Ayuweg Lek’ngin, ma Fapi Pa’ngin Era Tuguul
Fapi lek’ngin e mich rom era fek gelngin u rogon toqorngin e mich rom ngak e Chitamangdaed nibay u Thariy nge fare Fak ni rib T’uf Rok’.
Reb e Chapel nib Kakrom u Zwickau
Fare duw ni 2024 e reb e duw ni rib ga’fan ngog. Ke gaman 75 e duw ko napan nin tawfe nigeg mug thapeg fare Kan ni Thothup nigeg reb gidii’en Fare Galasia ku Yesus Kristus ni fan ko gidii’en Got ko Tin Tomur e Rran.
Membership rog ko fare Galasia Ku Yesus Kristus e rib tu’uf rog. Ni nggu mang reb pi gidii’en Got ni kug ngongliy e m’ag ngak, ni gamed mu’un ngay, ni gamed pi walageg, e ir reb e muruwel ni th’abi ga’ ulan e yafos rog.
Napan ni gura tafney nag rogon e milekag rog ni gag reb pigachalpen, ma tafney rog e baga’ nima yean nga bangi binaew u Zwickau, ni gin ni ug un riy ko mo’olung ko sakrament ko fare Galasia rok’ Yesus Kristus ko napan ni kugub bitir. Irreram e gin nigu thapeg fare mich rog riy.
Biney e chapel e bay reb e organ riy ko musik ni kari kakrom. Gubin e Madnom makan duugliy reb e pagal nib fal’yangren ni ir e nge dili’iy fare organ ngalang nge ngabut’ in ngeyag ni chub lingan. Bochingiyal’ ma guma un nggu pi’ e ayuw ko biney e muruwel ni rib ga’fan.
Ngiyal’ nibe yoen’ e gidii’ e tang ko fapi hymns, ma ri guma pamp nag fare organ u gelngin gelngig ni ngeyag ni dabi m’ay e nifeng riy. Ko gin ni yima par riy ko giney, rib fel’ rogon e changar rog ko thilin bangi winda nibay e therek riy, ko bangi sasing ni ya’an fare Tathapeg Yesus Kristus nge kabang ni ya’an Joseph Smith ulan farengi Luway nib Thothup.
Ri kugu manang e biney e thamtham ni rib thothup ko napan ni gura sap ko fare winda nibe yib ya’an e yal’ riy ni gube motoyil ko mich ko gidii’en e Galasia ma yaed be yoen’ e tang nifan yu Zion.
Ulan e giney nib thothup, fare Kan ni Thothup e micheg ko tafney rog nge gum’ircha’eg ni rib riyul’: Ni Yesus Kristus e ir fare Thathapeg ko fayleng. Ireray e Galasia Rok. Fare Profet Joseph Smith e ri guy Got ni’ir e Chitamangdaed nge Yesus Kristus maki rung’ag lamanrow.
U mm’on ko biney e duw, napan ni gubay u reb e muruwel u Europe, mayag nigu sul ngak Zwickau. Kirabaen’ug ngay ni biney e chapel nikab kakrom e dakuriy u rom. Ni chuweg nike bukun e duw ngay ni bachan boech e nu’un nikan toey ngaloen.
Mang e bin nib Manemus, nge Mang e bin Ngathi ir?
Kirbean’ug ngay ni biney e nu’un ni kugum mang napan ni kugub bitir e kemus ni leam riy e kabay. I moey ni’ir ban’en nib thothup ngog. Machane kemus ni ba nu’un.
Ta’arebnag rogon, ko fare thothup nigu micheg rok’ fare Kan ni Thothup ko boech e duw ni kakrom e dawri thumur rog. Arrogon, yakan gelnag. Pin’en nikug fil ko napan ni kub fal’yangreg ko mornga’agen fapi yalen ni’ir e def ko fare gospel rok’ Yesus Kristus e ke par ni’ir biyang e def ko yafos rog. Fare tha’ ko m’ag nikug ngongliy ngak e Chitamangig u Tharmiy nge fare Fak ni rib T’uf rok’ e ke par rog—ni rib n’uw napan u tomuren nikan puthuy fare chapel u Zwickau nge farengi therek ko winda nike yean ngabang.
