Yɛrekã Mbrasɛm Akɛse Ebien no Abɔ Mu
Mbrɛ yebotum aka Jesus Christ do no gyina hɛn ahoɔdzen na tum a yɛdze beker dze mbrasɛm a odzi kan na ebien no abɔ bra na yɛdze sompa pɛr ama ebien nyina.
Mbueienyi
Ber a emi na me yer Lesa yetu kwan wɔ hɛn edwumayɛ ho kɔ wiadze nyina mu no, ɔyɛ hɛn enyigye na ndzinoa kɛse dɛ yehyia hom wɔ hom mboanofo akɛse na nkumaa mu. Hom sompa ma Ewuradze n’edwuma no pegya hɛn na ogyina dɛ Jesus Christ n’asɛmpa ho dasegye. Akwantu biara ekyir no yɛsan ba fie a, yɛdwendwen sɛ yɛama hom dodow a yenyaa no a.
Sɛ yerutu kwan a, mber kakrabaa na yɛwɔ ma bɔhwɛadze. Naaso, ber a ɔbɛyɛ yie no, midzi mber kumabaa wɔ m’akɔndɔdze bi ho. M’enyi gye architecture na nhyehyɛɛ ho na bregye horow yɛ m’enyikadze soronko. Bregye a ɔsensɛn hɔ no yɛ me nwanwa. Sɛ ɔyɛ Rainbow Bridge [Nyankontɔn Bredge] wɔ Tokyo, Tsing Ma Bridge wɔ Hong Kong, Tower Bridge [Abantsentsen Bredge] wɔ London, anaa binom so a mehu no, ɔyɛ me nwanwa dɛ nyimdzefo a wɔawea tum sii edwindze yinom a ɔkyer adwen mu no. Bregye horow nye hɛn kɔ mbea ahorow a nkyɛ yennkotum akɔ hɔ. (Ansaana mobɔsɔɔw do no, mehyɛ no nsew dɛ fitsi ber a mesiesie asɛm yi, bregye akwanhyia esian bi esi wɔ Baltimore. Yedzi yaw wɔ hɔn a wɔhwer hɔn nkwa na yɛdze hɛn hyɛ dzen ma ebusua ebusua a hɔn ekyir ahyehyew.)
Bregye Nwanwa bi a Ɔsensen Hɔ
Ndaansa yi, ehyiadzi ho edwuma bi nye me kɔr California, hɔ na mutwaa Golden Gate Bridge [Sika Abobow Bredge] a ɔagye dzin no, na wɔfa no dɛ nyimdzee a wɔawea a ɔyɛ nwanwa wɔ wiadze yi mu. Edwindze kakraka yi dze ne fɛw, dwuma botae, na abemfo a wɔawea nyina bɔ mu kor. Ɔyɛ bregye a ɔsensɛn hɔ a abantsentsen deda ano, a fapem akɛse gye no abamba. Abantsentsen ebien akakraka a ɔgye ndzɛmba no mu dur pue wɔ po no sorsor na wodzii kan sii. Wɔbɔ mu a wɔgye dur no a daadze ahoma a ɔtsen fa do a ɔsensɛn akwantsen kwan no a ɔwɔ ase no. Abantsentsen no tum no—ma ɔma ogyina ara yie no—ɔno nye nkongyaa a ɔwɔ bregye a nyimdzefo a wɔawea yɛe no.
Sika Abobow Bredge Mansin
Bregye no ho edwumayɛ ahyɛse mfonyin horow no gye dase fa dɛm nyimdze nhyehyɛɛ no ho. Bredge n’adze biara nya abamba wɔ dur no nsoae ho fi abantsentsen ebien a wɔsɛ, dɛ ankorankor na dɛ wɔfam ho.
Getty Images/Underwood Archives
Sɛ wowie bregye no a, ɔwɔ n’abantsentsen ahoɔdzen ebien a osi hɔ pi na wɔdze akyekyer botantsim no, ɔyɛ dza ɔwɔ ahoɔdzen na dza ɔyɛ fɛw ho mfonyin.
