Somoel Yesus Kristus e Ra Yib Biyay
Irreray e ngiyal’ nifan ngom, nge fan ngog, ni ngad fal’agned rogdaed ko fare bin Migid e Wub rok’ Somoel nge far Tathapeg, ni Yesus Kristus.
Pi walageg, gube falfalaen’ ngay nike tawa’ath nigeg Somoel ni nggu non ngomed e daba’.
Ulan ere mo’olung ney, ma Somoel e ke non ngodaed u dakean fapi tapigpig rok’. Gube piningmed ni ngam filed mornga’agen fapi mulwol roraed. Fanayed ni ngam nanged e tin nib riyul’ nge tin ni dani riyul’ ko re nel’ i puul ni ba’aray nga mm’on.
Fare ayuweg ni yibe tay nga fare ngongliy rogon ko fare Temple u Salt Lake, nga yuyang riy u Temple Square, e ke gaman laal e duw ngay. Be yibi m’ug ni biney e muruwel e ran mu’nag ko 2026. Gamaed be ognag e magar ko pi’in ni yaed be un ko biney e muruwel ni rib ga’.
Ra nel’ i puul ni ba’aray nga mm’on, ma kug yibliyed fa kun yibliy biyay mereb e temple ulan e laal e naam. Ngiyal’ ne chiney nge mada’ ko tomur ko biney e duw, ma kadad yibliy laal ngay.
Daba’ falfalaen’mad ngay ni nggu goged e tin ni ba’aray ni baykun toey 17 e temple. Wenig mu motoyilgaed ni yibe dag e liyoer ko ngiyal’ ni gube weliy e ggin ni ngan dumow nag temple.
-
Juchitán de Zaragoza, Mexico
-
Santa Ana, El Salvador
-
Medellín, Colombia
-
Santiago, Dominican Republic
-
Puerto Montt, Chile
-
Dublin, Ireland
-
Milan, Italy
-
Abuja, Nigeria
-
Kampala, Uganda
-
Maputo, Mozambique
-
Coeur d’Alene, Idaho
-
Queen Creek, Arizona
-
El Paso, Texas
-
Huntsville, Alabama
-
Milwaukee, Wisconsin
-
Summit, New Jersey
-
Price, Utah
Pi walageg, ga be guy e n’en nibe buch u powchendaed? Gube meybil ni ridamu fek owchen ko pin’en ni be buchbuch ko ngiyal’ ney! Somoel e riyul’ nibe ul’ul’nag e muruwel Rok’.
Mangfan ni gadaed be toey e temple ni bo’or ni bo’or nib papay? Mang fan? Bachane ke yoeg Somoel ngomad ni nggu rrin’ed e biney. Fapi tawa’ath ko temple e be pi’ e ayuw i mukunnag piyu Isreal u l’agruw raba’fare veil. Pi tawa’ath ney e kube pi’ e ayuw ko gidii’ ni nge fal’ag rogon raed ni ngar ayuwegned e fayleng ni ngar fal’agned e fayleng ko fare bin Migid e Wub ku Somoel!
Woed rogon ni profesy nag fare profet Isaiah, nge rogon nikan yoloey ulan e Handel’s Messiah, napan nira sul Yesus Kristus, “Ma aram e bayib i m’ug feni muluplup’ SOMOL, ma urngin e girdi’ nu fayleng ni bayi guy.”
Napan nira taw ngay “kan piiʼ beeʼ nib pagael ni fak ngodaed; ma bayi paer niʼir e am; ma fithingan e yira pining ni, Maʼangʼang, Taʼayuw, Fare Got ni Gubin marayog Rokʼ, Fare Chitamangiy ni Manemus, nge Fare Pilung ko Gapas.”
Yesus Kristus ere gagiyegnag e bin kakrom e Jerusalem nge bin Be’ech e Jerusalme “niikan toey nga dakean e nam nu Mariken.” Ko galin’ey nibay u lukungun, e Ir e bay i gagiyegnag mama’en e Galasia rok’.
Napan nira taw ngay ma Somoel e yira nang ni’ir e fare “Pilung ko pi pilung nge Somol ko pi somol.” Ma pi’in ni yead bay Rok’ “ni pi’in yad ba yul’yul’ ma yad be un ngak e bay ra gelgad ngorad.”
