“Ang Sinugdanan sa Simbahan sa Tanang Kanasuran sa Kalibutan”

Kaniadtong Abril 20, 1967, ang mga Santos sa Osaka nagpundok diha sa ilang bag-ong nahuman nga meetinghouse. Si Hugh B. Brown, usa ka sakop sa Unang Kapangulohan sa Simbahan, didto aron sa paghalad sa gambalay. Sa panahon sa miting, gisulti ni Brown sa mga mananambong nga iyang nakita ang adlaw nga ang mga General Authority, gani usa ka Apostol, pagatawgon gikan sa Japan.

Sa buntag sa Abril 3, 1975, ang panan-awon ni Brown natuman sa usa ka bahin. Si Adney Y. Komatsu, usa sa daghang mga Santos sa Hawaii nga kaliwat og Hapon, gihangyo sa pagpakigkita sa Presidente sa Simbahan Spencer W. Kimball. Gihangyo siya ni Kimball sa pagserbisyo isip Assistant sa Korum sa Napulog Duha ka mga Apostoles ug usa ka General Authority sa Simbahan. Sa kadugayan misulti si Komatsu nga sa sinugdanan hilabihan ang iyang kahingangha nga dili siya makasulti. Sa pagkataud-taod, mitubag siya nga kon ang Ginoo naghangyo alang sa iyang serbisyo, niana moserbisyo siya. Human dawata ni Elder Komatsu, misandig si Kimball sa iyang lingkuranan ug mahunahunaong miingon, “Ikaw ang unang dili-kagikan og puti [non-Caucasian] nga natawag isip usa ka General Authority,” nagdugang, “Kini ang sinugdanan sa Simbahan sa tanang kanasuran sa kalibutan.”

Sukad sa tawag ni Komatsu, nagkadaghan ang matinud-anong mga lalaki ug mga babaye gikan sa gawas sa Amihanang Amerika ang matinud-anong miserbisyo sa importanting mga tahas diha sa Simbahan. Uban niadtong gipanawag daghan ang gikan sa Japan, lakip sila ni Yoshihiko Kikuchi (Unang Korum sa Seventy, emeritus; unang General Authority nga natawo sa Japan), Chieko Okazaki (kanhi Unang Magtatambag, Kinatibuk-ang Kapangulohan sa Relief Society; unang Asyano nga babaye nga gitawag isip usa ka General Officer), Kazuhiko Yamashita (Unang Korum sa Seventy), ug Koichi Aoyagi (Ikaduhang Korum sa Seventy, emeritus).