NGAAHI FAKAKAUKAU MAʻÁ E EFIAFI FAKAFĀMILI ʻI ʻAPÍ

ʻE lava ke fakaʻaongaʻi ʻa e ngaahi fokotuʻu fakafaiakó ni ʻi he loki akó pe ʻi ʻapi foki. Te ke lava pē ʻo liliu ke feʻunga ʻa e ngaahi fakakaukaú ni ki ho fāmilí pe kalasí.

“Mūsika Taau, Ngaahi Fakakaukau Taau,” p. 30: Kamataʻaki hano fai ha kiʻi vaʻinga ʻe feinga ai e kau mēmipa ʻo e fāmilí ke nau mateʻi ha foʻi himi pe foʻi hiva Palaimeli ʻi haʻanau fanongo ki ha foʻi nota ʻe taha pe ua, pe tolu pe fā. Kapau he ʻikai ke nau lava ʻo mateʻi atu, pea ʻoange ha kiʻi tokoni fakatupu fakakaukau ki he foʻi himí. Mou aleaʻi hono mahuʻinga ʻo e mūsiká ʻi heʻetau moʻuí mo e founga ʻe lava ke tokoniʻi ai kitautolu ʻe he ngaahi fasi leleí. Fakaʻaongaʻi e fakamatalá ke fakamahinoʻi e founga ʻe lava ke tākiekina ai ʻe he mūsiká ʻetau ngaahi fakakaukaú pe fakaʻaongaʻi ke puleʻiʻaki kinautolú. Fokotuʻu ha taumuʻa ke mou ako maʻuloto e ngaahi lea ʻo ha foʻi himi ʻoku mou manako ai.

“Teuteu ke Maʻu e Ngaahi Ouau ʻo e Temipalé,” p. 40: Hiki e ngaahi fokotuʻu ʻe valu ʻa Misa Talakisí ʻi ha laʻipepa pea ʻoange ki he tokotaha takitaha ke ne fili ha laʻipepa. Fakaafeʻi kinautolu ke nau takitaha vahevahe atu ʻa e founga ʻe lava ke tokoniʻi ai kitautolu ʻe he faleʻi ko ʻení ke tau tuʻu ʻi he ngaahi potu māʻoniʻoní pea teuteu ke maʻu e ngaahi ouau ʻo e temipalé. Fakaʻaongaʻi ha ngaahi meʻa mei he fakamatalá ke poupou atu ki hoʻomou fealēleaʻakí. Mou fai fakafāmili ʻeni, ʻo mou fili ha tefitoʻi moʻoni ʻe taha ke mou ngāue ki ai lolotonga e ngaahi uike ka hoko maí.

“Ko e Foʻi Hiva ʻa ʻEne Faʻeé,” p. K8: Hili hono lau ʻo e foʻi talanoá pea fakaafeʻi e kau mēmipa ʻo e fāmilí ke nau vahevahe mai ha taimi ne nau ilifia ai. ʻEke ange ʻa e meʻa ne nau fai ke ʻosi ai ʻenau ilifiá. Mou aleaʻi ʻa e lava ke tokoniʻi kitautolu ʻe haʻatau hivaʻi ha himi pe hiva ʻa e Palaimelí. Mou fili fakafāmili pe fakafoʻituitui pē ha foʻi hiva ke mou manatuʻi ʻi he taimi ʻe fie maʻu ai ha fakafiemālie pe mālohí.

“Fiemālie Pē He Meʻa ʻOkú Ke Maʻú,” p. K12: Vahevahe ʻa e lēsoni ko ia naʻe fie maʻu ʻe he tamai ʻa ʻEletā ʻOtiumé ke ako ʻe hono fāmilí. Fakaukauʻi hano ʻai ha “hina ʻo e loto houngaʻiá” ke tokoni ki he fānaú ke nau ʻiloʻi ʻa honau ngaahi tāpuakí. Tuku ke hiki pe tā fakatātaaʻi ʻe he kau mēmipa ʻo e fāmilí ʻa e ngaahi meʻa ʻoku nau fakamālō aí pea faʻo e ʻū laʻipepá ʻi he loto hiná. Fakalotolahiʻi hoʻomou fānaú ke nau fakakaukau foki ki he ngaahi tāpuaki ʻoku ʻikai ko ha ngaahi meʻa fakamāmaní.