Ɔyɛ Adze a Ɔtsen a ofi Ewuradze hɔ dɛ Dɛ Yebenya Mormon Nwoma no

Mark L. Pace ne Kasaa

Wiadze Mfɛndzanan Sunday Skuul President

Ɔyɛ me mpaabɔ dɛ yɛrekenkan Mormon Nwoma no afe yi bɛyɛ dɛwdzi na nhyira ama hɛn mu kor biara.

Enuanom na nkyerɛbaa adɔfo, hɛn enyisɔ hom mbɔdzembɔ dɛ hom dze kyerɛwsɛm no kã Bra, Bɛka Mo Do ho kenkan. Yɛda hom ase wɔ dza hom reyɛ nyinara ho. Hom nye Nyankopɔn na N’asɛm daa daa nkitahodzi wɔ nsunsuando horow a no mu dɔ. “Hom rotow dwumadzi kɛse bi ne fapem. Na ndzɛmba nkakraba mu na dza ɔyɛ akɛse fi mu ba.’’

Yɛrekenkan Agyenkwa no ne nkyerɛkyerɛ wɔ kyerɛwsɛm mu no boa hɛn ma yɛsesa hɛn efiefi ma ɔyɛ gyedzi guandɔbea na asɛmpa adzesũa asoɛe. Ɔto nsa frɛ Sunsum no ma ɔba hɛn efiefi. Sunsum Krɔnkrɔn no dze dɛwdzi hyɛ hɛn akra mu mã na ɔsakyer hɛn ma yɛyɛ Jesus Christ n’esuafo wɔ hɛn nkwa nda mu nyina.

Mfe beberee yinom a ɔabasen kɔ no, mber a nna yɛrekenkan kyerɛwsɛm krɔnkrɔn nwoma no, yeebohu Nyankopɔn ne nkyerɛkyerɛ ma Ne mba a ɔtserɛw wɔ asɛmpa mberano tsitsir nyinara mu.

Mberano biara mu no, yeehu nhwɛdo a yenyim. Nyankopɔn san ananmu dze Jesus Christ n’asɛmpa dua No nkɔnhyɛfo do anaa oyi kyerɛ hɔn. Nkorɔfo no dzi nkɔnhyɛfo no ekyir na wohyira hɔn kɛsenara. Naaso, mber resen no, nkorɔfo binom gyae dɛ wotsie nkɔnhyɛfo no hɔn nsɛm na wɔtwe hɔnho fi Ewuradze na N’asɛmpa no ho. Iyi nye dza yɛfrɛ no gyedzi ho asehwe. Wodzii kan yii asɛmpa no kyerɛɛ Adam, naaso Adam na Eve hɔn mba no binom twee hɔn ho fii Ewuradze ho wɔ gyedzi ho asehwe mu. Yehu nsanananmu na gyedzi ho asehwe nhwɛdo a wosii do wɔ Enoch, Noah, Abraham, Moses, na nkaafo so hɔn mberano nhwɛdo mu.

Sesei, ndɛ, yɛtse mber ne mãhyɛ mberano mu. Iyi nye mberano nko a onnkowie wɔ gyedzi ho asehwe mu. Mberano yi nye dza ɔdze Agyenkwa Jesus Christ Ne mbae a Otsĩa Ebien na Ne mfe apem ahendzi no bɛba.

Ntsi, ebɛnadze na ɔyɛ soronko wɔ mberano yi ho? Ebɛnadze na Ewuradze dze ama hɛn ndɛ, tsitsirara wɔ hɛn mber ho, a ɔbɔboa hɛn ma yɛatwe abɛn Agyenkwa no na yennkefi No ho dabiarada?

Nyiano kor a ɔba m’adwen mu nye kyerɛwsɛm no—na tsitsir ara Mormon Nwoma no: Jesus Christ N’ahyɛmu Kor So.

Ber a Nyankopɔn abɔ anohoba dɛ gyedzi ho asehwe kor so a obesi wɔ nyimpadɔm mu nnkɛba bio no, yehia dɛ yɛdwen ho na yɛyɛ ahwɛyie dze kwetsir ankorankor gyedzi ho asehwe—yɛkaa, dɛ mbrɛ President Russell M Nelson akyerɛkyerɛ dɛ:, “Hɛn mu kor biara wɔ asodzi fa hɛn ankorankor sunsum mu nyinii ho.’’ Yerusũa Mormon Nwoma no, dɛ mbrɛ yɛreyɛ no afe yi, aber nyina no twe hɛn bɛn Agyenkwa no—na ɔboa hɛn ma yɛtsena bɛn No.

