke masap kuht sulaclah in ukwe ke fuhfahsryucsr lasr facluh. Ye plwacn wolacna se inge, puhslac kain in tohkohsrahi—puhs acn in muhta—in muh tuhlihk nuhkwewa nuhtin God in usrui sie tohkohsrahi ingacn suc ma masap kac an elos kampare in “ukwe.”
Ke kuht ahkuhtweyac atac ac ma enenuh ke kais sie sin tohkohsrahi tolu ke plwacn luhn Pahpah, kuht muhtacwacack ke ma se e lucng ah, suc srihpac se ke masap ac akwuck muhtahl ma God El ahkahlwemye ke Alu luhn Jisus Kraist luhn Mwet Luhlahlfongi ke Lwen-sahflah. Ke wolacnaiyacn “celestial”5 oasr lacfahl tolu kac,6 suc acn se ma fuhlwact emet ngacn pa moul ma pahtpaht ke tohkohsrahi celestial. Pa inge acn in muhta lalos suc eis fohnlah Lal, ac wolacna Lal, pwacnacng, elos god, finne wen ac acn nuhtin God7 ac muhta yurin God ac Kraist Lal ne tok ac ma pahtpaht.8 Ke fwackyuck, God El ahkahlwemye masap, akwuck, ac wuhlweacng ma pahtpaht ma enenweyuck in orekmakihnyuck ac akihlwenyuck in sramtweack atacn mwet se in oacna god. Alu luhn Jisus Kraist luhn Mwet Luhlahlfongi ke Lwen-sahflah siiac na srihpac se inge ke sripen Alu fohlohkyak se inge pa in ahkolah tuhlihk nuhtin God nuh ke moul ma pahtpaht ke tohkohsrahi celestial ac, yohk liki nuhkewa, moul ma pahtpaht ke lacfahl se ma fuhlwact emeet uh.
Plwacn luhn God, oreklac ke ma pwacye ma pahtpaht, fahkwack lah moul ma pahtpaht kuh in sruokyucki ke oaru nuh ke wuhlweacng ke macruht ma pahtpaht inmahsrlon mukul se ac muhtwacn se lin tempuhl muhtahl,9 suc macruht se inge kuh in orek nuh sin mwet luhlahlfongi nuhkwewa. Srihpac sacn pa oruh kuht luti lah “sie mwet el kuh in oruh mukul se kuh muhtwacn se ma el eis ke moul se el muhta we met liki el tuhkuh nuh facluh ah, ac moul se inge ac moul nwe tok ma pahtpaht.”10
Sie luti yohk srihpac in kahsre kuht ahkolah nuh ke moul ma pahtpaht yurun God pa 1995 Mwe Fahkwack ke sucu.11 Fwahkack se inge ahkkahlwemye ma kuht enenuh in ahkolah in muhta yurun God Pahpah ac Wen Nahtuhl, Jisus Kraist. Elos suc tiac kahlwem ke plwacn lal Pahpah nuh sin tuhlihk Nahtuhl kuh in nuhnkuh ke mwe fahkwack ke sucu se inge liki na masap ma kuh in ikihlyucklac uh. Nuh ke acn se sahyac ah, kuht ahkkweyelah lah mwe fahkwack ke sucu, oreklac ke mwe luti pwacye, ahkuhtweyac kuhpahsr luhn sucu suc ip yohk se emeet ke kapwack lasr uh kuh in sikyak we.
