Talafaasolopito o le Ekalesia
Mataupu 10: E Taua le Taimi

Mataupu 10

E Taua le Taimi

Lautusi Aikupito anamua faatasi ma ni tusitusiga ma atatusi

I le tautotogo o le 1966, sa mulimuli atu ai Dr. Aziz Atiya i se tagata faigaluega i se faleteuoloa o pepa o faamatalaga i le Falemataaga o Faatufugaga a le Aai o Niu Ioka. Ao tilotilo solo, sa ia maua ai se faila ma tatala loa. O le mea sa ia vaaia na faateia ai o ia.

Sa i ai i totonu ni fasi tusitusiga faaAikupito anamua. Sa matuai leaga lava le lautusi, ae sa faigofie lava ona iloa atu e Aziz le ata o ni alii se toalua, o se tasi o i laua o loo taoto i luga o se nofoa e mamanu i le leona ae o le isi o loo tu i ona tafatafa. O le vaega o lautusi o loo faaalia ai ogalima ma le tino o le alii i luga o le nofoa, faatasi ai ma le ulu o le tagata o loo tu, sa misi. I se taumafaiga faatauvaa e faasaoina ai le pepa o faamatalaga, sa kelu ai e se tasi le lautusi i se fasipepa ma taumafai e tusia vaega [o tino] sa misi.

O Aziz sa le o se tagata O Le Ekalesia a Iesu Keriso o le Au Paia o Aso e Gata Ai, ae i le avea ai ma se polofesa o talafaasolopito ma gagana i le Iunivesite o Iuta, sa umi se taimi na nofo ai o ia ma tagata o le Au Paia e iloa ai sa ia tilotilo i se ata mai le Tusi a Aperaamo i le Penina Tau Tele.

E iva isi fasi lautusi sa teuina faatasi i le ata lenei. A o suesueina e Aziz, sa ia maua ai se tusi faamaonia na faamaonia ai sa avea muamua i latou ma meatotino a le perofeta o Iosefa Samita. O le tusi faamaonia sa tusia i le 1856 ma sa sainia e Iosefa Samita III, Ema Samita, ma le toalua lona lua o Ema, o Lewis Bidamon.

O fasi vaega na aumai i se seti o tusitaai o lautusi na maua e le perofeta o Iosefa Samita ma isi Au Paia ina ua latou faatauina mai ni mami (tino taai) se fa mai se faaaliga faaanamua i le 1835. I le fitu tausaga mulimuli ane, sa ia lolomiina ai ata mai lautusi faatasi ai ma se faaliliuga na ta’ua o le Tusi a Aperaamo. I le mavae ai o le tele o tausaga talu le maliu o Iosefa, sa faatau ese atu ai e Ema ia mami ma lautusi, ma sa vaevaeina i latou e le pule fou ma faatau atu nisi o i latou i se falemataaga lata ane. Mo le tele o tausaga, o tusitaai sa manatu na mu i se afi, ae na maua se faaputuga o fasi lautusi i le itu i sasae i le Falemataaga o le Metropolitan.

“O nei pepa o faamatalaga e le tatau ona iinei,” o le tala lea a Aziz. Sa ia iloa le taua o vaega ia i le Ekalesia, ma sa tonu ia te ia e fesoasoani e toe tuuina atu i latou i le Au Paia.

O lena lava tausaga, sa lofituina ai Isapela Santana e sefulufa tausaga i lona siosiomaga fou. Faatoa ia tuua lona aiga i Ciudad Obregón, o se aai i Mekisiko i matu, e auai i le Centro Escolar Benemérito de las Américas, o se aoga a le Ekalesia i le Aai o Mekisiko. O le laumua o se taulaga tele e fitu miliona tagata, ma sa foliga mai na ese lava laei o tagata uma ma ese le tautatala nai lo tagata sa ia iloaina mai le mea e sau ai.

O le ala na latou fai mai ai “faamolemole,” “faafetai,” ma le “tulou lava” sa matuai aloaia lava. E le o le auala lena e talanoa ai tagata i matu.

Na mauaa le talalelei toefuataiina i Mekisiko i le vaitau o le 1800, ma ua lua siteki malolosi ua i ai nei i le atunuu. I le aluga o le luasefulu tausaga ua mavae, o le aofai o Au Paia o Aso e Gata Ai i Mekisiko na faatupulaia mai le pe tusa ma le lima afe i le silia ma le tolusefulu-ono afe.

A o faateleina le faitau aofai o tagata, sa mananao taitai o le Ekalesia ia mautinoa ua maua e le tupulaga faiae o le Au Paia Mekisiko avanoa uma mo aoaoga ma aoaoga faamasani faalegaluega. I le 1957, sa tofia ai e le Au Peresitene Sili se komiti e suesue i aoaoga i Mekisiko ma faia ni fautuaga mo le faavaeina o aoga a le Ekalesia i le atunuu atoa. O le mauaina o eria faaletaulaga e lei lava ni a’oga e taulimaina ai le faitau aofai faatupulaia o tagata Mekisiko, sa fautuaina ai e le komiti le tatalaina ia le itiiti ifo ma le sefululua aoga tulagalua i le atunuu atoa, faapea foi ma se aoga maualuga, kolisi laitiiti, ma se aoga faaleaoaoga mo faiaoga i le Aai o Mekisiko.

I lena taimi, sa faagaoioia ai e le Ekalesia ia aoga i Niu Sila, Samoa i Sisifo, Amerika Samoa, Toga, Tahiti, ma Fiti. E oo atu i le taimi na tatalaina ai ni aoga tulagalua se lua i Chile i ni nai tausaga mulimuli ane, sa faia foi e le Ekalesia ni taumafaiga faaleaoaoga na amataina i Mekisiko. Ina ua taunuu Isapela i Benemérito, e tolu-afe valu selau isi tamaiti aoga na lesitala i aoga tulagalua e luasefulu-lima a le Ekalesia ma aoga maualuluga e lua i Mekisiko.

O Benemérito o se aoga maualuga ua tolu tausaga. Na tatalaina i le 1964 i se faatoaga e 287-eka i matu o le Aai o Mekisiko. Sa muai iloaina e Isapela le aoga a o auai i se aoga tulagalua e faatautaia e le Ekalesia i Obregón. E ui sa lei manao o ia e nofo i le silia ma le afe maila mai lona fale ma lona aiga, ae sa naunau lava o ia e auai i vasega ma aoao ni mea fou.

Sa galueaiina atoa le aoga e faiaoga o le Au Paia o Aso e Gata Ai mai Mekisiko. Sa ave e tamaiti aoga ni vasega i le faaSipaniolo, Igilisi, matematika, faataatiaga faafaafanua, talafaasolopito o le lalolagi, talafaasolopito o Mekisiko, paiolo, kemisi, ma le fisiki. E mafai foi ona latou lesitala i vasega o faatufugaga, aoaoga faaletino, ma vasega o tekinolosi. O le polokalama o le seminare, lea na faagaoioia e ese mai le aoga, na tuuina atu ai i tamaiti aoga ni aoaoga faalelotu.