“Tharmiy nge fayleng e bayi chuw,” Yesus ni yoeg, “machane ren’ey u m’on ko ngiyal’ ni dawori taw ngay.”
“Ya pi burey e bayi mʼay nge pi yungi ted e bay ni chuweg, machane wurengaenʼ rog e dabi chuw romed, ara ni chuweg fare mʼag ko gapas rog, nibe yoeg fare Somoel niʼir e be runguymed.”
Reb e n’en ni th’abi ga’fan ni rayog ni ngad filed ulan e biney e yafos e rogon ni ngan nang e tin nib manechubog nge tin ni dani manechubog. Napan ni gadaedra nangfan e biney, ma gubin ban’en era thil—tha’ rodaed, pin’en ni gadaedra mel’eg, nge rogon ni gadaedra ayuwegdaed.
Nang e tin nib manechubog nge tin ni dani manechubog e irreram fare kiy nira ga’nag fare mich rodaed ngak Yesus Kristus nge fare Galasia rok’.
Damu Mal’fathnag fapi Papa’angin ko fapi Lek’ngin
Fare sulyarem ko fare gospel rok’ Yesus Kristus, ni woed rogon ni machib nag fare Profet Joseph Smith, e mu “fanaye[d] urngin, e pin’en nib riyul”. Machane dar yipfan ni gubin ban’en nib riyul’ e ta’ab rogon. Boch e tin nib riyul’ e rib tu’uf, ma rib ga’fan, ko lek’ngin e mich rodaed. Boch e kemus nifan papa’angin—nib ga’fan, machane kemus ni fa’anra bay rogon ko fapi def riy.
Profet Joseph Smith e machib nag: “Fapi def ko yalen e tiliw rodaed e irreram fapi mich rok’ fapi Apostles nge fapi Profet, ko mornga’agen Yesus Kristus, nike yim’, min ke’yag, me foskoyam’ ko fare bin dalip e rran ngay, ni yean nga tharmiy; nge gubin ban’en nibay ko tiliw rodaed nibay rogon ngay”
Biney e be yipfan, ni Yesus Kristus nge fare Bayul rok’ e ir fare lek’ngin e mich rodaed. Gubin ban’en ngay e kemus ni papa’ngin.
Biney e ku dar yipfan ni fapi papa’ngin e dani ga’fan. Ya gak’iy e btu’uf papa’ngin. Machane wod rogon ni yoeg fare Tathapeg ngak fapi gachalpen, “ni bod rogon pa’ngin e grape ndabiyag ni nge yib wom’ngin ni fa’anra dabi par nib peth nga kenggin.” Fa’anra dariy e tha’ riy ngak fare Tathapeg, ko rogon ni nge ayuweg fapi lek’ngin, ma fapi papa’ngin ere yim’.
Napan nira yib ko ayuweg e mich rodaed ngak Yesus Kristus, ma gube lemnag ni sana gadaed ma mal’fathnag fapi papa’ngin ko lek’ngin. Irreray e n’en niguy Yesus rok fapi Farisis napan ni’i moy roraed. Kar pired ni yaed be sap ko tin ni bach’ig ban’en ko fapi motochiyel mi yaed pagtilin e n’en ni yoeg fare Tathapeg “baga’fan tomalngin”—ni wod fapi yalen e daef ko “Justie nge murnguy nge mich.”
Fa’anra gabada’ag ni ngam ayuweg bakan e gak’iy, ma gathi ngam po’eg e ran nga papa’engin. Ya ngam rannag fare lek’ngin. Ku ta’ab rogon, ni fa’anra gaba’adag fapi papa’angin e mich rom ni nge gel me pi’ wa’amngin, ere mu ayuweg fapi lek’ngin. Ere fa’anra be marwar u wun’um boch e yalen fa rogon mornga’agen e Galasia nikab kakrom, mu gay e biney ni nge tomilangnag u fithik’ e mich ngak Yesus Kristus. Mu gay rogon ngam nangfan fare gafgow nitay ni bachan ngom, fare t’ufeg rok’ ngom, nge tin ni ba’adag nifan ngom. Mu laek u fithik’ e sobut’aen’. Fapi lek’ngin e mich rom era fek gelngin u rogon toqorngin e mich rom ngak e Chitamangdaed nibay u Thariy nge fare Fak ni rib T’uf Rok’.
