Mataupu 21

O Se Malamalamaaga Mataalia

o faaputuga ma taga meaai i totonu o se potu teuoloa

I le tautotogo o le 1931, na tuua ai e John ma Leah Widtsoe ia Europa mo ni nai masina e asiasi i aiga, feiloai ma taitai o le Ekalesia, ma auai i le konafesi aoao. Sa faatalitali le la tama teine o Ana mo i la’ua i le nofoaga e taunuu i ai nofoaafi i Iuta. I lo la toesea ai, sa toe faalelei ai o ia mo lea taimi ma lona toalua, ma ua ia maitaga nei i lana tama lona tolu. O le tina o Leah, o Susa Gates, sa i ai foi iina, ua sauni e faafeiloai i la’ua i le fale, e pei ona ia folafola atu e fai ina ua latou o ese i le tolu tausaga ua mavae. O lona aso fanau lona fitusefulu-lima e i le isi lua aso oi luma, ma na taunuu mai John ma Leah i le taimi tonu lava mo se faafiafiaga i le fale o le uso o Leah, o Emma Lucy ma lona toalua, o Albert Bowen.¹

O le mea e faanoanoa ai, na maliu Petroline, le tamaitai o le aiga o John, i le lua tausaga ua tuanai atu ina ua mavae se gasegase umi. Sa i ai Ann ma Rose, le toalua o le uso o Ioane, o Osborne o lē ua maliu, sa i tafatafa o lona [Petroline] moega ina ua maliu o ia.²

A o i ai John i Iuta, sa tumu ana fuafuaga faatulagaina i fonotaga ma taitai o le Ekalesia. Sa taulimaina e le Au Peresitene Sili ma le Korama a Aposetolo e Toasefululua se eseesega o manatu i le va o le aposetolo o Iosefa Filitia Samita ma B. H. Roberts, o lē ua avea nei ma sui sinia o le Aufono Muamua a Fitugafulu. Na tusia e Elder Roberts le “The Truth, The Way, The Life,” o se tusiga e valu selau itulau e auiliili ai le ata o le faaolataga. Sa manao o ia ia faaaogaina e le Ekalesia e fai ma kosi o suesuega mo korama a le Perisitua Mekisateko.³ Ae sa faaleoina e Elder Samita ni atugaluga ogaoga e uiga i ni manatu patino i tusitusiga.

I le mafuaaga autu o lona le mautonu, o le taumafaiga a Elder Roberts ia ogatasi le tala faatusi paia o le Foafoaga ma ni manatu faasaienitisi e uiga i le amataga o le olaga.⁴ Sa talitonu Elder Roberts o le faamaoniga o toega o ivi na faamaonia ai le ola o ituaiga faaletagata ma maliliu ai i le lalolagi mo le faitau miliona o tausaga a o lei tuuina e le Atua ia Atamu ma Eva i le Faatoaga o Etena.⁵ Peitai, sa finau Elder Samita o na talitonuga sa le ogatusa ma tusitusiga paia ma aoaoga faavae a le Ekalesia. Sa talitonu o ia o nei ituaiga sa lei i ai a o lei faailoa mai e le Pa‘ū o Atamu le oti i le lalolagi.

I se lauga i le Sosaiete o Gafa o Iuta, sa matuai faaleaogaina ai lava e Elder Samita manatu o Elder Roberts, e ui lava na te le’i ta‘ua o ia i lona igoa. Ae o Elder Roberts, sa ia tusi atu ai i le Au Peresitene Sili, e saili ia iloa pe o le saunoaga a Elder Samita o le tulaga aloaia lea o le Ekalesia i le mataupu pe o le manatu lava lea o le aposetolo ia.⁶

Na valaaulia e le Toasefululua alii uma e toalua e tuuina atu o la manatu i le aufono. Ona auina atu lea e aposetolo se lipoti i le Au Peresitene Sili, o e sa iloiloina ma le faaeteete itu uma e lua o le finauga ma tatalo ia iloa pe faapefea ona foiaina.⁷

