Kampacniacn Lasr Pacl Nuhkwewa
Oasr inkacnek luhk ac kom in eis Nguhn Muhtahl elan wi kuht pacl nuhkwewa.
Tamuhlwel ac tahmtahel sacohk wiyuck, ke toeni se inge kuht ahkinsewowoyeyuck ke kahklah luhn fwackyuck. Mwet kuhlwacnsap luhn Leum Jisus Kraist elos sramsram ac elos fah sramsram ke kahs pwacye, in ahkkweye, ac in kol.
Nguhnihk pihrihkyuckyak ke srihpen luhlahlfongi fwackyuck ke toeni se inge lah Leum el sramsram nuh sesr kais sie yurin Nguhn Muhtahl. Ke kuht pruhe ac lohacng nuh ke pihrihkyuck luhn Nguhn Muhtahl, kuht eis kahlwem ac insewowo yohk in kol kuht lwen nuhkwewa.
Prestuhn Russell M. Nelson el luti, “Ke lwen fahsruh uh, ac fah tiacna kuh in painmoul ke nguhn fin wacngihn pwenyuck, kolyuck, ahkwoye, ac pihrihkyuck pacl nuhkwewa luhn Nguhn Muhtahl.”1
Mwe sensen inge use nuh sihk ngan motko lah meac nga e fah sang luti tuhlihk nuhtihk, nuhtin nuhtihk, ac nuhtin nuhtin nuhtihk ke mwe kolyuck yohk srihpac ke pacl upac lalos meet oh.
Oruh pweng luhk misenge uh el lacta fototo se nuh sin tuhlihk nuhtihk ma kuh in kahsrelos ke ngac wacngihnlac luhkelos ke pacl lalos meet oh. Nga ke elos in etuh lah ma nga etaclah inge kuh in kahsrelos.
Nga kahlwemwack kac lah meac elos enenuh in oruh in eis pihrihkyuck pacl nuh kwewa yurin Nguhn Muhtahl ke lusen moul lalos uh. Ac nga mokleyuck in sramsram misenge ke ma nga sifacna puhlakihn in suli Nguhn Muhtahl, in fototo [nuh yuruk], in wiyuc pacl nuh kwewa. Pruhe luhk uh pa nga kuh in ahkweye kowos in oruh oacna.
Nga muhtacwacack in motko ac pruhe ke wen nahtuhl Helman, Nephi ac Lehi, ac mwet kuhlwacnsap sahyac luhn Leum ma weluhlos orekma. Lainyuck elos na upac. Elos kuhlwacnsap ke sie acn koluk ac tuh elyah ke kikiacp koluk. Nga eis puhlaik, ac kom pac, ke fuhs se tuhkuh ke ma sihmlac kacl Helaman:
“Ac ke yac ahkitngucul ac yuc muhtwacwacack in oasr akuhkuhin yohk. Tuhsruhk tukun ma inge Nephi ac Lehi, ac puhs sin mwet wiyaclos suc etuh ke ip yohk pwacye luhn mwe luti, elos eis fwackyuck pucspucs ke lwen nuhkwewa, ke ma inge elos tuh luti nuh sin mwet uh, yohkna oruh elos tuh tulokihnyac akuhkuhin lalos ke yac sac pac na.”2
Sramsram se inge ahkkweyeyuc, ac kuh in ahkkweye kom pac. Wen nahtuhl Helaman elos tuh lutiyuck ac kolyuck ke kuhtuh ma elos puhlakihn yurin Nguhn Muhtahl. Ma se inge ahkkweye lah kuht kuh in lutiyuck kac ac lotwelah sin Nguhn lain nuh ke lain, eis ma kuht enenuh, ac pacl se kuht ahkolah an, kuht ac fah eis kuhtuh pac.
Nga ahkkweyeyuck ke ohiyac sepacna inge ke sramsram fototo se kacl Nephi ke siyuckyuck sel in fohlohk nuh Jerusalem in eis plwet lal Laban. Kom esam sulwaclah se el oraclah ah. El oraclah sulaclah se: “Nga ac fah som ac oruh ma suc Leum El sapkihn.”3
Ma Nephi el puhlakihn ke Nguhn Muhtahl ke sapsap se ingacn acse nuh sihk puhlaik ke pacl puhs ke nga muhtwacwacack in oruh orekma ma nga etuh muh kunohkohn sin Leum me tuhsruhk oacna in muh arulacna srihklac etuh luhk ac nga liye muh nga suhfallac nuh kac.
