Fadum na Kan Hyerɛn horow
Hɛn so yebotum enya hɛnara hɛn kan fadum—kan hyerɛn kor nkorkor.
M’asɛm yi kɔ ma hɔn a wɔhaw wɔ hɔn dasegye ho osiandɛ wonnyaa sunsum mu sũahu dzendzenndzen biara. Mobɔ mpaa daa dɛ mubotum ama hom asomdwee na awerɛhyɛmu.
Jesus Christ asɛmpa ne nsananamu dze kan na nokwar heii hyɛɛ ase! Babun banyimba bi a ɔwɔ New York etsifi apaamu, a ne dzin ara nye Joseph Smith, hɛn ndua kwaa mu kɔbɔ mpaa. Ne kra na ne gyinabew wɔ Nyame enyim haw no. Ɔserɛ bɔnfakyɛ. Na ɔwɔ adwensɛɛ wɔ asɔr a ɔnkɔdɔm ho. Ohia adwenmu-ndahɔ na asomdwee—ohia kan na nyimdzee.
Ber a Joseph bu ntwɛr bɔ mpaaa “rekã n’akoma mu nsɛm akyerɛ Nyame no,” sum kebii twa noho hyia. Biribi bɔn, a ɔtseetsee, na ɔwɔ hɔ ankasa per dɛ osiw no kwan—kyekyer ne tɛkyerɛma ma oenntum annkasa. Sunsum mu etumfo bɔn nhyɛdo no yɛ dzen ara ma Joseph dwen dɛ orubowu. Naaso “[ɔ]dze [n’]ahoɔdzen nyina bɔ mpaa frɛ Nyame dɛ Ɔngye no mfi dɛm ɔtamfo yi a [ɔabɛhyɛ no] do yi no tum nsa.” Nkyii, “aber no mu ara a [ɔ]yɛɛ krado dɛ [ɔ]bɛhɛn abagura no bun mu no na [oe]gyaa [no]ho ama ɔsɛɛ no,” ber a nna onnyim sɛ obotum awɔwdo mpo o, enyimnyam kan hyerɛnn, hyɛɛ kwaa no mu mã, hwetse sum na ne kra tamfo no.
“Kan fadum” bi a ɔhyerɛn sen ewia sian berɛww kɛpem dɛ ɔtɔ no do. Nyimpasu kor pue, na kor so toa do. Hɔn “hyerɛn na hɔn enyimnyam no murunntum nnkã.” Dza odzi kan, hɛn Ɔsor Egya, bɔ ne dzin, “ɔtsen ne nsa wɔ kor no do—[Joseph!] Iyi nye Mo Dɔba. Tsie No!”
Na dɛm kan na nokwar a epue heii no, Nsanananmu no ahyɛ ase. Nokwar nyikyerɛ krɔnkrɔn na nhyira horow mbordo bɔtoa do: kyerɛwsɛm fofor, asɔfodzi tum a wɔdze asan ananmu aba, asomafo na nkɔnhyɛfo, ayɛdze na ahyɛmu horow, na Ewuradze N’Asɔr ne nkyekyeree bio, a daakye bi ɔdze kan bɛhyɛ asaase no do na ɔagye Jesus Christ na N’asɛmpa a wɔdze asan ananmu aba no ho dase.
Ɔno nyina, na beberee a ɔkã ho, hyɛɛ ase ɔnam banyimba bi n’enyiber mpaa na kan fadum bi ntsi.
Hɛnara so wɔ hɛn ehiadze dzendzen horow. Hɛnara so hia fahodzi fi sunsum mu adwensɛɛ na wiadze sum ho. Hɛnara so hia dɛ yehu ma hɛnho. Iyi yɛ siantsir kor a President Russell M. Nelson ato nsa afrɛ hɛn dɛ “yɛmfa [hɛnho] nhyɛ Nsanananmu n’enyimnyam kan no mu.”
Nokwar kɛse kor fa Nsanananmu no ho nye dɛ ɔsorsor ebuei—na hɛn so yebotum yenya kan na nyimdzee efi sor. Megye dase dɛ ɔyɛ nokwar.
Mbom, otwar dɛ yɛyɛ ahwɛyie wɔ sunsum mu ndaadaa bi ho. Ɔtɔfabi a, asɔrmba anokwafo binom abaw mu gura na mpo wɔtwe hɔnho osiandɛ wonnyaa sunsum mu sũahu nwanwason—osiandɛ wonnyaa hɔnankasa hɔn kan fadum. President Spencer W. Kimball bɔɔ kɔkɔ dɛ “daabaa enyi da biribi nwanwason kwan no, bɛma dodow noara ayew daa daa nyikyerɛ nkitahodzi a ɔpem ba no koraa.”
