Ba Moem e Machib ku Yesus Kristus
Gube micheg mornga’agen muruwel nib thothup ko machib nag e bitir rok Chitamangiy nu tharmiy’ e m’ag ku Yesus Kristus.
Gadad gubin bay e chongin e tabinaw rodad ni ngad t’ufeged ni ma fek e pi lumel nge sikeeng ufithik’ gelngin rok’ Satan, fare tagathay, ni ma guy rogon ma fal’eg e gafgow ngak gubin e bitir ku Got. Ya bo’or e gadad, bay bochi pi nep’ ni dabda mol gad. Kad guyed rogon ni ngad ayuweged e pi’in ni bat’uf ayuw udakaen e gelngin nib mangil. Kad wenig nag ulan e meybil ni fan raed. Kad ba t’uf roraed. Kad guyed rogon ningad daged ngorad e susun nib fel’ rogon.
Alma, profet nib gonop nib kaakroom, ke fek e pi sikeeng nib boed rogon. Fare gidii’ ni ke powi’iy nge t’ufeg kar thapeged e mael ko to’ogor, machane ni kar guyed rogon ni ngar tugul nag e bitir nib fel’ ulan e feyleng ke sug ko denen. Ke thamiy Alma ni yigo ta’areb e athap ko gelnag ir e gelngin dabda lemnag bo’or fa use ni bachuw. Ke wenig nag ngak Got nifan ko ayuw.
Ke nang Alma ni fa’anra ayuwegrad Got, ma thingarda kalngan’rad e gidii’ ni ke powi’iy, nge fapi to’ogor rorad. Ere, ke mel’eg reb e rogon nib thil ko mael.
Fare Babyor ku Mormon me weliy ni arrogon: “Ere chiney, e bachan e machib ko fare thin e be mʼug riy ni wawliy fapi gidiiʼ ni ngar rinʼed e tin nib matʼaw—arragon, ma … bagaʼ angin ni aw nga laniyaenʼ fapi gidiiʼ nga rogon ni rinʼ e sayden, ara yug banʼen, ni ke buch roraed—ere Alma e lemnag nib gamog ni ngar gayed rogon falʼngin fare thin ku Got.”
Fapi thin ku Got e fapi machib nike fil Yesus Kristus nge pi Apostle Rok. Ke nang Alma ni bay e metawon nib ga’ ulan e pi thin ko machib.
Ulan fare guruy ni 18 ko fare Doctrine and Covenants, fare Somoel nike dag e dayif ko machib Rok’:
“Ere, musap, gube chiyliy gubin e gidii’ ni ngar kalngan’rad. …
“Ere, musap, fare Somoel ni Tathapeged ni ke yim’; ere nike fek e gafgow ko gubin e gidii’, ere gubin e gidii’ rayog ni ngar kalngan’rad nge baed ngak.
“Nge ni ke faskoyam’, ere rayog ni nge thapeg gubin gidii’ ngak,ufithik’ e kalngan’uy.”
“Nge gamed ra awgaed nga but’ nge liyor gad ngak e en Chitamangiy u fithingag.
“… Thingarda kalngan’med nge tawfe nag, udakaen e fithingan Yesus Kristus.”
“Mu ning ko Chitimag u daken fithingag, u fithik e michaen’ ni ram athapeg, mra paer rom e Kan Thothup.”
“Nge chiney, tomuren … nikam thapeged biney, bat’uf ni ngad folgad gubin e pi motochiyl rog.”
“Mu fekad e fithingan Kristus ngadakaen med, nge weliy e tin riyul’.
“Nge gubin e bee’ ni ra kalngan’rad min tawfe nag udakaen e fithingag, ni Yesus Kristus, nge athamgil mada’ ko tomur, e ireram e cha’ nra thap.”
Ulan gali thin ney, me pii’ ngodad fare Somoel rogon nib machalbog ni rogon ni ngad weliy e machib Rok’. Ireray e machib ni ir mich ulan fare Somoel ni Yesus Kristus, kalngan’, tawfe, to’owath ko far Kan ni Tothup, nge athamgil mada’ ko tomur ma yibliy nag urngin e bitir ko Got.
Napan ni gadadra machib e kenggin e yalen ney ngak e gidii’ ni gadad ba’adag, ma fare Kan ni Thothup e ra ayuwegdad ni ngad nanged e tin nib riyul’. Bachane gadad bat’ufeg e ayuw rok’ fare Kan ni Thothup, ma thingarda chuw e lemnag fa nang ko mang e be yip’ fan rodad nib thil ko machib nib riyul’.
Binem ni ra mang mo’omaw’ napan ni gara t’ufeg bee’ niba guyrogon ni ngam machib ngak’. Sana ni ke siyeeg e machib napan e ke weliy ngak. Bay e sikeng ni ngam rrin’ e banen nib bi’ech fa balyangaen’. Machane fare Kan ni Thothup ea ra dag e tin nib riyul’ napan ni ngad kolchiya’ ngay nga dabda machib e pi’nen ni de riyul’. Ta’areb e rogon nib mangil e rayog ni ngad chuw e machib nib de riyul’ ir me’leg ni ngad machib nib moem. Gara thapeged e ayuwen udakaen e tin nib moem, nge dabi malog e pi’nen.