O le lei leva ai ona uma ona lolomiina lana lava tusi e uiga i le faaogatusaina o tulaga faasaienisi ma mataupu faalelotu, sa manatunatu loloto ai John i le mataupu. Sa talitonu o ia e manaomia e taitai o le Ekalesia ona fesoasoani i le Au Paia talavou e atiina ae le faatuatua ia Iesu Keriso i le lotolotoi o manatu fou ma faaonaponei. O le toatele o tagata lolotu sa faaeteete lava i mea faasaienisi, sa ia manatu ai, ona sa latou fenumiaia mea moni ma faaliliuga. Sa musu o ia e faalagolago atoa i le tulaga faasaienisi e foia ai feeseeseaiga, talu ai o le malamalama faasaienisi e ono suia ma sa masani ona le amanaiaina manatu faalelotu e pei o le tatalo ma faaaliga. Ae sa tutusa lava lona faaeteete e uiga i le faalagolago i soo se faauigaga o mau lea e lei faaaofia ai le ala na oo mai ai faaaliga ma tusitusiga paia.

“Ou te manatu o la tatou fuafuaga aupito sili ona atamai o le faia lea e pei ona tatou faia i nei tausaga e tele,” na ia ta’u atu ai i le aposetolo o Melvin J. Ballard na o ia. “Talia mea moni uma ua lelei le faavaeina ma le faamaoni ma tetee le faavaeina o lo tatou faatuatua i manatu, pe faasaienitisi pe faatalitonuga.”⁸

I le aso 7 o Aperila, le aso na sosoo ma le konafesi aoao, na valaauina faatasi ai e le Au Peresitene Sili le Toasefululua ma isi pulega aoao e foia le feeseeseaiga. Sa faalogologo John a o faailoa mai e le au peresitene lo latou manatu e faapea, e tatau ia Elder Samita ma Elder Roberts ona faataatiaese le mataupu. “O nei vaega uma e lua ua avea mau ma faamatalaga a tagata o e sa lauiloa i mataupu a le Ekalesia ma faavae o le la finauga,” sa latou matauina ai. “E le’i maua foi e i la’ua taitoatasi se faamaoniga mautinoa e lagolago ai ona manatu.”⁹

Sa faamanatu mai e le Au Peresitene Sili i korama le aoaoga a Iosefa Samita: “Folafola atu uluai mataupu faavae, ma ia tuu pea mealilo, ne‘i faatoilaloina outou.”¹⁰ Sa latou lapatai mai e faapea, o le talai atu o manatu patino e peiseai o ni aoaoga faavae o le Ekalesia e mafai ona mafua ai le le malamalama, fenumiai, ma le fevaevaeai i le Au Paia. “Pe a faia e se tasi o pulega aoao o le Ekalesia se faamatalaga manino e tusa ai ma soo se aoaoga faavae,” sa latou fai mai ai, “pe na te faailoaina mai o ona manatu pe leai, ua ta’ua ia o sē ua fai ma leo o le Ekalesia, ma ua taliaina ana faamatalaga o ni aoaoga faavae ua faamaonia a le Ekalesia.”¹¹

Sa latou uunaia alii e talai atu aoaoga faavae autu o le talalelei toefuataiina. “A o tatou faalauteleina lo tatou valaauga i le malo o le Ekalesia,” na latou fai mai ai, “tuu i suesuega faasaenisi mataupu faale-eleele, mea e ola, mea e tanumia i le eleele, ma tagata ma a latou aganuu, e leai se tasi o ia mea e faatatau i le faaolataga o agaga o tagata.” E tusa ai ma le faapogai o le olaga, e le toe i ai ni a latou tala e fai atu nai lo le saunoaga a le Au Peresitene Sili i la latou saunoaga i le 1909, “The Origin of Man.”¹²

I le mafaufau o John, na foia e upu a le au peresitene le mataupu. O ia ma isi taitai o le Ekalesia i totonu o le potu, e aofia ai Elder Roberts ma Elder Samita, na lagolagoina le faaiuga ma malilie e le toe talanoaina i nofoaga faitele le fesili o le olaga o le tagata soifua ao le’i faia Atamu.¹³ E ui i lea, sa le mafai e Elder Roberts ona aveesea mai le autu mai le “The Truth, The Way, The Life.” I le iuga, sa ia faataatia ese ia tusitusiga, e lei lolomiina.¹⁴

Mulimuli ane i lena tausaga, i Cape Town, Aferika i Saute, sa usu faatasi ai e Viliamu ma Clara Tanielu ma isi Au Paia o Aso e Gata Ai e toasefululua se viiga, e pei ona latou faia i Aso Gafua uma pe a latou feiloai mo talanoaga o le talalelei i le fale o le au Tanielu. Ae sa le na o se isi fonotaga lea i le fale. Sa valaauina faatasi i latou e le peresitene o le misiona o Don Dalton mo se konafesi faapitoa.