O le tamā o Isapela, e le o se tagata o le Ekalesia, sa lagolagoina lona manao e auai i Benemérito ma sa malie e faataga o ia ma lona uso o Hilda e lesitala faatasi. Sa laitiiti Hilda i le tausaga, ae sa la i ai ma Isapela i le vasega lava lea e tasi talu mai le aoga tulagalua ona sa lei manao Isapela e alu na o ia i le aoga.

Sa malaga Isapela ma Hilda ma lo la tina i Benemérito. Sa i ai pea se vaega o le aoga i le fausiaina ina ua latou taunuu atu, ma ni lotoa palapala, ni nai faleaoga, ma ni tamai fale e sefululima mo tamaiti aoga e nonofo ai. E ui i lea, sa maofa Isapela i le telē o le lotoa.

Sa faasino atu o ia ma lana vaega i le fale numera lua. O iina sa talia lelei ai i latou e se supavaisa o fale, o le sa faaali atu ia i latou ia masini ta lavalava, kapoti mo le teuina o a latou meatotino, ma potumoe, e tofu ma moega fatalua e lua. O le fale e fa-potumoe sa i ai foi se potu ai, umukuka, ma se potu malolo.

Sa faaalu e Isapela le tele o lona taimi e maitauina ai isi tamaiti aoga ma taumafai e faamasani i se aganuu e le masani ai. Pe tusa ma le lima selau tamaiti aoga i Benemérito, o le toatele o i latou e mai Mekisiko i saute. O o latou aafiaga o le olaga sa ese mai aafiaga o Isapela, ma sa ia iloa ai sa sili atu foi ona eseese a latou meaai. Sa faateia o ia i le feū atu o le tofo ma filifiliga o mea faamanogi mea ai manaomia.

Po o a lava eseesega faaleaganuu, o tamaiti aoga uma i Benemérito sa faamoemoe e ola i tulafono lava e tasi. Sa latou mulimuli i se faiga masani o le alapo, fai feau, ma auai i vasega. Sa uunaia foi i latou e atiina ae ni mausa malolosi faaleagaga, e pei o le o i le lotu ma tatalo. O le ola ae i se aiga e eseese talitonuga, sa lei masani ai ona faia e Isapela ma lona uso nei mea seia oo ina la o mai i Benemérito.

I totonu o ni nai aso talu lona taunuu atu, sa maitauina ai e Isapela nisi o tamaiti aoga ua faasolo ina ma’i manatu i le aiga ma o ese atu ai. Ae e ui lava i le fou o tagata, meaai, ma agaifanua, sa naunau lava o ia e nofo ma ia manuia.

“E foliga mai e le mafai ona ou latalata atu i lo’u tausaga lona ivasefulu-fa,” na tusia ai e Peresitene Tavita O. Makei i lana apitalaaga i le aso 1 Ianuari, 1967. Sa faagasolo lemu le aso i le fale, ma manatunatu i le tele o ona aafiaga. “O se olaga fiafia ma manaia!” sa ia mafaufau ai. “Oka se taimi umi, ae ua vave lava ona mavae atu.”

Ae e ui lava ina sa ia tulimatai atu i le tausaga fou, sa popole lava le perofeta. “Ua tumu le lalolagi i faafitauli,” na ia tusia ai. O aso uma lava, e lipotia ai e nusipepa ma televise tala o taua, faiga faailoga lanu ma faiga faaupufai, ma faalavelave faalenatura. Sa tumau pea le maualuga o feeseeseaiga i le va o le Iunaite Setete ma le Sovieti Iuni [Soviet Union]. Ma e toatele tagata i le atu Asia, Aferika, ma Amerika Tutotonu ma Saute sa i ai i ni feteenaiga matautia faaleitulagi ia na faamata’uina ai le faatoilaloina o malo ma fevaevaea’i nuu.

Sa faapitoa le popole o Peresitene MaKei e uiga i se taua faalemalo, lea ua silia nei ma le sefulu tausaga, i le malo Asia i sautesasae o Viatename. I se taumafaiga e taofia le faakomunisi mai le mauaa i le atunuu, na auina atu ai talu ai nei e le Iunaite Setete ni fitafita se 450,000 i Viatename i Saute. O lenei la ua vave le faateleina o le taua o le sitaili o vaega au toalaiti e faasaga i ni vaega au tetele, ma ua fasiotia fitafita ma tagata lautele e le mafaitaulia i itu uma e lua o le taua.

I Saigon, o le laumua o Viatename i Saute, sa i ai i le Ekalesia ni nai paranesi lea na feiloai ai le tusa ma le tolu selau o le Au Paia i le lotoifale ma nisi o tagata e fa afe o le Ekalesia sa auauna atu i le militeli a Amerika. O Elder Gordon B. Hinckley o le Korama a Aposetolo e Toasefululua ma Elder Marion D. Hanks o le Aufono Muamua a Fitugafulu sa asiasi atu talu ai nei i le atunuu ua faatamaia e le taua. I le taimi o se konafesi faaleitu faatasi ma le Au Paia, sa faapaiaina ai e Elder Hinckley le laueleele mo le talaiina o le talalelei ma tatalo mo le filemu ia toe foi atu i le atunuu. “Faanatinati le aso,” na ia aioi atu ai, “pe a uma le vavao o le taua.” Mulimuli ane i le afiafi, sa tuuina atu ai e taitai o le Ekalesia a la molimau a o papa leo tetele mea tau i se vaega mamao.

Sa faamoemoe Peresitene MaKei e vaai i le faaitiitia o le vavao ma le fetaua’i i le 1967, ae e le o le mea lena na oo iai. Ia Iuni, na aliae ai le taua i le va o Isaraelu ma ona tuaoi, ma le mautonu ai le itulagi. O le masina na sosoo ai, na aliae ai le tulaga fevaevaeai faaupufai faifai pea a Naitiria i se taua faalemalo. O le faatupula’ia o tagata maliliu ma le le lauiloa o le taua i Viatename, i le taimi lea, na alia’e ai i nisi taimi solotetee e tetee i le taua i le Iunaite Setete. O feeseeseaiga faailoga lanu na iu ina le mafai ona toe alofia i le atunuu atoa, ma na luluina aai tetele ona o gaoioiga faatupu faalavelave ua aafia ai.

Sa popole le perofeta e uiga i le aafiaga o lenei vatau i le autalavou. O nisi o tagata talavou, na lotovaivai i mea na tutupu i le lalolagi, sa fesiligia tulaga faatauaina ma aganuu a o latou matua ma matua matutua. O le toatele o le autalavou na faataitaia fualaau faasaina, punouai i feusuaiga, ma faaaoga gagana mataga.