Mwet Sap Paul el ahkuhtweyac wolacnaiyen tohkohsrahi tolu inge, kapsra nuh ke wolacna luhn faht, mahlwem, ac itu.12 El sang inen ma se ma fuhlwact ah “celestial” ac ahkluo pa “terrestrial.”13 El tiac sang inen ma sahflah sac, tuhsruhk fwackyuck se ituckyang nuh sel Joseph Smith oruh oasri ine: “telestial.”14 Siepac fwackyuck ahkuhtweyac pac ohiyacn moul luhn mwet ma e sollac nuh ke kais sie sin tohkohsrahi wolacna inge. Elos suc ma tiac kuh in ahkos masap ke tokohsrahi celestial15 e fah usrui siena tohkohsrahi wolacna, srihk liki na celestial tuhsruhk fal nuh ke masap ma elos sulaclah ac kuh in “muhta kac.” Kahs se ingacn muhta kac, kwacna sihmlac ke ma suhmuhslah, kalmac pa oasr tari acn in muhta.16 Sie srihkasrak nuh kac an pa, elos suc oasr ke tohkohsrahi terrestrial—kapsra nuh ke atacn inkuhsrao—suc pa elos suc muhta ye muhtuhn Wen, tuhsruhk tiac ke fohnlah luhn Pahpah.17 Elos mwet wowo fin facluh, suc lohsrlah ke eyeinse luhn mwet uh,18 tuhsruhk tiac kampare ke luhlahlfongi la sin Jisus Kraist.19
Fwackyuck se ma ahkuhtweyac mwet ma muhta ke tohkohsrahi wolacna se e ten ah, telestial, pa elos suc tiac kuh in muhtana ke … wolacnaiyacn terrestrial.20 Ma ingacn ahkuhtweyac elos suc tiac eis Mwet Lahngo ac wacngihn elyah lalos ke mukwikwi lalos. Tohkohsrahi se inge pa mwet koluk ah muhta kac, tukun elos kweok ke ma koluk lalos. Ma inge ahkuhtweyucki ke fwackyuck misenge uh muh ma nuh selos suc tiac eis wosasuc luhn Jisus Kraist, kuh luhlahlfongi kacl Jisus …
Mwet inge pa mwet kikiacp, ac mwet inutnut, ac mwet kosro, ac mwet ahkmas, ac oacna sie mwet suc luhngse [kikiacp] ac kikiacp.21
Sramsram ke wolacnaiyacn tohkohsrahi tolu inge wi palyeiyacn liye inge, Prestuhn Russell M. Nelson el tuhfahna suhmuhslah: “Moul lasr facluh uh arulacna fototo kapsra nuh ke moul ma pahtpaht. Finne fototo tuh yohk srihpac! Nuhnkuh ahkwoyac lah orek fuhkah: Ke moul se facluh inge utuckot kowos in sulaclah lah piyac masap ma kowos luhngse in ahkos—ma ke tohkohsrahi celestial, terrestrial, kuh telestial—ac, ke srihpac se ingacn, piyac sin tohkohsrai inge kom e muhta kac ne tok. Plwacn na wowo se! Plwacn se suc ahkfuhlwactye sukohsohk in sulaclah lowos.”22
III.
Mwet Sap Paul el luti lah mwe luti ac masap luhn Leum utuckuh tuh kuht nuhkwewa in eis “fuhlatan woiyen moul su oan in Christ.”23 Ohiyac se ingacn enenuh ma puhs ac yohk liki na in eis etacack. Suhfalac in fahk ke wosasuc muhkwena; kuht enenuh in oruh tuh kuht in muh kuh in eklac kac. Nuh ke atacn luti sahyac, ma luti kuht in etuh ma se, wosasuc luhn Jisus Kraist ahsrosri kuht in sramtweack sie ma ah.
Ke mwe luti inge kuht kuh in fahk lah Nuhnuhnkuh Sahflah uh tiac top ke kotaiyen mukwikwi wo ac koluk nuhkwewa— ma kuht tuh oraclah. Ma inge akihlenyacn mukwikwi ac nuhnak sahflah lasr—ma kuht tuh eklac nuh kac. Kuht eis moul ma pahtpaht ke ohiyacn eklac. Oacna ke orekmakihn inse, kahs se inge suc puhslac kalmac fahkwack eklac upac se in moul uh. Suhfalac nuh sin oacna sie in oruh ma se ac tiac nuhnkuh. Masap, akwuck, ac wuhlweacng ke wosasuc tiac ma sihmihsyucklac in som tolyucklac nuh ke kuhtuh sef inkuhsrao. Wosasuc luhn Jisus Kraist pa plwacn se ma ahkahlwemye nuh sesr lah kuht e oruh fuhkah in oacna ma Pahpah Inkuhsrao El kena kuht in oacna uh.24
IV.