Ina ua uma ona faia e Clara se tatalo amata, sa faamatala e Viliamu le tala o lona liua ma le amataga o a latou fonotaga laiti. “Sa matou suesueina muamua Book of Mormon Ready References, ma o lea ua matou suesueina nei le Jesus the Christ,” sa ia tomanatu ai. “Ua ou maua le tele o le malamalama ma e mafai ona ou ta‘u atu i le toatele o tagata le tele o mea e uiga i le talalelei.”¹⁵

Sa tuuina atu foi e Clara lana molimau, ma faailoa atu le faafetai mo lona auai i le Ekalesia. “Ou te faamoemoe o le a fesoasoani mai le Alii ia i tatou ia tumau mausali,” o lana tala lea.¹⁶

E toatele isi na faasoa mai a latou molimau, ona saunoa atu lea o Peresitene Dalton i le vaega. “Ou te lagona le mautinoa o loo i ai le Alii i le ulu o lenei galuega,” na ia faapea mai ai, “ma afai tatou te ola i poloaiga, o le a le taofia lava e le Alii se mea.” Sa ia talanoa e uiga i le uso o Iareto i le Tusi a Mamona, o le sa nofo latalata tele i le Alii ma sa leai se mea na taofia mai ia te ia. “O le a faapena foi ia i tatou,” na ia molimau atu ai. “Ou te iloa afai ou te faamaoni, o le a ou vaai i mea matagofie.”¹⁷

Sa popole pea Peresitene Dalton i le ala na taulimaina ai e nisi o tagata o le Paranesi a Mowbray ia tagata “Lanu” e pei o le Au Tanielu. I le taulimaina o ia tulaga, sa fautuaina ai o ia e le Au Peresitene Sili, e tatau ona ia mafaufau i lagona o le Au Paia uma. O le vevesi o le faailoga tagata o se faafitauli lea e tatau ona taulimaina ma le faaeteete tele ina ia aloese ai mai le faatiga i tagata uli po o tagata papae o le Ekalesia, sa latou tusia ai.¹⁸

O le iloaina ma le faamemelo atu i le faamaoni o Viliamu, sa manao ai Peresitene Dalton e tuuina atu i ana galuega le tulaga aloaiaina taualoa. “Ou te lagona e tatau ona faatulaga se paranesi iinei,” na ia faasilasila atu ai i le fonotaga i le fale. “E tatau ona maua e Brother Tanielu le avanoa e faatino ai se galuega faapitoa. Ou te iloa o lona filiga o le a aveesea ai le papupuni, ma o le a avea ai o ia ma se taitai i Isaraelu.”

Ona valaauina loa lea o Viliamu e avea ma peresitene o le paranesi, o Clara o se peresitene o le Aualofa, o lo la afafine, o Alice, o le failautusi o le Aualofa ma le failautusi o le paranesi, ma le la uo o Emma Beehre o le fesoasoani o Clara. Ona faaee lea e Peresitene Dalton ona lima i luga o le ulu o Viliamu ma vaetofia o ia mo lona valaauga fou. Na te lei faauuina Viliamu i le perisitua, o lea sa le mafai ai e Viliamu ona faatautaia le faamanatuga pe vaetofia tagata o le paranesi i valaauga. Ae o ona tiutetauave fou o le a tuuina atu ai ia te ia ni avanoa sili atu e auauna atu ai ma tuputupu ae i le Ekalesia.

