Enyigye a Ɔkrɔn
Hɛn nyina nhwehwɛ dɛ yebenya enyigye a ɔkrɔn a ofi yɛdze hɛn abrabɔ som hɛn Ɔsor Egya na No Dɔba.
Ɔayɛ me adom kɛse dɛ makasa wɔ wiadze mfɛndzanan ehyiadzi mfe eduosa yi. Dɛm mber yi mu, nkorɔfo dodow a wɔwɔ wiadze nyina mu ebisa me nsɛmbisa a ɔfa dza makã no ho. Sesei, asɛmbisa kor bi na wɔtaa bisa. Ɔtaa dɛ ɔyɛ biribi tse dɛ iyi: “Elder Uchtdorf, metsie ndaasa yi wo kasaa no, mbom … manntse hwee ammfa wimuhɛn ho.”
Oye, fi ndɛ rokɔ no, bia ɔbɛkyɛr kakra ana maatse dɛm asɛmbisa no.
“Maafow Sor Akɔ Mununkum a Ewia ne Kan Edua Mu.”
Ɔyɛ dzen dɛ ibegye edzi dɛ mfe 120 ara na abɛsen ber a Wilbur na Orville Wright dzii kan tuu wimuhɛn dze faa Kitty Hawk, North Carolina ahwea sar no do. Wimuhɛn akwantu anan dɛm Mumu da no sesãa wiadze na obuei kwan maa wiadze abaefor edwindze kɛse mapã no.
Dɛm ahyɛase mber no, nna wimuhɛn akwantu yɛ esian. Nuambanyin no nna wonyim iyi. Na hɔn egya, Milton so nyim. Nokwar, nna osuro dodow dɛ ɔbɔhwer ne mbabanyin beenu nyina wɔ wimuhɛn akwanhyia mu dɛm ntsi ɔmaa wɔbɔɔ no anohoba dɛ wɔnnkɔbɔ mu etu wimuhɛn dabiarada.
Na wɔannyɛ da—gyedɛ kor pɛr. Kitty Hawk abakɔsɛm da ne mfe esuon ekyir no, Milton Wright afei ɔpen do na ɔhwɛe ber a odzi kan a Wilbur na Orville bɔɔ mu tuu wimuhɛn. Wobesii famu ekyir no, Orville tuu n’egya n’aso dɛ ɔnye hɔn ntu nkɔ kor pɛr na ɔnhwɛ mma ho mbrɛ ɔtse.
Ber a wimuhɛn to tui fii famu no, mfe-82 Milton n’egyigyee akwantu no ho ara ma suro biara fii no mu. Orville dzii ehurusi ber a n’egya tsẽaa mu enyigye mu ara, “Orvilee, kɔ sor, kɔ sor!”
Iyi yɛ ɔbarimba a ɔpɛ m’akoma mu adze!
Bia siantsir a me mekasa fa wimuhɛn ho nkorkor nye dɛ minyim Wrightfo no hɔn atsenkã no ho biribi kakra. Emi so “mafow sor efi asaase do, afefa wimu a m’antsɛban ayɛ hyɛnhyɛn.”
Wright enuanom no hɔn wimuhɛn akwantu a odzi kan no, a osii mfe 37 ara ana wɔrowo me no, buei akwantu, anwanwadze, na enyigye mbobow dɛɛdɛw baa m’abrabɔ mu.
Naaso, ma dɛm enyigye no yɛ nwanwa dɛn ara mpo no, enyigye a ɔkrɔn mpo wɔ hɔ. Ndɛ, medze sunsum a Milton Wright enyigye mu ara dze tsẽa mu dɛ, “Orville, kɔ sor, kɔ sor,” no, mebɛpɛ dɛ mekasa fa enyigye yi a ɔkrɔn yi ho asɛm—bea a ofi ba, mbrɛ osi hɛn hɛn akoma mu, na mbrɛ yebotum enya ho sũahu mbordo.
Nyimpa Asetsena ne Tsirmpɔw
Hɛn nyina yenyim dɛ obiara pɛ dɛ n’enyi bɛgye. Naaso, hɛn nyina yenyim dɛ nnyɛ obiara na n’enyi gye Ɔyɛ yaw dɛ nkorɔfo dodowara no, ɔyɛ dzen dɛ hɔn enyi bɛgye.
