14:10

Kolyuck luhn Nguhn

Sel Elder Gary E. Stevenson

Ke U luhn Mwet Sap Singucul Luo

Nguhn Muhtahl in wi kuht pacl nuh kwewa pa sie sin mwe sang yohk emet ma Mwet Luhlahlfongi ke Lwen-sahflah engankihn.

Ikucslah

Pacl fototo tari ah, mwet luhngse sritacl soccer wi FIFA World Cup luhn Muhtwacn 2023 sikyak fin acn Australia ac New Zealand. Mwet sritacl suhmaht suc ahol muhtuhn facl 200 fin facluh nohfohn ahkkahlwemye insacnweacng, oaru, talan, ac fokokoiyacn sritacl lalos ke elos srihke in eis opi luhlahp ke soccer fin facluh.

Kuht lut ke puhs mwet suhmaht ke sritacl ac ke orekma sahyac suc sun suhmahtiyac emet ke orekma lalos. Kuht sramsram ke talan kuh mwe sang ma tuhkuh sin God. Ma inge weacng elos suc suhmaht ke tacn, oruh gymnastics, on, sroal, drama, math, science, ac puhs pac. Kais sie mwet inge ahkkahlwemye mwe sang ma tuhkuh sin God ma ahksuwohsye ac ahkwoye moul in orekma, lutlut, ac ahkpah. Mwe sang sin God oraclah mwet suc oasr mwe sang la.

Orekmakihn Mwe Sang luhn Nguhn

Ke ohiyacn wosasuc uh, God El sang nuh sin tuhlihk Nahtuhl mwe sang puhkantwen, oruh elos mwet ma oasr mwe sang in nguhn la. Mempucr ke Alu uh suc karihngihn olwelah lalos ituckyang mwe sang luhn Nguhn, suc pa mwe sang ke luhlahlfongi ke Jisus Kraist in pa Mwet Lahngo lasr, mwe sang luhn Nguhn Muhtahl, mwe sang luhn luhlahlfongi in ahkweye ac ahkkweyeyuck, mwe sang in etuh liki ma wo ac koluk, mwe sang in eis ma usrnguck, ac mwe sang luhn lahlmwetmwet ac etwacack.¹ Leum El suli kuht in suk pwacye mwe sang wo emet, finne mwe sang luhn nguhn. El use mwe sang luhn nguhn in ahkinsewowoye kuht ac orekmakihn in ahkinsewowoye mwet sahyac.²

In sulpac sruhmuhn ke mwet sritacl suhmaht, yohk srihpac in esam tuh mwe sang muhkwena tiac oraclah mwet suhmaht se. Finne mwet se isuslac ke talan, orekma ac ahsrosr paht mwet sritacl suhmaht ahksuwohsye ac ahkwoye ma elos oruh in sun finsrak fuhlwact emet lalos. Finne mwe sang ingacn ituck ac sona ikacklah kwacna wiyuck ke kahs inge “kom enenuh in sifacna oraclah.”

Ohinge, nga akihlwen lah in etaclah ma se oacpacna nuh ke mwe sang luhn nguhn. Orekmakihnyacn mwe sang luhn nguhn enenuh tuh mwet se in ahkpah in nguhn kac. “In eis kolyuck luhn Nguhn Muhtahl in moul lom enenweyuck orekma luhn nguhn. Orekma inge pa pruhe pwacye ac luti na luti ma suhmuhslah. Weacng pac ahkostwen ke olwelah lowos ac masap luhn God. … Ma inge weacng ipeis sackramacn ke inse nwacsnwacs wik nuh kwewa.”³

Kuh meac fahko luhn orekmakihnyacn mwe sang luhn nguhn? Ma inge pa kolyuck sin Nguhn ma kahsruh kuht sun ma enenuh lwen nuh kwewa ac ahkkahlwemye nuh sesr ma kuht in oruh ac fahk—mwe insewowo luhn mihslac ac ahkkweyeyuck. Ke kuht lohng ac orekma ke kolyuck in nguhn, Nguhn Muhtahl El ahkyohkye kuhiyacsr ac ohiyacsr in ahluhkwelah ma kuht kuh in oruh sifacna. Mwe sang in Nguhn sacohk inge ac kahsruh kuht ke ma nuh kwewa ke moul lasr.⁴

Nguhn Muhtahl in wi kuht pacl nuh kwewa pa sie sin mwe sang yohk emet ma Mwet Luhlahlfongi ke Lwen-sahflah kuh in engankihn.

