Motko ke Celestial!

Sel Prestuhn Russell M. Nelson

Prestuhn luhn Alu luhn Jisus Kraist luhn Mwet Luhlahlfongi ke Lwen-sahflah

Sulaclah lowos misenge an e otwelah lah kowos e muhta oyac ne tok ma pahtpaht, mahno fuhkah se kowos e eis ke sifilpac moulyak, ac suc kowos e wi muhta ne tok uh.

Tamuhlwel ac tahmtahel sacohk wiyuck, nga kuloh lah nga kuh in sramsram nuh suwos misenge. Ke matwuck, kais sie lwen sasuc use ma wolacna puhs ac ahklutyeyuc. Wik tolu somlah ah, ngalyak muhsuhl ke fintukuk. Nga tuh tuyak sramsram puhs liki pacl 100 ke toeni luhlahp, misenge nga muh ngac muhta na sramsram. Nga pruhe tuh Nguhn e fah us pweng se luhk inge nuh insiowos misenge.

Pacl fototo somlah ah nga ahkfuhlwactye puhtte ahk 99 luhk ac muhtwacwacack yac ahk 100 ke moul luhk. Kwacna siyuckyuck sihk ma lukmac nuh ke moul paht. Kihsensiyuck se ma wo liki an pa “Meac nga lotwelah ke apkuhran in sun lusen yac 100 ke moul uh?”

Pacl uh misenge oruh nga tiac kuh in tohpohklah kwewa kihsensiyuck sacn, tuhsruhk lwelah nga in akacsruhi ke sie sin mwe luti yohk srihpac emet ma nga lotwelah.

Nga lotwelah lah plwacn luhn Pahpah Lucng nuh sesr uh oaskalacna, pa oruh ma kuht oruh ke moul se inge yohk srihpac, ac lah Iwaclah luhn Mwet Lahngo pa oruh plwacn luhn Pahpah tuhmwacsr uh kuh in oreklac.¹

Ke nga lain waek upac ke ngalyak [fintukuk] ah, nga puhlakihn tarilacna yohk nuh sin Jisus Kraist ac ke mwe sang na yohk ke Iwaclah Lal. Nuhnkuh kac! Mwet Lahngo El “kweok ke kain in waek ac ongaiyac ac mwe sruhf nuhkwewa”² tuh Elan kuh in ahkwoye kuht, unwekuhtlac, ac molikuhtlac—ke pacl [kuht] enenuh kahsruh.³ Jisus Kraist El ahkuhtweyac ma El puhlakihn Gethsemane ac fin Calvary: lah ma kweok sac oruh El sifacna, finne God, suc kuhlacna liki nuhkwewa, in rarrar ke srihpen kweok, ac srah kahklah ke pat nuhkwewa.⁴ Ngalyak se luhk inge oruh nga in sifilpac na motko na motko ke “wolacna luhn El suc Muhtahl luhn Israel.”⁵ Ke ono luhk ah, Leum El ahkkahlwemye kuh wolacna Lal ke ohiyac mislac ac pwacye.

Ke srihpen Iwaclah ma pahtpaht luhn Jisus Kraist, plwacn luhn Pahpah tuhmwacsr Inkuhsrao uh pa sie plwacn suwohswohs! Etatwen ke plwacn wolacna luhn God eislah ma lukmac liki moul uh ac ma tiac etweyuck uh liki pacl fahsruh uh. Ma inge lwelah kais sie sesr in sulaclah lah kuht ac moul fuhkah inge fin facluh ac kuht ac muhta yac ne tok ma pahtpaht. Luhlahlfongi kikiacp se lah kuht in “mongo, nihm, ac engan, tuh litu kuht misac; ac e fah wo nuh sesr”⁶ pa sie kikiacp koluk emet fin facluh.

