Talafaasolopito o le Ekalesia
Mataupu 7: O Fanau a le Atua e Tasi

Mataupu 7

O Fanau a le Atua e Tasi

aufaipese a tamaitai i luma o le faatusa o le Malumalu o Sate Leki

I le amataga o Oketopa 1963, o le lala i le lotoifale i le Aai o Sate Leki o le Asosi Faalemalo mo le Siitiaina o Tagata Lanu (NAACP) ua saunia e faia se tetee toafilemu i fafo atu o le Lotoa o le Malumalu i le taimi o le konafesi aoao. A o avea ma ni ulutala i talafaasalalau i le salafa o le Iunaite Setete lea tetee o fuafua e faatino, sa faamoemoe i latou na faatulagaina o le a faatauanauina e lea tetee taitai o le Ekalesia e faamanino o latou tulaga i aia tatau faalemalo.

E ui o le Deseret News e anaina e le Ekalesia sa faamaonia le faasolosolo malie o le faaleleia o le tulaga faailoga tagata i le 1956, ae sa faatuai le faatinoga i Iuta nai lo isi setete lata ane i le pasia o tulafono o aia tatau faalemalo. Sa faamoemoe le NAACP o se faamatalaga malosi mai le Ekalesia o le a tosina ai le au faitulafono ia mautinoa ai puipuiga ma avanoa tutusa mo tagata uma i le setete.

O le tetee na avea o se tasi o le tele [o tetee] o lena vaitau i le Iunaite Setete. I le amataga o le tausaga, sa fautuaina ai e le peresitene o le I.S. o John F. Kennedy se tulafono o aia tatau faalemalo e puipuia ai tagata Aferika Amerika ma isi tagata lanu e faasaga i le faailogalanu. I ni nai masina mulimuli ane, sa fesoasoani ai le NAACP e faatulaga se savaliga tele i Uosigitone, DC, e tetee atu ai i le le tutusa faaleagafesootai ma faaletamaoaiga i le Iunaite Setete. Na faaiuina le savaliga i se saunoaga musuia faaosofia na saunia e Dr. Matini Luteru King Jr., o se taitai iloga o aia tatau faalemalo, lea na musuia ai le toatele o tagata e tutu e tetee atu i le faamasinoletonu faailogalanu.

Ina ua iloa e uiga i le tetee na fuafuaina i le Lotoa o le Malumalu, sa faatulaga e Sterling McMurrin, o se polofesa o filosofia i le Iunivesite o Iuta, mo taitai o le lala i le lotoifale i le Aai o Sate Leki o le Asosi Faalemalo mo le Siitiaina o Tagata Lanu e feiloai ma Hugh B. Brown o le Au Peresitene Sili.

I le afiafi o le aso 3 o Oketopa, na faafeiloaia ai e Peresitene Brown ia Albert Fritz, le peresitene o le lala i le lotoifale i le Aai o Sate Leki o le Asosi Faalemalo mo le Siitiaina o Tagata Lanu, ma isi tagata na faatulagaina le tetee, i le Maota o le Pulega o le Ekalesia. O N. Eldon Tanner, lea na valaauina i le amataga o lena aso e suitulaga ia Henry D. Moyle i le Au Peresitene Sili, na faatasi atu foi ma i latou.

I le fonotaga, sa fesili atu ai i latou na faatulagaina le tetee pe ua faamoemoe le Ekalesia e saunoa atu e lagolago ai aia tatau faalemalo.

“E pei ona outou silafia,” na saunoa ai Peresitene Brown, “e le aafia le Ekalesia i tulaga faaupufai.” Sa i ai se tulaga ua loa o le le faatuaoia faaupufai.

Ona ta’u atu lea e le au faatulaga tetee faapea, e masani lava ona talanoa faalauiloa atu le Ekalesia e uiga i mataupu tau amio sa’o. Ma o aia tatau faalemalo, sa latou manatu i ai, o se faafitauli o le amio sa’o.

Sa malilie faatasi Peresitene Brown ma i latou, ae e lei manatu foi o ia po o Peresitene Tanner sa manaomia se tetee faalauaitele. Sa la’ua folafola atu e talanoa ma Peresitene MaKei e uiga i le tuuina atu e le Ekalesia o se faamatalaga e uiga i aia tatau faalemalo.

Ina ua maea le feiloaiga, sa talosagaina e Peresitene Brown ma Peresitene Tanner ia Sterling McMurrin e fesoasoani ia i la’ua e saunia se faamatalaga mo le faamaoniga a Peresitene MaKei. O le taimi lea, na uunaia ai e Albert Fritz tagata o le NAACP e tolopo le tetee ma tuu atu i le Ekalesia se taimi e tuuina atu ai se faamatalaga. O nisi o le au tetee ua uma ona faia ni faailoilo tetee, ae sa latou malilie e faatali mo se isi vaiaso.

I le Aso Toonai, 5 Oketopa, na logoina ai e Peresitene Brown le NAACP e faapea ua faamaonia e Peresitene MaKei se faamatalaga, lea na faitauina e Peresitene Brown i le konafesi aoao i le taeao na sosoo ai.

“O loo i ai i lenei Ekalesia le leai o se aoaoga faavae, talitonuga, po o se faiga ua faamoemoe e teena ai le olioli i aia tatau atoatoa faalemalo e soo se tagata, e tusa lava po o le a le ituaiga, lanu, po o talitonuga,” na folafola mai ai. “Matou te talitonu o tagata uma o fanau a le Atua e tasi, ma o se mea leaga mo soo se tagata po o se vaega o tagata le faafitia o soo se tagata soifua o le aia tatau e maua ai galuega lelei, i avanoa atoa faaleaoaoga, ma i avanoa uma o le avea ai ma tagatanuu.”

“Matou te valaau atu i tagata uma i soo se mea, i totonu ma fafo atu o le Ekalesia, ina ia tuuto atu i latou lava i le faatuina o le tulaga tutusa atoatoa faalemalo mo fanau uma a le Atua,” na faaauau ai. “Soo se mea lava e itiiti ifo nai lo lenei ua faatoilaloina ai lo tatou tulaga maualuga o le usoga o tagata.”

O le faamatalaga sa avea o se talafou i le itulau pito i luma i le Aai o Sate Leki ma isi nofoaga. I le talosaga a Albert Fritz, e lei faia ai e le NAACP soo se tetee i le taimi o le konafesi. Sa faamoemoe o ia e mafai ona avea lana faalapotopotoga ma le Ekalesia ma ni paaga.

