Mataupu 20
Taimi Faigata
E lei leva ona faauu mai le Kolisi Faifaatoaga a le Setete o Iuta, ae teena loa e Evelyn Hodges e luasefululua tausaga le matua se galuega totogi o se faiaoga ae avea ma volenitia, o se tagata faigaluega faaagafesootai mo le Matagaluega o Auaunaga Faaagafesootai a le Aualofa i le Aai o Sate Leki.1
Sa le fiafia ona matua. E ui ina toaga o ia i le Aualofa, ae sa le’i manatu lona tina o le galuega faaagafesootai o se ituaiga galuega e tatau ona faia e lana tama teine. Ma sa manao lona tama ia te ia e nofo ai pea i le faatoaga a le aiga i Logan.
“E toatasi lava lo’u afafine, ma e tatau ona mafai ona ou lagolagoina o ia,” o lana tala lea. “Nofo i le fale. Ia maua se faailoga tikeri o le matuaofaiva, ia maua se faailoga o le fomai—soo se mea e te manao ai. Ae ia nofo i le fale.”2
Na iu lava ina faia e Evelyn se tuutuuga faatasi ma ona matua. O le a ia volenitia mo le iva vaiaso o se tagata faigaluega faaagafesootai. Afai e lei ofoina atu e le Aualofa ia te ia se galuega totogi pe a oo atu i lena taimi, o le a toe foi mai o ia i le fale.
I lona aso Toonai muamua i le Aai o Sate Leki, na lipoti atu ai Evelyn i le fale o Amy Brown Lyman, le fesoasoani muamua i le au peresitene aoao o le Aualofa ma le faatonusili o Auaunaga Faaagafesootai a le Aualofa. Sa lei feiloai atu Amy ia te ia i le faitotoa. Nai lo lena, na maua o ia e Evelyn i luga o le fogafale lona lua o le fale, o nofo fataivae i le ogatotonu o se moega, ma punou i se galuega suisui. Sa fai sona ofu e maanuminumi ma ni sapalai o mea suisui sa fola solo faataamilo ia te ia.
O foliga vaaia lē faauo tagata o Amy na le mautonu ai Evelyn. Sa taumafaufau o ia pe ua ia faia le faaiuga sa‘o i le sau i le Aai o Sate Leki. Pe na ia manao moni lava e galue mo lenei fafine?3
I le isi iva vaiaso na sosoo ai, na iloa ai e Evelyn sa ia mana’o ai. O lana galuega o se tagata faigaluega o tulaga patino mo le tusa ma le valusefulu aiga na ave atu ai o ia i le aai atoa, ma sa ia iloa lelei ai ona auala ma auala savali. I le taimi muamua, sa matamuli o ia e talanoa ma tagata ese, ae e lei umi ae ia maua le olioli ma le faamalieina i le fesoasoani atu i tagata e le tagolima. Ina ua o mai ona matua e ave o ia i le fale ina ua mavae lana iva vaiaso, sa faanoanoa o ia. E lei ofoina atu lava e le Aualofa ia te ia se galuega.
I le tolu o aso talu ona foi Evelyn i Logan, na ia maua ai se valaau mai ia Amy. Faatoa taliaina lava e se tagata faigaluega faaagafesootai a le Aualofa se galuega i se falemai lata ane, ma sa manao Amy ia iloa pe mafai e Evelyn ona suitulaga ia te ia.
“Ioe,” na faapea ai Evelyn. Na te lei fesili foi pe o le a le tele o le a totogi ai o ia e Amy.