Kom esam ma Nephi el fahk ke ma el puhlakihn: “Ac ke fongweni; na nga oruh tuh [tamuhlwel wiyuck] in wihklac lihkihn pot uh. Ac tukun elos tuh sifacna wihklac, nga, Nephi, orahkyang nuh in siti uh ac som nuh ke lohm sel Laban.”
El tahfwelah in fahk: “Ac nga tuh kolyuck sin Nguhn, tiac etuh met ma ma nga enenuh in oruh.”4
Nga ahkkweyeyuck in etuh lah Nephi el kolyuck sin Nguhn mihnit nuh ke mihnit ke fong sac ke sapsap luhn Leum.
Kuht enenuh, ac kom e enenuh, oasr luhn Nguhn Muhtahl pacl nuhkwewa. Kuht kena kac, tuhsruhk kuht etuh ke mukwikwi uh lah ma se inge tiac fihsrwacsr in oreklac. Kais sie sesr nuhnkuh, fahk, ac oruh ma ke moul lasr ma kuh na in ahktoasrye Nguhn.
Ke ma ingacn sikyak, ac fah sikyak, kuht kuh in puhlakihn tiac insese luhn Leum. Ac sahp kuht kuh in in srihfeyuck in puhlakihn muh kuht muhkwena. Yohk srihpac in esam olwelah fokoko ma kuht eis ke kais sie wik ke kuht auliyak ac ipeis kuhfa luhn Leum, lah Nguhn in weluhlos pacl nuh kwewa.5
Fin kom puhla mokleyuck luhn Nguhn Muhtahl mihsenge, kom kuh in eis muh mwe ahkpwacye muh Iwaclah uh orekma ke moul lom an.
Oacna ke Elder Jeffrey R. Holland el fahk: “Ke pacl ma ma upac lasr inge tuhkuh, kuht enenuh in tiac fuhlweack ac sahngweng lah God El siskuhtlac kuh El tiacna porongo pruhe lasr uh. Pwacye, El poronge kuht. Pwacye, El liye kuht. Pwacye, El luhngse kuht”6
Mwe ahkkweye se ingacn kahsreyuc. Ke nga puhla muh nga loeslac liki Leum, ke top nuh ke pruhe luhk uh kohtlah, nga lotwelah in ukwe kahs in kahsruh lal Prestuhn Nelson in sifilpac lohacng nuh ke moul luhk nuh ke pacl wowo in auliyak. El ahkacsmakihnye kuht, “Auliyak lwen nuh kwewa pa inkacnek nuh ke moul nwacsnwacs, ac nwacsnwacs uh use kuh fokoko.”7
Kom fin liye muh upac nuh sum in puhla Nguhn Muhtahl, sahp kom motko fin oasr ma kom enenuh in auliyak kac ac eis nuhnak muhnahs.8 Kom kuh in pruhe ke luhlahlfongi in etuh lah meac kom enenuh in oruh in ahknwacsnwacsyeyucklac ac ohinge fal wo tuh Nguhn Muhtahl in wi kom pacl nuh kwewa.
Kom fin kena tuh Nguhn Muhtahl in wi kom pacl nuh kwewa, kom enenuh in luhngse ma inge ke srihpac suwohs. Srihpac lom an enenuh in pa srihpac luhn Leum. Fin srihpac lom an tuhkuh ke srohwohsr, kom ac liye lah upac in eis pihrihkyuck luhn Nguhn.
Ki nuh sihk ac nuh sum pa in luhngse ma suc Mwet Lahngo El luhngse. Srihpac lasr uh enenuh in mokleyuck ke luhngse pwacye luhn Kraist. Pruhe lasr uh enenuh in “Nohfohn ma nga luhngse uh pa ma Kom luhngse uh. Luhngse Lom in orek.”
Nga srihke in esam kihsac luhn Mwet Lahngo ac luhngse Lal nuh sihk. Na, ke nga pruhe nuh sin Pahpah Lucng in sang kuloh, nga puhlakihn luhngse ac ahkkweyeyuck lah pruhe luhk uh lohngyuck ac lah nga ac mwet nga luhngse uh fah eis ma wo kac. Ma inge ahkfokokoye luhlahlfongi kuh luhk uh.
Ke ma nuh kwewa ma Nguhn Muhtahl fahkwack kac, ma sacohk se emet nuh sesr uh pa Jisus pa Kraist, Wen moul nuhtin God. Mwet Lahngo El olwelah: “Ngun Mutal el ac tuku, … suc tuku sin Papa me. Nga ac fah supwalot nu yuruwos sin Papa, ac el ac fah orek loh keik.”9
Yac ekahsr somlah ah, nga eis pahng se sin sie ninac na fosrngah. El fahk nuh sihk lah tuhlihk muhtwacn se nahtuhl mukwilac som loeslac liki lohm ah. Arulacna srihklac pacl el sramsram nuh sin tuhlihk muhtwacn se nahtuhl ah oruh el puhlakihn muh oasr ma koluk upac sikyak. El kwacfe sihk nga in kahsruh.