“Sa ou mafaufau i se igoa mo lenei paranesi,” na saunoa ai Peresitene Dalton. “E tatau ona ou mafaufau faapea o le igoa e tatau ai ‘o le Lala o le Alofa.’”¹⁹

I le latou faatasiga i le Aso Gafua na sosoo ai, sa talosagaina ai e Viliamu ia Clara ma isi taitai o le paranesi faatoa valaauina e faasoa mai o latou manatu e uiga i o latou tiutetauave fou. “Ou te iloa e fai si faigata,” na ta’utino atu ai Clara, “ma iloa o le a fesoasoani mai le Alii ia te a’u i la’u galuega, e pei ona fesoasoani le Alii lava lea e tasi i le uso muamua lea na amataina le Aualofa.”²⁰

I le avea ai ma taitai o le paranesi, sa faaauau pea ona tausia e Viliamu ma Clara ia faifeautalai, o e sa auai i sauniga a le paranesi faatasi ai ma tagata asiasi papae mai le Paranesi o Mowbray. Sa faamautinoa foi e Viliamu sa tausia ma le faaeteete e Alice minute ina ia mafai ai ona auina atu kopi i le Aai o Sate Leki. Sa lei manao o ia ia faagaloina le Paranesi Alofa.²¹

I le Iunaite Setete, na avea Paulo Bang e sefulutolu tausaga le matua ma tiakono aupito fou o le Paranesi o Cincinnati i le aso 14 Fepuari, 1932. O tama laiti o lona vaitausaga sa mauaina le Perisitua Arona talu mai le faaiuga o le 1800, ina ua tātāina e tiakono fafie mo e matitiva, tutu afi e faamafanafana ai falelotu, ma faatino ai isi galuega o auaunaga i a latou uarota ma paranesi. Faato’a tulai mai ina ua folasia e Peresitene Iosefa F. Samita ia toefaatulagaga o le Perisitua Arona i le amataga o le seneturi e luasefulu, e faapea, o le faauuina o alii talavou i tofi o le perisitua na avea ma faiga masani. Ina ua mavae lena, sa amata ona faia e tiakono talavou se matafaioi tele atu i le paranesi ma ona fonotaga.²²

O le taimi nei, e faaopoopo atu i le tausiga o le falesa ma lotoa, ua mafai e Paulo ona tufa le faamanatuga, ao taulaga anapogi, ave savali mo le peresitene o le paranesi, ma fesoasoani i fafine ua oti a latou tane faapea isi Au Paia e le tagolima.²³ E pei foi o isi tiakono i le Ekalesia, sa faamoemoeina foi o ia ia malamalama ma faamatala atu Mataupu Faavae taitasi o le Faatuatua, usitai i le Upu o le Poto, fai tatalo amata ma tatalo faaiu, totogi sefuluai, ma iloa le tala o le toefuataiga o le Perisitua Arona.²⁴

Sa lei tuuina atu ia Paulo le avanoa e faatino ai nisi o nei tiutetauave fou i le taimi lava lena. Mo le tele o tausaga, na tufaina ai e alii matutua le faamanatuga, ma e toatele tagata i le Ekalesia atoa sa tumau pea le le mautu o lagona e uiga i le tuuina atu i alii laiti e faatino lenei matafaioi. I Cincinnati, sa faamanuiaina i taimi uma le faamanatuga ma tufaina atu e ni alii matutua se toalua, o nisi taimi o uso matutua o Paulo o Chris ma Henry.²⁵

Ae, afai e lei lava le pisi o Paulo i ona tiutetauave fou o le perisitua, o le tele o ana feau i le faleoloa a ona matua na faaatoa ai le eseesega. Sa fiafia o ia e faigaluega i le faleoloa. Sa matala i taeao uma i le ta o le ono ma sa lei tapunia seia ta le sefulutasi i le po. Sa tu e faatau atu oloa, teu ma faasa’osa’o oloa i fata, ma salu le fola laupapa ma suauua. Pe a fasi e lona uso o Chris aano o manu, e faataapeape e Paulo le penuili i luga o le fola e mitiia le gasu. Ona ia fufuluina lea o poloka e tipi ai aano o manu i se pulumu uamea i le taimi lava e mae’a ai galuega a Chris. A tuua le aoga, e uta i luga e Paulo atigipusa ma ato o oka oloa ma tiliva faataamilo i le pitonuu.²⁶

Ina ua o’o mai le pa’u maulalo o le tamaoaiga, sa i ai Cincinnati i le ogatotonu o se tulaga manuia i pisinisi faufale. Na faatoa amata lava le galuega o se fale maualuga e lata i le ono selau-futu le maualuga ma se fale tele fou e taunuu i ai nofoaafi. O nei galuega faatino, faatasi ai ma se tamaoaiga eseese i le lotoifale, na fesoasoani i le aai e faafetaiaia tulaga sili ona leaga o le faafitauli. Ae sa pau totogi ma maualuga le tulaga o tagata ua leai ni galuega.²⁷