Sa alofa Peresitene MaKei i le autalavou o le Ekalesia, ma na te lei manao e maileia i latou i nei faiga. Sa ia uunaia le autalavou o le Au Paia o Aso e Gata Ai ia auai i se ituaiga o aoaoga faalelotu i aso o le vaiaso—seminare po o le inisitituti—lea e mafai ona latou atiae ai uiga faaKeriso a o siomia ai e isi o e tutusa o latou tulaga faatauaina ma tulaga faatonuina. Talu ai nei, sa gaosia ai foi e le Ekalesia se tamaitusi ua faaigoaina Mo Le Malosi o le Autalavou e fesoasoani ai i alii talavou ma tamaitai talavou ia iloa, malamalama, ma ola i tulaga faatonuina a le Ekalesia mo le ola mama, tafaoga faamasani, siva, laei, ma amioga. Ae sa ia talitonu sa i ai foi i matua ma taitai o le Ekalesia se tiute e aoao atu ma faaali atu i le autalavou o le ola mama e mafai ona aumaia le fiafia.

I le konafesi aoao ia Oketopa 1967, o le le atoatoa o le soifua maloloina o Peresitene MaKei na taofia ai o ia mai le tuuina atu o ana lauga patino, o lea sa ia talosagaina ai lona atalii o Robert e fai mona sui e faitauina atu i le Au Paia.

“A o ou mafaufau i le lumanai o lenei Ekalesia,” na tautino atu ai le perofeta i le sauniga amata o le konafesi, “sa uunaia au e leai se isi savali sili atu ona taua e tuuina atu nai le ‘ia tasi,’ ma aloese mai mea e tupu ai le fevaevaeai i tagata lotu.”

I nai tausaga ua mavae atu, sa saili ai taumafaiga faamaopoopo a le Ekalesia e tuufaatasia le Au Paia e ala i le faamaopoopoina o polokalama ma faamamafa atu le matafaioi o le perisitua, aiga, ma le auaiga. I lena lava tausaga, sa faalaugatasia ai e le faamaopoopoga a le Ekalesia le anotusi o ana mekasini faavaomalo ma faalauiloa atu ai se mataupu aoaoina laugatasia. I le tali atu i le tuputupu ae i le lalolagi atoa, sa valaauina ai foi e Peresitene MaKei le onosefulu-iva o “sui risone o le Toasefululua” e fesoasoani i le aoaoina o au peresitene o siteki, o lea na fesoasoani ai i le Ekalesia ia faagaoioia lelei ma tumau i le lalolagi atoa.

A o feagai le Au Paia ma le fesuisuiai o tulaga faatauaina faaagafesootai ma fesuisuiai tulaga faatauaina i malo, sa faamoemoe Peresitene MaKei ma isi taitai aoao o le Ekalesia i polokalama fesootai e maua ai se savali autasi ma se faavae mautu mo tagata i le lalolagi atoa.

“O le luitau o loo i o tatou luma,” na ta’u atu ai e Peresitene MaKei i le Au Paia. “O le tasi o le faamoemoega, faatasi ai ma le galulue o tagata uma e i totonu o le faatulagaga a le Ekalesia e pei ona faailoa mai e le Alii, e tatau ona avea ma o tatou faamoemoega.”

O le tausaga lava lena, sa tausia ai e Hwang Keun Ok pe tusa ma le valusefulu teineiti i le Nofoaga o Tamaiti Matuaoti Songjuk i Seoul, Korea i Saute. Ina ua faafaigaluegaina o ia o se supavaisa i le nofoaga o teineiti uma i le 1964, na te lei tauina atu i au lagolago Porotesano o ia o se Tagata o le Au Paia o Aso e Gata Ai. Sa lei malamalama lelei tagata i le Ekalesia i Korea i Saute. O le mea moni, ina ua papatisoina Keun Ok i le 1962, o le aoga Kerisiano lea sa ia faiaoga ai na faamutaina lana auaunaga.

Ua tusa nei ma le tolu afe-tolu selau le Au Paia Korea i Saute. O Kim Ho Jik, o le uluai Au Paia o Aso e Gata Ai i Korea, na auai i le Ekalesia i le 1951 a o aoga ai i le Iunaite Setete. A o lei maliu o ia i le 1959, sa toe foi Ho Jik i Korea i Saute, ma avea ma se polofesa ma se taitai o le iunivesite, ma faailoa atu le talalelei toefuataiina i nisi o ana tamaiti aoga. O nei tamaiti aoga, faatasi ai ma le au tautua o fitafita Amerika, na fesoasoani i le Ekalesia ia tuputupu ae i le atunuu. O se faaliliuga faaKorea o le Tusi a Mamona sa lolomiina i le 1967.

E ui i le le ta’uina atu i e na lagolagoina o ia e uiga i lona avea ai ma tagata o le Ekalesia, ae sa lei maasiasi Keun Ok i le avea ai ma se Tagata o le Au Paia o Aso e Gata Ai. Sa ia auauna atu o se peresitene o le Aualofa a lana paranesi ma faiaoga i se vasega laiti o le Aoga Sa. Sa ia faafeiloaia foi asiasiga mai tagata o le Ekalesia o e sa mananao e fesoasoani i le nofoaga mo tamaiti ua leai ni matua. I se tasi aso, sa valaau mai ai se leoleo Amerika e igoa ia Stanley Bronson ia Keun Ok i luga o le telefoni. O ia o se tagata o le Au Paia o Aso e Gata Ai sa tofia ma faamautu i Seoul, ma sa manao o ia e asiasi i le nofoaga o tamaiti ua leai ni matua ma usu ni pese e faafiafia ai tamaiti.

Sa oo mai Stan i ni nai aso mulimuli ane. Sa toeitiiti atoa le ono ma le afa futu le umi ma sa sili ona maualuga i tagata uma. Sa fiafia teineiti e faalogologo ia te ia o pese. Sa ia pu’eina se lipine o pese malie a o lei tofia o ia i le vaegaau, ma sa ia faamoemoe e pu’eina se isi lipine a o i ai i Korea i Saute.

“Ae e te lei taina lau kitara,” o le tala lea a Keun Ok ia Stan ina ua faapotopoto mai tagata uma, “ua saunia e tamaiti se mea mo oe.”

Sa masani ona pepese teineiti mo malo faaaloalogia, ma sa saunia lelei i latou. A o latou usuina ni nai pese mo Stan, sa faate’ia o ia i lea mea. Sa matagofie le tuufaatasiina o latou leo.

Sa amata ona asiasi soo atu Stan i le nofoaga o tamaiti ua leai ni matua e pepese faatasi ma teineiti. E lei umi, ae ia fautuaina i latou e pu’e faatasi se latou lipine, ma o tupe maua o le a manuia ai le nofoaga mo tamaiti ua leai ni matua.

