“Hom Nyɛ Komm na Hom Nhu Dɛ Meyɛ Nyame’’
Yebotum ayɛ komm na yehu dɛ Nyame nye hɛn Ɔsor Egya, dɛ yɛyɛ Ne mba, na Jesus Christ yɛ hɛn Agyenkwa.
Ndaansa yi Ewuradze ne fie fofor bi ne ofi mbuei ma mediafo no, menye akɛtseabɛkãfo kuw bi kɔr nserahwɛ wɔ fi krɔnkrɔn no mu. Mekãa temple no botae wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ho nsɛm na me buae hɔn nsɛmbisa mapã no.
Ansaana yɛrebɛhɛn celestial dan mu no, mekyerɛkyerɛɛ mu kyerɛɛ hɔn dɛ dan yi a ɔwɔ Ewuradze ne fie no, ngyinahɔmadze mu ara no, ogyina hɔ ma asomdwee na ɔsor fie ne fɛɛfɛw a yebotum asan akɔ wɔ hɛn abrabɔ ekyir. Memaa hɛn ahɔho no hun dɛ yɛrennkasa ber a yɛwɔ celestial dan mu, mbom yɛatoa do akɔ nserahwɛ a odzi do ekyir no, ɔbɛyɛ me enyigye dɛ mibeyi nsɛmbisa biara ano.
Yepuei fii celestial dan mu ekyir no ber a yɛboaa ano wɔ bea odzi do no, mibisaa hɛn ahɔho no sɛ wɔwɔ biribi a woehu a wɔbɛpɛ dɛ wɔkyɛ a. Akyɛtseabɛkãfo mu baako a adze ekitsa no no kãa dɛ, “M’abrabɔ mu nyina minyaa sũahu biara a ɔtse dɛm. Nna minnyim dɛ beebira wɔ wiadze mu ɔyɛ komm dɛm, manngye enndzi dɛ dzinnyɛ a ɔtse dɛm botum atahye.
Nyimpa yi no nokwardzi na pefeeyɛ wɔ n’asɛmkã mu no yɛɛ me ahobow kɛse. Akɛtseabɛkãnyi n’asɛm no daa kommyɛ n’afã a ohia kɛse edzi—yebedzi hɛn sɔn mu begyabegyayɛ do konyim na yɛatwe hɛn adwen efi do.
Ber a ekyir no modwendween akɛtseabɛkãnyi n’asɛm no ho na modween ndɛ hɛn abrabɔ a ndzɛmba kɔ ntsɛntsɛm—yennyi adagyer, dede, nsesa, dandanee, na mmanee horow a ɔgye hɛn asokyɛn no—kyerɛwsɛm bi baa m’adwen mu: “Yɛ komm, na hu dɛ meyɛ Nyame.”
Mobɔ mpaa dɛ Sunsum Krɔnkrɔn no bobue hɛn mu kor biara ne ntseasee mu ber a yesusu hɛn abrabɔ mu kommyɛ krɔnkrɔn a ɔkrɔn—ɔkra no sunsum mu kommyɛ a ɔma yetum hu na yɛkaa dɛ Nyankopɔn yɛ hɛn Ɔsor Egya, dɛ yɛyɛ Ne mba, na Jesus Christ yɛ hɛn Agyenkwa. Nhyira nwanwa yi Asɔrmba nyina a wɔrobɔ mbɔdzen nokwar mu abɛyɛ “Ewuradze n’ahyɛmu mba” no nsa botum aka.
Yɛ Komm
Afe 1833 mu no, Ahotseweefo a wɔwɔ Missouri no begyinaa atseetsee dzendzen ano. Nna dɔm etu hɔn efi hɔn efiefi wɔ Jackson County, na Asɔrmba binom bɔɔ mbɔdzen dɛ wobetsim hɔnho wɔ amansin no a ɔbɛn no bi mu. Naaso atseetsee no kɔr do, na wohunahunaa hɔn pii dɛ wobokunkum hɔn. Ɔhaw gyinabew yinom mu no, Ewuradze yii nkyerɛkyerɛ yi kyerɛɛ Nkɔnhyɛnyi Joseph Smith wɔ Kirtland, Ohio:
“Dɛm ntsi, hom mma hom akoma ntɔ hom yamu wɔ Zion ho; osiandɛ honam nyinara hyɛ me nsamu; hom nyɛ komm na hom nhu dɛ meyɛ Nyame.