Pa inge pweng wowo ke plwacn luhn God: ma suc fah oruh moul suhkawihl lom an in wo emet ma kuh in oacna ma suc fah oruh moul lom ke moul ma pahtpaht in wo emet uh! Misenge, in kahsre kowos in wo fal in eis mwe insewowo na wo luhn Pahpah Lucng nuh suwos, nga suli kowos in muhtwacwacack srihke in “motko ke celestial!”⁷ Kalmacn motko ke celestial pa in motko ke ma luhn nguhn. Kuht lotwelah sel mwet pahluh Jacob ke Puk luhn Mormon lah “in nuhnkuh ke ma luhn nguhn pa moul ma pahtpaht.”⁸

Moul suhkawihl uh pa sie kuhlahs fuhlwact in sulaclah ke ma yohk srihpac ne tok ma pahtpaht. Puhslac mwet moul nuhnkuh muh moul se inge muhkwena pa oasr uh. Tuhsruhktuh, sulaclah lowos misenge an e use ma tolu, lah kowos e muhta oyac ne tok ma pahtpaht, mahno fuhkah se kowos e eis ke sifilpac moulyak, ac suc kowos e wi muhta ne tok uh. Na motko ke celestial.

Ke pweng se emet luhk ke nga Prestuhnlac luhn Alu uh, nga kwacfe kowos in muhtwacwacack nuhnkuh finsrak lasr uh. Kalmac pa siiac na tohkohsrahi celestial in pa finsrak sahflah lasr ac nuhnkaclah ahkwoyac lah kais sie sulaclah lasr facluh inge e fihlikuhti oyac ke facl se tok uh.⁹

Leum el ahkkahlwemye kahlwem lah mukul ac muhtwacn ma siliyucki ekihn tuhma ac kiyac lin tempuhl ac suc karihngihn wuhlweacng lalos, elos fah tuhkweni ne tok ma pahtpaht. El fahk lah wuhlweacng, inseselac, tuhkweni, kunohkohn, fuhlahk, orekma, aetuhilac, sie sin sie, kuh finsrak nuhkwewa ma tiac oreklac ac ilyak ac sil ke Nguhn Muhtahl in olwelah … oasr sahflahiyac fin mukul sacn misac.¹⁰

Ohinge, fin kuht tiac na lahlmwetmwet in sulaclah in moulkihn masap ke telestial ingena, kuht sulaclah in sifwil moulyak ke mahno telestial se. Kuht sulaclah in tiac muhta wi sucu lasr ne tok ma pahtpaht.

Na, tamuhlwel ac tahmtahel sacohk wiyuck, fuhkah ac oyac ac suc kowos luhngse in wi muhta ne tok uh? Utuckot kowos in sulaclah.¹¹

Ke kowos oraclah sulaclah lowos an, nga suli kowos in ngwetlah liye—atac se ne tok an. Fihlilyac Jisus Kraist meet, ke srihpen moul ma pahtpaht lowos an oreklac fal nuh ke luhlahlfongi lowos Kacl ac ke Iwaclah Lal.¹² Oacyacpac oreklac fal nuh ke ahkostwen nuh ke masap Lal. Ahkostwen ahkfwelyelah inkacnek nuh ke moul engan nuh suwos misenge ac opi luhlahp litu ne tok ma pahtpaht.

Ke kowos fohsack, motko ke celestial! Ke kowos srihfeyuck, motko ke celestial! Ke moul se kuh mwet kowos luhngse an ahksuhpwacryekowoslac, motko ke celstial! Ke sie mwet fuhsr na misac, motko ke celestial. Ke sie mwet puhlakihn mas na upac, motko ke celestial! Ke toasr luhn moul raunikowoslac,motko ke celestial! Ke kowos kwelac liki acksitacn kuh mas se, oacna ke nga oruh ingena inge, motko ke celestial!

Ke kowos siiac na celestial uh, ahkolah in sun pac ma upac.¹³ Yac ekahsr somlah ah, mwet pihsrlac se ahkolukyeyuc fahk muh “puhslaclac tempuhl” in ikok, ac puhs liki mwet lutiyuc koaseyuc ke srihpen luhlahlfongi luhk. Tuhsruhk nga tu na kuh, in etuh ac motko ke celestial in ahkyohkye orekma luhk.