“Afai tatou te galulue i le lotogatasi,” na ia fai mai ai, “o le a tatou maua se tulaga e sili atu i lenei setete.”

I le gasologa atoa o le 1963, sa masani ona femalagaai solo ai Hélio da Rocha Camargo i Pasila. Sa ia mauaina le Perisitua Mekisateko ae lei leva ona mavae le malaga asiasi atu a Elder Spencer W. Kimball i Amerika i Saute i le 1959, ma o lea ua ia auauna atu o se fesoasoani i le au peresitene o le Misiona a Pasila. Faatasi ai ma le faatupulaia vave o le Ekalesia i le tele o vaega o le atunuu, o lona valaauga na manaomia ai o ia e feiloai ma le Au Paia i aai e mamao e pei o Rio de Janeiro, Belo Horizonte, Recife, ma Pasilia, o le laumua fou faatoa fauina o Pasila.

I le aluga o le fa tausaga ua mavae, e silia ma le tolusefulu-lima afe tagata na auai i le Ekalesia i Amerika Latina. I le 1961, sa faatulagaina ai le uluai siteki o le gagana Sipaniolo i le Ekalesia i le Aai o Mekisiko. I le taimi lava lea, o le aofai o misiona i Amerika i Saute na sili atu ma le faaluaina. Ua lua nei misiona i Pasila, e lua i Atenitina, e tasi i Iurukuei, tasi i Chile, ma le tasi na aofia ai Peru ma Polivia.

I nei misiona taitasi, o le sini o le faasalalau atu lautele o le talalelei, fesoasoani i le Au Paia ia ola faamaoni, ma faatuina uluai siteki i Amerika i Saute. O le faatulagaina o nei siteki o le a tuuina atu ai i tagata o le ekalesia le pule sili atu e taitai ai ma auauna atu ai i le Ekalesia, ma aveesea ai le manaomia o taitai mai fafo atu o o latou eria.

O Wayne Beck, le peresitene o le Misiona a Pasilia, ma lē na muamua atu ia te ia, o Grant Bangerter, sa la talitonu uma o le auala sili e saunia ai le Au Paia mo le tiutetauave o siteki o le fausia lea ma aoaoina taitai o le Ekalesia i le lotoifale. O le aafiaga o Hélio o se faifeau Metotisi na avea ai o ia ma se sui lelei mo le taitaiga o le Ekalesia, ma sa vave ona valaauina o ia e Peresitene Bangerter i ni tofiga o tiutetauave iloga.

O se tasi o ona valaauga muamua faaletaitai sa auauna atu o se fesoasoani i se au peresitene o le itu faatasi ma isi Au Paia Pasilia e toalua. O ona tiute fou sa le masani ai i le taimi muamua, ma ina ua uma ona tauivi ia malamalama i lo latou faamoemoega, sa ia saunoa atu ia Peresitene Bangerter. “Ou te le o faia se mea taua iinei,” o lana tala lea.

“O le a se mea e te manao e fai?” na fesili atu ai le peresitene.

“Ou te toe fia foi i la’u paranesi ma avea ma se faiaoga,” na tali atu ai Hélio. “E mafai ona avea a’u ma se faiaoga lelei.”

Ona faamalamalama atu lea e Peresitene Bangerter e faapea, o le Au Paia i le lotoifale sa taua tele i le atinaega o le Ekalesia i lo latou atunuu. I le avea ai ma se tasi o le au peresitene o le itu, sa i ai se matafaioi autu a Hélio i le valaauina ma le aoaoina o taitai ma faiaoga o le Ekalesia i le lotoifale.

“O le taimi lenei ua atiae ai e le Alii Ana auauna mo le faatuina o Lana galuega i le mana i Amerika i Saute,” na saunoa ai le peresitene. “O nisi e valaauina e tauaveina le avega, ma ua pau ifo ia te outou.”

Sa faafuasei ona vaaia e Hélio le taitaiga o le Ekalesia i se malamalama fou. I totonu o ni nai vaiaso, sa galulue lelei ai o ia ma isi sui auai o le au peresitene o le itu.

Ina ua mavae lena, sa aoaoina e Hélio le toatele o taitai i le lotoifale—o se tiutetauave na faaauau ina ua mavae se valaauga i le au peresitene o le misiona. I le avea ai ma se fesoasoani ia Peresitene Bangerter ma Peresitene Beck, sa ia fesoasoani ai i ona uso a Au Paia ia faaleleia le tulaga lelei o a latou sauniga faamanatuga, uunaia le auai i galuega faatino o le fausiaina o fale a le Ekalesia, ma galue e faamalolosia paranesi. O le taimi nei, po o fea lava na faavae lelei ai le Ekalesia i le misiona, o paranesi ma itu sa galulue moni lava o ni uarota ma siteki. Afai sa manaomia se papatisoga po o se faamauga, e faatinoina e se tagata Pasilia e umia le perisitua.

O le faletua o Hélio, o Nair, sa auauna atu o se fesoasoani i le faalapotopotoga a le Peraimeri a le misiona, lea sa ia faia ai lana vaega e saunia ai le Au Paia mo le taitaiga faalesiteki. I le mulimuli ai i se mamanu a le Ekalesia atoa i siteki, sa faia ai e le au peresitene se konafesi i tausaga uma mo taitai ma faiaoga o le Peraimeri. I ana lesona i tamaitai, sa tuuina atu ai e Nair ni fautuaga mo le aoaoina o tamaiti laiti, faaleleia atili o le auai i le Peraimeri, ma le faaaogaina o mataupu aoaoina ma fesoasoani o mea faitino vaaia o loo maua.

“Matou te ole atu i le Atua e faamanuia galuega uma ua outou faia mo tamaiti,” sa ia tau atu ai i le aufaigaluega a le Peraimeri i le konafesi o le 1963, “ma ia Ona faateleina lo tatou faatuatua ma lo tatou manao e ola e tusa ai ma mataupu faavae o le talalelei, ma tuuto atu i tatou lava ma le naunautai ma le faamaoni i le galuega ua Ia tuuina mai ia i tatou.”

I lana galuega i le au peresitene o le misiona, sa faalautele ai e Hélio lona valaauga i le malosi lava e tasi na ia maua o se faifeau. Sa ia ta’u atu ia Peresitene Bangerter e faapea, o le avea ma soo moni e manaomia ai le ua’i atu ma le tuuto atoa i le faamoemoe o Keriso.