President Joseph F. Smith kaa dɛ “Ewuradze dze anwanwadze kamm me [ber a musuar], na ɔkyerɛɛ me nokwar no, nsensaneeba tsia nsensaneeba, ahyɛdze tsia ahyɛdze, ha kakra, hɔ kakra.”
Dɛm ara pɛpɛɛpɛr na Ewuradze No nhwɛdo tse, enuanom na nkyerɛbaa. Nkyɛ ɔbɛma hɛn kan fadum no, Ewuradze brɛ hɛn kan hyerɛn kor, nkakrankakra.
Wohuei dɛm kan hyerɛn horow yi gu hɛn do aber biara. Kyerɛwsɛm no kyerɛ dɛ Jesus Christ nye “wiadze kan na … nkwa no” dɛ No “Sunsum dze kan ma banyin [na basia] biara a ɔba wiadze yi mu” na Ne kan “hyɛ bea ɔda hɔ pan kɛsenara no no mã,” rema “adze nyina nkwa.” Christ ne Kan no etwa hɛn ho ehyia ankasa.
Sɛ hɛn nsa akã Sunsum Krɔnkrɔn akyɛdze no, na yɛrobɔ mbɔdzen dɛ yɛdze gyedzi bedzi dwuma, enu hɛnho, na yesie hɛn ahyɛmudzi a, nna yɛfata dɛ hɛn nsa kã dɛm krɔnkrɔn kan hyerɛn horow yi daa daa. Elder David A. Bednar ne nkaadze asɛmfua mu no, “yɛtse nyikyerɛ mu.”
Naaso, hɛn mu kor biara yɛ soronko. Nyimpa beenu biara nnya Nyame ne kan na nokwar ho sũahu wɔ kwan kor noara do. Fa mber kakra na dwen mbrɛ ɔwoara isi inya Ewuradze Ne kan na No Sunsum ho sũahu.
Bia inya dɛm dasegye kan hyerɛn yinom dɛ “asomdwee [awɔse] wɔ w’adwen mu” fa asɛm [bi] a ɔrehaw wo ho.
Anaa dɛ nkenyan bi—ndze tsẽaa—a ɔtsenaa “w’adwen na w’akoma mu” na ɔhyɛɛ wo nkuran dɛ yɛ biribi a oye, tse dɛ eroboa obi.
Bia na akɔ asɔr adzesuabea bi— anaa mbabun ehyiadzi bi—na enya nkenyan dzendzen dɛ ebɛkã Jesus Christ do na ayɛ nokwafo. Anaa mpo dɛ igyinae kyɛɛ dase a nna ewɔ enyidado dɛ ɔyɛ nokwar na nkyii inyaa atsenka dɛ ampa ɔyɛ nokwar.
Anaa abɔ mpaa na enya dɛw awerɛhyɛmu dɛ Nyankopɔn dɔ wo.
Bia atse obi ne dasegye fa Jesus Christ ho na ɔakã w’akoma na oekenyan wo dɛ yɛ papa.
Anaa nna erekenkan Mormon Nwoma no na nkyekyɛmu bi kasaa kyerɛ w’akoma, a ɔyɛ dɛ mbrɛ Nyankopɔn hyɛ daa dze hyɛɛ hɔ ma wo.
Bia na enya atsenka wɔ Nyankopɔn No dɔ ma binom ho ber a esoom hɔn.
Anaa bia ɔyɛ wo dzen dɛ ebɛtse Sunsum no ne nkã ɔnam awerɛhow adwenmuhaw anaa dadwen ntsi, mbom ewɔ akyɛdze dɛ itum hwɛ w’ekyir hu “Ewuradze n’adɔyɛ mbɔbɔrhu” a woetwa mu kɔ.”
M’asɛntsir nye dɛ kwan horow pii wɔ hɔ a yɛfa do nya sor kan hyerɛn horow ho dasegye. No mu kakrabaa nye yinom. Bia wɔnnyɛ nwanwa dze, naaso ne nyinara kã hɛn dasee horow ho.
Enuanom na nkyerɛbaa, munnhun kan fadum, mbom tse dɛ hom ara meenya sor kan hyerɛn horow sũahu pii. Mfe a etwa mu no, maper dɛ mobɔkora dɛm sũahu horow yi. Mehu dɛ, sɛ meyɛ no dɛm a, muhu na mekaa beberee nara. Mfatoho bi a ofi mara m’abrabɔ mu nye yi. Bia wɔrennyɛ nkenyan kɛse mma hom mu binom, mbom wɔsom bo ma me.
Mekaa dɛ nna meyɛ babun a m’enyi do yɛ hyew a mowɔ enuma som bi ase. Ber a nhyiamu no rebɛhyɛ ase no, minyaa Sunsum ne nkenyan dɛ mentsena ase na menkyerɛ enyidzi. Metsenaa ase na meyɛɛ komm wɔ ehyiadzi no mu nyina.