Fuhkah yohk srihpacn mwe sang se inge? Prestuhn Russell M. Nelson el topuk kihsen siyuck se inge ke el fahk tuh “ke lwen ma ac tuhkuh uh, ac fah tiacna kuh in painmoul ke nguhn fin wacngihn pwenyuck, kolyuck, ahkwoye, ac pihrihkyuck pacl nuh kwewa luhn Nguhn Muhtahl.”⁵

Fuhkah in Suli ac Akihlen Kolyuck luhn Nguhn

Ke lusen kuhlwacnsap luhk, nga konwacack tuh mwet nuh kwewa kena in etuh fuhkah in suli ac akihlen kolyuck sin Nguhn Muhtahl. Kolyuck sin Nguhn ma nuh sin kais sie mwet sifacna ac tuhkuh ke ohiyac puhs. Tuhsruhktuh, kuht, ahkinsewowoyeyuck in eis kahs sin mwet pahluh, meet ac misenge, in use nuh sesr kahs in kahsruh tuh kuht in eis fuhkah kolyuck sin Nguhn.

Lwelah ngan usot ip yohk ahkosr ma kuh in kahsre kowos in suli ac akihlen kolyuck sin Nguhn.

Tu ke Acn Muhtahl

Ma se met pa in tu ke acn muhtahl.⁶ Nga tuhfahna wi kihsaclah luhn Tempuhl Tokyo Japan. Top nuh ke suliyuck suhpweyucklac nuh ke media ac mwet luhlahp in wi liye ahluhkwelah ma plwacniyuck nuh kac. Mwet puhkantwen wi liye lohm tempuhl inge. Mwet suc wi ah moklweyuckyak upac insiaclos ke kahtoiyacn tempuhl, weacng pactuhn ac mwe akucl ma tuhkuh sin facsin yohk srihpac luhn Mwet Sacpacnis. Sie ma sacohk pa top suhnak ac ahkfuhlwact ma tuhkuh sin mwet suc wi ke elos etwacack ke akwuck nuh sin mwet misac ma ac orek ke kais sie infuckihl ah. Ma sacohk emet pa moklweyuck luhn Nguhn.

Sie sin ma inge ma sikyak yurin mwet luhlahp luhn kafucrmacn srwackna oasr in nuhnak luhk. Tukun pacl in mihs se lun infuhkihl luhn celestial, el mokleyuckyak loal ac mahmah fahk nuh sihk, “Finne eng nga momong ke infuhkihl se inge puhla sienalac.” Nga akihlen lah el srihke in ahkuhtweyac lah oasr luhn Nguhn Muhtahl, ma, pwacye, oasr ke acn muhtahl. Kom fin finsrakkihn in puhla Nguhn, som nuh ke acn se ma fihsrwacsr Nguhn in oasr we.

Tempuhl lasr ac lohm sesr pa acn muhtahl emet sin acn srweyucklac inge. Lun lohm inge fihsrwacsr in suli ac akihlen Nguhn. Acn muhtahl sahyac pa nuhke lohm alu, lohm in seminary ac institute, ac acn luhn sramsram mahtuh kuh etwaclah luhn Alu uh. Tu ke acn muhtahl.

Tu yurun Mwet Muhtahl

Ahkluo, tu yurun mwet muhtahl. Ngac ahkuhtweyac ip yohk ahkluo ke sie pac ma nga esam.

Nga ac tiac muhlkuhnlah pacl se nga wi alu ke arena acn in sritacl pwengpweng se. Inkaiyacn pacl uh, arena se inge nwacnwaclah ke mwet wohwohn suc kahluhkluhk luhn u lalos ac sahp ahkkasrkuhsrakye u soko sahyac ah. Tuh ke fong sacn, arlac siena ohiyacn acn se. Arena sacn nwacnwaclah sin mwet fuhsr tausin ekahsr suc fahsrweni in ahkfuhlwactye ac esam moul luhn Mwet Pahluh Joseph Smith. Ohiyac efahl, mihs; kuloh; ac pruhe lalos nwacklah arena sacn ke Nguhn Muhtahl. Nga kuh in liye ke luhmahlos. Pa orekma luhn mwe sang luhn Nguhn Muhtahl, ahkkweye luhlahlfongi lalos kacl Joseph Smith ac ke Fohlohkyak ke wosasuc.