Ndɛ moto nsa frɛ wo ma ahwɛ bregye ɔdehye—ɔwɔ abantsentsen ebien a ɔfow kɔ sor a woesi no wɔ fapem a ɔyɛ dzen do –edua asɛmpa ahwehwɛ enyiwa mu ahwɛ.
Jesus Christ no som rokɔ ewiei no, ber a dza sesei yɛfrɛ no Dapɛn Krɔnkrɔn no, Phariseenyi bi a nna ɔyɛ mbrayimfo no bisaa Agyenkwa no asɛmbisa bi a onyim dɛ onnkotum eyi ano: “Kyerɛkyerɛnyi, mbra no mu asɛnkɛse nye mmuana? Mbranyimfo no, “sɔɔ no hwɛe” na ɔrohwehwɛ mbra mu mbuae no, ɔdze ndaadaa adwen no, onyaa mbuae nokwar, krɔnkrɔn, a ofi sor.
“Jesus see no dɛ, Dɔ Ewuradze wo Nyankopɔn, wɔ w’akoma nyina mu, nye wo kra nyina mu, nye w’adwen nyina mu.
“Iyi nye mbra no mu asɛm kɛse a odzi kan na ɔsõ.” Iyi tse dɛ hɛn bregye mfatoho no, abantsentsen a odzi kan no!
“Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho.” Iyi nye abantsentsen no a otsia ebien no!
“Mbransɛm ebien yi do na mbra na nkɔnhyɛfo no nyina sɛn.” Bregye no ne ndzɛmba nkaa no!
Hom mma yɛnhwehwɛ mbra mu asɛnkɛse ebien no, dza woeyi akyerɛ na dza Jesus Christ kãa no wɔ No mbuae no mu. Na ber a yɛyɛ dɛm no, hom mma bregye a ɔsensɛn hɔ ho mfonyin nda hom adwen do.
Dɔ Ewuradze
Dza odzi kan, fa w’akoma nyina, wo kra, na w’adwen dɔ Ewuradze.
Mbuae yi mu no, Jesus Christ fa Ahyɛmu Dadaw mu mbra mu asɛntsitsir a ɔwɔ nkyerɛkyerɛ krɔnkrɔn mu dza ɔkrɔn no. Ibɔdɔ Ewuradze dzi kan gyina w’akoma mu—wo su ankasa. Ewuradze bisa dɛ edze wo kra nyina bɔdɔ—wo nyimpadua nyina ama Nyame na ewiei no, edze w’adwen nyina adɔ—wo nyansaa na adwen. Nyame ho dɔ nnyɛ sin anaa wotwa do. Ɔyɛ ɔmmbɔadze na onnyiewiei.
Emi no, mbrasɛm kɛse a odzi kan no ibotum enya ho atsenkã dɛ ɔyɛ hu dɛ wobotum edzi do. Ndaase mu ara, mususu Jesus ne nsɛm kɔ ekyir a, mbrasɛm yi bɛyɛ dza wosuo mu a ɔyɛ yie: “Sɛ hom dɔ me a, hom ndzi me mbrasɛm do.” Iyi mubotum ayɛ. Mubotum adɔ Ɔsor Egya na Ba no, ɔno na nkyii obegya akɔ mpaabɔ, kyerɛwsɛm adzesũa, na temple nsɔree. Yedua ebupɛn du no ntuae mu dze dɔ Egya na Ɔba no, yesie Ahomgyeda no krɔnkrɔn, yɛbɔ bra pa na ahosan bra na yɛyɛ setsie.
Yɛrodɔ Ewuradze no wɔtaa dze ndzɛmba nketseaba a wɔyɛ no daa daa susu, anamɔn tu wɔ ahyɛmu anamɔn kwan do, ma mbabun no, wɔdze social media repegya kyɛn wɔdze bɛsɛɛ obi, worifi aponto ase, cene, anaa dwumadzi bea a dza ɔkɔ do mmfata, erekyerɛ obu ma ndzɛmba krɔnkrɔn.