Woed e, fa’anra gaba’adag ni ngam gelnag e mich rom ko fare Babyor ku Mormon, ere mu sap ko pi’iin nibe micheg mornga’agen Yesus Kristus. Ga manang ni fare Babyor ku Mormon ema micheg mornga’agen, pin’en nibe machib ni mornga’agen, nge rogon nibe piningem ma be pi’ e athamgil ngom ni ngam mub ngak.
Fa’anra gabe thapeg e nangfan ko rogon fapi mo’olung ko Galasia fa lane temple, ere mu gay rogon ngam sap nag fare Tathapeg ko gin ni gadaed ma fal’ag fapi gam’ing riy nib thothup. Mu gay Somoel ulan fare nu’un Rok’ nib thothup.
Fa’anra ke tomal nigem e pigpig rom ko Galasia, mu gay rogon ngam sapeg e pigpig rom ngak Yesus Kristus. Mu rrin’ ni’ir e t’ufeg rom ni gabe dag ngak.
Ayuweg lek’ngin, ma fapi papa’ngin era tuguul. Ma bayi taw ko ngiyal’ riy, nira pi’ wa’amngin fare wuldug.
Lek’ngin nib Sor Ngak
Mich nib gel ngak Yesus Kristus e darma pas me buch. Danga’, ya ulan e fayleng, fapi rachangol nge pan ni wod e tafney nib marwar ema tugul’ rok’ ni yigo ir. Tin th’abi yungo’ol, ma bo’or wa’amngin ko fare gak’iy ko mich e ma tabab ni fa’anra rigaba’adag mag gay rogon. Ma bang ko biney ni gay rogon e ngan micheg nibay lek’ingindaed ngak Kristus.
Woed e: Somm’on riy, ma woed ni gadaed ba’adag fare gospel rok fare Tathapeg nge fare Galasia rok’ ni bachan e gidii’ riy nib gol fa fare bisof ni yiba’adag dakean fa bachan ya’an fare chapel nib be’ech. Tiney e ban’en e rib ga’fan ni bachan e be ayuweg fare Galasia be ga’ i yean.
Machane, fa’anra dabi toqar e mich rodaed ko biney, mang era buch ko napan ni gara yean ngareb e ward ni dani fel’ ya’an ni bod e biney, fa gidii’ riy e dani tafagar, fa fare bisof riy e yog ban’en ni dabum lingan?
Reb e biney e: Gathi susun ni ngan athpeg ni fa’anra gadaed be fol ko fapi motochiyel magdaed mabgol u temple, ma yira tawa’ath nagdaed ko tabinaew nib ga’, nib sug chonggin e gidii’ riy nib fel’, mab tafol e bitir riy, ni yaed gubin ni yaed bagel u Galasia, ranod ko mission, mara uned ko tang ko choir, ma yead be pi’ e ayuw ko klen nag e Galasia ko Sabado ni kakadbul?
Ri gube athpaeg ni gadad gubin ra guy e biney u lan e yafos rodad. Machane re chey ni dabi buch? Garam ul’ul’ ngam m’agem ngak fare Tathapeg ni demuturug e tin nibe buch—pagaen’um Ngak nge ngiyal’ Rok’?
Thingarda fithed daed, fare mich rog e kemus nibe yan u rogon e tin ni gube athapeg ulan e yafos rog? Fa kemus nibe yean u rogon e tin nibe buch fa bachan e ngongol rok’ be’? Fa bay ni bachan Yesus Kristus, “mu ted lik’ngimed nib to’ar nga fithik’ Kristus,” ni demuturug e pin’en nibe buch ulan e yafos rom?
Fapi Yalen, Ngongol nike Macham, nge Mich
Fare Babyor ku Mormon e weliy mornga’agen bugi gidii’ ni yaed ba “mi yaed yulʼyulʼ i muguʼuliy e pi gamʼing ku Got.” Me yib reb e mo’on ni kanog i Korihor ngak, nibe makrang nag mornga’agen fare gospel rok’ fare Tathapeg, nibe pining fithingan ni “bogi yalen rok e pi chitamangmed nib meechiyang.” Korihor e wawoliy “nib yoʼor e piʼin ni wawliy gumʼirchaʼen nga orel, mar puged oewchraed ngalang ngar ʼuf gaed nga fithikʼ e pi denen roraed,” Machane bay boech e gidii’ ni deyag ni ban nagraed, ni bachan, fare gospel e rib ga’fan ngoraed ko boch e yalen.
