K’eyaged boech Talin e Togopluw Rodad
Rayog ni ngad k’eyaged—ni rib too’aer—gubin e pi’nen ko togopluw ngak Got ulan e yafos rodad nge thilyegen ko gum’ircha’dad ni m’agaen’ nge tafney ni m’agaen’.
Ulan fare Babyor ku Mormon chuchugur 90 e duw umon ni gargeleg Kristus, fare pi fak ku Pilung Mosiah ni kar tabab e mission ko 14 e duw rorad ngak e fapi Lamanites. Boʼor e murwel ufithikʼ boch e duw e kar magawongad ni ngar auyweged e pi gidiiʼ nib Lamanite ni ngar thapeged a mich ulan e machib rokʼ Kristus. Ngiyalʼ ney, machane, udakaen e ayuweg nib maʼangʼang rokʼ fare Kan ni Thothup, biyuʼ e pi Lamanite ni kar thilyegrad ngar manged e gachelpen ku Yesus Kristus.
Gadad ma biʼeged, “Ma woed nib fos Somoel, e aram fini yoʼor e piʼin ni michaenʼraed, ara aram rogon fini yoʼor e piʼin ni ke tamilang laniyaenʼraed ko tin riyulʼ, u dakean e machib ku Ammon nge pi walagen, u rogon e nangaenʼ ko yiʼiy nge prophecy, nge fare gelingin Got e gagyeg nag e maʼangʼang u dakeanraed—arragon, gube yoeg ngomed, ni woed nib fos Somoel, e aram rogon fini riyulʼ ni michaenʼ fapi Lamanites ko machib roraed, me michaenʼraed ngakʼ Somoel, mar pired riy ni dar mul gaed.”
Piʼnen ni gaʼfan nifan e mich nib athamgil rorad ko biney e weliy ulan bin e verse: “Ya ra manged bogi gidiiʼ ni rib matʼaw; mar tayed nga butʼ e pi talin e togopluw roraed, ni arame dakur togopluw gaed ngakʼ Got, ara ngakʼ reb i walagraed.”
Biney e thin ni “pi talin e togopluw” e ba fanathin ma kuba bugithin. Ba yip fan e pi sayden nge reb e talin e mael machane ya ku aram rogon e dar folgad ngak Got nge motochiyel rokʼ.
Pilung ko pi Lamanite ni kar thilyeged ke weliy ko bin b’aray: “Ere chiney e musap gaed, gimed pi walageg, … faʼanra kemus rogon ni rayog ni ngad rinʼed … ni ngad kalgaed ngaenʼdaed ko gubin e pi denen rodaed nge pi mathang pogofan nib yoʼor ni kad rinʼed, ni nge chuweg Got u lan gumʼirchaʼdaed ya karimus chirogon ni rayog ni ngad rinʼed, me yog ni ngad kalgaed ngaenʼdaed nib felʼ rogon u mit Got ni nge yog ni chuweg e alit rodaed.”
Mu lemnag marngaʼagen e thin rok e pilung—yul’yul’ ko kalngaen’ roraed ke thapeged e n’agfan ko pi denen roraed, machane Got e ki fek alit riy ko denen ney nge ba’adag roraed ni ngar denen raed ko gum’ircha’raed. Woed ni ngam nanged, dubrad ni ngar sul nga e gidii’ rorad kafram nge togopluw ngak’ Got, ere ni kar k’eyaged e talin e mael. Nge napan ni kar k’eyaged e talin e mael, udakaen e gum’ircha’raed ni kar thilyeged, kar k’eyaged e ba’adag roraed ni ngar denen gad.
Gaddad ra fithed ngodad mang e pi’nen rayog ni ngad rrin’ed ningad folgad rogon ko ra’ney, ni “tayed nga butʼ e pi talin e togopluw [rodad],” demtrug e pi’nen, nge manged “me michaenʼraed [ngakʼ] Somoel,” ere fare alit riy ko denen nge baʼadag dad ni ngad denen gad ra chuw ko gumʼirchaʼdad nge dabda mul gaed.