Sa fiafia Keun Ok i le manatu. Sa ia tautino o se tamaitai talavou e tuuto atu o ia lava i le faaleleia atili o le lalolagi. O se tagata sulufai o le taua mai Korea i Matu, sa maliu lona tamā a o laitiiti ma sa ia iloa le faigata mo teineiti ona manuia i Korea e aunoa ma se lagolago malosi faaleaiga ma faalenuu. O le toatele o tagata i le atunuu sa maualalo le latou tilotilo i teineiti ua leai ni matua ma sa lei faamoemoeina i latou ia tele ni mea latou te maua. Ina ia maua lona aoaoina, sa tauivi Keun Ok e tetee atu i le mativa ma le maliu o se matua ma le leai o se aiga. Sa ia faamoemoe o le latou faafiafia ai ma Stan o le a fesoasoani i teineiti o loo i lana tausiga ia iloa lo latou taua—ma fesoasoani i isi tagata Korea ia iloa foi.

Sa maua e Stan se fale e pue ai lipine pese, ma mo ni nai masina na sosoo ai, sa fesoasoani Keun Ok ia te ia ma teneiti e faataitai ma pu’eina pese. Ina ua tuuina atu e le vaegaau ia Stan se malologa e tolusefulu-aso, sa alu o ia i lona aiga i le Iunaite Setete ma tuuina atu ia puega na faia i ni puega vaino. Ona ia toe foi atu lea i Korea ma fuafua e faafiafia ma teineiti i se televise lauiloa a Amerika sa pueina iina.

O le lipine o le, Daddy Big Boots: Stan Bronson and the Song Jook Won Girls, na taunuu i Seoul i uluai masina o le 1968. Sa manao Keun Ok e tatala pese fou o se mea telē e tupu i Korea, o lea na ia valaaulia ai le Peresitene o Korea i Saute, Amapasa o le Iunaite Setete, ma le taitai au o fitafita o Malo Aufaatasi i Korea e auai i le pati mo le tatalaga [o le lipine] i se aoga maualuga a teine i le lotoifale. E ui e na o le amapasa na mafai ona auai, ae o isi malo faaaloalogia na auina atu sui i o latou tulaga, ma o le faalauiloa sa faamanuiaina.

E lei leva, ae matua manaomia le au pepese mai le Fale o Tamaiti Ua Leai Ni Matua o le Songjuk.

O le taimi lea, i le Iunaite Setete, na maua ai e Truman Madsen, o se polofesa filosofia i le Iunivesite o Polika Iaga, se tusi mai lana uo o Richard Bushman, o se polofesa i le matagaluega o talafaasolopito. Sa popole Richard e uiga i se tusiga faaleaoaoga lea faatoa uma ona ia faitauina. O le tusitala, o Wesley Walters, o se faifeau Pesepeteriane i le ogatotonu i sisifo o le Iunaite Setete. Sa ia fai mai e na te faaleaogaina le Mua’i Faaaliga a Iosefa Samita.

I le aluga o tausaga, sa masani ona taumafai le au faitio e faatupu le masalosalo i le talafaasolopito paia o le Ekalesia, e tele taimi e faaaoga ai ia lava mau e tasi e le lagolagoina e finauina ai lo latou manatu. Peitai sa ese lea tusiga. “O se tusiga tusia lelei, ma ua lelei ona sailiilia,” na faailoa atu ai e Richard ia Truman. O le mea moni, sa talitonu se isi paaga na tuuina atu se taufaamatau matuia i le faatuatua o le Au Paia.

Sa auina atu e Richard ia Truman se kopi o le tusiga. Na iloa e Wesley Walters e le mafai ona ia faaleagaina tuusao e faapea o Iosefa Samita na vaai i le Tama ma le Alo i le tautotogo o le 1820, o lea sa ia suesueina ai faamatalaga a le perofeta e uiga i le faatulagaga faasolopito o le Uluai Faaaliga.

Mo le tele o tausaga, e na’o le lua tala na iloa e Au Paia o Aso e Gata Ai ia na tusia e le perofeta o Iosefa e uiga i le faaaliga vaaia. O le tala sili ona lauiloa, na amata i le 1838, e mafai ona maua i le Penina Tau Tele. O le isi tala na lolomiina i le Times and Seasons, o se nusipepa a le Ekalesia, i le amataga o le vaitau o le 1840. Peitai, talu ai nei, sa tatalaina ai e se tagata aoga faauu i le Iunivesite o Polika Iaga ma se tagata tausi faamaumauga o le Ekalesia ni tala muamua se lua o le Uluai Faaaliga i le tuufaatasiga a le Ekalesia o pepa a Iosefa Samita.

Sa iloiloina ma le faaeteete e Wesley ia tala e fa e faailoa ai soo se le talafeagai faasolopito e ono i ai. Ma ina ua ia suesueina le faamatalaga a le perofeta e faapea, sa uunaia o ia e se toefaafouga faalelotu i le lotoifale e saili le Alii i le tatalo, sa lei maua e Wesley se faamaoniga o soo se toefaafouga e lata ane i le fale o le au Samita seia oo i le toeitiiti atoa le lima tausaga talu ona tupu le Uluai Faaaliga. Mo Wesley, o lona uiga sa fatu e Iosefa Samita lana tala.

Sa mautinoa e Truman na sese mea na maua e Wesley. Ae ona o sina sailiiliga laitiiti o talafaasolopito sa faia i le Uluai Faaaliga ma uluai aso o le Ekalesia, sa leai ai sona auala e faamaonia ai. I le avea ai muamua ma se peresitene o le misiona, sa ia iloa ai e toatele tagata na taliaina le talalelei toefuataiina ona o le molimau mamana a le perofeta i le vaai i le Tama ma le Alo. O se osofaiga i le Uluai Faaaliga na foliga mai o se osofaiga i le faavae tonu o le Toefuataiga.

Ina ua uma ona faitauina le tusiga, sa faapotopoto e Truman se vaega toalaiti o tusitalafaasolopito i le Aai o Sate Leki. O i latou uma o ni tagata atamamai faaaloalogia ma ni tagata tuuto o le Ekalesia. A o latou talanoaina le tusiga a Wesley, sa latou iloa ai e mafai ona latou faaaogaina a latou aoaoga faasikola e fesoasoani ai i le Ekalesia. Sa manaomia e i latou ma isi tagata talitonu ona faia se suesuega fou o le talafaasolopito o le Ekalesia, e amata i ona aa. Seia oo ina latou faia, o faamatalaga a Wesley Walters e uiga i le Uluai Faaaliga o le a le finauina.