Pi walageg, irreray e ngiyal’ nifan ngom nge fan ngog ni ngad fal’agned rogdaed ko fare bin Migid e Wub rok’ Somoel nge far Tathapeg, ni Yesus Kristus. Chiney e ngiyal’ riy ni ngad rrin’ed e muruwel ni th’abi ga’ ni ngad manged pigachalpen. Ulan e fayleng nib sug ko wagagay, ere uw rogon ni ngad rrin’ed e biney?
Liyoer u temple nib ul’ul’ yay ere ayuwegdaed. Ualn e nu’un rok’ Somoel, e gin ni gadaed ma sapeg e tafney rodaed riy ngak Yesus Kristus. Gadaed ma fil u Wo’en. Gadaed ma ngongliy fapi m’ag ni ngad laked Wo’en. Gadaedra nang mornga’agen. Fa’an gadaedra ayuweg fapi m’ag rodaed nifan e temple, ma rayag ni gadaedra thapeg gelngin Somoel nib gel. Ulan e temple, e rayag ni ngad thapegned e ayuw ko tin nibe buchbuch u fayleng. Ma rayag ni ngad thamiyed fare t’ufeg rok’ Yesus Kristus nib polo’ nge Chitamangdaed nibay u Tharmiy ni ribo’or. Ma gadaedra thamiy fare gapas nge fare thothup nibe micheg, ni demuturug ko mit i mang e yikoq e be buchbuch u fayleng.
Ba’aray e n’en ni nggu michegnag ngomed: Gubin e pi’in nibe gay Yesus Kristus u fithik’ e yul’yul’ era pire’eg ulan fare temple. Garam thamiy fare murnguy Rok’. Garam pire’eg e fulweg ko fapi duwer rom nibay. Mara gel e falfalaen’ rom’ nge llowaen’ rom ni bachan fare gospel Rok’.
Kug fil ni bin th’abi ga’fan e duwer ni thingar da fithed gadaed riy e: Mang ere n’en fa mang e gura pi’ e yafos rog nifan?
Turguy rog ni nggu mel’eg Yesus Kristus e ir e bin th’abi ga’fan nikug duugliy ulan e yafos rog. Napan ni gubay u skul ko taflay, mug thapeg e mich ko fare gelngin Got ni’ir e Chitamangiy nge fare Fak’, ni Yesus Kristus. Ko ngiyal’ nem make par ni fare Tathapeg e bay ni’ir e fare malang ni gube toey e yafos rog nga dakean. Biney nikug duugliy e ke thilyeg urngin ban’en! Biney nikug duugliy e ke moem nag boech ban’en ni nggu duugliy ulan e yafos rog. Biney nikug duugliy e ke pi’ ngog fan e yafos nge ggin ni nggu sor ngay. Maki ayuwegneg ko pi yikoq nibe yib ngalan e yafos rog. Nggu weliy l’agruw kanawo’en:
Bin somm’on, napan ni yim’ le’engig Dantzel, momaw’ ngong ni nggu ayuweg reb fapi fakmow. Ug moey, ni yigo gag, kirbaen’ug, ni gube yoer nag e ayuw. Falfalen’ug ngay, ni u dakean fare Kan ni Thothup rok’, Somoel e fil ngog fan nike fek Dantzel nga tharmiy. Bachan e biney ni kug nangfan, ere yib e gapas ngog. Boech e ngiyal’ ngay, ma arram meyag niyag ni fel’ e tafney rog ko kirbean’. Fin boech nga tomur riy, mug mabgol ngak e bpin rog i Wendy. I ir e kabang nib lukungun ko bin l’agruw e kanawo’en ni gube yoeg.
Napan ni gamow bay Wendy u reb e muruwel nib palog nga orel, bay reb e mororoq ni tay e pistor nga lolgeg me chubeg. Machane fare pistor e d’ani chub. Bachan e biney ni buch, yafos romow e yayawol rogon. Machane gu thamiyew Wendy e gapas ni dabiyag ni nggu fekyathin nigew. Irreram fare gapas, “ni dabi chuchugur ni nge nang e girdi’ fan.”
Pi walageg, ra pi’ Somoel e gapas ngom! Ma kura gelnag med. Ra yibliymed ko gapas, ni demuturug e pi aliliy ni gamed bay u fithik’.