Togopluw rayog ni nge mang e tin nigam sap fa dabiyog ni ngam sap. Susun nib mangil ko dugliy u wun’ ni nge togopluw ngak’ Got ir Lucifer, ni, umon e yafos ney, ke togopluw ngak’ e wo’en e bayul rok’ Chitimangiy nge tinning ngalang reb e gidii’ ni ngar togopluw raed, “nge, u rran nem, bo’or ni kan fol ngak.” Rib moem ni ngad nanged e gelngin bachane yul’yul’ ko togopluw rok’ u rran rodad e daba’ney e rran.
Ba’ dalip e to’ogor ku Kristus ulan Fare Babyor ku Mormon—Sherem, Nehor, and Korihor—ma pii’ e fil nib mangil marnga’agen e togopluw ngak Got. Machib rok’ Nehor nge Korihor me weliy ni darkiriy e denen; ere, dariy’fan e kal’ngaen’ nge dakiriy’ e Tathapeg. “Ere gubin e gidii’ ma be mon’og u rogon e llowaen’ rok’, ere… gubin e gidii’ ma rayog rok’ ban’en u rogon gelingin; ma demutrug ko mang e [rarin’] bee’ ma de kireb.” Fare gidii’ nib to’ogor ku Kristus ma siyeg e gelngin ko taliw, me weliy e pi gam’ing nge michmicheg “ni sunmiy e pi priest ni kakrom, ni ngar gagyeg niged gelingraed nge mat’awngiraed u dakeanraed.”
Bay e susun ulan e rran ko tin tomur e rran marnga’agen e togopluw i ir e yat rok’ William W. Phelps. Phelps e un ko Galasia ko 1831 min pi reb e murwel ngak ni nge mang printer ko Galasia. Ke thilyeg bochi e pi babiyor rok’ e Galasia, nike yol’ bo’or e pi hymn, nge ke mang e tayoloy rok’ Joseph Smith. Machane, ke togopluw ngak fare Galasia nge fare Profet, nge ke baen marnga’agen e Joseph Smith ulan e court u Missouri, nge thin rok’ nike ayuweg ni ngar tay fare Profet ulan e kalbus.
Ta’aboch riy, Phelps nike yol ngak’ Joseph nge wenig nag ngak nifan e n’agfan. “Gu manang ko mang e be buch rog, ma gamanang, ma Got e manang, ma gu ba’adag ningan thapageg ni fa’anra ayuwegneg fapi tafagar rog.”
Ulan e fulweg rok’ fare Profet nike yoeg: “Riyul’ ni kug thapeged bo’or e magawon bachane e pi’nen ni kam rrin’. … Machane, binem e ke buch, e laniyaen’ facha’ ni Chitamangiy ni ke buch, nge dawo’ ni ngad m’aed. … Moy, walageg nib t’uf rog, ke yaen e mael, tafagar ni somm’on nge tafagar ni tomur.”
Udakaen e yul’yul’ ko kalngaen’ rok, William Phelps nike “k’eyag e talin ko togopluw,” nge nike mang e chongin bayay, nge de mul bayay.
Sana ni rib’ kireb e rogon ko togopluw ngak Got, ni, napan dabi ngongol—me dabi fol e rogon ni ba’adag ulan e yafos rodad. Bo’or ni dabun ni ngar un’ed e togopluw machane nira me’leg ni ngar togopluw e rogon ni ba’adag nge thin ku Got napan ni ngar ranoed nga dakaen e kanawo’ nge dabug e fonow nib thothup. Gube puguran ba tang ni yoen’ Frank Sinarta me bay e pi thin ney, “Kug rrin’ u rogon rog.” Riyul’ rayog ni ngam thapeg e ba’adag romed nge me’leg romed, machane nifan e tin ko thap nge yafos bin manimus, e tang rodad thingarda managed “Kug rrin’ u rogon rok Got,” bachane dariy’ reb e rogon.
Mu lemnag, e, susun rok’ Tathapeg nifan ko tawfe. Nike tawfe nag bachane ni nge dag ngoadad e ir ba’adag ni nge fol ngak’ e Chitimangiy.