Faatasi ai ma Truman e taimua, sa faatulaga ai le vaega i se komiti e uunaia ai le au atamamai o le Au Paia o Aso e Gata Ai e suesue le uluai talafaasolopito o le Ekalesia. Ina ia tali atu i le tusiga a Wesley, sa fautuaina ai e le komiti le auina atu o tusitalafaasolopito e toalima i le Iunaite Setete i suesue ni toefaafouga faalelotu ma le Uluai Faaaliga. Ae paga lea, sa leai ni seleni e faatupeina ai.

Sa taumafai muamua le komiti e saili tupe o sailiiliga mai tagata foai tumaoti. Ina ua faamaonia ua na’o se vaega sa faamanuiaina o lenei mea, sa aapa atu Truman i le Au Peresitene Sili. Sa lagolagoina e Peresitene MaKei ma ona fesoasoani isi taumafaiga e suesue ma faasaoina le talafaasolopito o le Ekalesia. I le amataga o le sefulu tausaga, mo se faataitaiga, sa latou foai atu tupe mo le faatauina mai ma le faasaoina o fanua faasolopito i Navu, Ilinoi, le laumua o le Ekalesia mai le 1839 i le 1846.

Sa fiafia foi le Au Peresitene Sili i vaega o tusiga faaAikupito a Iosefa Samita. O le galulue vavalalata ai ma Aziz Atiya ma le Falemataaga o Faatufugaga o le Metropolitan, sa faatulagaina ai e Peresitene N. Eldon Tanner ia toe faafoi atu lautusi faaAikupito o se meaalofa i le Ekalesia. Na lipotia mai e nusipepa i le salafa o le Iunaite Setete le faatauina mai, ma sa faia e le Ekalesia se faatalanoaga ma le aufaasalalau ma faalauiloa atu ata o fasi vaega na totoe i le Improvement Era. I le talosaga a le Au Peresitene Sili, sa faapea ona tuuina atu ai vaega ia Hugh Nibley, o se polofesa i le Iunivesite o Polika Iaga, mo nisi suesuega. O Hugh, le sikola iloga a le Ekalesia o le lalolagi anamua, na maua se faamaoniga malosi faasolopito e lagolagoina le moni o le Tusi a Mamona ma sa mautinoa e faia foi lea mea e tasi i le Tusi a Aperaamo.

O le tusi atu i le Au Peresitene Sili i le tautotogo o le 1968, na talosagaina ai e Truman se $7,000 e faatupe ai malaga sailiili. “O le Uluai Faaaliga ua i ai nei i osofaiga matuia faaletalafaasolopito,” na ia faailoa atu ai ia i latou. E taua le taimi.”

I le amataga, sa filifili ai le Au Peresitene Sili e aua nei faatupeina le galuega faatino. I tausaga talu ai nei, sa tele ina aitalafu ai le Ekalesia i le fausiaina o falesa i le lalolagi atoa, ma talu mai lena taimi, sa sili atu ona faaeteete taitai o le Ekalesia i le faaaluina o tupe.

Peitai sa tauanau pea e Truman. Sa ia feiloai talu ai nei ia Wesley Walters i se konafesi i le talafaasolopito o le Ekalesia, ma sa ia lagonaina le naunautaiga o le faifeau e faaleaga Iosefa Samita.

“O le a ia faia soo se mea e maua muamua ai punaoa,” na tau atu ai e Truman i le Au Peresitene Sili. “Matou te lagona e le mafai ona matou tolopoina ma le atamai ni faatinoga.” O le taimi lea, sa ia talosaga ai se $5,000.

Sa toe mafaufau Peresitene MaKei ma ona fesoasoani i le talosaga ma malilie ai e faatupe le au suesue.

I se aoauli mafanafana o Setema mulimuli ane i lena tausaga, sa nofo ai na o Maeta Holiday e sefulufa tausaga i luga o se pasi e agai atu i Fullerton, o se itumalo o Los Angeles, Kalefonia. Sa ia sioa atu i fafo o le faamalama i le togavao lanumoli i itu uma e lua o le auala o taavale afi, o se laufanua e le pei o lona fale i le mea tuufua i le tuaoi o Iuta ma Arisona.

O Maeta o se Tiné, o se tagatanuu o le Malo o Navato. Sa ola a’e o ia i se fanua faasao o Tagatanuu Amerika i totonu o mauga paia e fa na faailogaina ai tuaoi masani o le aiga o tupuaga o lona nuu. I le seneturi lona sefuluiva, na fatuina ai e le malo o le Iunaite Setete le fanua faasao ma isi faapena mai laueleele na latou pueina mai vaega o Tagatanuu Amerika e pei o le Navato e faaavanoa ai se avanoa mo tagata papae na nofoia, e aofia ai Au Paia o Aso e Gata Ai. I le faamalosia ai e nonofo i fanua faasao e masani ona faatauvaa, e toatele aiga na tauivi.

O le fanua faasao o Navato na nofo ai Maeta sa telē lava, ma sa nonofo vavamamao tagata mai le tasi ma le isi, ma faigata ai ona aveina atu tamaiti i le aoga ma mai le aoga. I le taimi lea, o a’oga mautotogi e faatupeina e le malo, sa masani ona ova le toatele ma lē lava le faatupeina. I lalo o nei tulaga, e toatele matua Tagatanuu Amerika na saili e faaleleia olaga o a latou fanau e ala i le auina atu o i latou i aoga e i fafo atu o fanua faasao.

Na sau Maeta i Kalefonia o se vaega o le Church’s Indian Student Placement Program, ma sa agai atu o ia e nonofo ma se aiga papae na te lei feiloai muamua lava i ai. Sa auai le uso matua o Maeta i le polokalama, ma sa manao o ia e faia foi faapea. Ae e ui ina sa ia saini ma le naunautai, ae sa popole o ia i lona aiga tausi fou.

O le polokalama o le tuuina atu o tamaiti aoga, na faavaeina i le 1954 i lalo o le taitaiga a Elder Spencer W. Kimball. E pei o le toatele o Au Paia o Aso e Gata Ai i lena taimi, sa ia manatu o Tagatanuu o Amerika o ni suli moni o tagata o le Tusi a Mamona. Sa talitonu o ia ua i ai i tagata o le Ekalesia se tiutetauave e fesoasoani i o latou uso ma tuafafine sa Lamana ia maua avanoa faaleaoaoga ma faataunuu lo latou taunuuga paia o se nuu o le feagaiga.

I le polokalama o le tuuina atu, na tuua ai e tamaiti Amerika moni o latou aiga i fanua faasao ae nonofo ma aiga o le Au Paia o Aso e Gata Ai i le aluga o le tausaga aoga. Ua faamoemoe le polokalama e tuu atu i tamaiti aoga ia maua ni a’oga lelei atu ma faataitai i aiga e faatotonugalemu i le talalelei. E oo atu i le 1968, pe tusa ma le tolu afe tamaiti aoga mai le silia ma le onosefulu-tolu ituaiga na tuuina i fale i Kanata ma setete e fitu o le I.S. E ui o avanoa uma lava sa mo le Au Paia o Aso e Gata Ai, ae o nisi o i latou sa itiiti so latou auai i le Ekalesia a o lei ulufale atu i le polokalama.