Mich e bagel ni fa’anra bay lek’ngin ko rogon e pin’en nike buch ulan e yafos rodaed, micheg rodaed ngak Yesus Kristus, nib thil ko yalen fa tin ni bayi yeog fa rrin’ e gidii’.
Mich rodaed e yira sikeng nag rogon. Mich e gathi mich ni fa’anra dabin sikeng nag. Mich e dani gel ni fa’anra dabin pi’ reb ngay nib thil ngay. Ere dabi kirbaen’um ni fa’anra yire sikeng nag e mich rom fa duwer rom ni dawrin fulweg taban.
Susun ni dabin tafney nag e pin’en ni darda nanged fan u mm’on ni ngad rrin’ed. Ya gathi irreray rogn e mich. Woed rogon ni machib nag Alma, “Mich e gathi nge matabgol anʼuy u bogi banʼen.” Fa’an gara son nga mada’ ko ngiyal’ nikan fulweg taban e pi duwer rodaed, ma gadaedra buchu’uwnag e tin nib fel’ nrayag ni ngad rrin’ed, ma gadaedra achig nag gelngin fare mich rodaed.
Mich e rib fel’ ni bachan nima ul’ul’ ndemuturug ko ra yib fapi tawa’ath ni gadaed be athpeg fa dangay. Dabiyag ni ngad guyed tin nira buch nga mm’on, ma dan nanged gubin ban’en, machane rayag ni nge pagaen’daed ngak Yesus Kristus ni gadaed be ul’ul’ nga mm’on ni bachan e Ir e fare Tathapeg nge Tabiyul rodaed.
Mich e bagel ko fapi sikeng nge tin ni danur nangfan ko mornga’agen e yafos ni bachan e bay lek’ngin ngak Kristus nge fapi machib Rok’. Yesus Kristus nge Chitmangdad ni bay u tharmiy ni ke pii Ir, u ta’abang e bay nib polo’ nrayag ni nge pagaen’daed ngak!
Mich e gathi ban’en nikemus ni ta’abiyay ni ngan fal’ag mrayag ni nge sak’iy ni n’umngin napan. Ya wod e gak’iy nib tu’uf ni ngam ayuweg ni gubin ngiyal’. Yung fare thin rok Got ngalan gum’ircha’em e irreram e bin somm’on i kanawo’en. Napan nira tabab i ilaal fare mich rom, ma arram e ngiyal’ nira tabab ko muruwel! Irreram e ngiyal’ ni ngam “tabab fare ke gakʼiy ko tugul, ni nge yog ni lʼeag likʼngin, ni nge yog ni tugul nge gaaʼ, me piiʼ e waʼamngin.” Biney e mu’un fare “l’igaen’ nge mich ngay” nge “gumʼaenʼ romed i fogloliy fare bugithin.” Machane fapi micheg nitay Somoel era buch: “Bay mu feked puluwon e mich romed, nge gonop romed, nge gumʼaenʼ romed, nge athamgil romed, u napʼan ni gimed be soen nag fare ke gakʼiy ni nge piiʼ waʼamngin ngomed.”
Pi walageg, pi fagar rog, bay bang rog ni kube tawureng nag fare chapel u Zwickau nge fare winda riy nib therek. Machane 75 e duw nike thumur, Yesus Kristus e be ul’ul nibe powi’iyeg ko milekag rog ulan e biney e yafos ni rib fel’ ndariy bi’id mug lemnag nira buch. Ke pi’ e gapas ngog u fithik’ e tin ni gube gafgow riy, ma be ayuwegneg ni gube guy e mo’owar rog, ma be fosag e mad’ad rog, ma be ayuwegneg ni nge gel nag e mich rog.
Irreray e meybil rog u fithik’ e yul’yul’ ni ngad ul’ul’ gaed ngad ayuweged fare lek’ngin e mich rodaed ngak fare Tathapeg, nge machib rok’, nge ulan e Galasia Rok’. Ko pin’ey ni gu be micheg u dakean e fithingan nib Thothup ku Tathapeg rodad, Tabiyul rodad, masta rodad—u dakean fithingan Yesus Kristus, amen.