ʻI ha Palani Fakalangi
ʻOku tau tui ko e fāmilí kuo tuʻutuʻuni ia ʻe he ʻOtuá. ʻOku fakafōtunga ʻa e mahino ʻoku tau maʻu fekauʻaki mo e fāmilí ʻi he fakahinohino fakapalōfita ko ia “Ko e Fāmilí: Ko ha Fanongonongo ki Māmaní.”
“Kuo mau ongoʻi ʻoku totonu ke mau fakatokanga mo sinaki atu fekauʻaki mo e ngaahi poto kākā fakaemāmani ko ia ʻoku lau ko e moʻoní, pea mo e lahi ʻa e kākaá fekauʻaki mo e ngaahi tuʻunga ʻulungāanga muhuʻingá pea mo e lahi ʻo e fakatauele mo e ʻahiʻahi ʻoku nau ʻuliʻi māmālie ʻa e māmaní. Ko e tahá foki, ʻoku loto ʻa e Kau Palesitenisī ʻUluakí mo e Fakataha Alēlea ʻo e Kau ʻAposetolo ʻe Toko Hongofulu Mā Uá ke fai ha fanongonongo fakamafaiʻi ki he Siasí pea mo e māmaní kotoa ʻo fakahā pea toe fakapapauʻi atu ai ʻa e ngaahi tuʻutuʻuni, ngaahi tokāteline mo e ngaahi ngāue ʻoku fekauʻaki mo e fāmilí ʻa ia kuo toutou fakahā atu ʻe he kau palōfitá, kau tangata kikite mo e kau tangata maʻu fakahā ʻo e Siasí ni ʻi hono hisitōliá.”1
Naʻe fakafeʻiloaki ai ʻe Palesiteni Kōtoni B. Hingikelí (1910– 2008) e ngaahi leá ni ʻa e “Ko e Fāmilí: Ko ha Fanongonongo ki Māmani”2 ʻi he fakatahaʻanga lahi ʻa e Fineʻofá naʻe fai ʻi he ʻaho 23 ʻo Sepitemá 1995, ʻi Sōleki Siti ʻi ʻIutā.
Naʻá ne tapou ʻo pehē, “ʻOku mau fakamamafaʻi atu ki he kakai kotoa pē ke nau lau fakalelei ʻa e fanongonongo ko ʻení, ʻi he faʻa fakakaukau, pea ʻi he faʻa lotu. Ko e mālohi ʻo ha puleʻanga ʻoku fakatefito ia ʻi he ngaahi fāmilí. ʻOku mau naʻinaʻi ki hotau kakaí ʻi he feituʻu kotoa pē ke fakamālohia honau ngaahi fāmilí ʻo fakatatau mo e ngaahi tuʻunga ʻulungāanga mahuʻinga ko ʻeni kuo tukufakaholo maí.”3
ʻOku hoko hake heni ha ngaahi ʻata ʻo e kakai ʻo ʻĒsiá, ʻa ia ʻoku ʻiloa ʻa honau ʻulungāanga fakafonuá ʻi heʻenau “fuʻu māteakiʻi honau ngaahi vā fakafāmilí,” ʻo kau ai ʻa e “fakaʻapaʻapaʻi ʻo e kakai toulekeleká mo e ngaahi tuʻunga moʻui māʻolunga maʻá e fānaú.”4 ʻOku fakafofongaʻi ʻe he ngaahi ʻata ko ʻení ʻa e Kāingalotu ʻo e Siasí ʻi māmani kātoa pea ʻoku fakamatalaʻi mai ai ʻa e ngaahi akonaki mahuʻinga ʻoku hā ʻi he fanongonongo ki he fāmilí.