Sa ese le mea sa i ai le tama o Evelyn i lena taimi, ma sa le fiafia o ia ina ua ia iloa ane ua ia taliaina le galuega a o toesea o ia. Sa lei manao o ia ia lē fiafia lona tama, ae sa ia tuuto atu lava i lana matata fou.4
I le Aai o Sate Leki, sa galulue faatasi ai Evelyn ma epikopo i le lotoifale o e sa faasino atua fafine ua maliliu a latou tane, tagata e le atoatoa le malosi, aiga e le o faigaluega, ma isi i tulaga atuatuvale i le Aualofa.5 I lalo o le vaavaaiga a le epikopo, o le a ia fesoasoani e atinae se fuafuaga mo le toomaga mo tulaga taitasi. O le a latou galulue faatasi foi ma uarota ma le malo i le lotoifale e tuuina atu tupe mo e lē tagolima mai taulaga anapogi, tupe fesoasoani a le Aualofa, ma auaunaga alofa e faagaoioia i le itumalo.
E tusa ai ma taiala a le Ekalesia i lena taimi, sa uunaia tagata ina ia maua mai se fesoasoani mai le malo a o lei liliu atu i le Ekalesia, o le toatele o aiga sa galulue faatasi ma Evelyn sa mauaina fesoasoani mai punavai uma e lua. Peitai, o le fesoasoani sa masani lava ona laitiiti, ma e masani ona ia fesili atu i tagata o loo galue i ai po o a nisi fesoasoani e mafai ona maua mai i tagata o le aiga, uo, po o tuaoi.6
Ia Oketopa 1929, i ni nai masina talu ona toe foi atu Evelyn i le Aai o Sate Leki, na pau maualalo faaletonu ai le maketi o fefaatauaiga o oloa i le Iunaite Setete. I le taimi muamua, o le pau maualalo o tau o oloa i le Aai o Niu Ioka e mamao ese, e foliga mai e lei aafia ai le avega a Evelyn. E oo atu i le tautotogo o le 1930, o le mea moni, na foliga mai ua sologa manuia le tamaoaiga mai le tulaga pau maualalo sa iai.7
Ae o lea sologa manuia sa le’i umi. O tagata taitoatasi ma pisinisi e tetele aitalafu sa le mafai ona toe totogiina. Sa amata ona faaitiitia le faaaluina e tagata o tupe, ma faaitiitia ai le manaomia o oloa ma auaunaga.8 Sa matuai faigata lava le aafiaga i Iuta. O lona tamaoaiga, lea sa faalagolago tele i le maina ma fua o faatoaga e auina atu, ua umi ona iai i ona tulaga tauivi i le taimi o le pau maualalo faaletonu o le maketi o fefaatauaiga o oloa. O le taimi lava na pau ai tau o oloa masani uma, na le mafai e le au gaosi oloa ona maua se tupe mama pe totogi tagata faigaluega, ma e toatele tagata na vave ona iloa ua leai ni a latou galuega. O le faateteleina o le faafitauli, ua toalaiti tagata na i ai tupe e tuuina atu i faalapotopotoga o galuega alofa e fesoasoani ai i e le tagolima. Na faapea foi ona tuuitiitia sefuluai ma isi foai a le Ekalesia.
E lei leva ona mae’a le aso faamanatu o le Ekalesia, ae amata ona vaaia e Evelyn le toatele o aiga o e ua le mafai ona tausia i latou lava. Ua mauaa le fefe i o latou loto.9
I le afiafi o le aso 19 o Me, 1930, sa faafeiloaia ai e Viliamu ma Clara Tanielu le peresitene o le Misiona a Aferika i Saute o Don Dalton i lo la fale i Cape Town. Sa talimalo le aiga o Tanielu i se “fonotaga i le fale” e talanoaina ai se mataupu mai le tusi a James E. Talmage O Iesu le Keriso. Sa i ai foi iina le afafine matua o Viliamu ma Clara, o Alice.10
Sa faia e le aiga o Tanielu ni fonotaga i po o Aso Gafua i lo latou fale talu mai le 1921. Sa ofoina atu e faatasiga se sulufaiga mai le vevesi o le faailoga tagata sa aafia ma siomia ai i latou. I Cape Town, o lotu ma aoga sa faanofo eseese ai tagata, o Tagatauli ma “Tagatalanu”, po o tagata e fefiloi o latou ituaiga, sa auai i le tasi nofoaga ae o tagata papae i le isi. Ae o le lanu o le tino sa le’i taofia ai tagata tapuai mai fonotaga i le fale o le au Tanielu. O Viliamu ma Clara, o e na tupuga mai augatuaa Tagatauli ma Asia sautesasae, sa faafeiloaia soo se tasi sa manao e auai. O Peresitene Dalton ma faifeautalai o e sa masani ona auai i sauniga, o ni tagata papae.11