Ke kowos motko ke celestial, insiowos e kais kuhtuh na eklac. E yohkwelihk ac fususeni pacl kowos luhngse pruhe. Nuhnak muhnahs nimet lwelah pruhe lowos an in oacna pwepuh in som moul se. Kena luhn Leum uh pa in lohng lahlmwetmwet lom an. Top Lal nuh ke pruhe lowos an sahp e ahklutyekom ac e kahsre kowos in motko ke celestial.

Nuhnkuh ke top luhn Leum nuh sel Joseph Smith ke el siyuckyuck kahsruh ke Nien Kaclpous Liberty. Leum El olwelah nuh sin Mwet Pahluh lah onweyacn kanon mahnol e sang etwaclah lal ac ma e wo nuh sel.¹⁴ Leum El olwelah lah e fin el kampare kuhtanglah, God elac fah sraklalwack nuh inkuhsrao.¹⁵ Leum el lotwel Joseph elan motko ke celestial ac in petsacelah opi ma pahtpaht se liki na in elyah ke ma upac ke lwen sacn. Pruhe lasr uh kuh—ac enenuh in—sramsram alken se nuh sin Pahpah Inkuhsrao.

Ke kowos motko ke celestial, kowos e konekowosyak in pihlesruh ma nuhkwewa ma pihsre sulwaclah lowos an. Ma nuhkwewa ma kom pahlah kac—pa nuh ke sritacl se, sritacl mani, soemoul, ono fokoko, mwe nihm fokoko, ahngyang, petsac fohkfohk, sritacl koluk, kuh fine mongo—lain God. Efuh? Ke srihpen ma kom eis ingacn eklac god lowos. Kowos nget nuh kac it liki na in nget nuh Sel in puhla wo. Fin kowos elyah ke ma se kowos pahlah kac, suk kahsruh ke nguhn ac etwacack kowos enenuh an. Nuhnak muhnahs nikmet lwelah ma kowos eis ingacn in pihsraclah sulaclah lowos in ukwe plwacn oaskalacna luhn God.

Motko ke celestial e kahsre kowos in ahkos masap ke tiac kosro. Ma ekahsr e sa na nwacklah mol lowos an liki na in kuhnahoslah masap muhtahl se inge. Nuh suwos suc oraclah olwelah la nu sin God, moul fohkfohk pa sie inkacnek ma sa in tohllah luhlahlfongi pwacye lom.

Inkaiyen ma upac sikyak uh tuhkuh ke mwe sruhf uh kuhnaoslah nwacsnwacsiyen mahno se. Kuh se ma sang oraclah moul uh pa suwohs se ke ma Pahpah Inkuhsrao El lwelah tuhlihk Nahtuhl facluh in orekmakihn. Ohinge, God El akiyac in kahlwem mwe kolyuck in orekmakihnyuck nuh ke kuh muhtahl se inge. Apuhsral mahno ma nuh sin mukul ac muhtwacn ma macruhtlac nuh sin sie sin sie muhkwena.

Puhs mwet facluh tiac luhlahlfongi ma se inge, tuhsruhk nuhnak luhn mwet uh tiac pa e fahk lah piac ma pwacye uh. Leum El fahkwack lah wacngihn mwet fohkfohk e fah usrui tohkohsrahi celestial. Pwacnwacng, ke kowos oruh sulaclah lowos ke apuhsrali uh, nuhnakmuhnahs motko ke celestial. Ac kowos fin tiac nwacsnwacs, nga ngihsre suwos in auliyak. Fahsruh nuh yurin Kraist ac eis fohnlahiyen olwelah Lal ke nuhnak muhnahs ke kowos auliyak na pwacye ke ma koluk lowos.¹⁶

