Tatsui Sato: Tighubad sa Tibuok Kinabuhi

Tatsui ug Chiyo Sato kauban ni Warren Richard Nelson, usa ka militar nga pari sa mga Santos sa Ulahing mga Adlaw kinsa gi-estasyon duol sa Nagoya, sa pagbunyag nga serbisyo ni Sato, sa Hulyo 7, 1946.

Ang Ikaduhang Gubat sa Kalibutan mipasabut nga daghang batan-ong mga Santos sa Ulahing mga Adlaw ang dili makaserbisyo og mga misyon. Ang pipila nangita og mga oportunidad sa pagpakigbahin sa ebanghelyo atol sa ilang serbisyo militar. Daghang matinud-anong mga kinabig sa Simbahan sa Japan ang gitudloan sa ebanghelyo pinaagi niini nga mga sundalo.

Wala madugay human sa gubat, ang mga Santos sa Ulahing mga Adlaw nga diha sa militar sa Estados Unidos––lakip ang usa ka batan-ong tenyente nga ginganlan og Boyd K. Packer––mahinamong mipakigbahin sa ebanghelyo ngadto ni Tatsui Sato, usa ka Kristiyano nga lalaki nga nagpuyo sa Narumi. Nabasahan ni Sato kaniadto ang mahitungod sa mga Santos sa Ulahing mga Adlaw ug nahinumdom sa nindot nga mga hulagway sa Templo sa Salt Lake nga gipaluyohan sa naputos sa yelo nga mga bukid. Si Sato, kinsa larino nga mosulti og Iningles, misilbi isip tighubad alang sa mga sundalo samtang sila mitudlo sa ebanghelyo ngadto sa iyang pamilya ug mga higala. Kaniadtong Hulyo, 1946, si Sato ug ang iyang asawa, si Chiyo, kauban sa unang tulo sa lokal nga mga kinabig nga gibunyagan human sa gubat.

Taudtaud human sa iyang bunyag, si Sato misugod sa pagserbisyo isip tighubad sa misyon. Sulod sa sunod nga daghang mga katuigan, gihubad ni Sato ang daghang mga pamphlet ug ubang mga materyal nga gimantala sa Simbahan lakip ang kang Elder James E. Talmage nga Jesus the Christ. Sa 1949 si Elder Matthew Cowley sa Korum sa Napulog Duha ka mga Apostoles mibisita sa panimalay ni Sato, gi-orden si Tatsui nga elder, ug gi-set apart siya isip tigsaysay ug tighubad alang sa mga Hapon “sa tibuok [niyang] kinabuhi.” Sa kadugayan gihubad ni Sato ang Basahon ni Mormon, Doktrina ug mga Pakigsaad, Perlas nga Labing Bililhon, ug ang mga seremonyas sa templo.