Sa nonofo le au Bangs i se pitonuu mativa lea sa nonofo ai tagata papae fai mai e pei o lo latou aiga, galulue, taaalo, ma suesue faatasi ma tagata Amerika Aferika, Iutaia, ma isi vaega o ituaiga tagatanuu. O le taimi lava na o’o mai ai taimi faigata i le aai, o le toatele o tagata faatau masani a le au Bangs sa le gafatia ona totogi a latou pili o oloa faatau. Nai lo le faafoi o tagata faatau, e masani ona foai atu e le tama o Paulo ni oloa faatau e aunoa ma se totogi pe tuu atu i tagata e faatau faaaitalafu. Ae o lona agalelei ma le agaalofa sa le mafai ai ona puipuia le pisinisi a le aiga mai le Pau o le Tamaoaiga, ma ia Aperila 1932, sa ia failaina ai le talosaga mo le gau o le pisinisi. E ui i lea, sa musu o ia e tapuni le faleoloa pe taofi le fesoasoani atu i ona tuaoi.²⁸

Sa faaauau pea le Au Paia i Cincinnati i le lotolotoi ai o le faiifo o le tamaoaiga. I le faamoemoe ai e uunaia le toaaga o e umia le Perisitua Arona, sa talosagaina ai talu ai nei e le Au Epikopo Pulefaamalumalu ia paranesi ma uarota i le Ekalesia atoa e amata ona faamanatuina le toefuataiga o le Perisitua Arona i tausaga taitasi. I le aso 15 o Me, 1932, e toafa na faauuina talu ai nei o ni ositaulaga i le Paranesi o Cincinnati, o i latou uma e sefuluiva tausaga pe matutua atu, sa saunoa i le sauniga faamanatuga e uiga i le talafaasolopito ma le tuputupu ae o le Perisitua Arona. Sa saunoa foi Charles Anderson, le peresitene o le paranesi, e pei ona masani ona ia faia i le faaiuga o le sauniga faamanatuga.²⁹

E le’i i ai se vaega na faatino e Paulo i le polokalama, ae o le tele o avanoa e auauna atu ai o le a oo mai. O le auai i le paranesi e seāseā lava sili atu ma le limasefulu tagata, o lea sa tele ai avanoa e ono maua e ona matua po o se tasi o ona tei matutua e tuuina atu ai se lauga, pese faatasi ma le aufaipese, faia se tatalo, po o le fesoasoani atu i soo se fonotaga lava.³⁰ O le mea moni, o lona uso o Henry, sa faia talu ai nei le tatalo faaiu i sauniga faamanatuga e tolu i le fa vaiaso. Ma i le aso na te le’i faia ai le tatalo faaiu, sa ia tuuina atu ai se lauga.³¹

O Paulo o se Bang, o lea ua na o sina taimi e le o toe mamao ona tuuina ai lea e le paranesi ia faagalue o ia.

I Iuta, i le taimi lea, o Evelyn Hodges o le tagata faigaluega faaagasefootai a le Aualofa sa tele mea e popole ai a o faasolo ina loloto le oo o le lalolagi i le Pau o le Tamaoaiga. O lona tamā, o le sa aioi atu ia te ia e nofo i le fale ina ia le faigaluega ai o ia, ua o’o i ai taimi faigata ina ua le toe faatauina atu oloa mai lana faatoaga i Logan. Sa iloa e Evelyn le auala e fesoasoani ai ia te ia e talosaga mo se toomaga mai le Ekalesia ma le setete, ae sa le’i manao ai o ia.

“E mafai ona maua sa’u galuega,” na ia fai atu ai ia te ia i le amataga o le Pau o le Tamaoaiga. “Ou te iloa e mafai ona ou maua se galuega.”