Ke srihpen Jisus Kraist ac Iwaclah Lal, ke kuht puhtatlac ke moul se inge, kuht kuh in auliyak ac sifilpac sroacng nuh ke inkacnek in wuhlweacng ma kol kuht nuh ke ma Pahpah tuhmasr Inkuhsrao El kena nuh sesr.
Puk luhn Mormon luti lah “moul se inge pa pacl [lasr] in ahkolah in ohsun nuh sin God.”25 Tuhsruhk ma ekahk ke “moul se inge” tuh ituckyang kano finsrak se la (in som yohk kuhtuh nuh sin kuhtuh mwet) suc Leum El ahkahlwemye nuh sel Prestuhn Joseph F. Smith, sihmlac ingena oasr ke Doctrine and Covenants section 138. “I beheld,” Joseph F. Smith el suhmuhslah, lah el liye mwet luhlahlfongi mahtuh ke fihl se inge, ke elos som liki moul se inge, tahfwelah orekma lalos in luti ke wosasuc in auliyak ac molwelah, ke kihsackuhnlah luhn Wen Kuloh Sefanna nuhtin God, inmahsrlolos suc muhta in lohsr ac ye kapihr luhn ma koluk ke facl upac se luhn nguhn luhn mwet misac.
Mwet misac ma auliyak e fah moliyucklac, ke ahkostwen nuh ke akwuck ke lohm sin God,
Ac tukun elos molwelah kaiyuck ke ma koluk lalos, ac ahknwacsnwacsyeyucklac, [elos] fah eis mwe sang fal nuh ke orekma lalos, tuh elos pa eis usru luhn molwelah.26
In weacng, kuht etuh lah ke Yac Tausin Sie, yac tausin ma tuhkuh tukun Tuhkuh Ahkluo luhn Mwet Lahngo, e fah oasr pacl se in ahkfahsrye akwuck enenweyuck nuh selos suc soena eis ke moul lalos facluh.27
Puhs ma kuht tiac etuh ke puhlan pacl tolu ke plwacn in molwelah: (1) facl in nguhn meet liki moul se inge, (2) moul facluh, ac (3) moul se tok uh. Tuhsruhk kuht etuh ke ma pwacye ne tok inge: “Moul ma pahtpaht pa elyah luhn sie mwet, tuhsruhk moul ma pahtpaht pa elyah luhn sucu se pac.”28 Oasr Pahpah Inkuhsrao luhngse se tuhmwacsr suc fah liye lah kuht eis mwe insewowo nuhkwewa ac ma wo nuhkwewa ma kena ac sulaclah lasr sifacna uh e lwelah. Kuht oacyacpac etuh lah El ac tiac sap kuh nuh sin oacna sie in awiyac inmahsrlon kais sie in lain kena lalos. Mwe insewowo ke kuhpahsr siliyucki pwacye nuh selos suc karihngihn olwelah lalos tuhsruhk tiac tuhkuh ke in fohrsi kuhpahsr siliyucki se nuh sin sie sie suc ma tiac fal kuh sruhnga oruh.
Tamuhlwel ac tahmtahel sacohk, nga fahkwack ke pwacyeiyacn ma inge. Nga fahkwack lah Leum Jisus Kraist, “mwet sihm ac mwet ahksuwohsye luhlahlfongi [lasr],”29 suc Iwaclah Lal, ye plwacn luhn Pahpah tuhmasr Inkuhsrao, El ahkfahsrye ma nuhkwewa, ke inen Jisus Kraist, amen.