Wen Suhnuhnte ac Inek Kol nuh Lohm ah
Kuhtuh pacl uh sulaclah uh ac uskomlac loesaclihk nuh sin Mwet Lahngo ac Alu Lal, Mwet in Onwelah Sahflah El tu inkacnek ma pen nuh lohm ah, paing kom.
Mukul Se Oasr Wen Luo Nahtuhl
Sruhmuhnyuck sin kuhtuh muh sie sramsram fototo ma arulacna etweyuck.1 Tohk tuh lwenglah nuh ke tausin puhsra raunweack facluh, wacngihn tahfonglac lah ke tausin yac puhs somlah ah, faht ah tekuh in tili uh wacngihn sruhmuhnyacn sramsram soko ke kuhtuh acn fin facluh.
Sruhmuhnyuck sel Jisus Kraist, Mwet Lahngo ac Mwet in Molwelah lasr, suc tuhkuh nuh facluh “in suk ac in molela mwet suc tuhlac.”2 El muhtwacwacack ke kahs fihsrwacsr inge: “Oasr wen luo nutin sie mwet.”3
Tohkoh kuht lohng ke ma na ahsor se sikyak. Sie wen ah4 fahk nuh sin pahpah tuhmwacl ah lah el sahflah ke muhta lohm sac. El ke eis sukohsohk lal. El ke som sislah facsin ac luti luhn pahpah tuhmwacl ninac kiacl. El ngihsre usru lal—pacl sac na.5
Kom puhla ma pahpah sac puhla ke el lohng ohinge? Ke el akihlenack lah ma se wen se nahtuhl inge luhngse yohk liki nuh kwewa pa in sislah sucu lal ah ac sahp tiac fohlohk?
Fuhfahsryucsr Pwacr Se
Wen se inge puhla pwacriyacn fuhfahsryucsr se inge ac engankihn. Tiac paht, el muhkwena lac. Sukohsohklah liki akwuck ac masap ke ohiyacn fuhsr lal, ingena el kuh in sifacna oraclah sulaclah lal ac tiac elyah sin pahpah tuhmwacl ac ninac kiacl. Tiac sifil auli kuh puhla suhfal. El engankihn in wi mwet ma oacna el ke acn se ingacn ac muhta ke moul se el luhngse ingacn.
Ai ke sie acn loesuhlah nuh yohrohl, el sa na sokwack kawuck lal ac muhtwacwacack moulkihn moul se ma el muhta mwemwei. Sahp puhs mwet luhngse el, mweyen el sisi mani ma na wacngihn. Kawuck sasuc lal inge—pwacye kuhnlah kahsruhp lal ingacn—tiac nuhnuhnkwacl. Elos ahkfuhlwact, weluhl, ac pahtok sulaclah lal an.6
Fin oasr social media ke pacl se ingacn, elac nwacklah page se lal ingacn ke petsac puhs wi kawuck lal an isracsr: #Moulkihnmoulsunluhkuh! #Tuhfahnapuhlaengan! #Kuhinoruhmaingepaclloeloessomlahah!
Sracl Sac
Tuh mwe pwacr sac tiacna pahtpaht—apkuhran pacl nuh kwewa ahksahfye. Ma luo sikyak: ma se meet an, lihsr mani lal ah, ac ahk luo, sracl se osraclihk acn sac.7
Ke upaclac mwe elyah an, el tuhfalwack. Mukul se ma kuh in sifacna, sritacl mani ke luhngse la tiac kuh in molwelah sie fana mongo ah, finne in sokwack acn in muhta se. Elac kuhtanglah fuhkah?
El wo na pwacye nuh sin kawuck lal ah—eltahl kuh in kahsrel ingena? Nga kuh in liyacl ngihsre kahsruh nuh ke kihtin ma se—nuh ke pacl sacna—nuh ke el kuh in sifacna lac.
Ma suhmuhslah fahk nuh sesr, “Wanginna mwet sang nu sel.”8
Kampare in moul na, el sokwack mwet imac se suc sang elan orekma muhta kihtakat pig.9
Upac masrinsrwacl lal, totolac ac muhkwena, mukul fuhsr se inge sahp nuhnkuh ma nuh kwewa ma fahlac tiacna wo, tahfonglac.
Tiacna insiac alal wacngihn kano se pa ahk elyah eluhl uh. Nguhna alal se. El pahngon pwacye el fin oraclah kena lal fin facluh se inge ac oruh el engan, lah masap facluh uh mwe lokoalok nuh ke engan. Ingena el etwaclah. Na oh, fuhkah luhpan molo se el molwelah ke etuh se ingacn!10
Ke upaclah masrinsrwacl luhn mahnol ac nguhnal, nuhnak lal fohlohk nuh yurin pahpah tuhmwacl. Kuh elac kahsrel tukun ma nuh kwewa ma sikyak inge? Mwet orekma nuh kwewa luhn pahpah tuhmwacl oasr mongo elos in kang ac acn in wihklac liki eng upac.