Me dag ko gidiiʼ, nu rarogon e dowef e sobutʼ nag ir riy u mit e en Chitamangiy, me micheg ngakʼ e en Chitamangiy niʼir e ra liyoer ngakʼ u dakean e fol ko pi motochiyel rokʼ. …
“Me gaʼar ngakʼ e gidiiʼ: Mu leaked gag. Ere, pi walageg nib tʼuf rog, rayog ni ngad leaked Yesus ni faʼanra dabi mʼagaenʼ daed ngay ni ngad fol gaed ko fapi motochiyel rokʼ e en Chitamangiy?”
Dakiry e “rogon rog” fa’anra gadad ra foled e susun rok’ Kristus. Guy rogon ni nge pir’eg reb e wo’en nga Tharmiy e rib kireb ni woed ni nge murwel’ udakaen e Wulyang ko Babel nge dabi thapeg Kristus nge wo’en e thap Rok’.
Fare sayden nge reb fapi talin ko mael ni kar k’eyaged fapi Lamanite ney ie e talin ko togopluw bachane e rogon ni kar use nag raed. Ta’abrogon e talin ko mael ulan e pa’raed fapi fakrad, ni ngar yororiy e tabinaw nge puf matwoy roraed, ni dabi pi talin ko togopluw ngak got. Ta’abrogon e ba riyul’ nifan e talin e mael ulan e pa’ raed fapi Nephites: “Ya gathi yaed be cham ni nge gaaʼ lungraed ara gelingin ni nge yog ngoraed, ya ur cham gaed ni fan ko pi tabinaew roraed nge pi puf-matʼawon roraed, nge pi leʼengiraed nge bitir roraed, nge gubin banʼen roraed, arragon, ni fan ko pi gamʼingin e liyoer roraed ngakʼ Got nge galasia roraed.”
U reb boed rogon, bay e piʼnen ulan e yafos rodad rayog nib felʼ rogon machane rayog ni ngar feked e rogon nib kireb nge manged e “talin ko togopluw.” Fapi thin rodad, ko wok, rayog ni nge ayuweg fa piiʼ kireb nag. Woed James ni keyog:
“Machane dariy be’ ni ka’a yag rok ni nge llowan’nag bolowthey. Ya ban’en nib kireb ndabiyag ni ngu’un gagiyegnag, ma ba sug ko yub ni yira yim’ ngay.
“Gadad ma maruwel ngay ngad pininged e magaer ngak e Somol rodad ni ir e Chitamangiy, ma ka gadad ma yibilay e girdi’ ngay ni nge buch ban’en rorad, ni girdi’ nsunumegrad ni yad bod ya’an Got.
“Taab l’ugunef e ir e gadad be pining e magaer riy ngak Got ma ku ir e gadad ma yibilay e girdi’ ngay ni nge buch ban’en rorad. Pi walageg ni girdi’en Kristus! Dab mu yodoroygad.”
Bay bo’or e pi’nen nib fananikan nge damomuw ufithik’ e sabathin ko gidii-daba’. Bay mo’or e sabathin nib kireb nge de mangil, ni aram rogon e gidii’ nib yangren. Biney e non ireray e “talin e togopluw” ngak Got, “ma ba sug ko yub ni yira yim’ ngay.”
Mu lemnag ko reb e wok marnga’agen e pi’nen nib mangil machane rayog ni nge thilyeg ko togopluw—murwel’ rok’ e bee’. Rayog ni ngam pir’yeg e ba’adag nifan e murwel’ fa ayuw nge gubindad ma thapeged e ayuw bachane e ngongol roraed e gidii’ nib cheag ni kar rrin’ed fa kar sunmiyed.
Machane, e murwel’ rok e bee’ rayog ni nge mang nib th’abi tolang e ba’adag ulan e yafos rok’. Me gubin reb e pi’nen ni ra manged bin magid, ni tay bu’un demtrug e ngiyal’ nge cheag rok’ e bee’ fare Tathapeg ni ba’adag. Nifan ko pumo’on nge ppin, me soen e mabgol roraed, dabi chech’eyed nge ayuweg e ppin fa pumo’on, tal’eg ni nge machathowol e bitir, fa mith ko pi tawa’ath nge ngongol ko fak e bitir bachane gabe guyrogon ni ngam ga’nag ko murwel’ ni ra thilyeg e pi’ney nib mangil udakaen e rogon ko togopluw.
