Mga Misyonaryo Nangabut sa Japan

Sa buntag sa Agosto 12, 1901, ang Empress of India misulod sa pantalan sa Yokohama nagdala sa unang grupo sa mga misyonaryo sa mga Santos sa Ulahing mga Adlaw sa pagbisita sa Japan. Nailhan isip ang “Japanese Quartet,” si Heber J. Grant (kanhi usa ka sakop sa Korum sa Napulog Duha ka mga Apostoles), Louis A. Kelsch, Horace S. Ensign, ug Alma O. Taylor dili mga andam sa mga babag nga ilang atubangon. Walay usa sa upat ang makasulti sa pinulongan o nahibalo og daghan mahitungod sa mga tawo sa Japan. Dali silang nakasugat og negatibong mga report sa mga pamantalaan ug gilikayan sa ubang mga misyonaryong Kristiyano gikan sa Kasadpan.

Mga kalainan sa kultura naghatag og importanting babag ngadto sa pag-uswag sa misyonaryong buhat sa Japan. Ang Kristyanismo gihunahuna isip usa ka pundok sa mga ideya nga gikan sa Kasadpan. Kini kasagaran nga masabtan isip usa ka paagi sa pagkab-ot og mas dakong katigayunan ug kauswagan kay sa isip usa ka hingpit nga milambo nga relihiyosong sistema. Ang labing una nga mga tawo nga gibunyagan mihatag og mga kalisud alang sa mga misyonaryo, kinsa nahimong nagdumili sa pagbunyag niadtong kinsa nag-usisa [investigate] sa Simbahan. Ang buhat sa Japan hinay nga milambo tungod kay ang mga misyonaryo midapit niadtong kinsa mipahayag og interes diha sa Simbahan ngadto sa ipalugway nga mga panahon sa pag-usisa aron sa pagsulay sa ilang sinseridad.

Kaniadtong 1905, si Alma O. Taylor, sa 22 anyos ang panuigon, nahimo nga presidente sa Japan Misyon. Batan-on ug ulitawo, gikinahanglan ni Taylor nga magsweldo og usa ka tig-atiman sa panimalay aron sa pag-amuma sa misyon home ug sa pagluto alang sa mga misyonaryo. Human ma-interbyu ang daghang mga aplikante, gidawat ni Taylor si Tsune Ishida Nachie, usa ka may kasinatian nga 49 anyos ang panuigon nga tig-atiman sa panimalay, usa ka Kristiyano, ug usa ka tawo nga adunay dako og interes sa doktrina sa Santos sa Ulahing mga Adlaw, usa ka kamatuoran nga wala niya ipahibalo ngadto ni Taylor. Kapin lamang og usa ka bulan human siya misugod sa pagtrabaho diha sa panimalay sa misyon, mihangyo si Nachie nga magpabunyag. Mabinantayon sa iyang mga katuyoan, ang mga misyonaryo mihangyo ni Nachie sa paghulat hangtud sila makatudlo kaniya og dugang pa nga mga doktrina sa ebanghelyo. Si Nachie, bisan pa niana, determinado nga magpabunyag. Mihimo siya og mga lakang sa pagmatuod sa iyang sinsero nga tinguha sa pagpasakop sa Simbahan, gani mibiya gikan sa iyang kanhi nga simbahan.

Sa Septyembre 26, 1905, si Nachie gibunyagan ug nahimong usa sa labing matinguhaon ug maalamong mga miyembro sa Simbahan sa Japan. Kasagaran siyang mitudlo og mga klase sa Sunday School, mitabang diha sa paghubad sa Basahon ni Mormon, ug mibarug isip usa ka ikaduhang inahan ngadto sa batan-ong mga misyonaryo nga nagserbisyo diha sa nasud. Human sa daghang mga katuigan sa pagserbisyo diha sa Simbahan, mipahayag si Nachie og kahinam sa pagbisita sa templo ug sa pag-apil sa mga ordinansa didto.

Sa 1922, ang mga misyonaryo nga nagserbisyo sa Misyon sa Japan nangayo og mga donasyon gikan sa kanhing mga misyonaryo kinsa nakaila ni Nachie. Nakuha ang mga pundo nga salapi, miretiro si Nachie ngadto sa Hawaii, diin sa pagka-Hunyo 5, 1923, nahimo siya nga unang lumad nga kinabig nga Hapon nga nakasulod sa templo sa Laie ug miapil sa mga seremonyas sa templo. Sa panahon sa katapusang mga tuig sa iyang kinabuhi, si Nachie nahimong himan sa pagsangyaw sa ebanghelyo ngadto sa mga langyaw nga nagtrabaho diha sa Hawaii.

Bisan pa sa mga babag sa pinulongan ug kultura, ang mga misyonaryo mipadayon sa pagtudlo sa ebanghelyo didto sa Japan. Gikan sa 1901 ngadto sa 1924, dinosena nga mga misyonaryo gikan sa Amihanang Amerika, kadaghanan gikan sa Utah ug Idaho, gitawag ngadto sa Japan. Bisan sa mga kahago sa mga misyonaryo, sa gihapon, ang buhat hinay nga miuswag. Sa mga 1924, 176 lamang ka lumad nga mga Hapon ang mipasakop sa Simbahan. Ang pipila, sama ni Nachie, mga matinud-anong mga kinabig; daghan ang mipahimulos og mubo lamang nga mga panahon sa pag-apil diha sa Simbahan.