“Soo se Metotisi lelei lava e iloaina lenei mea,” o le tala lea a Hélio. Ma sa talitonu o ia o Au Paia o Aso e Gata Ai e tatau foi ona latou malamalama i ai.

E lata i le faaiuga o le 1963, sa le nofonofo lelei ai Walt Macey e fasefulu-fa tausaga le matua. I le avea ai ma se tasi o pule o faleoloa e tolu i le Aai o Sate Leki, sa le mautinoa e ia pe tatau ona tatalaina ana faleoloa i Aso Sa. Sa aoaoina o ia i le tuputupu ae o le Sapati o se aso paia e malolo ai. Ae talu ai nei, sa ia maitauina ai le toatele o le Au Paia o Aso e Gata Ai sa faatau i le Sapati e pei lava ona faia e isi tagata.

Soo se mea lava sa ia tilotilo i ai, sa ia vaaia ai faleaiga, pamu kesi, ma faleoloa o loo matala i le Aso Sa. Ma o lana paaga faipisinisi ua leva, o Dale Jones, sa manatu e tatau foi ona tatala pea a la’ua faleoloa. Sa tele a la’ua oloa e taulia ma tele ai tupe e maua i aso Sa, ma sa talia e Walt le manatu faapea o le tatalaina pea sa fesoasoani i aiga o e sa manaomia ona faatau i faaiuga o vaiaso. E toalaiti ni aiga sa i ai ni taavale se lua, ma talu ai e masani ona ave e tane le taavale e galulue ai i aso o le vaiaso, o le Aso Sa o se aso taua o faatauga.

E lei lagonaina lava e Walt le toafimalie atoa i le faagaoioia o faleoloa i le Sapati. Sa faanoanoa o ia i le manatu faapea sa ia taofia maia le autalavou sa ia faafaigaluegaina mai le auai i a latou sauniga faalelotu. I ni nai tausaga na muamua atu, sa ia ta’u atu ai ia Dale o le a faamanuiaina le la pisinisi pe afai la te tapunia i Aso Sa. Sa le ioeina e Dale lena mea. “O le a ta le tapunia lava,” na ia fai atu ai, ma famae’a ai le mataupu.

Peitai, talu ai nei, o se talanoaga ma Iosefa Filitia Samita, le peresitene o le Korama a Aposetolo e Toasefululua sa popole ai Walt. O Peresitene Samita ma lona faletua, o Jessie, sa avea ma tagata faatau masani i lo la faleoloa i le itu i sisifo o le Aai o Sate Leki. I se tasi aso, sa savali atu ai Peresitene Samita i le itu e faatau ai aano o manu fasi lea sa faigaluega ai Walt.

“Uso Macey,” na ia fai atu ai, “Ou te manao ia te oe e aveese lena faailoilo mai le faamalama.” Sa tele ni faailoilo i luga o le faamalama, o lea sa fesili atu ai Walt po o le fea o faailoilo o loo faatatau i ai lana tala.

“Le faailoilo o le ‘Tatala i Aso Sa’” na saunoa ai Peresitene Samita. Sa ia tau atu ia Walt e sili ia te ia le faatau i faleoloa e faamamaluina ai le Sapati e ala i le tapunia i Aso Sa. Ona ia liliu lea ma savali ese atu. E lei vaai lava Walt ia te ia i le faleoloa talu mai lena taimi.

Sa avea Peresitene Samita ma se aposetolo mo le silia ma le afa seneturi. I le gasologa o lena taimi, sa ia vaaia ai le faaitiitia o le faaaloalo mo le aso Sapati e tagata kerisiano i le salafa o le lalolagi. A o iloaina sa i ai ni mafuaaga malamalama mo le galulue ai i le Sapati, sa popole o ia ma isi taitai o le Ekalesia e uiga i le Aso Sa i le na o le avea ma se isi aso o gaoioiga faafiafia ma fefaatauaiga. I lea taimi ma lea taimi, sa latou sii ae lo latou leo e faasaga i le faaaogaina o le Sapati mo taaloga, ata tifaga, faatauga, ma isi gaoioiga e mafai ona faia i isi aso. E sili atu nai lo se isi lava aposetolo o lona taimi, sa aioi atu Iosefa Filitia Samita i le Au Paia ia tausia le paia o le aso o le Alii.

“E tatau ona tatou taofia le solia o le aso Sapati,” na ia folafola atu ai i le konafesi aoao ia Aperila 1957. “Ou te folafola atu ia te outou afai tou te tausia le aso Sapati, o outou o e o loo tatalaina a outou faleoloa i le aso Sapati, afai o le a outou tapunia ma tausia tiute ua tuuina atu e le Alii ia te outou, ma tausi Ana poloaiga, o le a outou manuia.”

I le lua tausaga mulimuli ane, sa aoao atu ai e le Au Peresitene Sili le mataupu faavae lava lea e tasi, ma aioi atu i le Au Paia e tuu le faatau i Aso Sa.

Ina ua maea lana talanoaga ma Peresitene Samita, sa tonu ia Walt e sui. Na oo mai le uunaiga ia te ia e faapea, sa ia toilalo i le mea sa ia iloa e sa’o.

Sa toe alu atu foi o ia ia Dale e uiga i le tapunia o faleoloa i le Aso Sa, ma sa musu Dale e mafaufau i ai. “Ia,” o le tala lea a Walt, “ona e taua tele lenei mea ia te a’u, e sili ai la le faamuta o la ta faigapaaga pe umia uma e oe po o a’u le pisinisi.”

I se masina mulimuli ane, na malie ai Dale e faamuta le faigapaaga. Na te aveina faleoloa e lua a o Walt le isi. Sa tonu ia Walt e toe tatala lona faleoloa i lalo o se igoa fou: o Macey.

E lei leva, ae faasilasila mai e le Deseret News o le a tapunia Macey i Aso Sa. O lena po i le 11:15, na maua ai e Walt se valaau i le telefoni i lona fale. O Tuafafine Samita. “E fia talanoa atu le peresitene ia te oe,” o lana tala lea.

Ona o’o ane lea o Peresitene Samita i luga o le laina. “Uso Macey,” na ia fai mai ai, “Ua ou vaai i le pepa o le po nei ua e tapunia lou faleoloa i le Sapati. O le a ou toe foi atu.”