Na muai iloa e Viliamu e uiga i le talalelei toefuataiina mai lona tuafafine o Phyllis, o le sa auai i le Ekalesia ma lona toalua ma siitia atu i Iuta i le amataga o le vaitaimi o le 1900. I ni nai tausaga mulimuli ane, i le 1915, na feiloai ai Viliamu i se faifeautalai o le Au Paia o Aso e Gata Ai, o lona faamaoni ma le tuuto ma le le manatu faapito i le talalelei na tosina atu ai o ia.12
E lei leva ona fiafia i le Ekalesia, ae asiasi atu Viliamu i Iuta e aoao atili e uiga i le Au Paia o Aso e Gata Ai. O le mea sa ia vaaia na faagaeetia ai o ia. Sa ia faamemelo i le faatuatua o tagata o le Ekalesia ma talisapaia lo latou tuuto atu ia Iesu Keriso ma le Feagaiga Fou. Sa ia feiloai faalua foi ma Peresitene Iosefa F. Samita, o le sa ta’u atu ia te ia e lei oo mai le taimi mo alii e tupuga mai Aferika e maua ai le perisitua.
O upu a le perofeta na atuatuvale ai Viliamu. E ui o le lotu Porotesano sa ia auai i Aferika i Saute sa tuueseesea ai ituaiga tagata, ae sa lei taofia ai o ia mai le auauna atu o se toeaina i lana aulotu. Afai e auai o ia i le Au Paia o Aso e Gata Ai, o le a le mafai ona ia umia se tofi faapena. Peitai, sa tuuina atu e Peresitene Samita se faamanuiaga ia Viliamu e folafola atu ai o le a ia umia le perisitua i se aso, e tusa lava pe o le olaga a sau. Sa ootia Viliamu i le faamanuiaga ma ia maua ai le faamoemoe. Sa papatisoina o ia i Iuta ma e lei umi ae toe foi atu i lona aiga i Aferika i Saute.13
Talu mai lena taimi, sa tapuai ai Viliamu i le Paranesi a Cape Town Mowbray faatasi ma tagata papae o le ekalesia. I le paranesi, sa ia tuuina atu lana molimau ma faia tatalo. Sa ia fesoasoani foi e saili tupe mo se okeni fou i le falelotu.14 O ia ma Clara, o lē na auai i le Ekalesia i ni nai tausaga talu ona uma lona papatisoga, sa ia fiafia faapitoa foi i faifeautalai. E masani ona talimalo le ulugalii i taumafataga e faafeiloai ai faifeautalai fou, faatofa atu i alii faifeautalai ua o ese atu, ma faamanatu aso fanau ma aso malolo. Ina ia fesoasoani i alii talavou ia lagona le taliaina i lona fale, o nisi taimi e ta ai e Viliamu le vii o le Iunaite Setete i luga o lana laau pe faatulaga ni taaloga peisipolo.15
Ae sa lei talia e tagata uma o le paranesi lena mea. Na iloa lata mai nei e Viliamu o nisi tagata o le ekalesia e le taliaina lona aiga i le faaaumeaina atoatoa. Ma sa ta‘u atu ia Peresitene Dalton e uiga i tagata asiasi o e sa taofia le faaalia o le fiafia i le Ekalesia ina ua latou matauina le potopotoga fefiloi o tagata lanu i Mowbray.16
I se tasi taimi, sa ta’u atu ai e Viliamu ia Clara o loo ia mafaufau e uiga i le tuua o le Ekalesia. “Faalogo mai,” sa ia tali atu ai, “ua e oo atu i le Aai o Sate Leki ma ua papatisoina oe.” Aisea e te lafoa’ia ai i le taimi nei?17
O upu a Clara, faatasi ai ma fonotaga i le fale i po o le Aso Gafua, na tuuina atu ai ia te ia le malosi e faatumauina ai le faatuatua, e ui lava i ona popolega. I lea afiafi i le tautotogo o le 1930, ina ua uma ona feauauai le au Tanielu ma a latou malo e faitau mai le Jesus the Christ, sa latou talanoaina le faatoafilemuina e le Faaola o le sami na felafolafoaiina e le matagi.