Tuh in fohlohk nuh yurin pahpah tuhmwacl?
Tiac kuh.
Fahkuhlwack nuh sin mura lal lah el tohllah usru lal?
Ac koflah na.
Ohsun sin mwet tuhlan lal suc kaeluhl muh el seahkos sucu lal ac sang ahsor nuh insiacn pahpah tuhmwacl ninac kiacl? Fohlohk nuh yurin kawuck mah lal tukun el luhkuhk fahk lah el sukohsohklah?
Koflah na.
Tuhsruhk masrinsrwacl, muhkwena, ac ma el puhla uh koflah in som luhkel—nuh ke “el asmakla ac nunkauk in el.”11
El etuh lah meac el enenuh in oruh uh.
Fohlohk Sac
Ingena lwelah kuht in fohlohk nuh yurin pahpah, sifen lohm sac pahpah muhsahlah insiac sac. Pacl ekahsr siofok, sahp tausin, au el tohllah elyah ke wen se nahtuhl inge?
Pacl ekahsr el ngweti liye inkacnek soko wen se nahtuhl inge ac puhla ahsor ke wen sac som ah? Pacl ekahsr el oruh pruhe lal ke infulwen fong uh, ngihsre sin God tuh wen se nahtuhl inge in wona, tuh elan kuh in sokwack ma pwacye, elan kuh in fohlohk?
Ac, sie lwen ah, pahpah sac ngwetlah nuh ke inkacnek ahsor se inge—inkacnek soko fahsr nuh lohm ahac liye atacn mwet se fahsr nuh yohrohl.
Kuh kuh in sikyak?
Finne atacn mwet sac fahsr loesuhlah, pahpah sac etuh ke pacl sac lah wen se nahtuhl ah.
El kahsruhsr nuh yohrohl, kafiselma in pahol, ac ngok muhtahl.12
“Papa,” wen sac fahk ke kahs se suc sahp el practis in pacl tausin ma, “nga orekma koluk lain God ac lain kom. Tia fal in sifil pangpang nga wen nutum. Oreyu oana sie sin mwet orekma lom.”13
Tuhsruhk pahpah tiac sang pacl tukun el tari ah. Ke sron in muhtahl, el sapkihn mwet kuhlwacnsap lal: “Use sie nuknuk na kato ac sang nokmulang. Sang pac sie ring nu ke paol ac fahluhk nu ke nial. Oraclah kufwa ac engan. Wen nutik koneyukyak!”14
Ahkfuhlwact Sac
Ke ohfuhs luhk sroal se srihpsrihp ma luhn mwet in sroal German se Richard Burde. Nga ac Harriet luhngse sroal se inge. Ahkuhtweyac sie ma sikyak yohk pahkotwen ac yohk kalmac ke puhpuhlyuck soko luhn Mwet Lahngo inge.
Ke apkuhran mwet nuh kwewa engankihn fohlohk luhn wen sacn, sie tiacna—tamuhlwel mahtuh sac.15
El us pack na emtuhng ekahsr.
El oasr insac ke pacl se tamuhlwel se wiyacl ah ngihsre usru lal ah. El liye ke muhtahl toasr ahsor pahpah tuhmwacl ah puhla.
Ac ke na pacl se tamuhlwel se wiyacl inge som ah, el srihke elan ahkmuhlahlahyelah ahsor luhn pahpah tuhmwacl. Lwen nuh kwewa, el orekma in fohlohkihn ahsor insiacn pahpah tuhmwacl.
Na ingena, tuhlihk sununte sac fohlohk, ac mwet nuh kwewa lohacng nuh sel.
“Yac puspis,” el fahk nuh sin pahpah tuhmwacl, “Nga tiana seakos ma sap lom uh. Na ke pacl sacn nohfohn, kom sona orek ahkfuhlwact nuh sihk.”16
Pahpah luhngse sac topuk, “Wen nutik, ma luk nukewa ma lom! Ma se inge tiac ma in kapsra opi kuh ahkfuhlwact. Ma in onwelah. Pa inge pacl se ma kuht finsrakkihn ke yac inge nuh kwewa. Tamuhlwel wiom el misac ac el moulyak ingena. El tuhlac tuhsruhk ingena el koneyuckyak!”17
Puhpuhlyuck se nuh ke Pacl Lasr uh
Tamuhlwel ac tahmtahel sacohklacna wiyuck, paing kawuck, oacna ke puhpuhlyuck nuh kwewa luhn Mwet Lango, ma se inge tiac ma kacn mwet muhta pacl loeloes somlah ah. Ma keim ac keik, misenge.
Suc inmahsrlosr soenna fahsr liki inkacnek muhtahl, kikiacp in nuhnak muh kuht kuh in sokwack engan yohk fin kuht fahsr ke inkacnek lasr sifacna?