I se taimi puupuu mulimuli ane, sa maitauina ai e Walt le faatau ai o Peresitene Samita i le faleoloa.

I le amataga o le 1964, sa i ai Belle Spafford i lona sefuluiva tausaga o se peresitene aoao o le Aualofa. Sa i ai i le faalapotopotoga se aofaiga i le lalolagi atoa e 262,002, i le i ai o tamaitai i le silia ma le ono afe o Aualofa a uarota ma paranesi e feiloai e le aunoa e aoao ai mai le tasi ma le isi ma tuuina atu le auaunaga alofa. Sa saili ma puleaina e le Aualofa a latou lava tupe e faatautaia ai le tele o polokalama, gaoioiga, ma ta’imua, e aofia ai le Mekasini a le Aualofa, lea e le o toe mamao ona faamanatuina lea o le limasefulu tausaga i le lolomiina.

Sa matuai mitamita lava Peresitene Spafford i ona uso o le Aualofa. “I aso e faatino ai e tamaitai lava ia le tele o gaoioiga ma pe a maualuga se aofaiga o i latou e faigaluega, e faamalosiauina le faatupulaia o le averesi o le auai i sauniga masani a le Aualofa,” sa ia maitauina talu ai nei i le konafesi faaletausaga a le faalapotopotoga. “Matou te faafetai atu mo lo outou tuuto i le Aualofa ma le amiotonu o o outou olaga.”

Ina ua amata le tausaga fou, sa i ai ia Peresitene Spafford ma ona fesoasoani, o Marianne Sharp ma Louise Madsen, ni nai masina o malaga i o latou luma.

I lalo o le polokalama faamaopoopoga fou, sa asiasi atu ai le au peresitene aoao o le Aualofa ma le au faatonu i konafesi faalesiteki i le afa muamua o le tausaga e aoao faamasani taitai o le Aualofa i le lotoifale ma saunoa atu i au peresitene o siteki, fautua maualuga, au epikopo, ma isi taitai o siteki ma uarota. O le auai ai i nei konafesi na tuuina atu ai ia i latou ni avanoa fou e aoao ai taitai perisitua e uiga i le galuega a le Aualofa.

A o faatulagaina e le Ekalesia le tele ma le tele o siteki i fafo atu o le Iunaite Setete, sa iloaina ai foi e le au peresitene lo latou malaga soo faavaomalo i le tele o taimi. Sa latou aoaoina talu ai nei siteki i Ausetalia, Niu Sila, ma Samoa, ma sa latou asiasi atu i le Au Paia i Europa i le tautotogo.

A o asiasi atu i konafesi faalesiteki i le salafa o le lalolagi, sa tuuina atu e Peresitene Spafford ma ona sui auai o le aufaatonu le O le Fāgua [The Awakening], o se ata tifaga e faamamafa ai le taua o le Aualofa. O ata tifaga sa avea ma se meafaigaluega faaleaoaoga lauiloa i totonu ma fafo atu o le Ekalesia, ona sa taugofie ma faigofie ona faaaoga. E ala atu i se faasologa o ata na fuafuaina i luga o se lau, O le Fāgua na faamatala ai le tala fatu ia Maria Samita, o se tagata o le Ekalesia na toe faaolaolaina lona faatuatua ua tuuitiitia e ala atu i le Aualofa ma asiasiga patino mai tagata o le uarota. I ata faaiu o le ata, na toe foi atu ai Maria ma lona aiga i le lotu ma sa sauniuni ina ia faamauina i le malumalu.

Mo le tele o tausaga, sa masani ona faamaonia e Peresitene Spafford ma ona fesoasoani ia anomea faaaoaoga a le Aualofa. O le Fagua, mo se faataitaiga, na tusia ma gaosia e sui o le Aualofa o le Siteki a Butler o Sate Leki a o lei faaaogaina e le au peresitene aoao o le Aualofa o se vaega o la latou folasaga i siteki.

E ui i lea, talu ai nei, na tuuina atu ai le tiutetauave mo le atiaeina o mataupu aoaoina mo faalapotopotoga a le Ekalesia ia Elder Harold B. Lee ma le Aufono Faamaopoopo Fou faatoa faatuina a le Ekalesia. E ui e lei faaaogaina e le Aualofa ni fuafuaga faamaopoopo o lesona, ae sa amata ona talosagaina e le komiti ia auina atu e faalapotopotoga uma a le Ekalesia ni otootoga mo lesona ma isi anomea mo le faamaoniga. Sa lagolagoina e Peresitene Spafford lenei suiga, ma i le avea ai ma se sui auai o le aufono faamaopoopo, sa ia auai i le faagasologa o le faamaopoopoina o lesona a le Ekalesia.

I le aso 24 Iuni, 1964, o faigamalaga a Peresitene Spafford na o’o atu ai o ia i le Iunaite Setete i sasae mo le “Aso o le Aualofa” i le Faaaliga a le Lalolagi o Niu Ioka. E pei foi o le Columbian Exposition 1893, na vaai le Ekalesia i le faaaliga o se avanoa e faasoa atu ai lana savali i se tulaga faavaomalo. Sa fausia ai se fale faafiafia tele na mamanuina ia foliga e pei o le Malumalu o Sate Leki ma saunia ai ni folasaga eseese e uiga i le Faaola ma Lana talalelei, e aofia ai se ata tifaga lauiloa e sefululima minute ua ta’ua o le Sailiga a le Tagata mo le Fiafia, lea na aoaoina ai tagata asiasi mai e uiga i le ata o le faaolataga.

Sa faatulagaina le Aso o le Aualofa e faaalia ai ausiaga a tamaitai o le Au Paia o Aso e Gata Ai. O le faatumutumuga o le aso o se aufaipese o “tina pepese” mai Aualofa a siteki i Niu Ioka ma isi aai. O a latou faatinoga na tosina atu i ai tagata e toatele, ma sa manatu Peresitene Spafford sa faaleleia konaseti taitasi mai le konaseti na muamua atu. O le faaaliga o se nofoaga e pisapisao, ae a o tuufaatasia e tamaitai o latou leo i viiga ma isi musika paia, sa foliga mai na mou ese atu vavaō uma. Ia Peresitene Spafford, sa peiseai o pepese faatasi agelu.

Mulimuli ane, sa fesili atu se failipoti ia te ia pe aisea na leai ai se aufaipese o “tamā pepese.”