Susu mfatoho yi a ɔyɛ awɔse yi. Nna ɔyɛ akɔnkye Kwesida ber a emi na Vance yɛbɔɔ fie kakraba bi n’abow mu. Hɛn na deaconfo quorumfo no enyi abɛda kwan dɛ yɛbɛtse nkasafua, “Meserɛ, hom mbra mu,” a ɔatsẽa mu akã no anyɛnkoyɛ mu ara a wɔdze German kasa kwan a ɔgyegye ma yebɛtse edua abow no mu. Akyerɛbaa Muella kã tukɔrfo ekunafo a wɔwɔ hɛn ward no ho. Ɔyɛ no dzen dɛ obobue abow no, osiandɛ ɔyɛ furafo. Yɛhɛɛn fie no a nkandzea nnhyerɛn yie no, okyiaa hɛn na obisaa hɛn nsɛmbisa horow tse dɛ: “Wɔfrɛ hom dɛn?. Hom ho tse dɛn? Ana hom dɔ Ewuradze? Yebuaa dɛ yɛbaa dɛ yɛrebɛgye n’akɔnkye afɔrbɔ. Nna yesusuar dze, naaso ne gyinabew daa edzi dɛ ɔyɛ bɔbɔfo, na ne gyedzi mbuae no kãa hɛn akoma kɛse: “Medze sika bi too pon no do anapa yi. Ɔyɛ me enyisɔ dɛ mebɛma m’akɔnkye afɔrbɔ. Meserɛ fa hyɛ envelope no mu na kyerɛw m’akɔnkye afɔrbɔ receipt no ma me ɛ?” No dɔ ma Ewuradze pegyaa hɛn gyedzi ber biara a yefii ne fie no.
Ɔhen Benjamin bɔɔ anohoba dɛ tum kɛse ba hɔn a wodzi mbrasɛm mu asɛnkɛse a odzi kan no do no. “Mebɛpɛ dɛ hom dwendwen nhyira nye ahomka tsebew a hɔn a wodzi ne mbrasɛm do no wɔ mu. … “Na hwɛ, woehyira hɔn wɔ adze nyina mu,, … na sɛ wosuo nokwar no mu dze kɔ ewiei a … [wɔgye] hɔn akɔ sor, [na] wɔnye Nyankopɔn aakɛtsena wɔ enyigye a onnyi ewiei da tsebea no mu.”
Yɛrodɔ Ewuradze dze hɛn kɔ onnyiewiei enyigye mu!
Dɔ Wo nyɛnko
Nkyii Jesus see dɛ, “Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho.” Iyi nye bregye n’abantsentsen a otsĩa ebien no.
Ha no Jesus kã ɔsorsor a yɛhwɛ, dze dɔ Ewuradze, na hɛn asaase do a yɛhwɛ, dze dɔ hɛn mfɛfo mbarimba na mbaa no, bɔ mu. Kor gyina kor do. Dɔ ma Ewuradze nndzi mu sɛ yɛpow dɛ yɛbɔhwɛ hɛn fipamfo a. Dɔ yi a yɛkyerɛ no Nyankopɔn ne mba nyina kã ho, a ɔyɛ banyin anaa basia, gyinabew wɔ ɔman mu, barimba anaa ɔbaa, ahonya, ne mfe a oedzi, anaa ebusuakuw mmfa ho. Yɛhwehwɛ hɔn a woepira na woebubu, hɔn a wommbu hɔn bi, osiandɛ “hɔn nyinara yɛ adze kor ma Nyame.” Yɛboa hɔn a wɔyɛ mberɛw no, ma nsa a ɔsensɛn famu no do wɔ sor, na ma nkotodwe a wɔagow no mu nyɛ dzen.”
Hom nsusu mfatoho yi: Ɔyɛɛ Onuabanyin Evans ahobow ber a onyaa nkenya dɛ ongyina ne kaar no na ɔnkɔbɔ ebusua bi a onnyim hɔn hɔn abow a onnyim mu. Ber a kunafo a ɔwɔ mba bɔbor 10 bue abow no, hɔn gyinabew mu nkõdzen na hia kɛse daa edzi ntsɛmara. Dza odzi kan no nna ɔda famu, kã fie no ho edur, a mfe pii honandua na sunsum mu som toaa do maa ebusua yi.