Ke kowos motko ke celestial, kowos e sun elyah ac ma upac ke kahlwem sasuc se. Ke sie mwet kowos luhngse akuhkuhin ke ma pwacye, motko ke celestial, ac nimet ahlohloh kihsensiyuck ke luhlahlfongi lasr. Mwet Sap Paul el palyei lah “in pacl tok ah kutu mwet uh ac sisla lulalfongi lalos, ac porongo ngun kikiap ac fahsr tukun mwe luti lun dimon u.”¹⁷

Wacngihn sahflahiyacn mwe sruhf upac inge. Nuhnakmuhnahs ahkolah. Tiac eis kahs in kahsruh selos suc tiac luhlahlfongi. Suk kahsruh yurin puhsra ma kowos kuh in luhlahlfongi—yurun mwet pahluh, mwet liyactwen, ac mwet eis fwackyuck ac ke mahmah luhn Nguhn Muhtahl, suc “ahkahlwemye nuh suwos ma nuhkwewa kowos enenuh in oruh.”¹⁸ Nuhnakmuhnahs oruh orekma luhn nguhn in ahkyohkye pacl lowos in eis fwackyuck nuh sum sifacna.¹⁹

Ke kowos motko ke celestial, luhlahlfongi lowos e yohkelihk. Ke nga fuhsr orekma, moluk $15 ke mahlwem se. Sie fong ah, muhtwacn kiyuck Dantzel el siyuck lah nga moli sie tahfuh singucul ke mani srihsrihk se ingacn. Nga tiacna. Nga silahklahk auliyak ac muhtwacwacack moli sie tahfuh singucul luhk ke $1.50 ke mahlwem nuhkwewa.

Kuh Alu uh sielacna ke yohkwelihk moliyacn sie tahfuh singucul lasr uh? Tiacna. Tuhsruhktuh, moli fohn sie tahfuh singucl pacl nuhkwewa ihkihlyuclac. Oruh nga etwaclah lah moli sie tahfuh singucul som yohk nuh ke luhlahlfongi, tiac mani. Ke nga moli fohn sie tahfuh singucul, winto inkuhsrao muhtwacwacack ikacklah nuh sihk. Nga tahfwelah sang mwe luti wowo nuh ke moliyen sie tahfuh singucul lasr uh.²⁰

Moli sie tahfuh singucul enenuh luhlahlfongi, ac el oacyacpac muhsahi luhlahlfongi kacn God ac Wen Kuloh Nahtuhl.

Sulaclah in moul nwacsnwacs ke facl koluk, okahrkahr se inge muhsahi luhlahlfongi.

Sislah pacl yohk in tempuhl muhsahi luhlahlfongi. Ac kuhlwacnsap ac ahkfuhlwact lowos lin tempuhl e kahsre kowos in motko ke celestial. Tempuhl el acn in eis fwackyuck. Ingoh kowos kuh in liye lah kowos e kapkapwack fuhkah nuh ke moul celestial. Ingoh kowos puhla fototoeni nuh sin Mwet Lahngo ac yohk ma kowos eis nuh ke kuh Lal. Ingoh kolyuck kowos in sokwack top nuh ke elyah lowos, fine elyah upac lowos.

Akwuck ac wuhlweacng lin tempuhl uh elos ma yohk srihpac ne tok. Kuht sikalweni in muhsahi in puhs tempuhl in oraclah inkacnek muhtahl inge in ma pwacye nuh ke kais sie moul lowos. Kuht kulohkihn in sulkackihn plwacn in muhsah tempuhl lasr nuh ke kais sie acn tahklac inge.

• Savai’i, Samoa

• Cancún, Mexico

• Piura, Peru

• Huancayo, Peru

• Viña del Mar, Chile

• Goiânia, Brazil

• João Pessoa, Brazil

• Calabar, Nigeria

• Cape Coast, Ghana

• Luanda, Angola

• Mbuji-Mayi, Democratic Republic of the Congo

• Laoag, Philippines

• Osaka, Japan

• Kahului, Maui, Hawaii

• Fairbanks, Alaska

• Vancouver, Washington

• Colorado Springs, Colorado

• Tulsa, Oklahoma

• Roanoke, Virginia

• Ulaanbaatar, Mongolia

Leum El kol kuht in muhsahi tempuhl inge in kahsre kuht motko ke celestial. God El moul. Jisus pa Kraist. Alu Lal fohlohkyak in ahkinsewowoye tuhlihk nuhkwewa nuhtin God. Nga fahkwack ma inge ke ine muhtahl luhn Jisus Kraist, amen.