“Ia,” sa ia tali atu ai, “o i matou o se faalapotopotoga o tamaitai.”

Pe tusa o le taimi lea, na nofo ai Giuseppa Oliva i se nofoa i se falelotu e lei mae’a i Quilmes, Atenitina. O le falesa muamua lea i le atunuu na fausia e faifeautalai i le polokalama o falelotu a le Ekalesia, ma o le Au Paia sa auai i le konafesi faaleitu i lena taeao sa tulimatai atu i lona faamae’aina. E pei o le tele o falelotu i le salafa o le lalolagi, sa faatusa i tausaga e tele o auaunaga tuuto ma osigataulaga a le Au Paia o e na feiloai iina.

O Giuseppa ma lona toalua o Renato, sa o mai mai le motu o Italia o Sicily. E pei o le toatele o tagata Italia, sa siitia atu lo latou aiga i Atenitina ina ua mavae le Taua Lona II a le Lalolagi e saili ni galuega lelei atu. E ui ina sa faigata ona faamasani i se atunuu, aganuu, ma se gagana fou, ae sa latou faia se fale mo le la fanau e toalima i Amerika i Saute. I le fitu tausaga talu ona tuua Sicily, sa feiloai ai Giuseppa i nisi o faifeautalai o le Au Paia o Aso e Gata Ai, ma sa vave ona latou taliaina ma lana fanau teine e toalua le la savali. Talu mai lena taimi, ua faaipoipo uma afafine i alii talavou mai le Ekalesia.

Ae sa popole lava Giuseppa a o saofai o ia i le konafesi. Sa tulai mai se faafitauli tau i le tamaoaiga i le atunuu. O le tau o le soifuaga i Atenitina na siitia i le 20 pasene i le tausaga, ma e toatele tagata na leai ni galuega a o tauivi pisinisi e totogi tagata faigaluega. I le feagai ai ma le tele o le le mautonu i le tamaoaiga, sa toe siitia atu ai Renato, o se tagata lalaga ato, i Sicily, ma sa manao o ia e faatasi atu lona aiga ia te ia.

Peitai, sa musu Giuseppa e alu. I le lima tausaga talu mai le asiasiga a Elder Spencer W. Kimball i Atenitina, na tulai mai ai le faitau aofai o tagata o le Ekalesia i le atunuu i le silia ma le valu afe. Sa malolosi ona paranesi, ma o sefuluai a le Au Paia faamaoni na mafai ai e le Misiona a Atenitina ona lava mea tautupe mo le taimi muamua i lona talafaasolopito. O le aofai o papatisoga liliu mai ua tuputupu a’e, faamalosia aulotu e pei o le au lotu na auai ai Giuseppa.

O Italia, i le isi itu, sa leai se paranesi e tasi a le Ekalesia. Afai e filifili Giuseppa e faatasi ma Renato iina, o le a ia lafoaia faamanuiaga o le auai soo i le Lotu. Ma talu ai o Renato e le o se tagata o le Ekalesia, sa le mafai ona ia faatautaia le faamanatuga po o isi sauniga o le perisitua ia te ia [Giuseppa].

Ina ua mae’a le sauniga o le taeao o le konafesi faaleitu, sa alu atu Giuseppa ia Afa Strong, le peresitene o le Misiona a Atenitina, ma ta’u atu ia te ia lona faafitauli. Sa ia fai atu sa manao o ia e nonofo ma lana fanau teine i Atenitina, ae sa ia lagonaina foi e tatau ona faatasi ma lana tane i Europa.

Sa faalogologo Peresitene Strong ona fautuaina lea o ia e toe foi atu i Italia. “O le nofoaga lena e te auai ai,” o lana tala lea.

“O le a se mea e tatau ona ou faia e uiga i le Ekalesia?” Na fesili ai Giuseppa.

“O le a tuputupu ae le Ekalesia i lo outou lava aai,” na ia folafola atu ai. “O le a e le popole i ai.”

Sa le talitonu Giuseppa. Mata e tupu moni lava se mea faapena? Ae sa ia filifili e faalagolago i le Alii ma toe foi atu i Italia. Mulimuli ane, o lona faatuatua, sa lei taitai seseina ai lava o ia.

Ia Iuni 1964, na vaai ai Darius Gray e sefuluvalu tausaga ua siitia atu se aiga fou i lona pitonuu. A o ia savali atu e pasia lo latou fale, sa ia maitauina ni tamaiti o loo taaalo i fafo.

“O i matou o le au Felix,” na faasilasila mai ai e se tasi o i latou. “O i matou o ni Mamona!”

O Darius, o se Aferika Amerika, sa ola ae ma auai i ni lotu eseese ma ona matua, e aofia ai nisi o lotu e toatele i Tagata Uli. O lona fiafia i mea tau lotu na iu lava ina taitai atu ai o ia e suesue i le Katoliko, faa-Iutaia, Isalama, ma le Faatuatuaga o Baha’i. Ae e ui lava sa nofo o ia i Colorado, o se setete e tuaoi ma Iuta, sa itiiti lava se mea na ia iloa e uiga i le Au Paia o Aso e Gata Ai. Ma sa ia mautinoa na te lei feiloai lava i se tasi.

I le aluga o nai masina na sosoo ai, sa ia faamasani ai i le aiga fou. O Ioane Felix o se tagata faigaluega i le leitio hamo ma sa ia aoaoina atu le faitau faaMorse ia Darius. O Barbara, le faletua o Ioane, sa sili atu ona fiafia e faasoa atu lana tapuaiga. Sa ia tuuina atu faatasi ma lana fanau ia te ia se kopi o le Tusi a Mamona. Sa musu o ia e ave, ae sa fiafia o ia i tusi ma iu ai ina amata ona faitauina.

Sa talanoa atu upu o le Tusi a Mamona i lona agaga, ma sa ia valaaulia faifeautalai e asiasi atu ia te ia. Na maliu lona tamā i ni nai tausaga ua mavae, ma sa na o ia ma lona tina, o Elsie, i le fale. O ia o se Kerisiano malosi o lē sa fiafia i taimi uma e talanoa ma tagata o isi lotu. Sa lei manatu Darius e le afaina ia te ia pe afai e o mai faifeautalai.

Peitai, i le taimi o le asiasiga, sa nofo o ia i lona potumoe. Ma ina ua tuumuli alii talavou, sa ia valaau atu ia Darius e sau.