Wenig motoyilgaed ko biney e michmicheg nitay Yesus Kristus nifan ngong: “Bay gu paer ko ba’an mat’aw i pa’ maed nge ba’an gilaey’ romaed, ma Kan ni Thothup Rok’ e ra yib i paer nga gumircha’ daed, ma pi angel nib liyeg daed, ninge ayuweg daed.”
Dariy n’umngin napan nra tal fare Tathapeg i ayuweggem. Gafgow nitay u Gethsemane nge Calvary e rrin’ nifan ngom! Fare Bayul Rok’ ni dariy n’ungin napan memus e ir e fan ngom!
Gube mulwol ngomed ningam liyoergaed ulan e wik ni gubin—ulan e yafos rom ni ga’angin—ni ngam ga’nag fare llowaen’ rom ko fare mornga’agen e Bayul rok’ Yesus Kristus. Be amith gum’ircha’eg nifan e pi’in nibay u fithik’ e denen ma denang rogon ni nge chuw u fithik’. Gube yoer nifan e pi’in nibe gafgow ko thin nib thothup ban’en ni yigo ir rok’ nibe fek tomalngin e gafgow rok’ ni bachan e darnangfan e n’en ni rrin’ Yesus Kristus nifan ngak.
Yesus Kristus e fek nga dakean e pi denen rom, pi oloboech rom, pi mo’owaer rom, nge gubin amithrom. Dani t’uf ni ngam fek gelngin ni yigo gur! Ra n’agfan rom ko napan ni gara kalngaen’. Ra yibliyem ko pin’en nira tu’uf rom. Ra golnag laniyan’ e pi’in ke kireban’rad ma be taflaynag e maad’ad rorad. Napan ni gara yok nigem Ngak, ma pi muruwel ni yibe tay nga dakean poem e yira ba’ud nag. Fa’an gara ngongliy mag ayuweg fapi m’ag ni ngam leak Yesus Kristus, ma gara pire’eg ni pin’en nibe amith nag e yafos rom e kemus ni tabochingiyal’ rogon. Ma pi gafgow rom e yira pilyeg “u dakean e falfalaenʼ roraed ngakʼ Kristus.”
Dawri thumur fa dawri pag e roffen riy ni ngam un ngam mang gachalpen Yesus Kristus. Ma arram ni gara thapeg fapi tawa’ath nib polo’ ko fare Bayul rok’. Ma krayag ni ngam un ko fare muruwel i kunuy nag piyu Isreal.
Pi walageg, ra borran ngay, ma Yesus Kristus era sul biyay nga fayelng ni’ir e fare millennial Messiah. Ere daba’ e gube piningmed ni ngam suled biyay ngam yibliyed e yafos romed ngak Yesus Kristus. Gube piningmed ni ngam pi’ed e ayuw ko ulunguy piyu Isreal min fal’ag rogon e fayleng ko fare Bin La’agruw e Wub rok’ Somoel. Gube piningmed ni ngam weliyed mornga’agen Kristus, machib ni morngaʼagen Kristus, michuwun’um ngak Kristus, nge falfalaen’ rok’ Kristus.
Mired ngakʼ Kristus, ngam “piiʼed gimed ni poloʼ [ya’al] nib maligach ngakʼ.” Irreray fare falay ko yafos ni falfalaen’!
Tin ni falel’ ban’an e bayib, pi walageg, ni bachan fare Tathapeg ni bayki yib biyay! Tin ni falel’ ban’en e bayib ni bachan Somoel e be rrin’ e muruwel rok’. Tin ni falel’ ban’en e bayib napan ni gadaedra sulweged gum’ircha’endaed nga yafos rodaed ngak Yesus Kristus.
Gube micheg u fithik’ e sobutaen’ ni Yesus Kristus e Fak Got. I gag e reb pigachalpen. Gub falfalaen’ ngay ni gag reb e tapigpig rok’. Napan nira taw ko ngiyal’ fare Bin L’agruw e Wub Rok’, “Ma aram e bayib i m’ug feni muluplup’ SOMOL, ma urngin e girdi’ nu fayleng ni bayi guy.” Roffen ney era sug e pi’in nib yul’yul’ ko falfalaen’!
U dakean fare gelngin fapi kiy ko priesthood nib thothup, gube micheg e pin’ey nib riyul’ ngomed nge ngak e fayleng ni ga’angin! U dakean fithngan Yesus Kristus, amen.