Anwanwadze, Sor Abɔfo, na Asɔfodzi Tum
Sɛ epɛ asɔfodzi nhyira, a anwanwadze na sor abɔfo som kã ho a, nantsew ahyɛmudzi anamɔn kwan horow no a Nyankopɔn dze ama hɛn no do.
Nkorɔfo pii na wɔkã ndɛ dɛ anwanwadze nnyi hɔ bio, na sor abɔfo yɛ kodzisɛm, na ɔsorsor akã ato mu. Midzi dase dɛ anwanwadze nntwae, sor abɔfo wɔ hɛn nkyɛn, na ɔsorsor ebue ampaara.
Ber a nna hɛn Agyenkwa, Jesus Christ, wɔ asaase do no, Ɔdze asɔfodzi nsaafee no maa No Ɔsomafo Panyin, Peter. Ɔnam nsaafee yinom do no, Peter na Asomafo nkaa no dzii Agyenkwa no N’Asɔr no baano. Mbom mber a Asomafo no wuwui no, woyii asɔfodzi nsaafee no fii asaase no do.
Midzi dase dɛ tsetse asɔfodzi ne nsaafee no wɔdze asan ananmu aba. Peter, James, na John na tsetse nkɔnhyɛfo nkaa no bae dɛ nyimpa a wɔasoɛr efi ewufo mu na wɔdze dza Ewuradze kãa ho asɛm dɛ “m’ahenman mu nsaafee, na asɛmpa ne mberano,” no guu Nkɔnhyɛnyi Joseph Smith no do.
Dɛm nsaafee kor noara na wɔdze fi nkɔnhyɛnyi kor do dze maa nkɔnhyɛnyi kor besi ndɛ. Mbarimba 15 a yɛma hɔn tsipia dɛ nkɔnhyɛfo, adzehufo, nye nyikyerɛfo no, dze dzi dwuma dzi Agyenkwa no N’Asɔr no baano. Dɛ nna ɔwɔ tsetse mber mu no, Ɔsomafo panyin kor na ɔwɔ hɔ a okitsa na wɔama no tumdzi dɛ ɔmfa asɔfodzi nsaafee no nyinara ndzi dwuma. Ɔno nye President Russell M. Nelson, Jesus Christ N’Asɔr a wɔdze asan ananmu aba no no nkɔnhyɛnyi na President wɔ hɛn nda mu: Jesus Christ N’Asɔr a ɔwɔ hɔ ma Nda a Odzi Ekyir Ahotseweefo.
Ɔnam Agyenkwa no N’Asɔr do no, yenya asɔfodzi ne nhyira—a Nyankopɔn no tum a ɔboa hɛn wɔ hɛn abrabɔ mu kã ho. Asɔfodzi nsaafee tumdzi ase no, yɛbɔ anohoba ma Nyankopɔn na yɛyɛ ayɛdze krɔnkrɔn horow a osiesie hɛn ma yɛtsena N’enyim. Yɛdze enuma na pisi hyɛ ase, na nkyii wɔ temple no, yɛkɔ kan wɔ ahyɛmu anamɔn kwan no do a ogya hɛn san kɔ Ne nkyɛn.
Wɔdze nsa gu hɛn tsir do no, yɛsan so gye asɔfodzi nhyira, a akwankyerɛ, awerɛkyekyer, afuto, ayarsa, na tum no dɛ yɛbɛkã Jesus Christ do kã ho. Tum kɛse yi ehyira me wɔ m’abrabɔ nyinara mu. Dɛ mbrɛ woeyi akyerɛ wɔ kyerɛwsɛm mu no, yɛfrɛ no dɛ Melchizedek Asɔfodzi krɔnkrɔn no tum.
Me mbabun ber mu no minyaa enyidzi kɛse maa tum yi, tsitsir ara mber a ɔdaa edzi wɔ asɔfodzi nhyira mu. Ber a nna morosom dɛ asɛmpasomafo aberɛntsɛba wɔ Chile no, wɔkyee emi na me nyɛnko na wɔtseew hɛn mu. Wɔannkã siantsir kor no annkyerɛ hɛn dabiara da. Nna ɔyɛ amanyɛ begyabegya kɛse mber mu. Porisi nsordaafo kyekyee nkorɔfo mpempem koguu efiadze na wɔanntse hɔn nkã bio dabiarada.