“Ou te le toe manao i na alii talavou e toalua e toe o mai iinei,” o lana tala lea.

“Aisea?” O le fesili lea a Darius.

“O lo’u fale lenei,” sa ia fai mai ai, “ma ou te le manao ia i la’ua iinei.”

Sa iloa e Darius e le tatau ona fesiligia o ia, ae sa faigata ona tuu le mataupu. Ina ua ia toe fesili atu ia te ia pe aisea na tetee ai o ia i faifeautalai, sa ia faamatala atu i ai e toalua faifeautalai o le Au Paia o Aso e Gata Ai na asiasi atu i lona fale. Sa na o sina taimi sa la i ai i totonu ae fesili mai se tasi o faifeautalai pe o ia o se Tagata Uli.

“Ioe, o lea lava,” sa ia tali atu ai.

Ona tuumuli lea o faifeautalai e toalua e aunoa ma se faamalamalamaga, ma talu mai lena taimi, sa i ai sona lagona le lelei e uiga i le Ekalesia.

Sa popole Darius i lea tala. Sa talitonu o ia i lona tina, ae sa ia taumanatunatu foi pe na tulaga ese lona aafiaga le lelei.

Sa faaauau pea ona suesue Darius ma faifeautalai, ma e lei leva ae filifili o ia e auai i le Ekalesia. Peitai, i le aso a o lumanai lona papatisoga, sa ia fesili atu ai i faifeautalai e uiga i aoaoga a le Ekalesia e faatatau i ituaiga tagata. Sa ia mafaufau pe faapefea ona faatatau ia tulaga ia te ia.

Mo sina taimi, e leai se tasi na tautala. Ona tu lea o se tasi o faifeautalai ma savali lemu atu i le tulimanu o le potu, ma u atu lona tua ia Darius. Na fai mai le isi faifeautalai, “Ia, Uso Gray, o le fautuaga autu lava o le a le mafai ona e umia le perisitua.”

Sa faafuasei ona lagona e Darius le faavalevalea. “Sa sa’o tina,” sa ia mafaufau ai. E mafai faapefea ona ia auai i le Ekalesia i le taimi nei? Sa ia iloa le lagona o le ese o le taulimaina aua o ia o se Tagata Uli, ma sa musu o ia e vaai ia te ia lava e itiiti ifo nai lo se isi lava tagata.

I lena po, na oso ai Darius i le moega ma pulou lona ie soosoo. Sa talitonu o ia i le Atua ma i le faaolataga e ala ia Iesu Keriso. Ma, seia oo mai i le asō, sa ia talitonu i mea uma na aoaoina ai o ia e faifeautalai. O lea la ua ia le iloa le mea e fai. E mafai faapefea ona ia faalelei lona faatuatua ma mea sa ia aoaoina e uiga i le tapulaa o le perisitua a le Ekalesia?

I le tatalaina ai o se faamalama lata ane, sa ia faalagolago lona ulu i le faamalama. Sa faatumulia ona māmā i le ea o le po, ma sa ia faia se tatalo. Ina ua uma, sa ia tapunia le faamalama ma taumafai e moe. Ae sa ia feliuliuai seia iu lava ina ia lagona e tatau ona toe tatalo tasi lava. Sa ia toe tatalaina foi le faamalama ma amata loa ona tatalo.

O le taimi lea, sa talanoa atu ia te ia se leo manino. “O le talalelei toefuataiina lenei,” na fai mai ai, “ma e tatau ona e auai.”

I le taimi lava lea e tasi, na iloa ai e Darius le mea e tatau ona ia faia. O le aso na sosoo ai, na ia ulu ifo ai i le vai o le papatisoga ma avea ai ma tagata O Le Ekalesia a Iesu Keriso o le Au Paia o Aso e Gata Ai.

  1. “Negroes May Picket Mormon Conference,” Newport (RI) Daily News, Oct. 4, 1963, 4; “Negro Threat to Picket Mormon Session in Utah,” Kansas City (MO) Times, Oct. 5, 1963, 19; “Mormon Temple May Be Picketed in NAACP Move,” Arizona Daily Star (Tucson), Oct. 5, 1963, B1.

  2. “Extremism Is Never the Answer,” Deseret News, Apr. 3, 1956, A22; McKay, Diary, Apr. 2, 1956.

  3. McMurrin, “Note on the 1963 Civil Rights Statement,” 60; Fritz, Oral History Interview [1984], 26–30; “NAACP Calls S.L. Protest over Rights,” Salt Lake Tribune, Oct. 5, 1963, 32; “Negro Group Lauds LDS Rights View,” Salt Lake Tribune, Oct. 7, 1963, 6; Mason, “Prohibition of Interracial Marriage in Utah,” 129–30; Harris and Harris, “Last State to Honor MLK,” 6.

  4. McMurrin, “Note on the 1963 Civil Rights Statement,” 60; Meier and Rudwick, CORE, 239, 250; Reed, Chicago NAACP, 198–99; Honey, To the Promised Land, 75–80; Jackson, From Civil Rights to Human Rights, 155–56, 166–69, 171–84; Branch, Parting the Waters, 846–50, 872–87; Arsenault, Freedom Riders, 8–10. Autu: Vaega mo Aia Faalemalo

  5. Tagai, mo se faataitaiga, Hugh B. Brown to Kelorah Franklin, Sept. 1, 1961; Hugh B. Brown to William Wangeman, Nov. 6, 1961; Hugh B. Brown to Deana Astle, Nov. 26, 1963, David O. McKay Papers, CHL.

  6. Mueller, “Pageantry of Protest,” 133; Tanner, Journal, Oct. 3, 1963; McKay, Diary, Oct. 4, 1963; Holbrook, Oral History Interview, 7; McMurrin, “Note on the 1963 Civil Rights Statement,” 61. Autu: O Le Le Faaituau i Faiga Faaupufai

  7. McMurrin and Newell, Matters of Conscience, 201; “NAACP Calls S.L. Protest over Rights,” Salt Lake Tribune, Oct. 5, 1963, 32; Fritz, Oral History Interview [1984], 28–29.