Dɛn ntsi a? Sɛ nyimpa benya ahomkã nye dza yɛhwehwɛ papaapa a, dɛn ntsi na yenntum nnya? Sɛ muruntwa ndwom bi do tsia a, bia yɛahwehwɛ dɛwdzi wɔ mbea a omuo mu.
Henfa na Yebotum Enya Ahomka?
Ansaana yɛbɛpɛnsampɛnsam mbrɛ yebesi benya enyigye no, hom ma mengye nto mu dɛ abagura yarba na adwen na nkã tse mu ɔhaw horow yɛ nokwar, na no mbuae nnyɛ “Bɔ mbɔdzen ma w’enyi ngye” ara. Nnyɛ mo botae ndɛ nye dɛ mubɔhuan adwen mu yarba do anaa medze bedzi fɛw. Sɛ hom hyia ɔhaw yinom bi a, menye hom dzi awerɛhow, na migyina hom nkyɛn. Nkorɔfo binom no, wɔrohwehwɛ enyigye bia wɔdze bɛkã ho ahwehwɛ mboa fi adwen mu apɔwmudzen edwumayɛfo a wɔdze hɔn abrabɔ nyina yɛ hɔn eduryɛ a ohia no hɔ. Ɔsɛ dɛ yɛda ase wɔ dɛm mboa no ho.
Abrabɔ nnyɛ atsenkã akɛse ntoatoado ara. “Na ohia dɛ adze nyina nya dza otsia no.” Na sɛ Nyankopɔn Nankasa sũ, dɛ mbrɛ kyerɛwsɛm no se a, nna nokwar ara dɛ emi na ɔwo so yebosũ. Iridzi awerɛhow nnkyerɛ dɛ edzi nkõgu. Abrabɔ yi mu no, annyɛ yie koraa no, enyigye na awerɛhow yɛ adamfo a wɔnntsetseew hɔn mu. Tse dɛ hom nyina no, menya me kyɛfa wɔ abagura, awerɛhow, na mfehoekyir.
Naaso menya enyimnyam ahyɛse a ɔdze enyigye nwanwa hyɛ m’akoma mu mã a munntum nnhom do. Mekopue do ama moho dɛ asomdwee awerɛhyɛmu fi yɛrekã Agyenkwa no do na yɛrenantsew N’Akwan mu.
Asomdwee a Ɔdze ma no nntse dɛ dza wiadze dze ma no. Oye koraa. Ɔyɛ krɔnkrɔn na ɔkrɔn. Jesus see dɛ, “Emidze mebae ma woeenya nkwa, na woeenya no mbordo.”
Jesus Christ n’asɛmpa yɛ nokwar “enyigye kɛse ho asɛmpa no!” Ɔyɛ enyidado a onnyi kãbea! Amandzɛɛbɔ a kɔndua no soa na adze dur ne mma do. Ɔfa kan ne ntserɛwee. Ɔfa ɔsor nkamfo, ntseasee a ɔkrɔn, ahyɛmudzi krɔnkrɔn, onnyiewiei bambɔ, na enyigye daapem ho!
Ɔkã Nyankopɔn ne nhyehyɛɛ ma Ne mba ho ara yie. Iyi ntsi na wɔbɔɔ wo—”ama enya enyigye”! Wɔwen wo ma iyi ho ntsi
Hɛn Egya a ɔwɔ Sor mmfaa enyigye kwan no nnsiei. Ɔnnyɛ dza ɔyɛ nsumae. Obiara nsa botum akã!
Wɔdze bɔ hɔn a wɔnantsew osuanyiyɛ anamɔn kwan no do, wodzi ne nkyerɛkyerɛ na Agyenkwa Ne fasusu do, wosie Ne mbrasɛm, na wodzi ahyɛmu a wɔnye Nyame dzi no nyi no anohoba. Anohoba nwanwa nye yi!
Nyame Wɔ Biribi Mbordo Dze Ma
Hɛn nyina yenyim nkorɔfo a wɔse wonnhia Nyame ana hɔn enyi agye, na sɛ wonnyi nyamesom mpo a hɔn enyi botum agye.
Megye hɔn atsenkã yinom to mu na medze obu ma hɔn. Hɛn dɔfo Egya a ɔwɔ Sor pɛ dɛ Ne mba nyina nya enyigye a wobotum enya, ntsi Ɔdze ndzɛmba a ɔyɛ fɛw, enyigyedze a ɔsɛ fata, “dɛ ɔnsɔ enyi na ɔmfa dɛw nhyɛ akoma mu.” Emi no, wimuhɛn tu dze enyigye kɛse brɛɛ me. Binom nya no wɔ ndwom mu, wɔ adorɔw mu, wɔ enyikãdze horow mu, anaa wɔ abɔdze mu.