Sa faamanatu atu e le fuaitau ia i latou e liliu atu ia Keriso i taimi o tofotofoga. Sa masani ona tapulaa le mana o le tagata. Ae e mafai e Keriso ona laveaiina tagata uma i se poloaiga faigofie: “Ia filemu, ina malu ia.”18
O maatimu aisa o le tetelē e pei o fuālupe sa toulu mamafa i le fale o le Misiona i Basel, Suitiselani, i le aoauli o le aso 24 Iuni, 1930. Mo le vaiaso na te‘a, sa nonofo ai Ioane ma Leah Widtsoe i le fale, i le aoaoina o peresitene o misiona ma o latou faletua i manaoga ma tiutetauave o faifeautalai. O aso uma lava sa faailoga e ni fonotaga uumi ma talanoaga anoa e uiga i le Ekalesia i Europa. O le pao mamafa o le maatimu aisa sa o se faalavefau e seāseā ona tupu i le konafesi.19
E lei i ai se taimi muamua na pisi tele ai Leah i lana misiona. Sa nafa o ia ma le aoaoina o faletua o peresitene o misiona e fesoasoani i le Au Paia i Europa e faatulaga ia Aualofa, Faalapotopotoga o le Mutuale a Tamaitai Talavou, ma Peraimeri i o latou itu ma paranesi. Talu ai ona sa fautuaina e taitai o le Ekalesia le Au Paia e nonofo ai pea i o latou lava atunuu e fausia Siona i le salafa o le lalolagi, sa talitonu Leah e manaomia e le Au Paia i le lotoifale ona tauavea se matafaioi taulamua i nei faalapotopotoga.20 I nisi paranesi, sa auauna atu faifeautalai o ni peresitene o Faalapotopotoga o le Mutuale. Ae na talosagaina e Leah ia tofu uma paranesi ma se FMTT ma se peresitene i le lotoifale, ni fesoasoani e toalua, se failautusi, ma le tele o fesoasoani e pei ona tatau ai.
E le gata i lea, e le o faamoemoeina se faletua o se peresitene o le misiona e na te vaavaaia faalapotopotoga uma. Ua na o ia o se tamaitai e toatasi ma e le mafai ona ia faia ma le mataalia ia galuega uma. O le mea moni, afai na te le faamatuuina atu ni tiutetauave i taitai i le lotoifale, o le a ia matuai faavaivaia lava ia faalapotopotoga. Sa manao Leah i taitai misiona e musuia ma aoao le Au Paia i Europa ina ia avea ma taitai i la latou lava aia tatau.21
I le aso 27 o Iuni, na talanoa atu ai Leah i tamaitai e uiga i le manaomia o ni FMTT malolosi i Europa. Sa vaevaeina le FMTT i ni polokalama se lua, o Teine o le Ofagapi ma Teine Ao Aputi Saito. Ua avea nei Teine o le Ofagapi ma se polokalama e tolu tausaga mo soo se tamaitai talavou e sefulufa tausaga ma matutua atu. O le taimi lava e na te faamae’aina ai lana galuega o le Ofagapi, e faatasi atu ai loa o se tamaitai talavou i Teine Ao Aputi Saito, o se polokalama e le tele se faatulagaga na mamanuina e saunia ai o ia mo le tulaga faatagatamatua. O teine o le Ofagapi ua uma ona i ai teineiti e lua afe na auai i Europa, ma sa uunaia e Leah ia tamaitai e faalauiloa atu le polokalama i le misiona atoa.22