Mwe Kahsruh

1. Liye John 6:38.

2. Alma 7:11.

3. Liye Alma 7:12.

4. Doctrine and Covenants 19:18.

5. 2 Nephi 9:40.

6. 2 Nephi 28:7.

7. Sahp e fihsrwacsr in sikyak pwacye in auliyak ac kapwack in nguhn inge, ke nguhnasr fohlohkyang nuh ke mahnosr, liki na facl se tok uh inmahsrlon pacl se kuht misac uh ac sifil moulyak. Oacna ke Amulek el luti mwet amacin luhn mwet Zoram, “Moul se inge … in ahkolah in ohsun nuh sin God” (liye Alma 34:32–35).

8. 2 Nephi 9:39.

9. Liye Mosiah 4:30 ke Tohkohsrah Benjamin el ahkkweye mwet lal: “Fin kowos tiac karihngihn kowos sifacna, ac nuhnak lowos, ac kahs lowos, ac orekma lowos, ac liyacacng masap luhn God, ac tahfwelah in luhlahlfongi … , kowos fah misac.”

10. Doctrine and Covenants 132:7; ahkuhtweyac wo ituckyang.

11. Pwacye lah, sulaclah lowos tiac kuh in welah sulaclah luhn mwet se sahyac ac sang mwacta luhn mwet sacn. Nga elyahlah in siliyucki nuh sin pahpah tuhmuhk ac ninac kiyuck. Tuhsruhktuh, nga enenuh in sano nekena elos sulaclah in eis mwe sang ke elos ahluhkwelah matwac yac 80. Na elos siliyucki ekihn mukul tuhma ac muhtwacn kiac, ac kuht tuhlihk [nahtuhlos] tuh siliyucki nuh selos.

12. Ma suhmuhslah kalweni na in fahkwack lah mwe sang ke moul ma pahtpaht kuh in oasr muhkwena fin oasr ma wo, pahkotwen, ac luhng kuhlwacng luhn Mwet Lahngo Jisus Kraist (liye, sie srihkasrak an pa, Moroni 7:41 liye pac 2 Nephi 2:6–8, 27.

13. Liye 2 Nephi 2:11.

14. Liye Doctrine and Covenants 122:7.

15. Doctrine and Covenants 121:8.

16. Liye Isaiah 1:16–18; Doctrine and Covenants 58:42–43.

17. Sie Timothy 4:1. Fuhs se tok ah tahfwelah, “Mwet suc kinauk kas kikiap; akilenyuk elos oana soko osra fol sang akilenelosi” (fuhs 2). Paul el oacyacpac fahkwack lah elos suc “moulkin moul mutal yurin Christ Jesus, elos fah kalyeiyuk” (Luo Timothy 3:12).

18. 2 Nephi 32:5; ahkuhtweyac wo ituckyang. E fin kuht siyuck, kuht kuh in eis fwacyuck ye fwackyuck, etwacack ye etwacack (Doctrine and Covenants 42:61).

19. Liye Russell M. Nelson, “Fwackyuck nuhke Alu, Fwackyuck nuhke Moul Lasr,” Liahona, Mei 2018, 96.

20. Tiac ma kuht e kapsra kuhpahsr in ma cause-and-effect se. Kuhtuh tena moli sie tahfuh singucul elos eis inkacnek na wowo, uh elos suc moli sie tahfuh singucul tiacna. Olwelah sac pa winto inkuhsrao e fah ikacklah nuh selos suc moli sie tahfuh singucul. Puhs acn ma mwe insewowo inge e tuhkuh kac.