Yɛroto nsa afrɛ obiara na yɛrekyɛ Agyenkwa N’enyigye kɛse ho asɛmpa no, yɛmmbɔ enyigye farbaa yinom mu biara nngu. Dza yɛrekã no tsiabaa ara nye dɛ Nyame wɔ biribi mbordo dze ma. Enyigye a ɔkrɔn na ɔyɛ nwanwa—enyigye a ɔbor biribiara a wiadze yi wɔ dze ma do. Ɔyɛ enyigye a ɔsɔw akomayaw, ohwira awerɛhow mu na ohuan ankonamyɛ do.
Wiadze enyigye dze, yɛdze to ho a, ɔnnkyɛr. Onnkotum. Dɛ mbrɛ abɔdze tse no wiadze do ndzɛmba nyina nyin, wɔporɔw, hwer, anaa ne dɛw no fi mu. Mbom nyame mu enyigye yɛ onnyiewiei, osiandɛ Nyankopɔn yɛ onnyiewiei. Jesus Christ baa dɛ Ɔrebepegya hɛn efi honandua mu na ɔdze dza ɔmmporɔw asesa dza ɔporɔw ananmu Ɔno nko na Ɔwɔ dɛm tum no, na Ɔno nko n’enyigye na ɔwɔ hɔ daa.
Sɛ etse dɛ enyigye a ɔtse dɛm yi mbordo botum aba w’abrabɔ mu a, moto nsa frɛ wo dɛ ibɛhyɛ akwantu ase a ibɛkã Jesus Christ na No kwan no do. Ɔyɛ abrabɔ ber nyina mu—na n’ekyir akwantu. Hom mma munsusu ahyɛse anamɔntu wɔ akwantu a ɔsɛ fata a yɛdze kopue enyigye mapã do.
Hom Ntwe Mbɛn Nyame
Ana hom kaa ɔbaa no a ahyɛmu Fofor mu no a ɔsɔɔw bɔgyaagu yarba mfe 12 no? Nna ɔahwer dza ɔwɔ nyina wɔ eduryɛfo hɔ, mbom yarba no yɛɛ kɛse. Nna ɔatse Jesus ne nkã; No tum a Ɔdze sa yarba no nna ayɛ atsenkã. Naaso ana Obotum asa no yarba a? Obesi dɛn bɛbɛn No mpo. Ne yarba no ɔnam Moses mbra ntsi nna noho “nntsew,” na dɛm ntsi ɔsɛ dɛ ɔtwe noho fi nkaafo ho.
Ɔbɔkɔ Ne nkyɛn wɔ guado na obebisa ayarsa no nnyɛ dza wobisa ho asɛmbisa.
Ɔkɔɔr do no, ɔdween dɛ, “Sɛ meka n’atar nko a, mo ho bɛyɛ me dzen”
Ekyir no, ne gyedzi hyɛɛ no suro do. Ogyinaa akokodur mu tsiaa hɔn a wɔbɛkasa etsia no na ɔkɔr kan kɔr Agyenkwa no ne nkyɛn.
Ewiei no, nna ɔabɛn. Ɔtseen ne nsa.
Na onyaa ayarsa.
Ana hɛn nyina yɛnntse dɛ ɔbaa yi wɔ kwan bi do a?
Bia siantsir pii bɔwɔ hɔ a yɛtwentweɔn dɛ yɛbɔtwe abɛn Agyenkwa no. Bia yebehyia binom a wɔserɛw hɛn anaa wobu hɛn fɔ. Hɛn ahopɔw mu no, bia yebobu enyi egu biribi a ɔyɛ ketseaba na ɔsom bo kɛse do. Bia yɛbɔdwen dɛ hɛn gyinabew mma yɛmmfata dɛ yebenya N’ayarsa—dɛ hɛn ntamu no war dodow anaa hɛn bɔn horow dɔɔ sõ dodow.
Tse dɛ ɔbaa yi, mesũa dɛ sɛ yɛtwe bɛn Nyame na yɛtsen dze hɛn nsa kã No a, yebotum enya ayarsa, asomdwee, na enyigye ampaara.
Hwehwɛ
Jesus kyerɛkyerɛɛ dɛ, “Hom nhwehwɛ na hom bohu.”