  8. Holbrook, Oral History Interview, 7.

  9. Hugh B. Brown, i le One Hundred Thirty-Third Semi-annual Conference,91.

  10. “Give Full Civil Equality to All, LDS Counselor Brown Asks,” Salt Lake Tribune, Oct. 7, 1963, 1; “Negro Group Lauds LDS Rights View,” Salt Lake Tribune, Oct. 7, 1963, 6; “Mormon Church Calls for Full Civil Equality for All,” Herald Bulletin (Burley, ID), Oct. 7, 1963, 1; “Digest of the News,” Arizona Republic (Phoenix), Oct. 7, 1963, 1; “Mormon Leader Appeals for Civil Equality for All,” Fort Myers (FL) News-Press, Oct. 7, 1963, 1.

  11. Camargo, Oral History Interview, 19, 20, 22; Hélio Camargo entry, Vila Mariana Branch, São Paulo District, Brazilian Mission, Transcript of Record of Members, 1959, 316, in Brazil (Country), part 3, Record of Members Collection, CHL; William Bangerter to First Presidency, Apr. 18, 1960, First Presidency, Mission Correspondence, 1946–69, CHL; A. Theodore Tuttle to First Presidency, Sept. 2, 1963, First Presidency, Mission Correspondence, 1964–2010, CHL; Reid, Brazil, 91–92.

  12. A. Theodore Tuttle to First Presidency, Sept. 2, 1963, First Presidency, Mission Correspondence, 1964–2010, CHL; Missionary Department, Full-Time Mission Monthly Progress Reports, Dec. 1958; Jan. 1959; Jan. 1963; “Elder Romney Creates New Mexico City Stake,” Church News, Dec. 9, 1961, 3. Autu: Tuputupua’e o le Ekalesia; Uarota ma Siteki; Polivia; Peru

  13. Missionary Department, Full-Time Mission Monthly Progress Reports, Jan. 1963; “Brief Report to the First Presidency on the Brazilian Mission from President and Sister Wayne M. Beck,” Aug. 9, 1966, [6], First Presidency, Mission Correspondence, 1964–2010, CHL; Bangerter, Oral History Interview, 86–88, 103–4; Bangerter, Reminiscence, 12.

  14. Rodriguez, From Every Nation, 135–37; Bangerter, Oral History Interview, 87–88; Bangerter, Diary, Oct. 28–29, 1959; Nov. 8, 1959; Feb. 22, 1961. Ua faasa’oina upusii mo le faitauina; o le uluai punaoa o loo i ai le “Sa ou fesili atu ia te ia pe aisea ma pe o le a le mea e manao o ia e fai.”

  15. Bangerter, Oral History Interview, 87–88; Bangerter, Diary, Feb. 22, 1961. Ua faasa’oina upusii mo le faitauina; o taimi e lua o le “sa” i le uluai suiga i le “o le,” “sa” suia i le “o i ai,” “ua” suia i le “ua i ai,” ma “i latou” na suia i le “oe.”

  16. Brazil São Paulo North Mission, Manuscript History, Aug. 4, 1963. Autu: Valaauga i le Ekalesia

  17. Bangerter, Diary, Mar. 1 and 27, 1962; May 6, 1962; Sept. 14, 1962; Nov. 1, 1962; Brazil São Paulo North Mission, Manuscript History, June 20 and July 28, 1963; Camargo, Oral History Interview, 20, 22; Wayne Beck and Evelyn Beck, Oral History Interview, 76–78, 88–89; Spät, Oral History Interview, 9; “Programa Dinamismo,” 2.

  18. Brazilian Mission, Congresso da Associação da Primária [1962], [11]–[13], [16], [20], [32]; Guide for Primary Stake Boards, 55.

  19. Brazilian Mission, Congresso da Associação da Primária [1963], 27.

  20. Bangerter, Oral History Interview, 74.

  21. “Sava-Nickel Acquires S.L. Market,” Salt Lake Tribune, Jan. 24, 1964, D4; Macey, Biographical Sketch, [31]–[33], [35]–[36], [38], [40]; “Macey Takes Over Grocery Store,” Deseret News and Salt Lake Telegram, Mar. 23, 1964, B9.

  22. Macey, Biographical Sketch, [32]–[36]. Ua faasa’oina upusii mo le faitauina; o le uluai punavai o loo i ai “sa lei lata ona tapunia.”

  23. Macey, Biographical Sketch, [38]; Smith, Journal, June 17 and Aug. 19, 1963; Joseph Fielding Smith, i le One Hundred Thirty-Third Annual Conference, 21.

  24. Joseph Fielding Smith to First Presidency, June 12, 1939, First Presidency, Miscellaneous Correspondence, CHL; “Return to Religion Held Big Need,” Deseret News, Apr. 5, 1943, 6; Miller, Peculiar Life of Sundays, 168–70, 263–65; Harline, Sunday, 215–99, 351–67; Mrs. Richard Harston to Heber J. Grant, May 22, 1934; Heber J. Grant to Mrs. [Richard] Harston, May 26, 1934, First Presidency, Miscellaneous Correspondence, CHL.

  25. Joseph Fielding Smith, in Eighty-Seventh Semi-annual Conference, 70; Joseph Fielding Smith, i le One-Hundred and First Semi-annual Conference, 25–26; Joseph Fielding Smith, “A Warning Cry for Repentance,” Deseret News, May 4, 1935, Church section, 6, 8; Woodger, “Restoration of the Perpetual Covenant to Hallow the Sabbath Day,” 289–310; Thomsen, “History of the Sabbath in Mormonism,” 102–5; Merrill and Cannon, “Legal and Cultural War over Utah’s Sunday Closing Laws,” 167–76. Autu: Iosefa Filitia Samita

  26. Joseph Fielding Smith, i le One Hundred Twenty-Seventh Annual Conference, 62; “The Sabbath,” Church News, July 11, 1959, 3.

  27. Macey, Biographical Sketch, [35]–[37]; “Sava-Nickel Acquires S.L. Market,” Salt Lake Tribune, Jan. 24, 1964, D4; “Macey Takes Over Grocery Store,” Deseret News and Salt Lake Telegram, Mar. 23, 1964, B9; “Grand Opening,” Deseret News and Salt Lake Telegram, May 14, 1964, E5.

  28. Macey, Biographical Sketch, [38]–[39]; “Grand Opening,” Deseret News and Salt Lake Telegram, May 14, 1964, E5; Smith, Journal, July 17, 1964.