Nga sokwack lah suc mwet luti luhn sucu luhn tuhlihk muhtwacn se nahtuhl ah. Kom kuh in fahk ke ine se ingacn lah ma na e ngi me. Nga pahnglolwack. El fuhsr. Tuhsruhk el fahk nuh sihk lah el ac kampacniacn se lal ah kwewana muhtwaclihk ke fong ah ac tiac fosrngah muhkwena ke tuhlihk muhtwacn se nuhtin ninac sac tuhsruhk elos pihrihkyuck pac lah el kuhracnna oruh sulaclah ma ac use suhpwacr ac kweok. Ke na srihpacn pihrihkyuck se luhn Nguhn ingacn, elos som liyacl.
Met na, el tiac ke fahk nuh selos ke ohiyacn moul lal. Elos kwacfe nuh sel in auliyak ac sulaclah inkacnek ma Leum El akiyac nuh sel. Na el akihlen, nga luhlahlfongi ke Nguhn, lah inkacnek sefanna ma elos etwacack ke ma elos etuh ke moul lal ah tuhkuh sin God me. Ninac se furohklah elyah lal nuh sin Pahpah Lucng ac Mwet Lahngo. Nguhn Muhtahl suhpweyucklac nuh yurin mwet luti luhn sucu an ke srihpen elos luhngse kuhlwacnsapuh Leum. Elos ukwe na mwe luti ac olweacng ma sukokyak ke Doctrine and Covenants.
Lwelah insiowos in sesseslah pac ke luhngse muhtahl nuh sin mwet nuh kwewa, ac nuh sin mwet luhlahlfongi, ac lwelah ma wo in nahwelah nuhnak lom an pacl nuh kwewa; na kom fah fokokoi ye muhtuhn God; ac mwe luti luhn pristut ac fah kahklah nuh fin nguhnum oacna aunfong inkuhsrao me.
Nguhn Muhtahl ac fah wi kom pacl nuh kwewa, ac scepter lom uh pa sie scepter ma tiac ekyek luhn ma suwohswohs ac pwacye; ac acn kom leumi fah sie acn kom leumi ne tok ma pahtpaht, ac ke wacngihn ohiyac in fohrsi mwet uh, ac fah kahklah nuh fom ne tok ma pahtpaht.10
Nga fahkwack lah Leum El karuhnguhnwacng na olwelah Lal. Nguhn Muhtahl uh suhpweyuckme nuh yurun mempucr oaru luhn wuhlweacng ke Alu luhn Jisus Kraist. Mukwikwi lom an ac fah siena, ac Nguhn ac fah kol kom ke inkacnek se ma wo emet nuh ke luhlahlfongi lom ac kuhiyom in eis fwackyuck nuh sum ac nuh selos suc kom luhngse ac kuhlwacnsapuh. Nga pruhe ke insiyuck nohfohn tuh nuhnak pwacye lom an fah kapwack.
Nga fahkwack ke mwe lohoh luhk lah Mwet Lahngo El moul. El luhngse kom. El lohng kwewa pruhe lom uh. Jisus Kraist El tuh pruhe nuh sin Pahpah in suhpwaclah Nguhn Muhtahl in kol, ahkwoye, ac fahkwack ke ma pwacye nuh sesr. Pahpah ac Wen Kuloh Sefanna Nahtuhl elos sikme nuh sel Joseph Smith ke insack se. Mwet Pahluh Joseph Smith el luhngaslah Puk luhn Mormon ke mwe sang ac kuh luhn God.
Mwet utuck pweng inkuhsrao me elos fohlohkohnwack ki luhn pristut. Prestuhn Russell M. Nelson el pa mwet pahluh luhn God fin facluh nohfohn.
Oa mwet lohoh ke Jisus Kraist, nga etuh lah El moul ac kol Alu Lal. Nga ac kom eis pacl wo in eis Nguhn Muhtahl in wi kuht pacl nuh kwewa ac in ahkpwacyeiye ma pwacye ingacn ke kuht esam ac luhngse Mwet Lahngo, auliyak, ac siyuck tuh luhngse Lal in oasr ke insiacsr. Nga pruhe tuh in oasr yohrohsr mwe insewowo ac Nguhn Muhtahl in wi kuht na misenge ac lwen nuhkewa ke moul lasr. Nga luhngse kom. Ke ine muhtahl luhn Jisus Kraist, amen.