Megye dzi dɛ Ewuradze n’afotu dɛ “wɔnyɛ komm” n’asekyerɛ bor wɔrennkasa anaa wɔrennkekã hɔnho. Ibia No botae nye dɛ yɛbɛkaa na yɛatwer No na No tum “aber nyina wɔ adze nyina mu, wɔ gyinabew biara a yɛwɔ mu no mu.” Dɛm ntsi, “yɛ komm” botum ayɛ kwan bi a ɔrekaa hɛn dɛ yentsim wɔ Agyenkwa no do a yɛnnkɔfom dɛ Ɔyɛ ɔkra no sunsum mu kommyɛ ne fibea ankasa a ɔhyɛ hɛn dzen ma yetum dzi ndzɛmba a ɔyɛ dzen do konyim.
Hom Ntow wɔ Botan no do
Aber biara nokwar gyedzi wɔdze tsim Ewuradze Jesus Christ mu na do—No mu dɛ Onnyiewiei Egya No Dɔba a Wɔwoo no Kortoo na No do na ɔpon ndwuma a Ɔhyɛɛ no mã no.
“Na ɔama mbra no n’ewiei ho mbuae, na ɔregye hɔn a wɔwɔ gyedzi wɔ no mu no nyinara; na hɔn a wɔwɔ gyedzi wɔ no mu no bɛtakyer dza oye biara ho; dɛm ntsi odzi ma adasamba.”
Jesus Christ nye hɛn Pomfo, hɛn Ntamugyinafo, na hɛn Dzimafo wɔ Onnyiewiei Egya n’enyim na botan a ɔwɔ dɛ yɛtow hɛn abrabɔ no sunsum mu fapem.
Heleman kyerɛkyerɛɛ mu dɛ, Hom nkaa, hom nkaa dɛ hɛn Pomfo a ɔyɛ Christ, Nyame ne Ba no, no botan no do na ɔwɔ dɛ hom tow hom fapem; ama sɛ abɔnsam bɔ n’ehum dzendzen no a, nyew, n’egyen-menaba a ɔwɔ ekyinehyia ehum no mu no a, nyew, sɛ no ɔsor-bo nyinara tɔ na n’ehum kɛse bɔ dzendzenndzen hwe hom a, orinnya tum wɔ hom do nntwe hom nnkɛhyɛ awerɛhow nye mbusu a onnyi ewiei no bun ase, osian ɔbotan a hom atow hom adan wɔ do ntsi, dza ɔyɛ fapem tsim, fapem a sɛ adasamba si hɔn adan wɔ do a wɔnkɔhwe ase.”
“Christ” dɛ ɔyɛ “botan” a ɔwɔ dɛ yɛtow hɛn abrabɔ wɔ do ho ngyinahɔmadze no yɛ nkyerɛkyerɛ tsitsir. Meserɛ hom nhyɛ no nsew wɔ nyiyimu yi mu dɛ Agyenkwa no nnyɛ fapem no. Mbom, wotu hɛn fo dɛ yɛntow hɛn ankorankor sunsum mu fapem no wɔ No do.
Fapem no nye dan no n’afã wɔdze fam famu. Fapem a ɔyɛ dzen ma bambɔ fi ɔdomakoma esian na ɔsɛɛ ahoɔdzen pii binom so. Fapem pa kyekyɛ dan no mu dur no kɔ bea kɛse dze kwetsir dɛtse no a ɔwɔ ase no benya duudur mbordo na ɔma no sor bea wɔasam do a wobesi dan no wɔ.
Asaase na fapem no botum akye dzendzen a ɔrennpaa mu no ho hia papaapa sɛ dan no osi do begyina pintsinn mber rugu mu no a. Na adansi binom no, wotum dze sekyɛ na ndaadze poma esuo dan ne fapem no na “ɔbotan,” boba dzendzen no a ɔwɔ dɛtse na nwora ase no mu dzen.
Dɛm ara so, otwar dɛ hɛn abrabɔ fapem no suo Christ botan no mu sɛ yebegyina pintsinn a. Agyenkwa n’asɛmpa a wɔdze asan ananmu aba no ayɛdze na ahyɛmudzi no wobotum dze atoto sekyɛ na daadze poma no a osuo dan no ɔbotan no a wɔwɔ n’ase mu. Ber biara nokwar mu ara yɛgye, yɛdwen ho, yɛkaa, na yekenyan ahyɛmudzi krɔnkrɔn no, hɛn sunsum mu sekyɛ no suo Jesus Christ “botan” no mu pintsinn.