Nguhn tiac kuh in kosrweyucklac in tiac wi un mwet muhtahl suc fahsrweni. Kom fin kena puhla Nguhn, weluhlos suc ma Nguhn fihsrwacsr in muhta yohroh. Mwet Lahngo El fahk ohinge: “Tuh yen nukewa ma oasr mwet luo ku tolu tukeni we inek, nga fah welulos pac.”⁷ Nuh sin mwet fuhsr an, nuhnkuh tuhkweni luhn un mwet muhtahl lowos, u ac kuhlahs, FSY ac seminary, mukwikwi luhn ward ac stake, ac choir luhn ward. Sulaclah in wi mwet ac som nuh acn ma suwohswohs oasr we. Konwacack kuh lom inmahsrlon mwet puhs lom. Konwacack kawuck wo. Ekihn kawuck wo nuh sin mwet sahyac. Kahsruh sie sin sie yen nuh kwewa kom oasr we. Tu yurun mwet muhtahl.

Fahkwack ke Ma Pwacye Muhtahl

Ahktolu, fahkwack ke ma pwacye muhtahl ke pacl nuh kwewa. Mwet Ahkmihs se el akacsruhi pacl nuh kwewa puhsra Lal ke kuht fahkwack ma pwacye ke puhsra lasr. Nguhn El fahkwack loh kac nuh sin mwet se sramsram ah ac nuh selos suc lohng ah oacna sie.

Nga esam sie pacl nga wi taxi soko mihnit 45 fin acn New York City. Tukun sramsram fototo se nuh sin driver sac ke wosasuc uh ke lusen pacl se el wucn yuc nuh lohm aksohk ah, nga molwelah taxi ah ac ahkolah in srolah liki. Na nga esamwack lah nga sona akacsruhi luhlahlfongi luhk. Tui kuhtesrihk, nga akacsruhi luhlahlfongi fototo, ma suli Nguhn, ma oruh kahklah sronin muhtahsr kwewa.

Ke kom suk ac eis pacl wo in akacsruhi luhlahlfongi lom nuh sin mwet sahyac, kom ac oraclah pacl wo in akihlen Nguhn sifacna.

Porongo Nguhn Muhtahl

Ip sahflah pa in lihksreni porongo Nguhn Muhtahl. El kuh in wi kuht pacl nuh kwewa tuhsruhk el sramsram ke puhsra mihs, fihsrwacsr. Mwet pahluh Elijah el konwacack tuh puhsrwen Leum tiac oasr yen eng upac, kusrusr, kuh ke e tuhsruhk oasr ke “pusra na srisrik ac fisrasr se.”⁸ Ma se inge “tiacna sie puhsren puhlahl” tuh “sie puhsra mihs ke ohi suwohs, oacna in mahmah se,” tuhsruhk kuh in “fakihsyac finne nuh ke nguhna uh.”⁹

Prestuhn Boyd K. Packer el fahk: “Nguhn uh tiac sramsram nuh sesr ke sasa kuh usruk kuht ke paho fokoko. Sahyacn na el mahmah. Sramsram nuh sesr arulacna mihs kuht fin tiac lohacng sahp kuht tiac kuh in puhla.”¹⁰ Nga etwaclah lah kuhtuh pacl puhsra Lal arlac mihs, kuh nga fin kahfofo, sie mwet nga luhnge e puhla luhk. Puhkantwen pacl kolyuck sin Nguhn Muhtahl tuhkuh nuh sihk sin muhtwacn kiyuck, Lesa. Pahpah ninac ac mwet kol suwohs kuh in eis kolyuck sum.

Wohwohn, okahrkahr, kuh fohs ma oasr fin facluh kuh in tanyac kolyuck mihs, fihsrwacsr luhn Nguhn Muhtahl. Konwacack acn mihs se, sie acn muhtahl ma kom kuh in suk kolyuck sin Nguhn.

Kuhtuh Kahs in Sensenkihn

Ke kom nuhnkuh ke ip yohk inge in suli ac akihlen Nguhn, nuhnkuh ke kahs in kahsruh sensenkihn inge.¹¹

Ahkpwacye kolyuck in nguhn lom. Nuh ke srihkasrak, kolyuck sin Nguhn ukwe ma suhmuhslah ac mwe luti luhn mwet pahluh moul.

Ahkpwacyeiye tuh ma kom puhla fahsr fal nuh ke kunohkohn lom. Fin tiac pahngonyuck kom sin wal pwacye, kolyuck sin Nguhn ac tiac tuhkuh nuh sum in luti kuh kaiyac mwet sahyac.