Wobisaa me nsɛm wiei no, mo nko na metsenaa efiadze hɔ, a nna minnyim sɛ mubohu m’adɔfo bio a. Mokɔɔr mo Ɔsor Egya hɔ, wɔ ntotɔserɛ dzendzenndzen mu dɛ: “Egya wɔakyerɛkyerɛ me aber nyina dɛ Ɔwo na ehwɛ W’asɛmpasomafo do. Egya meserɛ, mennyɛ obi soronko biara, naaso maayɛ setsie na mihia Wo mboa anafua yi.”
No mboa aba no nna woedzi kan edua no mfe pii. M’enuma ekyir no, wosii me pi dɛ Asɔrba na wɔdze Sunsum Krɔnkrɔn n’akyɛdze no maa me. Mber a nna mankotsee mowɔ efiadze hɔ no, mobɔɔ mpaa na ntsɛmara Sunsum Krɔnkrɔn no baa me nkyɛn na ɔbɛkyekyee mo werɛ. Ɔkaa me asɛnsin soronko papaapa bi fi me patriarch nhyira mu, a ɔyɛ asɔfodzi nhyira kor so. No mu no, Nyankopɔn bɔɔ me anohoba dɛ ɔnam mo nokwardzi do no wobotum asɔw moho ano akã ɔbaa bi a ahoɔfɛw na ndzepa na ɔdɔ ahyɛ no mã ho ama mber na mfesantsen wɔ temple, na yɛabɛyɛ mbambanyin na mbasiamba a wɔsom bo hɔn awofo, na wobehyira me na mayɛ kɛse dɛ egya wɔ Israel.
Nkenyan nsɛm no fa me ndaamba abrabɔ ho no dze asomdwee hyɛɛ me kra mã. Nna minyim dɛ ofi mo Ɔsor Egya dɔfo hɔ, a aber nyina odzi N’anohoba do. Mber no mu no, minyaa awerɛhyɛmu dɛ wobegyaa me ma m’atsena ase ehu anohoba no ne mãhyɛ.
Bɛyɛ afe kor ekyir no, Ɔsor Egya dze ɔyer bi a ahoɔfɛw na ndzepa na ɔdɔ ahyɛ no mã hyiraa me. Emi na Lynette wɔsɔɔw hɛn ano wɔ temple. Wɔdze mbabanyin baasa na mbasiamba baanan a wɔsom bo hyiraa hɛn. Mebɛyɛɛ egya, ne nyinara dɛ mbrɛ Nyankopɔn n’anohoba tse no wɔ patriarch nhyira mu a megyee ber a meyɛ mfe 17 banyimba no.
“Dɛm ntsi, m’enuanom [na nkyerɛbaa] adɔfo, ana anwanwadze etwa osiandɛ Christ afow kɔ sor a? …
“… Oho; na eso sor abɔfo nngyaa dɛ wosom adasamba.”
Midzi dase dɛ anwanwadze na ɔsom kɔ do ara risisi wɔ hɛn abrabɔ mu, ɔtaa dɛ ɔyɛ asɔfodzi tum no nsunsuando pɛɛ. Asɔfodzi nhyira mu bi hyɛ mã ntsɛmara, wɔ akwanhorow mu a yebotum ehu na yɛatse ase. Bi so ba nkakrankakra na onnkotum ahyɛ mã wɔ abrabɔ yi mu. Naaso Nyankopɔn dzi N’anohoba nyinara do, aber nyina, dɛ mbrɛ wɔakyerɛ wɔ asɛm yi fi hɛn ebusua abakɔsɛm mu no:
Nna me papa afamu nanabanyin, Grant Reese Bowen yɛ ɔbarimba a ɔwɔ gyedzi kɛse. Mekaa pefee dɛ metsee dɛ ɔrekã mbrɛ osii nyaa ɔnoara ne patriarch nhyira ho asɛm. Ne journal mu no, ɔkyerɛɛw dɛ: “Patriarch no dze ayarsa akyɛdze bɔɔ me anohoba. Ɔkãa dɛ,‘Yarfo no benya ayarsa. Nyew, wo nsa ase na owufo no bɔsoɛr.’”
Mfe pii ekyir no, nna Nanabanyin roboaboa efuw ano ber a onyaa nkenyan dɛ ɔnsan nkɔ fie. N’egya hyiaa no dɛ ɔreba ne nkyɛn. N’egya kãa dɛ, “Grant, wo maame ewu seseiara.”