Machib ir e rogon ni ngad weliy’ marnga’agen e doctrine ko thap’, napan e bitir ma dabi fek e lumel ku tabaen ni ra yib boraen, umon e tin nib riyul’ ney ni gadad bat’uf ra thang udakaen e pinen ko social media, fagar, nge gubin e magawon rorad. Thingarda thapeged gubin e rogon ni ngad weliy e machib ku Yesus Kristus ngak e bitir rodad. Fapi ngiyal’ ney e baga’fan nge nira buch buchuw yay ni de woed rogon e guyed rogon ni dabi tal’ ko to’ogor. Gubin e awa ni ngam weliy e machib ngak’ e bitir, bay bo’or e pi awa ko milwol nge sasing ni ra chamgad fa siyeeg e tin nib riyul’ ko thap.
Sana gamed be lemnag fa’anra be mangil ni ngam chuchugur gad ngak e bitir romed ufithik’ e gosgos, fa gara fith ngak e bitir fa’an ni ra yib e tomal bachane e machib romed. Thingard lemniged, “Kemus buchuw e ngiyal’ nge rogon, mang e pi thin ko machib bat’uf ni nggu weliy ni ra gelnag rad napan nira yib e pi’nen ni ra sikeng e mich rorad?” Fapi thin ni ngam yoeg daba’ rayog ni nge mang e thin yad ra fekrad, nge daba’ ni ra chuw.
Gube ba’adag e dangitaew ni Mary Bommeli nge rogon ni ke pii’ e machib ku Yesus Kristus. Tabinaw rok’ ni ke thapeged e machib ko fapi missionary u Switzerland napan 24 e duw rok’.
Tomur ni ke tawfe nag, Mary ba’adag ni nge un e fapi gidii’ rok Got u Merika, ere ni ke yaen ko Switzerland nga Berlin nge ke piryeg e muruwel ngak e ppin ni ke faleg e maad nifan e tabinaw rok’. Mary nike paer ulan e seenggil ko sib nge ke tay e talin ko mad rok’ ulan reb e seenggil u na’un.
U ngiyal’ ney, e machib ko doctrine ku Fare Galasia ku Yesus Kristus ni Fan Gidii’en Got ko Tin Tomur e Rran u Berlin e togopluw ko motochiyl. Machane Mary dabiyog ni nge tal’eg e machib nifan e pi’nen ni ke fil. Fapi ppin ko fare na’un nge pi fagar rok’ ni kar kunuy gad ulangab e talin ko mad ni ngar rungan e machib rok’ Mary. Ke non marnga’agen e yib gow ko Chitamangdaed nu Tharmiy nge Yesus Kristus ngak Joseph Smith, kar yib gad fapi angel, nge fare Babyor ku Mormon. Ke puguran e fapi chep ko Alma, ni ke machib marnga’agen fare Foskoyam’. Nike micheg e tabinaw rayog ni ra sul u lane celestial kingdom.
Ba’adag rok’ Mary ni nge machib ko fare yalen e gospel ni kan sulweg yarmen ku Yesus Kristus nike feken e magawon. Dabi n’ew napan e police ni kar fek Mary nga kalbus. Ulan e milekag ney, nike fith ngak e poillceman nifan e fithingan e tapufthin ni ra mada’ bin magid e rran. Nike fith ngak marnga’agen e tabinaw rok nge fa’an ir e chitimangiy nge figirngiy nib mangil. Fare policeman nike weliy fare tapufthin ir e bee’ ko feylang.
Ulan e kalbus, Mary nike fith ko e piinsal nge boch e babyor. Nike yol e milwol ngak e tapugthin u fithik’ e neap, me pii’ e m’ag marnga’agen e Foskoyam’ ku Yesus Kristus woed ni ke weliy ulan fare Babyor ku Mormon, me weliy fare tafen ko ya’el, nge ni ke weliy kalngan’uy. Ke weliy fare tapufthin thingari fek boch e ngiyal’ nge lemnag marnga’agen e yafos umon e bin tomur e pufthin. Ke yoloy nike nang ir bat’uf ni nge kalngan’ ko bo’or pi’nen, ya boch nira fek e kirebaen’ ngak e tabinw rok nge fek e kirebaen’ ngak. Bin magid e kakadbul, napan nike mu’ e milwol, nike pii’ ngak e policeman ni nge fith ngak ni rayog ir ba pii’ ngak fare tapufthin, nge nike rrin’.