Ansaana morobɔkɔ asɛmpakã somdwuma no, nna musuro dɛ me dasee nnyɛ dzen nnwie pɛ yɛ. Nna mo busuanyi biara nkɔr asɛmpasomafo somdwuma no bi da, na minnyim sɛ mubotum ayɛ o. Mekaa dɛ murusũa na morobɔ mpaa enyiberdo dɛ mibenya dasegye a otsim fa Jesus Christ ho. Nkyii da kor bi, ber a musũi gu Ɔsor Egya do no, minyaa kan na dɔ ho tum atsenkã bi. Na muhunii. Nna minyim.
Mekae mirinya ”nyimdzee pefee” da kor anafua bi a minyanee, dɛ wɔbɛfrɛ me ma masom wɔ elderfo quorum no mu. Adapɛn ebien ekyir no wɔfrɛɛ me.
Mekae wiadze mfɛndzanan ehyiadzi bi ase a Asomafo Duebien no mu mba kor kãa dasegye mu nsɛm noara pɛpɛɛpɛr a nna makã akyerɛ me nyɛnko bi dɛ nna m’enyi da kwan dɛ mebɛtse.
Mekae menye enuanom ɔha na no mboree rubu ntwɛr abɔ mpaa ama nyɛnko dɔfo bi a n’enyi do esiw no a ɔda ahomgye efir do wɔ ekyirekyir asopitsi kumaa bi mu, ber a n’akoma gyaa tow. Ber a yɛdze akoma kor totɔe serɛɛ no nkwa no, ɔsoɛree na ɔtwee efir a ɔboa no ma ɔgye ahom no fii ne men mu. Ndɛ da yi, ɔsom dɛ stake president.
Na mekaa medze sunsum mu atsenkã dzendzen rinyan efi adaaso a ɔda edzi yie fa me nyɛnko dɔfo na kwankyerɛnyi bi a owuu ntsɛm koraa ho, a ogyaa tokur kɛsenara wɔ m’abrabɔ mu. Nna ɔayerɛw n’ano na oridzi dɛw. Na minyim dɛ noho ye.
Me kan hyerɛn horow no bi nye yi. Ɔwoara enya wo sũahu horow—wankasa wo dasegye kan hyerɛn horow. Ber a yehu, yɛkaa, na yɛboa dɛm kan hyerɛn horow no ano “bɔ mu no,” biribi nwanwason hyɛ ase si. “Kan takyer kan”—“nokwar fua nokwar.” Dasegye kan hyerɛn kor no nokwar na tum nye nkaa no bɔ mu hyɛ hɔnho hɔnho dzen. Nsensaneeba tsia nsensaneeba, ahyɛdze tsia ahyɛdze, kan hyerɛn kakra wɔ ha na kan hyerɛn kakra wɔ hɔ no—sunsum mu mber a ɔsom bo kumaabaa kor kakra—hɔ na fapem a kan na susnsum mu sũahu horow ahyɛ no mã nyin wɔ hɛn mu. Bia na kan hyerɛn kor biara nnyɛ dzen dodowara dɛ ɔbɛyɛ dasegye mu kor, naaso wɔbɔ mu no, wobotum abɛyɛ kan a ekyingye sum runntum nnkata do.
“O nkyii, ana iyi nnyɛ nokwar?’’ Alma bisa. “Mese hom dɛ Nyew, osiandɛ ɔyɛ kan.”
“Dza ofi Nyame no yɛ kan,” Ewuradze kyerɛkyerɛ hɛn, “na nyia ɔgye kan no, na ɔkɔ do tsena Nyame mu no, nya kan no bi kã ho; na dɛm kan no kɔ do ara hyerɛn dze kɛpem da a odzi mu no.”
Ɔnam mber na “enyimpisi kɛse” do no, hɛn so yebotum enya hɛnara hɛn fadum—kan hyerɛn kor nkorkor. Na wɔ dɛm fadum ne finimfin no, hɛn so yebohu Ɔsor Egya dɔfo, a Ɔdze hɛn dzin refrɛ hɛn, ɔrekyerɛ hɛn Agyenkwa Jesus Christ no, na Ɔroto nsa afrɛ hɛn dɛ “Tsie No!”
Megye Jesus Christ ho dase, dɛ ɔyɛ wiadze nyina kan na nkwa—na emi na ɔwo hɛn ankorankor wiadze kan na nkwa.
Megye dase dɛ Ɔyɛ nokwar tseasefo Nyame ne Ba nokwar tseasefo no, na dɛ Ogyina nokwar tseasefo Asɔr yi ne tsir.
Wɔmma yenhu na yɛngye N’enyimnyam kan na nkyii yɛnsan mu nyi No wɔ wiadze no sum do. Jesus Christ ne dzin mu, amen.