“Dinhi Magpabilin”

Sa katapusan sa gubat, usa ka gamay nga pundok sa mga Santos, lakip ni Fujiya Nara, sa gihapon kanunay nag-uban sa miting. Nagtudlo og Sunday School si Nara diha sa iyang panimalay ug nagdumala og usa ka Sunday School sa mga batan-on diha sa panimalay sa usa ka mahigalaong dili miyembro. Sa kinatibuk-an, mipadayon si Nara sa pakig-uban sa hapit 100 ka mga tawo kinsa makiuyunon ngadto sa Simbahan; pipila, hinoon, nabunyagan.

Usa ka buntag, wala madugay human miabut ang langyaw nga mga militar sa Tokyo, usa ka pahibalo diha sa pamantalaan nakakuha sa atensyon ni Nara. Ang pahibalo nga gibutang ni Edward Clissold, usa ka opisyal sa sakayang iggugubat [naval officer] sa U.S. nagserbisyo sa militar nga gobyerno ug usa ka miyembro sa Simbahan, nangita sa tanang mga miyembro sa Simbahan sa Japan. Nalipay nga adunay kontak na usab sa Simbahan, gidapit ni Nara si Clissold ngadto sa iyang mga miting sa Sunday School.

Fujiya Nara ug uban sa gawas sa Tokyo Sunday School, circa 1946

Sa 1947, si Edward Clissold, karon retiro gikan sa navy, gitawag nga presidente sa bag-ong giablihan pag-usab nga misyon. Ang iyang una nga trabaho mao ang pagpangita og permanenting lugar alang sa opisina sa misyon ug alang sa mga miyembro nga magpahigayon og mga miting. Uban sa pipila ka kalisud, si Clissold wala madugay nakakaplag og karaang panimalay diha sa Azabu kasikbit sa Tokyo. Ang gambalay naguba sa panahon nga gibombahan ang Tokyo ug nagkinahanglan nga ayuhon. Human makompleto ang pagpalit, ang unang kabtangan nga gipanag-iya sa Simbahan sa Asya, mitrabaho si Clissold sa pagbag-o sa gambalay ug sa pag-andam niini nga magamit isip ang opisina sa misyon.

Sa Hulyo 17, 1949, si Matthew Cowley sa Korum sa Napulog Duha ka mga Apostoles miadto sa Tokyo sa pagpahinungod sa bag-ong giayo nga panimalay sa misyon. Atol sa iyang mubo nga pakigpulong, gipahayag ni Cowley nga Ang Simbahan ni Jesukristo sa mga Santos sa Ulahing mga Adlaw ania “dinhi magpabilin; dili gayud kita mosibug pag-usab.” Dayon si Cowley misaad nga adunay daghan pang mga gambalay nga tukuron ang Simbahan––“gani mga templo”—sa Japan.