Magtukod og Templo sa Japan

Ang mga Santos nga Hapon miposisyon alang sa usa ka pahulagway sa wala pa mosakay sa eroplano alang sa unang temple excursion ngadto sa Hawaii.

Ang panagna ni Cowley kabahin sa usa ka templo sa Japan mikabat og daghang mga katuigan nga matuman. Atol niana nga panahon ang labing duol nga templo didto sa Laie, Hawaii, labaw sa 3,840 ka mga milya (6,180 km) ang gilay-on. Ang gasto sa biyahe––kutob sa katunga sa kasagarang sweldo sa tibuok tuig niana nga panahon––nagpasabut nga pipila lamang ang makahimo sa biyahe.

Sa 1963, si Dwayne N. Andersen, presidente sa Northern Far East Mission, nagtinguha nga ang mga Santos nga Hapon makadawat og kaayohan gikan sa nagtubo nga espiritwalidad nga miabut gikan sa pagsimba didto sa templo. Misugod si Presidente Andersen og usa ka kampanya sa pagtudlo sa mga Santos sa importansya sa pagtambong sa templo ug sa pagtabang sa pagtugbang sa gasto sa pag-adto sa templo. Ang mga leksyon sa tanang mga branch gipunting diha sa mga doktrina sa templo ug ang gisaad nga mga panalangin alang niadtong kinsa maninguha sa pag-apil sa mga ordinansa niini.

Daghang mga Santos nga Hapon ang mihatag sa ilang panahon ug mga talento ug migamit sa ilang personal nga mga koneksyon sa trabaho aron sa pagtabang sa proyekto. Si Kenji Yamanaka importante sa paningkamot sa pagplano, pagpundo sa salapi, ug sa paghimo sa temple excursion. Si Yamanaka, usa ka negosyante sa perlas pinaagi sa pamalit–pamaligya, migamit sa iyang mga kontak sa negosyo sa pagsiksik ug pakigsabot og abang sa biyahe sa eroplano; mihatag sa mga miyembro sa Simbahan og mga perlas nga himoon og gamay nga pin alang sa kurbata [tie tacks], mga kwintas, ug ubang mga alahas; ug mitabang sa paghimo og rekording sa usa ka lokal nga choir sa Simbahan. Ang kita nga salapi gikan sa halin sa perlas nga mga alahas ug sa rekording adto sa pundo sa salapi sa temple excursion.

Sa Hulyo 1965, 166 ka mga Santos nga Hapon ang misakay sa inabangan nga biyahe gikan sa Tokyo ngadto sa Laie, Hawaii. Sila ang una sa daghang mihimo og tinuig nga biyahe ngadto sa Hawaii aron sa pag-apil sa mga ordinansa sa templo. Sa dihang miabut ang mga Santos sa Hawaii, nahimo sila nga unang nakadungog sa bag-ong hubad sa mga ordinansa nga Hinapon. Si Tatsui Sato, kinsa mihubad sa mga seremonyas, mipahigayon niining unang mga ordinansa. Ang pagsimba sa templo nahimong importanting bahin sa mga kinabuhi sa mga Santos nga Hapon kinsa misakripisyo og dako kaayo sa paghimo sa biyahe.

Kaniadtong Agosto 9, 1975, sa dihang si Spencer W. Kimball, Presidente sa Simbahan, mianunsyo diha sa usa ka komperensya sa area sa Tokyo nga usa ka templo pagatukuron diha sa Japan, daghan sa mga Santos ang mikyugpos ug mihilak sa kalipay. Ang opisina sa misyon diha sa Tokyo napili nga dapit alang sa bag-ong templo. Karon, tulo ka mga templo––sa Tokyo, Fukuoka, ug Sapporo––nagserbisyo sa mga Santos sa Japan.