Yɛfrɛ no, “adzesũa,’’ na dɛm ye osiandɛ ɔkyerɛ mbɔdzembɔ. Naaso yennhia dɛ aber nyina yebosũa nokwar fofor bi. Ɔtɔfabia yɛrekenkan Mormon Nwoma no tse dɛ etse nkã dɛ enye Nyankopɔn nya nkitahodzi ara ndɛ ɔrenyɛn ɔkra no, erenya dzenhyɛ sunsum mu ansaana epue ekehyia wiadze, anaa erenya ayarsa ber a da no annkɔ yie wɔ wiadze no mu ekyir no.

Yesũa kyerɛwsɛm no ama Sunsum Krɔnkrɔn no, kyerɛkyerɛnyi kɛse no, eetum ama hɛn nsakyeree kɔ Ɔsor Egya na Jesus Christ hɔ no mu adɔ yie na ɔaboa hɛn ma yɛabɛyɛ tse dɛ Hɔn yie.

Adwendwen yinom wɔ hɛn adwen mu no, yebotum ahwɛ dɛ, “Ebɛnadze na Sunsum Krɔnkrɔn no akyerɛkyerɛ hɛn dapen yi wɔ hɛn Mormon Nwoma n’adzesũa ber mu?’’ na “Iyi si dɛn twe hɛn bɛn Agyenkwa no yie?’’

Iyinom yɛ nsɛmbisa apapa ma hɛn kyerɛwsɛm adzesũa wɔ fie. Wɔsan so yɛ nsɛmbisa papaapa a wɔdze hyɛ Kwesida adzesũa ase wɔ asɔr. Yetu hɛn adzesũa mpon wɔ asɔr Kwesida ber a yerutu hɛn adzesũa mpon wɔ fie wɔ dapɛn no mu. Dɛm ntsi, wɔ hɛn Kwesida adzesũa ahorow mu no, “nyia ɔkã na nyia otsie no nyina nya hɔnho ntseasee, na wonya ntowdo na wɔbɔ mu enyi gye.”

Nyiyimu kakra yinom na Sunsum no ekenyan wɔ m’adwen do fi dapɛn yi ne Mormon Nwoma no n’adzesũa mu:

• Nephi kyerɛkyerɛɛ Jacob dɛ “[on]kora mprɛtse yi do yie na [ɔ]mfa mma … fi ebusuasantsen dze kɛpem ebusuasantsen. Na sɛ nsɛmpa bi wɔ hɔ a ɔyɛ krɔnkrɔn, anaa nyikyerɛ bi a … , anaa nkɔnhyɛ bi a,’’ ɔno Jacob “nkrukye … wɔ mprɛtse yinom do, … na [hɔn] nkorɔfo ntsi.”

• Ekyir no Jacob gyee dase dɛ, “Yɛpɛnsapɛnsa [kyerɛwsɛm] no mu, … na yɛwɔ dɛm dasegye yinom nyinara ɔma yenya enyidado, na hɛn gyedzi nnhihim.’’

Sesei, nyiyimu yinom maa me kaa dza Nephi kãe dada no fa ayewa mprɛtse yinom ho:

“Na yenya kyerɛwsɛm no … na yɛpɛnsapɛnsaa mu na yehun dɛ … ɔsom bo kɛse ma hɛn, dɛm ntsi yɛbɔkora Ewuradze ne mbrasɛm no do ama hɛn mba.

“Dɛm ntsi, ɔyɛ adze a ɔtsen a ofi Ewuradze hɔ dɛ yɛdze botu hɛn kwan wɔ sar no do akɔ asaase a wɔbɔɔ hɛn ho anohoba no do.”

Sesei, sɛ nna ɔyɛ adze a ɔtsen ma Lehi na n’ebusua dɛ wobenya kyerɛwsɛm no a, dɛmara na ɔtsen ma hɛn so ndɛ. Kyerɛwsɛm no bo kɛse a ɔsom na no tum no kɔ do hyerɛn wɔ hɛn abrabɔ mu ndɛ.

Nkorɔfo biara mmbae wɔ abakɔsɛm mu a wonyaa Mormon Nwoma no na kyerɛwsɛm bi so ho kwan a yenya ho enyigye ndɛ yi. Nyew, wohyiraa Lehi na n’ebusua dɛ wɔsõaa mprɛtse no kãa hɔnho, naaso woeenya kor amma asese kor biara. Mormon Nwoma no kor a ohia dodow nye hɛnankasa hɛn dze. Ɔno nye kor no a yɛkenkan.