Sa ia faasilasila atu foi o le peresitene aoao o le FMTT o Ruth May Fox sa lei leva ona faatagaina o ia e fatu se lomiga i Europa o le tusitaulima a Teine o le Ofagapi. O le tusi lesona o i ai nei sa mamanuina e faamalolosia ai tamaitai talavou e ala i gaoioiga eseese e faia i totonu ma fafo. Ae o nisi o anotusi i totonu o le tusi sa faapitoa lava le fetuunaia i tamaitai talavou i le Iunaite Setete, ma lē talafeagai ai mo isi vaega o le lalolagi. Sa tuuina atu e Leah ona manatu mo le tusitaulima fou i faletua o peresitene o misiona, ma sa latou tuuina atu fautuaga i le auala e fetuunai ai le tusi lesona e taulima ai manaoga o tamaitai talavou i Europa.23
Ina ua mae’a le konafesi, sa tusi atu Leah i le Au Peresitene Sili e uiga i lana galuega. “Ou te lagona ua ono lipoti au nisi fuataga o le manuia,” na ia ta’ua ai. “O tamaitai i misiona taitasi ua faateleina lo latou lagonaina o le manaomia o le tuputupu ae ma lo latou tiutetauave mo le tauaveina i luma o a latou vaega o le faaolaolaina o le Ekalesia.”
Sa malamalama o ia o loo i ai pea se avanoa mo le faaleleia atili. “E lei a’oa’oina lava e tagata le lagolago o le tasi i le isi i le ofisa,” na ia tusi atu ai. “E tatau ona latou a’oa’oina iinei e pei ona i ai i le fale.” I le aluga o le tausaga na sosoo ai, sa ia fuafua ai e faamamafa atu le taua o le lagolagoina o latou ua valaauina ma taitai o le Ekalesia i le lotoifale.
“O aso uma o le tausaga ua tuanai na ou tuuina atu ai se aso faigaluega atoa e tau leai se itula e mama mai,” sa ia faaopoopo mai ai. Ae na te lei maua lava se isi lagona e sili atu ai. “Ua ou lagona le faateleina o lo’u talavou ma o a’u o se tamaitai ua sili atu le fiafia nai lo le taimi na ou sau ai,” sa ia tusi atu ai. “Mo lenei mea ou te faafetai muamua ai i le Tama Faalelagi, ona oo atu ai lea ia te outou, o o matou taitai ma uo.”24
O lena tautoulu, i Tilsit, Siamani, sa papatisoina ai Helga Meiszus e sefulu tausaga le matua i le Vaitafe o Memel. Sa malulu, ae sa matagofie le lagi i luga, ua suluia uma i fetu. A o sau Helga mai le vai, sa tau le mafai ona ia taofiofia le olioli sa ia lagonaina o se tagata O Le Ekalesia a Iesu Keriso o le Au Paia o Aso e Gata Ai.25
O se taimi mataina i lona olaga. Sa tonu ia te ia e auai i se aoga fou, ma i le taimi muamua sa fiafia o ia mo le suiga. Sa latalata le aoga i le fale, ma o le toatele o ana uo ma tuaoi o le a i ai iina. Ae sa le’i pine ae salamo o ia i lana faaiuga. O lona faiaoga, o Miss Maul, sa le’i foliga mai e fiafia ia te ia.
I se tasi aso, na talosagaina ai Helga e auina atu se fomu e tuuina atu ai i le aoga ona faamatalaga patino. Ina ua iloiloina e Miss Maul le fomu, sa ia faatauemu ina ua ia vaaia o Helga o se Au Paia o Aso e Gata Ai. E ui ina sa toatele atu tagata o le Ekalesia sa nonofo i Siamani nai lo se isi lava atunuu i fafo atu o le Iunaite Setete, ae sa le’i iloa lelei i latou pe maualuga lo latou amana’iaina.