O Glen Van Wagenen, o lē sa taitaia le polokalama i Kalefonia i Saute, sa faalogo e uiga ia Maeta a o nofo o ia ma se aiga i Kanab, Iuta. Sa fiafia Maeta e nonofo faatasi ma i latou, ma sa lelei lana fegalegaleaiga ma le la tama teine. Ina ua valaaulia e Glen ia Maeta e auai i le polokalama o le tuuina atu o tamaiti aoga i Kalefonia i le amataga o lana vasega iva, sa vave lava ona ia taliaina le ofo.

O Maeta o le uii o le fanau teine e toaono a Calvin Holiday ma Evelyn Crank. Sa auai ona matua i le Ekalesia i le popofou o le la faaipoipoga, ae na mulimuli ane le fiafia i ai. E ui ina sa papatisoina Maeta i le valu o ona tausaga, ae sa lei auai soo o ia i le lotu, ma na te lei malamalama foi i le taua o lona papatisoga. I le manao ai e faaleleia le aoga a Maeta, sa tuu ai o ia e ona matua i aoga nofotumau a Amerika i Arisona i le taimi lava na lava ai lona matua, o lea sa fesiitai solo ai o ia.

Sa iloa e Maeta aiga i le fanua faasao lea sa alolofa matua i le tasi ma le isi ma sa fiafia fanau. Ae sa lei aofia ai lona aiga. Ina ua tetea ona matua, sa toe faaipoipo faalua lona tina. E toaono isi fanau a le tina o Maeta mai nei faaipoipoga, ma o lona toesea umi na faamalosia ai Maeta e tausia ona tei laiti. E silia ma le faatasi, na tuua ai na o Maeta ma ona tei mo le tele o aso i nai meaai laiti ma vai. Sa ia faia le mea sili na te mafaia e fafaga ai tamaiti, o nisi taimi i mamoe mafu ma ni nai meaai tuuapa.

I se tasi taimi, a o falai e Maeta falaoa i luga o se afi i fafo, sa tilotilo atu lona tina ia te ia ma faapea atu, “Na pau lava le mea o le a e lelei ai o le faia lea o ni pepe.” Na nutimomoia le loto o Maeta. I lena taimi, sa ia tautino le leoa ai, “O le a ou faia se mea mo au lava ia.”

I le taunuu ai i le fale faatali pasi i Kalefonia i Saute, sa mapu ai Maeta i le aluese ai mai lona tina. Ae sa popole o ia a o ia vaai atu i se ulugalii o vaitausaga o tagata matutua o savavali atu i le faitotoa. “O le a avea i la’ua ma o’u matua fou,” sa ia mafaufau ai.

O lona tamā tausi, o Spencer Black, sa filemu ma taofiofi. Sa faafeiloaia o ia e Maeta ma le faaeteete, sa mailaila mai alii faasaua sa ia iloa mai lona olaga. Peitai, o lona tina tausi, o Venna, sa i ai sona agaga faamafanafana e uiga ia te ia.

Sa la aveina Maeta i lo latou fale, lea na ia feiloai ai i le la fanau, o Lusi e sefululima tausaga le matua ma Larry e sefulutolu tausaga le matua. Sa i ai foi i le au Blacks ni tamaiti matutua se toatolu o e na siitia ese atu mai le fale. Sa faasolo ina masani Maeta i lona aiga fou, faatasi ai ma lona magalafu telē ma se togalaau e tumu i fugalaau. O le fefaasoaai o potu ma nai ona tei i lona olaga atoa, sa faapitoa ai lava lona fiafia i le i ai o lona lava potumoe.

Ae sa lei toafimalie atoatoa Maeta. Sa lofituina le aai ma sa tumu i le puaoa. Ma a o agalelei ona matua tausi, sa mafaufau Maeta pe o la faaaogaina le agalelei e faasese ai o ia i le faia o feau, e pei ona faia e lona tina i nisi taimi.

Sa lei faanoanoa o ia i le sau i Kalefonia, ae sa ia misia le filemu o le fanua faasao a o taoto o ia i le moega i lena po, ma le popole i le malomaloa o taavale i le auala.

  1. Jay M. Todd, “Egyptian Papyri Rediscovered,” Improvement Era, Jan. 1968, 13–14; Fragment of Book of Breathing for Horos–A, between 238 and circa 153 BC, in JSP, R4:8–9; Nibley, Message of the Joseph Smith Papyri, 183–84; Muhlestein, “Papyri and Presumptions,” 40, 44–45.

  2. McKay, Diary, Nov. 27, 1967; “Arabic Documents to U,” Deseret News, Dec. 15, 1966, C1; “U. Professor to Speak on Mideast,” Salt Lake Tribune, Oct. 4, 1959, A17; Jay M. Todd, “Egyptian Papyri Rediscovered,” Improvement Era, Jan. 1968, 13–14; “A Facsimile from the Book of Abraham, No. 2.”

  3. Jay M. Todd, “Egyptian Papyri Rediscovered,” Improvement Era, Jan. 1968, 12–14, 16; Lewis Bidamon, Emma Smith Bidamon, and Joseph Smith III to Abel Combs, Certificate of Sale, May 26, 1856, CHL.

  4. Au Paia, voluma 1, mataupu 20; “Book of Abraham and Related Manuscripts,” i le JSP, R4:xix–xx, xxiii–xxix; Peterson, Story of the Book of Abraham, 203–16, 242–47; Gee, “Stranger in a Strange Land,” 501–3. Autu: Faaliliuga o le Tusi a Aperaamo

  5. Jay M. Todd, “Egyptian Papyri Rediscovered,” Improvement Era, Jan. 1968, 14.

  6. Isabel Santana entry, Births and Blessings, 1958, Obregon Branch, Northern Mexican Mission, 158–59, in Mexico (Country), part 6, Record of Members Collection, CHL; Isabel Santana, Oral History Interview [Jan. 5, 2022], 1–2, 22–23; Santana and Machuca, Oral History Interview, 32–33; Morgan, “Benemérito de las Américas,” 108, 110.

  7. Au Paia, voluma 2, mataupu 31; Au Paia, voluma 3, mataupu 31; Deseret News 1991–1992 Church Almanac, 178, 190; Morgan, “Century of LDS Church Schools in Mexico,” 364; Missionary Department, Full-Time Mission Monthly Progress Reports, Jan. 1966; Daniel Taylor to Ernest L. Wilkinson, Sept. 26, 1962, Church Educational System, Harvey L. Taylor Administrative Files, CHL; Morgan, “Benemérito de las Américas,” 94, 96–97.