“Dɛm ntsi nyia ɔgye Nyankopɔn dzi no nya enyidado a osi pi dɛ wiadze papa bi wɔ hɔ ma no, nyew, bea a ɔwɔ Nyankopɔn n’abanyimfa hɔ no mpo, dza yɛnam gyedzi do dze nya enyidado no, yɛ sekyɛ dze ma adasamba hɔn akra, dza ɔma wohu nokwar no na wogyina pintsinn, na daa wɔbor do wɔ ndwuma pa mu, na ɔgye hɔn ma wɔhyɛ Nyankopɔn enyimnyam.”
Nkakrankakra na ɔrokɔ do no “mber rugu mu no,” “ɔbra pa [siesie hɛn] adwen mu a onngyaa da,” hɛn “awerɛhyɛmu [bɔkɔ do ahyɛ dzen] wɔ Nyame enyim,” na “ Sunsum Krɔnkrɔn no [ayɛ hɛn] anyɛnkoyɛ aber nyina.” Yegyina, yɛgye ndwow, yetsim, na yetsintsim. Ber a hɛn abrabɔ fapem yɛtow wɔ Agyenkwa no do no wohyira hɛn dɛ “yɛbɛyɛ komm”—ama yenya sunsum mu awerɛhyɛmu dɛ Nyankopɔn yɛ hɛn Ɔsor Egya, na Jesus Christ nye hɛn Agyenkwa.
Mber Krɔnkrɔn, Mbea Krɔnkrɔn, na Fie no
Ewuradze ma hɛn mber krɔnkrɔn na mbea krɔnkrɔn ebien yi nyina dze aboa hɛn ma yenya na yesũa hɛn akra no mu kommyɛ ho sũahu.
Mfatoho, Ahomgyeda yɛ Nyame ne da, mber krɔnkrɔn a wɔdze esi hɔ dɛ yɛnkaa Egya no Ne Ba ne dzin na yɛnsɔr no, yɛnyɛ asɔfodzi ayɛdze horow, na yengye na yenkenyan ahyɛmudzi krɔnkrɔn. Dapɛn biara no yɛsɔr Ewuradze wɔ hɛn fie adzesũa mber na dɛ “ahotsewfo no kuromamfo” so wɔ sacrament nhyiamu mber na nhyiamu nkaa. Ne da krɔnkrɔn no, hɛn adwendwen, ndzeyɛɛ na enyim su yɛ nsɛnkyerɛdze a yɛyɛ ma Nyame na dza ɔkyerɛ hɛn dɔ a yɛwɔ ma No. Kwesida biara, sɛ yɛ pɛ a, yebotum ayɛ komm na yehu dɛ Nyame nye hɛn Ɔsor Egya, dɛ yɛyɛ Ne mba, na Jesus Christ yɛ hɛn Agyenkwa.
Hɛn Ahomgyeda a yɛsɔr no dza ɔda edzi tsitsir nye “[yɛbɔ]kɔ mpaabɔ fie wɔ [Ewuradze ne] da krɔnkrɔn no mu [ye]kedzi sacrament no.” “Mpaabɔ [efie]fi” no a yɛboa ano Kwesida no yɛ hɛn nhyiamu adan nye mbea binom so a wɔapen do no, yɛ obu, asɔryɛ, na adzesũa—mbea krɔnkrɔn. Nhyiamu-dan na bea biara so no wɔdze asɔfodzi tumdzi dze tu si hɔ dɛ bea a Ewuradze no Sunsum botum atsena na bea a Nyame ne mba botum aba “[e]bohu hɔn Pomfo no.” Sɛ yɛpɛ a, yebotum ayɛ komm” wɔ hɛn krɔnkrɔn mbea a yɛsɔr no na yehu no nokwar mu ara dɛ Nyankopɔn nye hɛn Ɔsor Egya, dɛ yɛyɛ Ne mba, na Jesus Christ yɛ hɛn Agyenkwa.