Suc inmahsrlosr soenna puhla in puhsisacl lac, muhsahlah insiac, ac enenuh na pwacye nuhnak muhnahs ac pahkotwen?
Sahp kuhtuh ac nuhnkuh, “Kuh fihsrwacsr kuht kuh in fohlohk? Kuh nga ac akihlenyucki ne tok, sruhngwacyuck, ac kawuck luhk ngi ac te lohacng nuh sihk? Kuh wo fin nga tari muhta na tuhlac? E fuhkah oruh luhn God fin nga srihke nga in fohlohk?”
Puhpuhlyuck se inge use top nuh sesr.
Pahpah Inkuhsrao El ac kahsruhsr nuh yohrohsr, Insiacl ac sesseslah ke luhngse ac pahkomuhta. Elac kafiskuhti; fihliyac nuknuk se nuh fin pihsacsr, ring se ne ke kihfihn pahosr, ac sori se nuh ke niyacsr; ac fahkwelihk, “Misenge, kuht ahkfuhlwact! Tuh nuhtihk, suc sie pacl ah misac, ac el moulyak!”
Inkuhsrao ac engan ke fohlohk lasr uh.
Engan Ma Luhlahp ac Seseslah ke Wolacna
Nga kuh in eis pacl se ingena inge in sramsram nuh sin kais sie suwos?
Lah meac sikyak ke moul lowos, nga sifil fahk ac fahkwelihk kahs luhn kawuck sacohklacna luhk ac sie Mwet Sap ah Elder Jeffrey R. Holland: “Kowos tiac kuh in puhtatlac nuh ye kahlwem ma pahtpaht ke kahlwem luhn kihsen iwaclah luhn Kraist.”18
Kuhtuh pacl uh sulaclah uh ac uskomlac loesaclihk nuh sin Mwet Lahngo ac Alu Lal, Mwet in Onwelah Sahflah El tu inkacnek ma pen nuh lohm ah, paing kom. Ac kuht suc mempucr ke Alu luhn Jisus Kraist suk in ukwe srihkasrak Lal ac kafihskowi in tamuhlwel ac tahmtahel wiyacsr, ekihn kawuck lasr. Kuht engan ac ahkfuhlwact wi kom.
Fohlohk lom an ac tiac ahksuhpuhsyelah mwet insewowo luhn mwet sahyac. Tuh mwe kahsruhp lal Pahpah wacngihn sahflahiyac, ac ma se suc ituckyang nuh sin sie tiac na ahkwacngihnyelah sukohsohk luhn mwet sahyac.19
Te kalmac pa in fohlohk el ma na fihsrwacsr se in oruh. Nga kuh in fahkwack ma se ingacn. Ac kuh in, fin pwacye, sulaclah se na ma upac emeet kowos in oraclah.
Tuhsruhk nga fahkwack loh luhk lah ke pacl se kom otwelah in fohlohk ac fahsr ke inkacnek luhn Mwet Lahngo ac Mwet in Molwelah lasr, kuh Lal ac ilyak nuh in moul lom ac eklac kom.20
Lipufacn inkuhsrao ac engan.
Ac kuht pac, sucu lom in Kraist. Tukun ma ingacn, kuht etuh lah fuhkah atacn suhnuhnte. Kuht nuh kwewa fungyang nuh ke iwaclah ac kuh se fanna kacl Kraist. Kuht etuh inkacnek se inge, ac kuht ac fahsr kac wi kom.
Moh, inkacnek lasr uh ac tiac sukohsohklah liki ahsor, suhpwacr, ac tuhng. Tuh kuht loesuhlah nuh inse “sahyacn na ke kahs luhn Kraist ke luhlahlfongi kuh in El, fungyang nohfohn nuh ke ohiyac wo Lal suc kuh in molwelah.” Ac kuht ac tuhkweni “ahkwot nuh met ke luhlahlfongi kuh in Kraist, in oasr kahlwem suwohs luhn finsrak, ac luhngse God ac [mwet] nuhkwewa.”21 Kuht ac fah, tuhkweni “engan ma luhlahp ac sesseslah ke ma wolana,”22 mweyen Jisus Kraist pa kuh lasr uh!23
Pruhe luhk tuh kais sie sesr in lohng, ke puhpuhlyuck yohk srihpac se inge, puhsren Pahpah pahngon kuht in utyak nuh ke inkacnek soko ma som nuh lohm ah—tuh in oasr puhlaik sesr in auliyak, eis nuhnak muhnahs, ac ukwe inek soko ma fohlohkihnkuhtlac nuh yurin God pahkotwen ac luhng kuhlwacng. Ke ma inge nga fahkwack ac fihliyac yuruwos mwe insewowo luhk ke inen Jisus Kraist, amen.