“E le o se tapuaiga lenei,” na fai atu ai Miss Maul ia Helga. “O se vaega lenei, ma o se vaega leaga!”26
O le upu “vaega” na tuia ai Helga. Sa le masani ona leaga le taulimaina o ia ona o lana tapuaiga, o lea sa ia alu ai i le fale ma ta’u atu i lona tina le tala a Miss Maul. Sa tago atu lona tina i se fasi pepa ma tusia se tusi i le faiaoga, ma faamanatu atu ia te ia e le o sana pisinisi po o le a le lotu e auai ai Helga ma lona aiga.
I se taimi puupuu mulimuli ane, na o mai ai Miss Maul ma le puleaoga i le vasega. Sa tutu uma i luga teineiti, ma sa latalata atu Miss Maul ia Helga, o le sa latalata i luma o le potuaoga.
“O ia lea,” sa ia fai atu ai, ma tusi atu le lima ia Helga. “E auai o ia i lena vaega leaga tele.”
Sa tu ai iina le puleaoga mo sina taimi, ma sioa atu ia Helga e pei o ia o se sau‘ai. Sa mautu pea lona mafaufau. Sa alofa o ia i lana tapuaiga ma sa le maasiasi ai.27
Ina ua mavae lena, o le toatele o uo a Helga na le toe taaalo ma ia. Ina ua savali atu o ia i le aoga pe mai le aoga, o nisi taimi e tau’aia ai o ia e tamaiti aoga i ni maa pe tuufeanu ia te ia. I se tasi taimi, ina ua foi mai i le fale mai le vasega, na iloa ai e Helga ua galo ia te ia lona pelaue. Sa faatopetope atu o ia i le aoga ma maua ai lona pelaue i le mea sa ia tuua ai. Ae ina ua ia pikiina i luga, sa ia vaaia ai sa fogi ai le isu o se tasi.28
Sa faaauau pea ona sauaina Helga e tagata o le vasega, ae soo se taimi lava latou te faia ai, e na te usuina lemu se pese sa ia aoaoina i le lotu ma e na te maua ai le malosi. I le faaPeretania, o lona ulutala o le “O A’u o se Tama Mamona,” ae i le faaliliuga faaSiamani sa faatatau i tamaiti uma o le Au Paia o Aso e Gata Ai:
O se atalii Mamona, o se atalii Mamona,
O a’u o se atalii Mamona;
Atonu e mafai ona lotoleagaina a’u e se tupu,
Aua o a’u o se atalii Mamona.29
I le aso 30 o Ianuari, 1931, sa tutu ai Evelyn Hodges ma isi tagata faigaluega o agafesootai o le Aualofa i le Aai o Sate Leki i faamalama o le fogafale lona lua o le Maota o Ofisa o le Epikopo Pulefaamalumalu, lea sa i ai ofisa o le Auaunaga Faaagafesootai a le Aualofa. I le auala o loo i lalo, toeitiiti atoa le afe limaselau o tagata solotete’e o loo savavali atu i matu e agai i le laumua o Iuta e talosagaina le fono faitulafono ina ia fesoasoani i le faatupulaia o le aofai o tagata e le o galulue i le setete.30
A’o tilotilo ifo i lalo i tagata solotetee, sa ofo Evelyn i lo latou lē foliga ita po o le faasaua. Sa latou tauaveina ni fu‘a Amerika se lua faatasi ai ma faailoga ma fu’a e uunaia ai isi tagata faigaluega ia auai faatasi ma i latou. O le toatele o tagata solotetee sa tatoso o latou vae ma punonou o latou ulu i le le fia auai. Afai e i ai se isi mea, sa foliga faanoanoa i latou.31
A o le’i amataina taimi faigata, sa tele lava ina galulue Evelyn ma tagata o e sa le faigaluega ona o le le lelei o le soifua maloloina po o le le atoatoa o le malosi. O lea la ua ia vaaia le tele ma le tele o tagata o loo naunau e faigaluega ae sa lē mafai ona maua ni galuega. O nisi o i latou o ni tagata galulue o e lava tomai. O isi o tamaiti aoga i kolisi po o tagata faauu mai i iunivesite. O le toatele o i latou ua leai se lagona o le taua o le tagata lava ia ma sa le mananao e fesili atu mo se fesoasoani.32