  29. Derr, Cannon, and Beecher, Women of Covenant, 304, 324; Belle S. Spafford, “Report and Official Instructions,” Relief Society Magazine, Nov. 1964, 816, 820–22; Belle S. Spafford, “Report and Official Instructions,” Relief Society Magazine, Nov. 1963, 821–22. O le Puletini a le Aualofa na muai lolomiina i le 1914. Na suia lona igoa i le Mekasini a le Aualofa ia Ianuari 1915. Autu: Belle S. Spafford; Aualofa

  30. Belle S. Spafford, “Report and Official Instructions,” Relief Society Magazine, Nov. 1963, 818, 822.

  31. Relief Society, General Board Minutes, volume 34, Sept. 19, 1962, 145; Oct. 17, 1962, 156; Jan. 9 and 23, 1963, 244, 254; Mar. 27, 1963, 286; May 29, 1963, 345, 351; Oct. 30, 1963, 402–3; Nov. 6, 1963, 405–6.

  32. Relief Society, General Board Minutes, volume 34, Jan. 31, 1962, 23–24; Mar. 6, 1963, 275, 277; May 15, 1963, 334; volume 35, May 20 and 27, 1964, 89–90, 100; Belle S. Spafford, “Talk Given by Sister Belle S. Spafford,” Apr. 25, 1964, Relief Society, Belle S. Spafford Files, CHL. Autu: Ausetalia; Niu Sila; Samoa

  33. Relief Society, General Board Minutes, volume 34, Oct. 23, 1963, 392, 396; volume 35, Jan. 2, 1964, 7; Jan. 22, 1964, 24; Mar. 11, 1964, 52; Relief Society General Board, “The Awakening,” 1964, Relief Society, Belle S. Spafford Files, CHL. Autu: FaaleKelope [Globalization]

  34. Saettler, History of Instructional Technology, 178–87; Whitaker, Pioneering with Film, 3–4, 90; “The Awakening”: A Sound-Filmstrip Presentation of the General Board of Relief Society, Filmstrip Script, CHL.

  35. “‘Mary Smith’ Story … Told World Wide,” Church News, Aug. 15, 1964, [8]–[9].

  36. Relief Society, General Board Minutes, volume 35, Feb. 19 and Mar. 11, 1964, 44, 52.

  37. Relief Society, General Board Minutes, volume 34, Sept. 19, 1962, 144–47; J. Reuben Clark to Belle S. Spafford, Sept. 14, 1961, First Presidency, General Administration Files, 1923, 1932, 1937–67, CHL. Autu: Faamaopoopoga

  38. “Visitors Welcomed to Mormon Pavilion at N. Y. Fair,” Church News, Apr. 25, 1964, 3; Kogan, “Mormon Pavilion,” 37–38; McKay, Diary, Mar. 21, 1963; Whitaker, Looking Back, 61–62; Whitaker, Pioneering with Film, 57–62. Autu: Columbian Exposition of 1893

  39. “Mormon Mothers Chorus to Sing at Fair,” Church News, Feb. 29, 1964, 3; Gay Pauley, “Utah’s Singing Mothers Perform at N.Y. Fair,” Los Angeles Times, July 12, 1964, E12; Belle S. Spafford and Counselors to First Presidency, June 29, 1964, First Presidency, General Administration Files, 1921–72, CHL; tagai foi Derr, Cannon, and Beecher, Women of Covenant, 273–74, 338–40.

  40. Argentina Buenos Aires North Mission, Manuscript History and Historical Reports, Feb. 23, 1964; “Construction Program,” 6; Strong, Autobiography Excerpt, 35. Autu: Atenitina; Polokalama o le Fausiaina

  41. [Maria Oliva] to Omar Esper, Email, July 15, 2021, Maria Oliva Family Papers, CHL; Lewis, Argentina, 101; Jack E. Jarrard, “She Remembers Well the Day the Elders Called,” Church News, Oct. 5, 1968, 11; Giuseppa Oliva, María Oliva, and Rosa Oliva entries, Baptisms and Confirmations, 1957, Quilmes Branch, Argentine Mission, 66–67; Rosa Oliva entry, Marriages, 1958, Quilmes Branch, Argentine Mission, 72; María Oliva entry, Marriages, 1960, Cōrdoba Branch, Argentine Mission, 148, in Argentina (Country), part 4, Record of Members Collection, CHL; Strong, Autobiography Excerpt, 35.

  42. John Bausman, “World of ’64: Foreign Correspondents Survey Trouble Spots around Globe,” Gazette (Montreal), Jan. 25, 1964, 13; Edward C. Burks, “Argentina Faces Growing Deficits,” New York Times, Jan. 17, 1964, 70; Lewis, Argentina, 132–33; “Argentine Costs Up,” Miami Herald, Mar. 19, 1965, Palm Beach edition, A2; Strong, Autobiography Excerpt, 36; [Maria Oliva] to Omar Esper, Email, July 15, 2021, Maria Oliva Family Papers, CHL.

  43. Au Paia, voluma 3, mataupu 16; Missionary Department, Full-Time Mission Monthly Progress Reports, Nov. 1963 and Jan. 1964; “Argentine Mission Is Now Self-Supporting,” Church News, Nov. 9, 1963, 6; Toronto, Dursteler, and Homer, Mormons in the Piazza, 259–77; Jack E. Jarrard, “She Remembers Well the Day the Elders Called,” Church News, Oct. 5, 1968, 11; Strong, Autobiography Excerpt, 35.

  44. Strong, Autobiography Excerpt, 35–36; Jack E. Jarrard, “She Remembers Well the Day the Elders Called,” Church News, Oct. 5, 1968, 11. O upusii ua faasa’oina mo le faitauina; O uluai punaoa o loo i ai “o le nofoaga lena sa ou i ai,” “o le mea e tatau ona ia faia e uiga i le Ekalesia,” ma le “sa ou folafola atu ia te ia o le a ola le Ekalesia i lona lava aai ma o le a le popole i ai o ia.”

  45. Gray, Oral History Interview, 21–23.

  46. Gray, Oral History Interview, 5, 15–19, 21, 23.

  47. Gray, Oral History Interview, 1, 4, 15–16, 18, 24–25; Darius Gray to Jed Woodworth, Email, Jan. 3, 2023, copy in editors’ possession.

  48. Gray, Oral History Interview, 8–10, 25–26, 55–56. Autu: Faatapulaaga o le Perisitua ma le Malumalu

  49. Gray, Oral History Interview, 26–27, 198–99; Darius Gray entry, Baptisms and Confirmations, Colorado Springs Second Ward, Pikes Peak Stake, 388, in Colorado Springs 2nd Ward, Record of Members Collection, CHL.