Lehi n’enyido-adzehu fa nkwadua ho mu no, Lehi kyerɛkyerɛɛ hɛn ankorankor sũahu wɔ Nyankopɔn no dɔ ho no ho hia a ohia. Odzii eduaba no wiei no, Lehi hun ne yer, Sariah, na ne mbambanyin Nephi na Sam wɔ ekyir kakra.

“Nna wogyinagyina hɔ dɛ gyama wonnyim bea a wɔrokɔ.

Lehi kãa dɛ“… Na ɔbaa dɛ motoo hɔn nsa’’ na “medze ndze kɛse kãa kyerɛɛ hɔn dɛ wɔmbra me nkyɛn, na wombedzi eduaba no a ɔyɛ ahomka sen eduaba biara no bi.

“Na … wɔbaa me nkyɛn na wobedzii eduaba no bi.”

Mepɛ Lehi ne fasusu fa ngye enyim ɔwofoyɛ ho no. Nna Sariah, Nephi, na Sam, robɔ abrabɔ papa, tsenenee abrabɔ. Naaso nna Ewuradze wɔ biribi a oye yie, biribi a ɔyɛ dɛw yie ma hɔn. Nna wonnhu beebi a wobohu wɔ, na nna Lehi nyim. Ntsi no, ɔdze “ndze kɛse’’ frɛɛ hɔn, dɛ wɔmbra nkwadua no ho na hɔnankasa wombedzi eduaba no bi. Nna n’akwankyerɛ yɛ pefee. Menntse moho ase biara nnkotum aba.

Meyɛ ngye enyim ɔwofoyɛ a ɔtse dɛm no mu ba. Mber a nna meyɛ banyimba no, annhwɛ a mfe 11 anaa 12 no, me maame bisaa me dɛ, “Mark, ana wankasa, nam Sunsum Krɔnkrɔn no do, nyim ma woho, dɛ asɛmpa no yɛ nokwar a?’’

N’asɛmbisa no yɛɛ me ahobow. Aber nyina no nna mobɔ mbɔdzen dɛ mebɛyɛ “banyimba papa,’’ na nna modwen dɛ ɔno ye. Naaso nna me maame, tse dɛ Lehi, nyim dɛ nna mehia dza ɔkyɛn dɛm koraa. Nna ohia dɛ marankasa midzi ho dwuma na muhu.

Mubuae dɛ minnyae nnya dɛm sũahu no. Na me nyiano no annyɛ no ahobow koraa.

Nkyii ɔkãa biribi a mowerɛ nnfir dabiarada. Mekaaa ne nsɛm besi ndɛ yi: “Ɔsor Egya pɛ dɛ wankasa hu ma wo ho.’’ Mbom otwar dɛ edze mbɔdzembɔ hyɛ mu. Ohia dɛ ibɛkenkan Mormon Nwoma no na edua Sunsum krɔnkrɔn no do dze ehu. Ɔsor Egya beyi wo mpaabɔ ano.’’

Oye, nna mennkenkan Mormon Nwoma no da. Manndwen ho dɛ m’enyi efir dodow dɛ meyɛ dɛm. Naaso nna me maame nyim dza oye.

N’asɛmbisa kenyaan pɛ wɔ mo mu dɛ mubohu ama moho.

Ntsi, anafua biara, wɔ pia mu a, menye mo nuanom mbanyin beenu da no, mosɔ kandzea a ɔwɔ me mpa n’etsifi no na me kenkan tsir kor bi wɔ Mormon Nwoma no mu. Nkyii, mudum kandzea no, na mosoɛr fi me mpa mu bu ntwɛr na mobɔ mpaa. Mobɔ mpaa nokwar mu ara na medze pɛ kɛsenara kyɛn dza maayɛ no da. Meserɛɛ Ɔsor Egya dɛ mepa no kyɛw ɔmma munhu Mormon Nwoma no no nokwar a ɔyɛ ho asɛm.

Ofi mber a mehyɛɛ ase kenkan Mormon Nwoma no, metsee nkã dɛ Ɔsor Egya nyim me mbɔdzenbɔ. Na metsee nka dɛ moho wɔ mfaso ma No. Nna mekenkan na mobɔ mpaa no, ahomka, asomdwee nkãtse tɔ mo do. Tsir kor na tsir kor no, nna gyedzi ne kan no rokɔ do rehyerɛn wɔ me kra mu. Annkyɛr, na muhun dɛ nkãtse no yɛ nokwar ho pisi fi Sunsum Krɔnkrɔn no hɔ. Muhunii maa moho dɛ Mormon Nwoma no yɛ nokwar, na Jesus Christ nye wiadze Agyenkwa no. Mbrɛ m’enyi si sɔ me maame ne nkenyan nsato a.