Meserɛ kã fi Nanabanyin ne journal mu bio: “Menngyina na medze ahoɔhar kɛhyɛɛ fie hɔ na mokɔɔr paado hɔ a nna ɔda abɔdomaba mpa do. Mohwɛɛ no na mutumii hun dɛ nna nkwa biara nnyi no mu. Mekaa me patriarch nhyira na anohoba no dɛ sɛ meyɛ anokwafo a, ɔnam me gyedzi do no yarfo no benya ayarsa, na owufo no bɔsoɛr. Medze me nsa guu ne tsir do, na mekãe kyerɛɛ Ewuradze dɛ sɛ anohoba a ɔnam patriarch no do bɔe kyerɛɛ me no yɛ nokwar a, Ɔnda no edzi nkyerɛ me mber yi na Onnyan me maame ma ɔmba nkwa mu. Mobɔɔ No anohoba dɛ sɛ Ɔyɛ iyi a, moronntweɔntweɔn dabiarada dɛ medze tum a mowɔ nyinara bɛyɛ adze dze akyekyer N’ahenman. Mber a morobɔ mpaa no, obue n’enyiwa na ɔkãa dɛ, ‘Grant, ma me do. Nna mowɔ Sunsum Wiadze, na asan afrɛ me yi. Aber nyina ma iyi nyɛ dasedzi mma ɔwo na m’ebusua nkaa no.’”
President Russell M. Nelson akyerɛkyerɛ hɛn dɛ yɛnhwehwɛ anwanwadze na hɛn enyi nda kwan. Midzi dase dɛ osiandɛ wɔdze asɔfodzi nsaafee no asan ananmu aba no ntsi, Nyankopɔn no tum na etumdzi wɔ asaase do. Ɔnam ɔfrɛ na abaguafo nhyiamu horow do no, mbanyin na mbaa, mpanyin na mbofra, botum dze hɔnho ahyɛ asɔfodzi edwuma mu. Ɔyɛ anwanwadze edwuma a, sor abɔfo ba hɔ. Ɔyɛ ɔsor edwuma, na ohyira Nyankopɔn ne mba nyinara.
Afe 1989 mu no, nna hɛn ebusua a yɛyɛ nyimpa beesuon no resan akɔ fie a yefi ward dwumadzi bi ase. Nna adze asa. Nna Lynette nyinsen hɛn ba ɔtɔ do esia no. Onyaa nkenyan dzendzen dɛ ɔmbɔ ne egua ho bɛlɛt no, a nna no werɛ efir dɛ ɔyɛ no. Annkyɛr na yeduur bea a kwan no man; kaar bi fii no kwan do baa hɛn dze no mu. Nna morokɔ bɛyɛ akwansin 70 wɔ dɔnhwer kor mu no, mekyeaa moho amma mammbɔ kaar a nna ɔreba no. Hɛn hɛn no pirewpirewee, tserewee sian kwantsenpɔn no, na otwuwee fii kwan no do na ewiei no a ogyinae no, ɔdze hɛntsiafo afã no sii dɛtse no mu.
Adze a odzi do a mekaa nye metsee Lynette ne ndze: “Shayne, yehia dɛ yɛfa w’abow no mu pue.” Nna mesensan wimu wɔ m’egua bɛlɛt no ho. Odzii simaba kakra ana moho reba moho do. Yɛhyɛɛ ase dɛ yɛremema hɛn mba no kor biara do edua me tokura mu efi hɛn no mu, a nna afei ɔabɛyɛ hɛn no n’etsifi. Nna worusũ, a nna wonnhu dza woesi.
Annkyɛr na yehun dɛ hɛn mfe 10 babasia, Emily, ayew. Yɛtsẽa mu bɔɔ ne dzin, eso nna mbuae biara nnyi hɔ. Nna ward mba a nna hɔn so wɔrokɔ fie, wɔ bea hɔ na wɔdze ahomtsew rohwehwɛ no. Nna sum ahyɛ dodow. Medze kandzea sanee hwɛɛ hɛn no mu bio na m’akomatu mu no, muhun Emily no honandua ketseketse no dɛ ɔhyɛ hɛn no ase. Ahomtsew mu ara mekãa mu kɛse dɛ, “Ɔwɔ dɛ yɛma hɛn no do fi Emily no do.” Medze ahoɔdzen taam etsifi no na motwee fii hɔ. Nna ihɛn a yɛrema do no suar, naaso awanwadze mu ara kaar no kyinn ntsɛm wɔ no wheel do, a ɔdaa Emily a nkwa nnyi no mu edzi.