Sa i ai ia Evelyn ona masalosaloga. O aso uma i le Aai o Sate Leki sa ia talanoa atu ai i tagata o e tutusa mea na fai mai ai. “Afai e mafai ona ou alu ifo i Los Angeles,” latou te tau atu ia te ia, “E mafai ona ou maua se galuega.” I Iuta, e toatasi mai le toatolu o tagata faigaluega ua leai se galuega, ma sa leai foi se tasi o sailia ni tagata faigaluega. Ae sa iloa e Evelyn sa le’i sili atu le lelei o le tulaga i Kalefonia po o se isi lava nofoaga i le Iunaite Setete. Sa ia taumafai e faamalamalama atu e faapea ua seāseā maua ni galuega i soo se nofoaga, a e o nisi o aiga sa ia galue ai sa le talitonu ia te ia.³²

E oo atu i le taumafanafana o le 1932, ua ia te ia se mafuaaga lelei e faamoemoe ai ua agai mai se suiga. Ina ua uma ona fatuina e le malo o le I.S se polokalama e tuuina atu ai fesoasoaniga tautupe i setete ma pisinisi, sa vave ona faatagaina e taitai i Iuta le Auaunaga Faaagafesootai a le Aualofa e fesoasoani ai i le setete e talosaga mo se nonogatupe mai le malo tele. Sa faaaluina e Evelyn ma Amy Brown Lyman ni itula e ao mai ai fuainumera ma faila o mataupu taitasi e faamaumau ai le tulaga le tagolima i le setete. Ona latou aumaia lea o a latou sailiiliga i taitai o le setete, lea na faaaoga e le au faitulafono i la latou talosaga faamanuiaina mo le fesoasoani a le malo tele mo Iuta.³³

Sa a’oa’o Evelyn mai ia Amy a o la galulue faatasi. O Amy e tautala sa’o lava i le tagata ma e masani ona le mafaufau pe a talanoa atu i tagata faigaluega lautele. E ui ina fiafia Evelyn i le tatala atu o manatu o Amy, sa ia ta’utino atu o nisi o taimi e le fiafia iai. Sa le’i faatali Amy e faitio ia te ia pe a ia faia se mea sese. Ae sa iloa e Evelyn e le o faatigainaina o ia e Amy. Sa le’i lagona lava e Amy e faaaluina sona taimi e tau faaeteete pe faaaloalo ai. Sa ia faamoemoe o tagata uma i le ofisa o le Auaunaga Faaagafesootai, e aofia ai ma ia, e tuuina atu mea uma sa ia i latou i le galuega. Mo lena mea, sa alofa ma faamemelo atu ai Evelyn ia te ia.³⁴

O tupe foai o le toomaga mai le malo tele na taunuu i Iuta ia Aokuso 1932, ma aumaia ai le faamoemoe i le toatele o le Au Paia faanoanoa. Sa toe valaau atu foi le setete i le Aualofa mo se fesoasoani, ma e le’i umi ae faia e Amy ma ana tagata faigaluega faaagafesootai se matafaioi autu i le tufatufaina atu o le fesoasoani.

I le toetoe ai uma le tele o tupe mo toomaga o le Ekalesia ma le malo i le lotoifale, o le toatele o epikopo sa galulue faatasi ma Evelyn sa naunau mo tagata le tagolima o a latou uarota ina ia maua le fesoasoani mai le malo tele. Ae sa i ai tagata o le Ekalesia o e sa popole i le faalagolago o le Au Paia i le fesoasoani a le malo. Sa teena e nisi tagata le sailia o le toomaga a le Ekalesia ona sa latou le mananao i o latou epikopo, o e sa tele ina avea ma tuaoi ma uo, ia iloa lo latou tulaga. O isi sa le’i mananao e lagona le faaigoaina o ni tagata e faalagolago pe a latou o i le lotu.

Peitai, sa faaauau pea ona salalau atu le i ai o le faalagolago. Sa manatu faatauvaa taitai o le malo i le Iunaite Setete i le pau o le tamaoaiga, ma o le tupe sa latou ofoina atu e le’i tuuina atu ai se toomaga tumau i tagata Amerika. Sa faaauau pea ona agai i lalo le tamaoaiga, ma alu atu faatasi ai ma le faamoemoe. O aso uma lava e toatele tagata ua leai ni a latou galuega ona sosoo ai lea ma le leai o ni o latou fale. E masani ona vaaia e Evelyn ni aiga se toalua pe toatolu o nonofo faatasi i se tamai fale.