Mormon Nwoma no n’akenkan sũahu ber a meyɛ banyinba no hyɛɛ kyerɛwsɛm adzesũa nhwɛdo ase a ɔkɔ do hyira me besi ndɛ yi. Meda ho kenkan Mormon Nwoma no na mubu ntwɛr wɔ mpaabɔ mu. Na Sunsum Krɔnkrɔn no kɔ do ara si no nokwar ho pi.

Nephi kãa nokwar. Ɔyɛ adze a ɔtsen a ofi Ewuradze hɔ dɛ yɛdze Mormon Nwoma no bɛnantsew wɔ hɛn abrabɔ nyinara mu. Mormon Nwoma no nye “botantsim’’ a ɔma mberano yi yɛ soronko fi mberano horow dadaw nyinara ho. Sɛ yesũa Mormon Nwoma no na yedzi nkɔnhyɛnyi tseasefo n’ekyir a, ankorankor gyedzi ho asehwe remmba hɛn abrabɔ mu.

Nsato no dɛ yɛmbra nkwadua no ho ber a yerusuo Nyankopɔn n’asɛm mu dzen no nnyɛ nsato fi Lehi hɔ dze ma n’ebusua ara, nna ɔnnyɛ nsato ara fi me maame hɔ dze ma me dɛ menkenkan Mormon Nwoma no na mombɔ ho mpaa. Ɔsan so yɛ nsato fi hɛn nkɔnhyɛnyi dɔfo, President Russell M. Nelson hɔ, dze ma hɛn mu kor biara.

Ɔkãa dɛ, “Mobɔ anohoba dɛ, “Ber a mpaabɔ mu ara irusũa Mormon Nwoma no dabiara no, ebɔbɔ adwenpɔw apapa—dabiara. Mobɔ anohoba dɛ ber a hom dwendwen dza hom sũa ho no, ɔsor ntokura no bobue, na hom benya homara hom nsɛmbisa ne nyiano na akwankyerɛ ama homara hom abrabɔ.”

Ɔyɛ me mpaabɔ dɛ yɛrekenkan Mormon Nwoma no afe yi bɛyɛ dɛwdzi na nhyira ama hɛn mu kor biara na ɔbɔtwe hɛn abɛn Agyenkwa no yie daa.

Ɔsor Egya tse ase. Jesus Christ nye hɛn Agyenkwa na Pomfo. Ne nsɛm wɔ Mormon Nwoma no mu na ɔda No dɔ edzi kyerɛ. President Russell M. Nelson nye Ewuradze no nkɔnhyɛnyi tseasefo wɔ asaase no do ndɛ. Minyim dɛ ndzɛmba yinom yɛ nokwar osian Sunsum Krɔnkrɔn no ne pisi dasee ntsi, dasee a midzii kan nyae ber a nna meyɛ banyimba a merekenkan Mormon Nwoma no. Jesus Christ ne dzin mu, amen.

Nsɛnsin

1. Nkyerɛkyerɛ na Ahyɛmudzi 64:33

2. “Fie-nhyiamu, Asɔr-mboa nwoma fofor a wɔdze abɔmu no wɔ tum dɛ ɔma ebusua ebusua tum dze dzi dwuma mbordo, ber a ebusua biara dze enyidaho na ahwɛyie dze sũa ne nyina dze sesã hɔn fie ma ɔyɛ gyedzi guandɔbea. Mobɔ anohoba dɛ ber a hom dze enyimia yɛ edwuma dze sesã hom fie ma ɔyɛ asɛmpa adzesũa ne sibea no, mber resen no hom Ahomgyeda bɛyɛ enyigye nokwar mu. Hom mbofra enyi bɛgye dɛ wobosũa Agyenkwa ne nkyerɛkyerɛ na wɔdze abɔ bra, na ɔsɛɛfo ne nhyɛdo wɔ hom abrabɔ mu na wɔ hom fie no do bohuan. Nsesa a ɔbɛba hom ebusua mu no bɛyɛ nwanwa na obetsim” (Russell M. Nelson, “Becoming Exemplary Latter-day Saints,” Liahona, Ɔberɛfɛw 2018, 113).

3. Nokwar, nokwar, mese wo dɛ, medze mo Sunsum ne kyɛfa bɛma wo, dza obobue w’adwen mu, dza ɔdze dɛw bɛhyɛ wo kra mã.” (Nkyerɛkyerɛ na Ahyɛmudzi 11:13

4. “Mberano horow no yɛ mber ahorow a annyɛ yie koraa no Ewuradze wɔ somfo baako a ɔwɔ tumdzi wɔ asaase do na okitsa asɔfodzi krɔnkrɔn na ne nsaafee, na ɔwɔ ahyɛdze a ofi sor dɛ ɔmbɔ asɛmpa no ho dawur nkyerɛ asaase do atsefo”” (Nsɛngyinado na Nsɛmbisa, “Dispensations,” Asɛmpa Nwoma Korabea).