Megye dzi dɛ kasasin tsiabaa yi nnyɛ sunsum mu anohoba nko; ɔyɛ nokwarsɛm.
Sɛ yɛhwehwɛ siantsir a hɛn bo bofuw, yɛgye kyim, yenya ayawdzi anaa yɛyɛ ankonam a, yebohu no so.
Naaso, sɛ yɛhwehwɛ enyigye—sɛ yɛhwehwɛ siantsir horow a yedzi dɛw na ahomkã mu ara yɛaka Agyenkwa no do a, yebohu ɔno so.
Yɛnntaa nnhu dza yɛronnhwehwɛ.
Ana hom rohwehwɛ enyigye a?
Hom nhwehwɛ na hom bohu.
Hom Nsoasoa Dza Ɔyɛ Dur Mma Homho Nkorkor
Jesus kyerɛkyerɛɛ dɛ, “Ɔma yɛ nhyira kyɛn ɔgye.”
Ana obotum aba dɛ yɛrohwehwɛ enyigye no, kwan tɔɔtsen a yɛdze bohu nye yɛbɛma binom hɔn enyi agye?
Enuanom na nkyerɛbaa minyim na hom nyim dɛ iyi yɛ nokwar! Enyigye tse dɛ isiam kotoku anaa ngo bɔdambɔ no a annsã no. Yɛkyɛ enyigye mapã no a, ɔyɛ mbɔho.
Onnhia biribi kɛse anaa dza ɔkyer adwen mu.
Yebotum ayɛ ndzɛmba nketseaba.
Tse dɛ yɛdze hɛn akoma nyina robɔ mpaa ama obi.
Yɛrekamfo obi nokwar mu.
Yɛroboa obi ma oenya atsenkã dɛ wɔma no akwaaba, wobu no, noho wɔ mfaso, na wɔdɔ no.
Yɛrekyɛ kyerɛwsɛm a yɛpɛ na n’asekyerɛ ma hɛn.
Anaa yeretsie hɔn ara mpo no.
“Ber biara a hom bɔsom hom nuanom no nna hom Nyame ara na hom rosom no no.” Na Nyankopɔn bɛma w’ayamuyie ho akatua mbordo. Enyigye a ema nkaafo nya no, wɔdze bɛsan ama wo wɔ “esusudze pa, a wɔahom do, na wɔawosow no ma ebu do mu.”
Nkyii Ebɛnadze na Yɛnyɛ?
Nda, adapɛn, na abosoom a, ɔreba no mu no, ma monto nsa mfrɛ wo dɛ:
-
Ebedzi mber a edze w’akoma nyina robɔ mbɔdzen atwe abɛn Nyame nokwar mu ara.
-
Hwehwɛ no enyiber do, daa daa dza osi a ɔyɛ enyidado, asomdwee na enyigye.
-
Ma hɔn a woetwa wo ho enhyia no hɔn enyi ngye.
Mo nuanom na nkyerɛbaa adɔfo, anyɛnkofo adɔfo, ber a hom hwehwɛ Nyame n’asɛm mu dze enya Nyame n’onnyiewiei nhyehyɛɛ ne ntseasee ho a ɔdɔ bun mu no, na hom bɔ mbɔdzen dɛ hom bɛnantsew N’Akwan mu no, hom benya “Nyankopɔn asomdwee a ɔtra ntseasee nyina no,” wɔ awerɛhow mber mpo mu. Hom benya Nyame no dɔ a ɔbor adze nyina do ho esusudze kɛse a ɔreyeyer wɔ hom akoma mu. Celestial anapa kan no bɛhɛɛn hom nsɔhwɛ sum no mu, na hom bɛhyɛ ase atse enyimnyam na anwanwadze a wonnhu a onnyi kãbea, emudzi, ɔsorsor dze. Hom bɛtse dɛ hom esunsum rema do fi asaase a ɔtwe no adze no.
Na tse dɛ Milton Wright dɔfo no, bia hom bɛma hom ndze do wɔ enyigye mu atsẽa mu dɛ, Egya kɔ sor, kɔ sor!”
Hɛn nyina nhwehwɛ dɛ yebenya enyigye a ɔkrɔn a ofi yɛdze hɛn abrabɔ som hɛn Ɔsor Egya na No Dɔba. Iyi nye me mpaabɔ na me nhyira wɔ Jesus Christ ne dzin mu, amen.