Reb e wok e mornga’agen e dowef. Paul nima pug uran dad thingarda liyorgad ngak Got ulan e dowef nge ya’el, nge dowef ney ir e Tempel ko fare Kan Nthothup, “ni Got e ke pi’ ngomed, Ere gathi gimed e mmil famed ngomed, ya Got e mmil famed ngak.” Ere, bat’uf ni fek e ngiyal’ ni ngad guywed rogon ni ngad ayuweged e dowdad. Kemus buchuw e gidii’ ni ra thapeged e th’abi ga’ e cheag woed ni kad sapgad de n’ew napan ulan fare Olymic nge Paralympic, nge bochi gadad be thamiyed e wengan ko dew rodad, fa President M. Russell Ballard ma kanoeg “me pithig e pi rivet.”
Machane yug aram rogon, ya mich rog ni ra pii’ e falfalaen’ ngak e Tasunmiy napan ni ngad guyed rogon ni ngad ayuweded e tawa’ath nib fel’ ko dowdad. Ni ra mang e pow ko togopluw napan ni ngam kireb nag e dowef, fa pii’ amith ngak’, fa dabi rrin’ e pi’nen nib mangil ko dowef. Me ta’ab rogon e ngiyal’, sasaliyib nge langlang gaed ngalang bachane fel’ ya’an ko dowef, ya’an, nge mad ra mang e rogon ko togopluw, me powiy’ ni ngam liyor gad ngak e tawa’ath rok’ Got nge gathi Got.
U tomur, k’eyaged e talin e togopluw ngak Got rodad ba yip fan ni ngad motoyil gad ngak ko fare Kan ni Thothup, me pag e fekyath, nge mang reb i gidiiʼen u dakean fare bayul rokʼ Kristus ni ir Somoel.” Ba yip’ fan ni ngad tay bin somm’on e motochiyl ni bin somm’on ulan e yafos rodaed. Be yipfan ni ngan pag Got ni’ir e nge gagiyegnag. Fa’an e t’uf rodad ngak Got nge ba’adag rodad ni ngad pigpig Ngak udakaen gubin e rogon, tafney, nge gelngin rodad ra mang e wo’ gadad ra fol nifan ko pufthin nag gubin pi’nen nge mel’eg roodad, gadad ra k’eyaged boech talin e togopluw rodad. Udakaen e murunguy rok’ Kristus, Got ni ra n’agfan e denen rodad nge togopluw rodad nike buch kafram nge ni ra fek e alit ko denen nge togopluw ney ko gum’ircha’dad. Aray rogon napan, ni ra fek demtrug e ba’adagdad nib kireb ni woed ni ke rrin’ ngak fapi Lamanite ni kar michaen’raed ni kakrom. Ere, gadad me “ni dar mul gaed.”
Ke’yaged e talin ko togopluw nira powi’iy nga falfalaen’. Ufithik’ e pi’in ni kar michaen’rad nga Somoel, gadad ma yon’ed e ”tangin e falfalaen’ u dakean e bayul.” Chitamangdad nu Tharmiy nge Fak, Tabiyul rodad, ni kar Dagew e micheg rorow ngodad ni dabi puth nifan e falfalaen’ rodad udakaen’ e t’uf nge maligach ni rib ga’. Gadad ma thameyed e tu’uf Rorow gubin e rran. Riyul’ rayog ni ngad rrin’ed ta’abrogon ko tu’uf nge liyor rodad. Rayog ni ngad k’eyaged—ni rib too’aer—gubin e pi’nen ko togopluw ngak Got ulan e yafos rodad nge thilyegen ko gum’ircha’dad ni m’agaen’ nge tafney ni m’agaen’. U dakean fithngan Yesus Kristus, amen.