5. Hwɛ Moses 5:12–16.

6. Nkɔnhyɛnyi Daniel hun hɛn da yi, hɛn mberano, mber a ɔkyerɛkyerɛɛ Nebuchadnezzar n’adaaso no ase. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no nye ɔbo no a ɔwɔ dɛm adaaso mu no, wɔnndze nsa twae fi mbepɔw mu, hyɛɛ asaase nyina do mã (hwɛ Daniel 2:34–35, 44–45; Nkyerɛkyerɛ na Ahyɛmudzi 65:2).

7. “Nyankopɔn Egya na Jesus Christ frɛɛ Nkɔnhyɛnyi Joseph Smith dɛ ɔmbɛyɛ mberano yi no nkɔnhyɛnyi. Wɔnam no do dze mberano horow dadaw tum krɔnkrɔn nyinara saan ananmu. Mberano yi ne mãhyɛ no do ronnhuan wɔ mber anaa wɔ mbea mu. Ɔremmba ewiei wɔ gyedzi ho asehwe mu, na ɔbɛhyɛ wiadze nyina mã’’ (Russell M. Nelson, “The Gathering of Scattered Israel,” Liahona, Ɔberɛfɛw 2006, 79–80).

8. Russell M. Nelson, “Opening Remarks,” Liahona, Ɔberɛfɛw 2018, 8.

9. Hwɛ “Nsakyeree Nye Hɛn Botae,” Bra, Bɛka Mo Do—Ma Fie na Asɔr: Mormon Nwoma 2024, v.

10. Nkyerɛkyerɛ na Ahyɛmudzi 50:22; san hwɛ nyiyimu 17–21.

11. Jacob 1: 3– 4.

12. Jacob 4:6.

13. 1 Nephi 5:21–22.

14. Ɔnkyɛree na wodze pue gua do dɛ Mormom Nwoma bobor 200 million na wɔakyɛ wɔ mberano yi mu. Iyi yɛ soronko ampara. Wɔakyerɛɛ ase Mormon Nwoma wɔ kasa ahorow 113 mu a nkyerɛase afofor 17 rokɔdo Nhyira bɛn na ɔyɛ dɛ yebenya Mormon Nwoma no a oetsintsim, digital, audio, video, na format horow bi so mu. (Hwɛ Ryan Jensen, “Church Distributes 200 Millionth Copy of the Book of Mormon,” Church News, Mumu 29, 2023, thechurchnews.com.)

15. 1 Nephi 8:14–16; oetsĩ mu akã ho.

16. “Sunsum mu nhyɛdo a ɔyɛ ndam mapã wɔ abofra n’abrabɔ mu no nye n’awofo dɔfo na nananom a wosie hɔn anakasa hɔn ahyɛmudzi krɔnkrɔn no nokwar mu no hɔn tsenenee fasusu. Awofo dze enyidahɔ kyerɛkyerɛ hɔn mbofra gyedzi wɔ Ewuradze Jesus Christ mu, ama hɔn so ‘eehu fibea kor a ɔsɛ dɛ wɔkɔ kɔhwehwɛ hɔn bɔnfakyɛ’ [2 Nephi 25:26]. Ahyɛmudzi nsiei biara biara na dakor dakor no ogya kɔ sunsum mu esian mu. Sunsum mu mbusu no taa yɛ kɛse koraa wɔ hɛn mba na mbanana no do’’ (Kevin W. Pearson, “Are You Still Willing?,” Liahona, Ɔberɛfɛw 2022, 69).).

17. Hwɛ Nkyerɛkyerɛ na Ahyɛmudzi 6:22–24.

18. Nkɔnhyɛnyi Joseph Smith kãa dɛ, “Mekãa kyerɛɛ enuanom no dɛ Mormon Nwoma no dzi mu kyɛn nwoma biara a ɔwɔ asaase do, na ɔyɛ hɛn asɔr yi no botantsim, na obiara a obedzi no mu nsɛm do no ɔbɛbɛn Nyankopɔn kyɛn dɛ obedzi nwoma biara no mu nsɛm do’’ (wɔ Mormon Nwoma no mbueienyi mu).

19. Russell M. Nelson, “The Book of Mormon: What Would Your Life Be Like without It,’’ Liahona, Ɔberɛfɛw 2017, 62–63.