Temple no yɛ krɔnkrɔn bea kor so a woetu esi hɔ tsitsir ara dɛ wɔdze rosom Nyame na onnyiewiei nokwar no nsũae ho. Ɔson mbrɛ yesi dwen, yɛyɛ hɛn ndzeyɛe, na yɛhyɛ ntar wɔ Ewuradze fie kyɛn mbea binom a yɛtɔ dɛ yɛkɔ. Ne fie krɔnkrɔn mu no, sɛ yɛpɛ a, yebotum “ayɛ komm” na yehu dɛ Nyankopɔn yɛ hɛn Ɔsor Egya, dɛ yɛyɛ Ne Mba, na Jesus Christ yɛ hɛn Agyenkwa.
Mber krɔnkrɔn na mbea krɔnkrɔn no botae tsitsir ara yɛ kor noara: dɛ yɛbɔkɔ do dze hɛn asokyɛn etsim Ɔsor Egya na Ne nhyehyɛɛ, Ewuradze Jesus Christ na No Werdambɔ, Sunsum Krɔnkrɔn no ne ntsewho tum do, na anohoba horow a ɔnye Agyenkwa n’asɛmpa a wɔdze asan ananmu aba no ayɛdze na ahyɛmudzi krɔnkrɔn.
Ndɛ mibesi do akã fapem bi a metsĩ mu akã ho asɛm pɛn. Ewiei no hɛn efiefi wɔdɛ ɔyɛ mber krɔnkrɔn na bea krɔnkrɔn ebien no nyina bea a ebusua ebusua botum “ayɛ komm” na woehu dɛ Nyankopɔn nye hɛn Ɔsor Egya, dɛ yɛyɛ Ne mba, na Jesus Christ yɛ hɛn Agyenkwa. Yerifi hɛn efiefi akɔ sɔr Ahomgyeda no na wɔ Ewuradze fie mu no yɛ dza ohia mapã. Mbom sɛ yɛsan ba hɛn efiefi a, yɛdze sunsum mu nhumu na ahoɔdzen a yenya no wɔ dɛm mbea krɔnkrɔn na dwumadzi horow no ba, nna nkyii yebotum ama hɛn ntsimii wɔ abrabɔ ne tsirmpɔw do no abamba na yedzi nsɔhwɛ horow a wɔadɔɔsõ wɔ hɛn wiadze a wɔahwe ase yi do no konyim.
Hɛn sũahu a yɛkɔ do nya wɔ Ahomgyeda, temple, na fie no wɔdɛ ɔdze Sunsum Krɔnkrɔn no tum no hyɛ hɛn dzen, a yenya ahyɛmudzi nkitahodzi a ɔkɔ do a yɛnye Egya na Ɔba no nya a ɔyɛ dzen na yenya “enyidado a ɔhyerɛn na odzi mu” wɔ Nyankopɔn n’onnyiewiei anohoba mu.
Ber a fie na Asɔr wɔabɔ mu kor wɔ Christ mu no, wofi mbeambea hiahia hɛnho naaso wɔremmem hɛn wɔ adwen na akoma mu. Hɛn gyinabew na ɔhaw horow bɛma hɛnho akyer hɛn, naaso yɛremmpa aba. Wɔtaa hɛn do, naaso yebohu dɛ yɛnnyɛɛ ankonam. Yebotum enya sunsum mu ahoɔdzen dze abɛyɛ na yegyina pintsinn, na nokwar mu.
Anohoba na Dasegye
Mobɔ anohoba dɛ sɛ yɛtow hɛn abrabɔ ne fapem wɔ Jesus Christ “botan” no do a, Sunsum Krɔnkrɔn no behyira hɛn ma yenya ankorankor na sunsum mu ɔkra no kommyɛ a ɔma yetum hu na yɛkaa dɛ Nyankopɔn yɛ hɛn Ɔsor Egya, dɛ yɛyɛ Ne mba, na Jesus Christ yɛ hɛn Agyenkwa, na wobotum ehyira hɛn ma yedzi ndzɛmba a ɔyɛ dzen do konyim.
Megye dase enyigye mu ara dɛ Nyankopɔn yɛ hɛn Ɔsor Egya, dɛ yɛyɛ Ne mba, na Jesus Christ yɛ hɛn Pomfo na hɛn nkwagye no “botan.” Megye ho dase wɔ Ewuradze Jesus Christ ne dzin krɔnkrɔn no mu, amen.