Ma luhn Nguhn tiac sikyak ke luhngse na lasr. Kom kuh in oraclah ohiyac ac acn ma ac suli Nguhn, ac ahkolah sifacna, tuh kom tiac kuh in sulaclah ohiyac kuh pacl ma kolyuck ac tuhkuh. Muhtweng ac luhlahlfongi ma kom ac eis ma kom enenuh ke pacl fal.

Orekmakihn nuhnuhnkuh wo lom. Kuhtuh pacl uh kuht luhngse in kolyuck sin Nguhn ke ma nuh kwewa. Tuhsruhk, Leum El ke kuht in orekmakihn lahlmwetmwet ma tuhkuh sin God lasr ac mukwikwi ke ohiyac ma fahsr fal nuh ke kahlwem lasr. Prestuhn Dallin H. Oaks el luti:

“Kena se in kolyuck sin Leum pa ma wo se, tuh enenuh in tuhkuh ke kahlwem se lah Pahpah tuhmasr Inkuhsrao El fihliyac sulaclah puhkantwen nuh ke sulaclah sifacna lasr. … Mwet suc srihke in fuhlwelah sulaclah nuh kwewa nuh sin Leum ac siyuck ke fwackyuck ke ma nuh kwewa ac konwacack pacl ma elos pruhe ke kolyuck ac tiac eis. …

“Kuht in lutlutkihn ma inge ke nuhnak lasr. … Na pruhe ke kolyuck ac mukwikwi nuh kac. … Fin kuht tiac eis kolyuck, kuht enenuh in mukwilac ke nuhnuhnkuh wo emet lasr.”¹²

Kaliyac ke Suli

In kaliyac, Mwet Luhlahlfongi ke Lwen-sahflah enenuh in mwet suc eis mwe sang, ac karihngihn olwelah lalos. Tuh finne ohinge, yohk srihpac nuh sesr kais sie in srihke in orekmakihn mwe sang in nguhn lasr ac in suli ac etwaclah in akihlen kolyuck sin Nguhn. Ip ahkosr ma ac kahsre kuht ke orekma in nguhn yohk srihpac se inge:

Tu ke acn muhtahl.
Tu yurun mwet muhtahl.
Fahkwack ke ma pwacye muhtahl.
Porongo Nguhn Muhtahl.

Kuh lowos in suli ac akihlen kolyuck sin Nguhn ac kapwack ip nuh ke ip. In ahkpahye nuh ke sramsram luhn Nguhn oacpacna lutlut ke siena kahs. Kais kuhtuh fahsr ac enenuh orekma oaru, mongfihsrwacsr.¹³

In fohlohk nuh ke muhtacwackiyacsr, nuhnak muhnahs esam lah ekihn Mwet Luhlahlfongi ke Lwen-sahflah kowos mwe sang se. Petsac elah ma se sikyak ke toeni in Sacnri se, ma ahkuhtweyucki nuh sihk. Tuhlihk fuhsr se, tu ke tepuh srihsrihk, apkuhran in tiac kuh in liyeyuck tukun acn in sramsram sac. Pahpah tuhmwacl tu siskacl, ahkkweyacl ac mahmah nuh insracl ke el engankihn in fahk, “Nga pa tuhlihk nuhtin God.”

Mwet fuhsr lolacp se tuyak tok fahkwack luhlahlfongi lal ac muhtwacwacack ange: “nga kena tuh in oasr mwet se mahmah pac nuh insrek kain sacn.” Na el moklweyuck ac fahkwack, “Oasr mwet se suc mahmah insrek kain sacn—Nguhn Muhtahl!”

Nga kaliyac ke mwe suli se yohk na nuh sin tuhlihk fuhsr! Puhs suwos muhtwacwacack lwen lowos an tu met liki seinngucn an. Lutu, wik se inge, yac se inge, pacl nuh kwewa, tui kuhtesrihk ac ngetwacng lie kowos ke seinngucn an. Nuhnkuh nuh sum sifacna, kuh fahk lihksreni kom fin luhngse “We, liyeyuc! Nga sun na pwacye! Nga tuhlihk nuhtin God se! El eteyuc! El luhngse nga! Nga mwe sang se—mwe sang ke Nguhn Muhtahl in wi yuc pacl nuh kwewa!”

Nga tahfwelah luhlahlfongi luhk nuh suwos, Mwet Luhlahlfongi ke Lwen-sahflah ahkinsewowoyeyuck, ke God Pahpah, Jisus Kraist, ac Nguhn Muhtahl, suc ahkpwacyeiye Elos. Ke inen Jisus Kraist, amen.