Enã yi a ndaase ahyɛ no mã ekyir no ɔkyerɛɛw ne nyɛnko a ɔsor somaa no ho asɛm dɛ, “Edze wo nkwa mber ahwehwɛ nketseaba dɛ hɛn mu binom. Mbrɛ mebɛpɛ dɛ mebɛtse ndzɛmba a Ewuradze wɔ kã kyerɛ wo ber a Ɔkyerɛ N’enyisɔ wɔ papayɛ a ayɛ sikasɛm mu na sunsum mu ama nkorɔfo a ɔwo na Ɔno nko bohu ho asɛm. Yɛda wo ase dɛ ehyiraa hɛn wɔ akwan pii mu, … wɔ asɛmpasomafo horow a ihwɛɛ hɔn. … Ɔyɛ na ɔyɛ me nwanwa sɛ wo nko na Ewuradze yii wo anaa ɔwo nko nye nyia otsiei.”
Christ-su ayamuyie ndzeyɛɛ na som kã yɛrodɔ hɛn nyɛnko no ho. Ana ibotum egyaa ayawdzi mu, dze atamfo hɔn bɔn akyɛ, ama fipamfo akwaaba na asom hɔn, na aboa mpanyimfo? Hom mu kor biara benya nkenya ber a hom si hom ɔdɔ abantsentsen ma hom fipamfo.
President Russell M. Nelson kyerɛkyerɛɛ dɛ: “Yɛrema binom mboa—yɛdze ahwɛyie bɔ mbɔdzen dwen binom ho tse dɛ ma yɛdwen hɛnara hɛnho no anaa ɔkyɛn mpo—nye hɛn enyikãdze. Nkankara, ber a ɔnnyɛ ber pa na ɔnnyɛ dza yɛpɛ no. Yɛdze mbrasɛm mu kɛse dza otsĩa ebien no robɔ bra no nye adze tsitsir a ɔma yɛbɛyɛ Jesus Christ osũanyi nokwafo.”
Kor Gyina Kor Do
Jesus kyerɛkyerɛɛ bio dɛ “Mbransɛm ebien yi do na mbra na nkɔnhyɛfo no nyina sɛn.” Iyi ma ntowdo papaapa. Yɛrodɔ Ewuradze na yɛrodɔ hɛnho nkorkor wɔ ngyinae kor wɔ kor do a ohia papaapa. Ama Sika Abobow Bregye no ayɛ edwuma a wɔhyehyɛɛ maa no no, abantsentsen ebien nyina hɔn ahoɔdzen kɛse no yɛ pɛr na wɔwɔ tum pɛr dɛ wɔbɔsoa ndaadze ahoma a ɔsensɛn, akwantsen kwan no, na ahɛn dodow a wɔresen bregye no hɔn mu dur. Nnyɛ nyimdzefo a wɔawea yɛɛ n’afã na afã no pɛr a, nkyɛ bredgye no botum asɛɛ, ma oebu mpo. Ama bregye biara a ɔsensɛn no bɛyɛ dza wosii dɛ ɔmbɛyɛ no, otwar dɛ n’abantsentsen bɔ mu dzi dwuma koryɛ mu. Dɛmara so, mbrɛ yebotum aka Jesus Christ do no gyina hɛn ahoɔdzen na tum a yɛdze beker dze mbrasɛm a odzi kan na ebien no abɔ bra na yɛdze sompa pɛr ama ebien nyina.
Wentwiwentwi a ɔrodɔɔ so wɔ wiadze mu no susu kyerɛ, naaso, dɛ mber binom mu yennhu anaa yɛnnkaa iyi. Binom dze hɔn enyi etsim woridzi mbrasɛm no do ara ma wɔnnkyerɛ tsema mma hɔn a wohu hɔn dɛ wɔnnyɛ tsenenee dɛ hɔn no. Ɔyɛ binom dzen dɛ wɔbɔdɔ hɔn a wɔasan mu eyi dɛ wɔnnkɔbɔ hɔn bra wɔ ahyɛmu no mu anaa mpo efi nyamesom biara ho.