Nna Emily renngye ahom. Nna n’enyim no ayɛ dɛ purple plum enyi. Mekãa dɛ, “Yehia dɛ yehyira no.” Me nyɛnko dɔfo bi na ward ba bi nye me buu ntwɛr na ɔnam Melchizedek Asɔfodzi, tumdzi do, wɔ Jesus Christ ne dzin mu no, yɛhyɛɛ no dɛ ɔntsena ase. Dɛm mber mu no, Emily dze ne menmu gyee ahom tsenstenntsen.
Dza nna ɔyɛ dɛ dɔnhwer pii ekyir no, ambulance no bae. Wɔdze Emily tuu mbirika kɔr asopitsi. Nna no horɔwhorɔw adwedwe na oepira wɔ ne nankroma mu. Nna adwen mu sɛɛe haw hɛn osian mber a nna onnya mframa no ntsi. Emily anntsew n’enyiwa da kor na fã. Yɛkɔɔr do yɛbɔɔ mpaa na yɛkyeer kɔm maa no. Wɔdze ayarsa koraa hyiraa no. Ndɛ, Emily na no kun, Kevin, yɛ mbasiamba baasia hɔn awofo.
Awanwadze mu ara, obiara noho tɔɔ no. Abɔdomaba a nna Lynette nyinsɛn no yɛ Tyson. Ɔno so emmpira na wɔwoo no Kwakwar bosoom a odzi do no. Abosoom awɔtwe ekyir no, a onyaa ne asaase do honandua no, Tyson sanee fie kɔr Ɔsor Egya hɔ. Ɔno nye hɛn sor ɔbɔfo babanyin hwɛdofo. Yɛtse no nhyɛdo wɔ hɛn ebusua mu na hɛn enyi da kwan dɛ yɛnye no bɛtsena bio.
Hɔnnom a wɔmaa hɛn no do fii Emily do no hun dɛ nna hɛn no mu nnyɛ dur koraa. Minyim dɛ sor abɔfo bɛkãa asaase do abɔfo ho ma yɛmaa hɛn no do fii Emily do. Mesan so nyim dɛ ɔnam asɔfodzi krɔnkrɔn no tum do na wɔ sanee dze Emily baa nkwa mu bio.
Nyankopɔn yii nokwar yi kyerɛɛ No nkowaa dɛ: “Mibedzi hom enyim. Mibedzi hom nyimfa na hom bankum, na mo Sunsum bɛhɛn hom akoma mu, na m’abɔfoe etwa hom ho ehyia, na wɔasoa hom.”
Midzi dase dɛ “Asɔfodzi Krɔnkrɔn no, wɔ Nyankopɔn ne Ba ne Nhyehyɛɛ do no”—Melchizedek Asɔfodzi no a—ne nsaafee, tumdzi, na tum kã ho no wɔdze asan ananmu wɔ asaase do, wɔ nda a odzi ekyir yinom mu. Minyim dɛ ber a gyinabew horow nyinara nnwie tse dɛ ma hɛn enyi bɛda no na yɛabɔ ho mpaa no, Nyankopɔn n’awanwadze bɛba aber nyina dɛ mbrɛ Ne pɛ, Ne mber, na ne nhyehyɛɛ ma hɛn no tse.
Sɛ epɛ asɔfodzi nhyira, a anwanwadze na sor abɔfo som kã ho a, moto nsa frɛ wo dɛ nantsew ahyɛmudzi horow anamɔn kwan no a Nyankopɔn dze ama hɛn mu kor biara no do. Asɔrmba na baanodzifo a wɔdɔ wo bɔboa wo ma etu ananmɔn a odzi do no.
Midzi dase dɛ Jesus Christ, Nyankopɔn Ne Ba no, tse ase na ɔnam nkɔnhyɛfo a wokitsa asɔfodzi nsaafee na wɔdze dzi dwuma do dzi N’Asɔr baano. Sunsum Krɔnkrɔn no yɛ nokwar. Agyenkwa no dze No nkwa mae dze saa hɛn yarba, san gyee hɛn, na Ɔdze hɛn aba fie.
Midzi dase dɛ anwanwadze nntwae, sor abɔfo wɔ hɛn nkyɛn, na nokwar ara ɔsor ebue. Na ao, mbrɛ woesi ebue a! Jesus Christ ne dzin mu, amen.