Ma sa tauivi pea lona lava aiga. Ina ua le manuia taumafaiga a lona tama e tausi le aiga, sa ia taumafai e faatau atu ni meatotino, ae sa leai se tasi na manao e faatau. Mulimuli ane, sa ia tuu ia Evelyn e lafo atu ia te ia le tolusefulu tala i le masina mai lana lava tupe maua. Sa fiafia o ia mo le fesoasoani.³⁵

A o faasolo ina faateteleina le Pau o le Tamaoaiga, ma sa molimauina e Evelyn le faateteleina o le faanoanoa i le Aai o Sate Leki, sa ia vaaia ai se avanoa mo le agaalofa sili atu ma le tuputupu ae i le nuu. “Afai e mafai ona tatou o ese mai lenei tauiviga ma se malamalamaaga malosi atu e uiga i manaoga o tagata soifua,” sa ia talitonu ai, “o le a sili atu ona lelei le nu’u ona o le puapuagatia na ala mai i lenei mea.”³⁶

I le isi itu o le taulaga, sa silafia e Peresitene Harold B. Lee o le Siteki a Paionia o le Aai o Sate Leki e tatau foi ona ia faia se mea e fesoasoani ai i tagata ia faasaoina i le Pau o le Tamaoaiga. I le tolusefulu-tolu o ona tausaga, o ia o se tasi o peresitene aupito laitiiti o siteki i le Ekalesia, o lea sa le’i tele ai sona poto masani i le olaga e pei o isi alii i lona tulaga. Ae sa ia iloaina pe tusa ma le lua-vaetolu o le Au Paia e 7,300 i lana siteki a le o le faalagolago atoa pe na o se vaega foi e faalagolago ai i fesoasoaniga tautupe. Ma ina ua matelaina tagata, sa itiiti se avanoa e fafaga ai i latou faaleagaga.³⁷

Sa valaauina faatasi e Harold ona fesoasoani e talanoaina pe faapefea ona fesoasoani i le Au Paia i lalo o la latou tausiga. Mai le suesueina o le Mataupu Faavae ma Feagaiga, sa latou iloa ai na poloaiina e le Alii le Au Paia anamua e faatu se faleteuoloa “e auauna atu ai i e matitiva ma e le tagolima.”³⁸ Mo le tele o tausaga, sa faagaoioia ai e uarota i le Ekalesia atoa ni “faleteuoloa laiti a le epikopo” e aoina ma toe faasoa atu meaai ma isi mea na ofoina mai mo e matitiva. E ui ina sa suia e le Ekalesia le totogi o sefuluai i na o tino-i-tupe i le 1910, ae sa i ai lava faleteuoloa i nisi o uarota ma siteki.³⁹ O le au peresitene aoao o le Aualofa, lea sa faagaoioia faleoloa ma fale teuoloa e fesoasoani i le Au Paia i taimi o puapuaga, sa faapena foi ona faia se faleteuoloa e tuuina atu ai i e matitiva ia lavalava ma isi aitema o le aiga.⁴⁰ Ae faapefea pe afai e faia e le Siteki a Paionia se mea faapena?

E le’i umi ae amata se polokalama o le toomaga, o se polokalama e fesoasoani foi i le Au Paia ia ola tutoatasi ai. Faatasi ai ma le fesoasoani a epikopo, o le a faatuina ai e le siteki a Harold se faleteuoloa e lagolagoina e sefuluai ma foai. Nai lo le tuuina atu fua o oloa, e tuu atu e le polokalama i Au Paia o le siteki e le o faigaluega le avanoa e galulue i le faleteuoloa po o isi galuega fesoasoani e fesuiai ai mo ni meaai, lavalava, suauu, po o isi mea e manaomia.⁴¹

Ina ua uma ona feutagai ma ona fesoasoani, sa auina atu e Harold le fuafuaga i le Au Peresitene Sili ma maua ai la latou faamaoniga. Ona ia tuuina atu lea i epikopo o lana siteki i se fonotaga faapitoa ma valaaulia i latou e talanoaina. I le taimi lava lena, sa fai atu ai e se tasi epikopo se fesili e le masalomia i mafaufau o le toatele o tagata o le Ekalesia: Afai na folafola mai e le Alii e na te tausia Lona nuu, aisea ua matua toatele ai le Au Paia faamaoni, totogi sefuluai ua faamativaina?