O se tasi alii sa ia talanoa i ai na ia tausia lona toalua ma le fanau mo le tele o tausaga. Sa latou nonofo i se fale e taugalemu i se pitonuu lelei. Ae o lenei ua le mafai ona ia maua se galuega, ma ua faatupulaia le atuatuvale o lona aiga. I le tagi ai, sa ia ta’utino atu ai ia Evelyn e na o le pau le meaai na totoe i totonu o le fale o le falaoamata ma le masima. Na manino lava lona tiga i le fesili atu mo se tupe e fesoasoani e tausi ai lona aiga, ae o le a se filifiliga sa ia te ia?33
Sa taulimaina e Evelyn mataupu faapenei i taimi uma. Ma a o faasolo ina faaletonu le tamaoaiga, sa le mafai e le Aualofa ona faaaoga le silia ma le toalima tagata faigaluega faaagafesootai i le taimi e tasi, ae tuua ai Evelyn ma galuega na faulalai atu. E masani lava, e mafai ona ia faia sina mea e sili atu nai lo le vave iloiloina o le tulaga o se tagata a o lei faatumuina se fomu e saunia ai meaai masani, fesoasoani i se totogi i le masina, po o sina malala mo le taumalulu.34
Sa fono i taimi uma le peresitene aoao o le Aualofa o Louise Y. Robison ma ona fesoasoani ma le Au Epikopo Pulefaamalumalu e faatulaga taumafaiga faaleuelefea i le Au Paia. E faapena foi, sa galulue faatasi epikopo ma taitai o le Aualofa e faailoa mai tagata o loo tauivi i a latou uarota ma tuuina atu mea masani latou te manaomia. Sa sailia foi e malo o le lotoifale ma nisi o pisinisi ni auala fatufatuai e fafaga ai tagata faigaluega ma faafaigaluegaina. O se faleteuoloa e vaaia e le itumalo na tufaina atu meaai avefua i le Aai o Sate Leki. Sa fatuina e le faigamalo o le aai ni galuega le tumau, e pei o le suoina o le kiona po o le tātāina o fafie, o ni galuega mo le silia ma le sefulu afe alii e le o faigaluega.
Ae, sa vave lava ona iloa e taitai o le Ekalesia ma le lotoifale o a latou taumafaiga tuufaatasi ma punaoa sa le lava lea e taulima ai faafitauli tau i le tamaoaiga.35
E lei umi ae galue Evelyn i ni itula uumi faatasi ma Amy Brown Lyman ma isi tagata faigaluega agafesootai o le Aualofa. O nisi taimi e foliga mai e le muta lava aso. O aso o vaiaso ma faaiuga o vaiaso e masani ona tuufaatasia. Talu ai sa le faalauaiteleina faamaumauga o galuega faaagafesootai, sa taumafai Evelyn e galue i mataupu na o totonu lava o le ofisa. Ae a o faateleina ona tiutetauave, sa ia tauaveina faamaumauga i le fale i se ato faigaluega ina ia mafai ai ona ia galue i aoauli o Aso Toonai po o Aso Sa.
O manaoga o le galuega a Evelyn sa faavaivai tagata, ma sa aafia ai lona soifua maloloina. Ae sa le mafai ona galo ia te ia foliga faanoanoa o alii ma tamaitai lototiga o loo savavali agai atu i le fale o le setete. Sa tele lava ina le amanaiaina e le au faitulafono a latou aioiga ma sa mumusu e ofo atu ni faamanuiaga i tagata e le faigaluega. O lenei la ua mau i lona mafaufau le leai o so latou faamoemoe ma le faanoanoa. Sa fia tagi o ia i soo se taimi lava e mafaufau ai i ai.36