N’afã kor so no, binom wɔ hɔ a wotsim kyerɛ hia ohia dɛ erodɔ binom na wɔmma ɔnnda edzi dɛ hɛn nyina yɛwɔ nkontaabu ma Nyame. Ibinom pow adwenkyerɛ no dɛ biribi wɔ hɔ a ɔyɛ nokwar turododo anaa dza oye na dza omuo na wɔgye dzi dɛ dza wɔrohwehwɛ no hɛn hɔ ara nye yebenya tsema emudzi ama hɔn na yɛagye nkaafo no hɔn nsanmuyi horow ato mu. Dza onngyina iyinom mu yie biara no botum ama wo sunsum mu bregye no akyea anaa ɔahwe ase mpo.
President Dallin H. Oaks kãa iyi ho asɛm ber a ɔkãa dɛ: “Wɔahyɛ hɛn mbra dɛ yɛndɔ obiara, osiandɛ Jesus ne Samarianyi pa abɛbu no kyerɛ hɛn dɛ obiara yɛ hɛn nyɛnko. Mbom hɛn mbɔdzembɔ dɛ yebedzi mbrasɛm a otsĩa ebien yi do no nnyi dɛ ɔma hɛn werɛ fir dza odzi kan no koraa, dɛ yɛdze hɛn akoma, akra, na adwen nyina bɔdɔ Nyankopɔn.”
Ewiei
Ntsi asɛmbisa ma hɛn mu kor biara nye, Yebesi dɛn besi hɛn ankasa hɛn gyedzi na sompa bregye—yeesi bregye abantsentsen a ɔyɛ yɛrodɔ Nyame na yɛrodɔ hɛn anyɛnkofo? Oye, yɛbɛhyɛ ase seseiara. Hɛn ahyɛse mbɔdzembɔ no bia ɔbɛyɛ tse dɛ nhyehyɛɛ a ayɛ no wɔ krataa gow do anaa bregye a yɛwɔ enyidado dɛ yebesi no ho adorɔw wɔ krataa do. Bia botae kakrabaa a yebotum edzi do na ɔbɛkã ho dɛ yɛbɛtse Ewuradze n’asɛmpa no ase yie anaa yedzi nsew dɛ yemmkobu binom atsen. Obiara nnsuar dodow anaa ɔnnyɛ panyin dodow dɛ ɔbɛhyɛ ase.
Mber rugu mu no, yɛdze mpaabɔ na nhyehyɛɛ a yɛadwen ho ara yie no, adwenkyerɛ basabasa yinom ho botum atsew. Ndzeyɛɛ fofor bɛyɛ suban. Dza ahyɛse no wɔayɛ no nsaano ara ba bɛyɛ nhyehyɛɛ mapã bi. Yɛdze hɛn akoma na adwen yɛdze som Ɔsor Egya na Ne Ba Kortonoo na hɛn nuambanyin na nkyerɛbaa a yɛnye hɔn yɛ edwuma, dze agor, na bɔ bra no na yɛdze si hɛn ankorankor sunsum mu bregye no.
Nda a ɔreba no mu, sɛ ekɛfa ɔdehye bregye a ɔsensɛn no do anaa ehu bi mpo wɔ mfonyin mu a, n’abantsentsen no wɔ sorsor no a, moto nsa frɛ wo dɛ ibɛkaa mbrasɛm akɛse ebien no a Jesus Christ kãa ho asɛm wɔ Ahyɛmu Fofor mu no. Ewuradze ne kyerɛkyerɛ nkenyan hɛn. Hɛn akoma na hɛn adwen mpegya sorsor nkɔ Ewuradze no dɔ ho na ɔdan mbra hɛn fipamfo ho dɔ ho.
Nkyɛ iyi ahyɛ hɛn gyedzi wɔ Jesus Christ na No Werdambɔ no mu dzen, a megye ho dase wɔ Jesus Christ ne dzin mu, amen.