Sa faia e Harold le mea sili na te mafaia e tali atu ai, ma faamanatu atu i epikopo sa faalagolago le Alii ia i latou e faatino Lana galuega. “Ua i ai folafolaga a le Alii i o outou lima, ma o le ala ma le faatinoga o le faataunuuina o nei mea e tatau ona tuuina atu ia te outou,” na ia saunoa ai. Ona ia uunaia lea o epikopo e faia mea uma latou te mafaia ina ia faamanuiaina ai le faleteuoloa, ma molimau atu o faamanuiaga folafolaina a le Alii o le a faataunuuina.⁴²

Ina ia fesoasoani e faataunuu le fuafuaga, sa aumai ai e Harold ma ona fesoasoani se tasi o epikopo, o Jesse Drury, e pulea le faleteuoloa. E toatele le Au Paia i le uarota a Jesse na taia malosi i le Pau o le Tamaoaiga. O Jesse lava ia ua leai sana galuega, ma ua tau le mafai e ia ma lona aiga ona ola ai i le toomaga faalemalo.⁴³

Peitai, i le amataga o lena tausaga, sa filifili ai Jesse ma ona fesoasoani e faia se mea e tuuina atu ai ni meaai faaopoopo ma galuega mo tagata o le latou uarota. I le itu i saute o le tuaoi o le uarota o se vaega o fanua lafulemu, ma e le’i faaaogaina. Sa oo atu le au epikopo i e umia le fanua, ma sa latou malilie e atiina ae e le uarota le fanua e fesuiai ma le totogiina o lafoga o le fanua. E toalua uarota tuaoi i le Siteki a Paionia na vave lava ona auai i le taumafaiga, ma sa latou mauaina faatasi ni faifaatoaga ma ni taitai o le itumalo o e sa naunau e foai atu fatu ma sapalai ni vai e faasūsū ai. Sa latou faatauina foi laau fualaau faisua i tau pau ma maua mai ai ni masini faifaatoaga ma solofanua mai tagata na lagolagoina la latou galuega faatino.⁴⁴

I le taimi lea, i le faatonuga a Harold, sa taitaia ai e Jesse se vaega o tagata o le Ekalesia ua leai ni galuega a o latou faaliliuina se faleteuoloa tele tuai e avea ma se faleteuoloa a le siteki. Sa latou faapipiiina se fale e teu apa ai meaai ma tatala se faleoloa o oloa eseese. Sa i ai foi mea e teu ai oloa i vaega eseese o le fale ma avanoa mo le taulimaina o laei na foai atu.⁴⁵

E oo atu i le taumafanafana o le 1932, ua saunia le faleteuoloa e tatala. Sa matauina e Harold, Jesse, ma le isi vaega o totoe o le Siteki a Paionia se aso faapitoa o le anapogi e faamanatu ai le gaoioiga, ma aumaia ai a latou taulaga anapogi i le sauniga amata mo le tatalaina o le fale. O nisi o tamaitai ma alii i le siteki sa tuu atu e galulue i le faleteuoloa a o isi na malaga i le vanu e galulue i faatoaga ma togalaau.⁴⁶

E le’i umi ae oo mai se galu o fua o faatoaga. Sa faitau selau faaputuga o fualaau aina, faitau afe taga pateta ma aniani, tele tone o vine, ma le tele o isi mea. O le taui mo a latou galuega, ua mafai e tagata o le siteki ona olioli i se vaega o le seleselega. Sa lava mea na totoe lea na avatu e le Aualofa nisi o meaai faasili na totoe e teu apa mo le taumalulu na sosoo ai. Sa faafesuiai foi e tamaitai ia galuega mo mea manaomia e le pala gofie e ala i le toe su’i faalelei o lavalava tuai ma le aoina mai o seevae ua faaaogaina.⁴⁷

I le faaiuga o le tausaga, sa mafai ona iloa atu e Harold o loo faamanuiaina e le Alii le Au Paia i le Siteki a Paionia. E ui o le toatele o i latou sa feagai ma faigata i le aluga o tausaga ua tuanai, sa tumau lo latou mausali i le talitonuga maumaututu o le a fesoasoani le Atua ia i latou i la latou tauiviga. O le mea na sili atu, sa latou saunia ma naunau e galulue faatasi mo le manuia o e le tagolima, e ui lava i faatamaiaga na aumaia e le Pau o le Tamaoaiga.⁴⁸