  8. Romney, Journal, Nov. 19, 1957; Feb. 6, 1958; Apr. 5, 1958; Nov. 5, 1959; Dec. 9, 1959; Bentley, Life and Family of Joseph T. Bentley, 98–99; Daniel Taylor to Ernest L. Wilkinson, Sept. 26, 1962; Harvey Taylor to M. James Penton, Sept. 7, 1966, Church Educational System, Harvey L. Taylor Administrative Files, CHL; Taylor, Story of L.D.S. Church Schools, 1:34–45, 62–71; 2:6–11; Griffiths, “Globalization of Latter-day Saint Education,” 82, 97–125. O Autu: Aoga a le Ekalesia; Amerika Samoa; Chile; Fiti; Mekisiko; Niu Sila; Samoa; Toga

  9. Joseph Bentley, “El Arbolillo (The Little Tree),” i le Joseph Bentley to N. Eldon Tanner, Apr. 29, 1968, Church Educational System, Harvey L. Taylor Administrative Files, CHL; Morgan, “Benemérito de las Américas,” 99–104; Taylor, Story of L.D.S. Church Schools, 2:6–15, 18–19, 21, 24; Santana and Machuca, Oral History Interview, 34–35.

  10. Santana and Machuca, Oral History Interview, 2–3, 10; Isabel Santana, Oral History Interview [Jan. 5, 2022], 16; Isabel Santana, Oral History Interview [Feb. 2, 2022], 16; Taylor, Story of L.D.S. Church Schools, 2:4, 5, 20; Harvey Taylor to Marion D. Hanks, Apr. 19, 1966, Church Educational System, Harvey L. Taylor Administrative Files, CHL; Morgan, “Impact of Centro Escolar Benemérito,” 156.

  11. Santana and Machuca, Oral History Interview, 32; Isabel Santana, Oral History Interview [Feb. 2, 2022], 1; Wagner and Wagner, Historia, 39; Church Board of Education, Executive Committee Minutes, Aug. 26, 1965; Romney, Journal, Oct. 26, 1966.

  12. Isabel Santana, Oral History Interview [Feb. 2, 2022], 1–4; Santana and Machuca, Oral History Interview, 32–34; Isabel Santana, Oral History Interview [Jan. 5, 2022], 1–2, 23; Wagner and Wagner, Historia, 39.

  13. Isabel Santana, Oral History Interview [Feb. 2, 2022], 2, 10; Santana and Machuca, Oral History Interview, 2–4; Isabel Santana, Oral History Interview [Apr. 19, 2022], 25.

  14. McKay, Diary, May 24, 1960; Mar. 28, 1964; Aug. 19, 1965; Aug. 22, 1966; Nov. 7, 1966; Jan. 1, 1967; Henry D. Taylor, in One Hundred Thirty-Sixth Annual Conference, 83; Garrow, Protest at Selma, 161–66; Patterson, Grand Expectations, 580–81, 598, 620–21.

  15. Powaski, Cold War, 135–60; Hartlyn and Valenzuela, “Democracy in Latin America since 1930,” 139–43; Falola and Heaton, History of Nigeria, 158–75.

  16. McKay, Diary, Jan. 1, 1967; Patterson, Grand Expectations, 512–17, 594–99; Boot, Invisible Armies, chapter 52.

  17. Gordon B. Hinckley, “Asian Diary,” Instructor, Sept. 1967, 346–47; Marion D. Hanks to First Presidency, Jan. 18, 1967, First Presidency, Mission Correspondence, 1964–2010, CHL; “1967 Membership Population Report,” 2; McKay, Diary, Jan. 20, 1966; Apr. 15, 1966; Sept. 15, 1966; Nov. 17, 1966.

  18. Gordon B. Hinckley, “Asian Diary,” Instructor, Sept. 1967, 346–47; Marion D. Hanks to First Presidency, Jan. 18, 1967, First Presidency, Mission Correspondence, 1964–2010, CHL; Allen Rozsa, Memorandum, Oct. 31, 1966, Gordon B. Hinckley Files, circa 1935–70, CHL; Hinckley, Journal, Oct. 30, 1966; Palmer, Church Encounters Asia, 143.

  19. McKay, Diary, Jan. 1, 1967; Steininger, Germany and the Middle East, 108–19; Gould, Struggle for Modern Nigeria, 8–9, 63, 211; Patterson, Grand Expectations, 448–49, 579–81, 588–89, 598–600, 620–30; Lytle, America’s Uncivil Wars, chapter 8.

  20. David O. McKay, i le One Hundred Thirty-Seventh Annual Conference, 5–7; Lytle, America’s Uncivil Wars, chapters 8 and 9; “Early Registrations Show Banner Year for Seminaries,” Church News, Sept. 7, 1957, 12; For the Strength of Youth, 3–16; tagai foi Patterson, Grand Expectations, 669–72.

  21. David O. McKay, Hugh B. Brown, in One Hundred Thirty-Seventh Semi-annual Conference, 4–5, 94, 149.

  22. Hugh B. Brown, Harold B. Lee, in One Hundred Thirty-Seventh Semi-annual Conference, 25–26, 98–108; Henry A. Smith, “Top Church News of ’67,” Church News, Dec. 30, 1967, 5; Correlation Executive Committee, “Church Curriculum Programs: Time Changes,” Instructor, Sept. 1967, 361. Autu: Tuputupua’e o le Ekalesia

  23. David O. McKay, Harold B. Lee, i le One Hundred Thirty-Seventh Semi-annual Conference, 5–10, 98–108.

  24. “LDS Teacher Helps Korean Orphans,” Church News, Feb. 6, 1971, 7; Hwang, “Hwang Keun Ok,” 293; Shirleen Meek Saunders, “Whang Keun-Ok: Caring for Korea’s Children,” Ensign, Oct. 1993, 46; Roby, Oral History Interview, 1, 4–5; Bronson, Oral History Interview, 2. O punavai e eseese lava le sipelaina o lona igoa “Hwang” ma le “Whang.”

  25. “1967 Membership Population Report,” 2; Palmer, Church Encounters Asia, 94–98, 108; “Korean Student at U. of U. Called to Far East Mission,” Church News, Nov. 17, 1956, 10; Joseph Lundstrom, “President McKay Given New Korean Translation,” Church News, Aug. 31, 1968, 3. O Autu: Paranesi o Tagata Tautua i le Fitafita; Korea i Saute

  26. Hwang, “Hwang Keun Ok,” 293; Bronson, Oral History Interview, 2, 91; Shirleen Meek Saunders, “Whang Keun-Ok: Caring for Korea’s Children,” Ensign, Oct. 1993, 46–47; “LDS Teacher Helps Korean Orphans,” Church News, Feb. 6, 1971, 7.