Borran, fare tapufthin nike pinning fare policeman nga office rok. Fare babyor Mary nike yoloy ir e pow riy ni ke machib fare doctrine ko e gospel nib sulyarmen nge, bachane ni ke rrin’, ke kirebnag e motochiyl’. Machane, de n’uw napan fare policeman nike sul nga kalbus ko Mary. Ke yog ngak nike thapeg e n’agfan ko pi motochiyl nike kirebnag nge rayog ni nge yaen. Machib rok’ ko fare yalen e gospel ni kan sulweg yarmen ku Yesus Kristus ke guy rogon ni nge yaen nga kalbus. Nge machib rok’ ko fare doctrine ko kalngan’uy ngak e tapufthin nike pag en u kalbus.
Mary Bommeli de taleg ni nge machib tumur nike pag e kalbus. Pi thin rok’ nike pii’ e doctrine nib mataw ufithik’ e mfen ni dawori gargelen. Mich rok’ ni e bee’ nike thilyeg e mich rok’ nib de n’uw napan e rayog ni ngar machib e doctrine ku Yesus Kristus ma pii’ e gelngin ngak e mfen rok’ ko pi mael rorad.
Napan gadad be guyed rogon e rayog rodad ni ngad machib e doctrine ku Yesus Kristus ngak e pi’in nibat’uf rodad, bochi gidii’ nira dabun. Maerwaer nira yib nga tafney rom. Gara lemang fa’an gama nang e doctrine rok’ Tathapeg nib fel’ ere rayog ninam machib nag nib mangil. Nge fa’an ni kam guyed rogon ni ngam machib, gara lemnag mangfan dabiyog ni ngam guy e pi’nen nib fel’ bachaen e machib. Dabmu fekmed e maerwaer nem. Mu chel ngak Got nifan e ayuweg nem.
“Arragon, mag meybil ngak’ Got ni fan ko gubin e tin nib t’uf rom ban’en; … arragon, mpag e murnguy u gum’ircha’em nge paer ngak’ Somoel ni gubinfen.”
“Ere chiney e gubaʼadag ni ngam mʼing niged gimed, ngam pired ni kam paged laniyaenʼmed ma kam sumunguy niged gimed; nib moem i fil banʼen ngomed; ma gimed sug ko gumʼaenʼ nge athamgil; mi gimed kolchiyaʼ u fithikʼ urngin banʼen; mi gimed yulʼyulʼ i koel falan e pi motochiyel rokʼ Got ni gubin e ngiyalʼ; ni gimed be ning ngakʼ ni demutrug ko bamang e renʼen ni ke tʼuf romed, ni lʼagruw mit, mitin balʼeg rogon ko yaʼel nge mitin balʼeg rogon ko dagur; ma nge gubin e ngiyalʼ ma ngam oged e magaer ngakʼ Got ko pinʼen ni ke yog ngomed.”
Faʼanra gara meybil, faʼanra gara non ngak Got, nge faʼanra ni ngam wenig nag ngak ko ayuw Rokʼ ni fan e gidiiʼen nib tʼuf rom, nge faʼanra gara oeg e magar ngak nifan e ayuw nge gumʼaen nge sumunguy bachane dabi thapeg nib rib papay gubin e piʼnen ni baʼadag, ere gube micheg ngom rayog ni ngam chuchugur Ngak. Rangam mang nib gum’aen’ rom nge athamgil. Nge tomuren rayog ni ngam nang ni kam rrin’ gubin e rayog rom ni ngam ayuweg e gidii’ nib t’uf rom nge meybil nifan e pi’in ni ngar ranoed ufithik’ e guyrogon rok’ Satan ni nge gathy nag rad.
“Machane pi’in yad be toer ngak SOMOL ni nge ayuwegrad e bay ra pir’eged nike yib gelngirad bayay; bay ra changeggad ngalang ni bod e arche’ ni eagle; yad ra mil, ma dab ra magaergad; ma yad ra yan, ma dabi m’ay gelngirad.”
Rayag ni ngom pire’eg e athap ulan e pi chepen rok’ e tabinaw. Gadad ma bi’eged marnga’agen pi’in ni kar chel ko pi’nen ni kar fil’ed fa pi n’en nikan fathaelngak Got nifan e n’agfan rorad, woed Alm nib wayin, pi pagal ni fak Mosiah nge Enos. Ulan e magawon rorad, kar pugurangad fapi thin ku gallabthir roraed, pi think ko fare machib rok Yesus Kristus. Puguraen nag ni ke thap rad. Rayog ni ngar puguraen e machib rom nifan e doctrine nib thothup.
Gube pii’ e m’ag rog nifan e muruwel’ nib thothup ney ko machib nag e bitir ku Got e doctrine nib moem ku Yesus Kristus, ni ma ayuwegdad ni ngad bi’echnagdad e ya’el rodad ngad suloed nga gin ku Got riy, ni ngad fasgad ngak nge Fak ufithk’ e fel’ngin ni gubenfen ko tabinaw. U dakean fithngan Yesus Kristus, amen.