  27. Bronson, Oral History Interview, 2–4, 27–28; Roby, Oral History Interview, 1; Shirleen Meek Saunders, “Whang Keun-Ok: Caring for Korea’s Children,” Ensign, Oct. 1993, 46.

  28. Roby, Oral History Interview, 1; Shirleen Meek Saunders, “Whang Keun-Ok: Caring for Korea’s Children,” Ensign, Oct. 1993, 46–47; Hwang, “Hwang Keun Ok,” 293; Bronson, Oral History Interview, 2–3, 27–28; “Shoes Big, Heart Bigger,” Church News, May 25, 1968, 10.

  29. Bronson, Oral History Interview, 2–3; Sarah Jane Weaver, “Orphanage Founder’s Life Spent Serving,” Church News, Aug. 19, 2000, 4, 7; Shirleen Meek Saunders, “Whang Keun-Ok: Caring for Korea’s Children,” Ensign, Oct. 1993, 46; Hwang, “Hwang Keun Ok,” 291–92; Roby, Oral History Interview, 1–3.

  30. Bronson, Oral History Interview, 9–10, 13, 28–31, 74, 81–82; Roby, Oral History Interview, 1, 4, 9; “Shoes Big, Heart Bigger,” Church News, May 25, 1968, 10.

  31. Bronson, Oral History Interview, 15–16, 52, 74–75; Roby, Oral History Interview, 1–4.

  32. Richard Bushman to Truman Madsen, Memorandum, Oct. 17, 1967, Truman G. Madsen Correspondence, CHL; Walters, “New Light on Mormon Origins,” 59–61; Godfrey, “Kenneth W. Godfrey,” 254; Harper, First Vision, 211–14.

  33. Harper, First Vision, 204–6, 214–15; “First Vision Accounts,” Gospel Topics Essays, ChurchofJesusChrist.org/study/manual/gospel-topics-essays; Allen, “Significance of Joseph Smith’s ‘First Vision,’” 29–46. Autu: Tala o le Mua’i Faaaliga a Iosefa Samita

  34. Harper, First Vision, 214–16; Walters, “New Light on Mormon Origins,” 60–73.

  35. Harper, First Vision, 219; Bushman, “First Vision Story Revived,” 82–83; Truman Madsen to First Presidency, Apr. 17, 1968, First Presidency, General Administration Files, 1921–72, CHL.

  36. Harper, First Vision, 219–20; Allen and Arrington, “Mormon Origins in New York,” 241–42.

  37. [Truman Madsen] to Harold Snow, Nov. 9, 1967; Truman Madsen to “Dear Brethren,” Jan. 18, 1968, Truman G. Madsen Correspondence, CHL; Allen and Arrington, “Mormon Origins in New York,” 241–42; Truman Madsen to First Presidency, Apr. 17, 1968, First Presidency, General Administration Files, 1921–72, CHL; Pykles, Excavating Nauvoo, 18–19, 53–128.

  38. Jay M. Todd, “Egyptian Papyri Rediscovered,” Improvement Era, Jan. 1968, 13–14; Tanner, Journal, Nov. 26–27 and Dec. 5, 1967; “Mormons Get ‘Lost’ Egyptian Papyrus Texts,” Los Angeles Times, Nov. 28, 1967, section 1, 4; “Old Papyri Find Linked to Mormons,” Sun (Baltimore), Nov. 8, 1967, A3; George W. Cornell, “Missing Documents Found,” Austin (TX) Statesman, Nov. 30, 1967, A5; “LDS Orders Papyri to Y. for Study,” Salt Lake Tribune, Nov. 29, 1967, B2.

  39. Nibley, Lehi in the Desert and the World of the Jaredites, 20–95; Nibley, Approach to the Book of Mormon, 164–89, 256–69; Nibley, Since Cumorah, 251–58, 297–327.

  40. Truman Madsen to First Presidency, Apr. 17, 1968, First Presidency, General Administration Files, 1921–72, CHL.

  41. First Presidency to Truman Madsen, May 8, 1968, First Presidency, General Administration Files, 1921–72, CHL; Spencer W. Kimball, Journal, Dec. 14, 1961; Lee, Diary, Dec. 7, 1961, and Dec. 17, 1963; Tanner, Journal, July 17, 1964, and Dec. 2, 1965; Quinn, Mormon Hierarchy, 120–23; Durham, N. Eldon Tanner, 208–9. Autu: Mea Tautupe a le Ekalesia

  42. Truman Madsen to Hugh B. Brown and N. Eldon Tanner, May 15, 1968, First Presidency, General Administration Files, 1921–72, CHL; Harper, First Vision, 221; McKay, Diary, May 24, 1968; First Presidency to Truman Madsen, June 4, 1968, First Presidency, General Administration Files, 1921–72, CHL.

  43. Shumway and Shumway, Blossoming, 96–97; Maeta Beck and Dennis Beck, Oral History Interview, 4, 6–7, 29–30, 51, 69–70.

  44. Shumway and Shumway, Blossoming, 89; Berlo, “Navajo Cosmoscapes,” 11; Prucha, Great Father, 1:562–81; 2:631–58, 814–40; Au Paia, voluma 2, mataupu 5 ma le 8; Garrett, Making Lamanites, 43–57; White, Roots of Dependency, 290–315; Bailey and Bailey, History of the Navajos, 26–28, 295–96.

  45. Maeta Beck and Dennis Beck, Oral History Interview, 5, 49–50, 67–68; Shumway and Shumway, Blossoming, 92, 96.

  46. Allen, “Rise and Decline of the LDS Indian Student Placement Program,” 88–96, 100–101; First Presidency to Spencer W. Kimball, Sept. 6, 1968, First Presidency, General Administration Files, 1921–72, CHL; Dorothy O. Rea, “Indian Student Plan,” Deseret News, Aug. 22, 1968, E8. O Autu: Polokalama o le Tuuina Atu o Tamaiti Aoga Initia; Faasinomaga o sa Lamana; Spencer W. Kimball

  47. Shumway and Shumway, Blossoming, 96–97; Maeta Beck and Dennis Beck, Oral History Interview, 2–3, 6.

  48. Shumway and Shumway, Blossoming, 90–91, 94–96; Maeta Beck and Dennis Beck, Oral History Interview, 2, 55, 71, 137.

  49. Shumway and Shumway, Blossoming, 96, faaopoopo le faamamafa; Maeta Beck and Dennis Beck, Oral History Interview, 16–17.

  50. Maeta Beck and Dennis Beck, Oral History Interview, 5, 48–49; Black and Black, Life Stories, [4].

  51. Maeta Beck and Dennis Beck, Oral History Interview, 3–4, 10, 25–26, 48, 68; Shumway and Shumway, Blossoming, 92; Black and Black, Life Stories, [158]; Pierce, Oral History Interview, 2–4.

  52. Maeta Beck and Dennis Beck, Oral History Interview, 6–7, 9–10, 50–51.