Ko ha Ngaahi Fakakaukau Makehe ma‘á e Taimi Fe‘inasi‘akí, ‘Epeleli 2008

Ko ha ngaahi fakakaukau makehe ʻeni ʻe lava ke fakaʻaongaʻi ʻe he kau taki Palaimelí fakataha mo e Taimi Feʻinasiʻaki ʻoku paaki atu ʻi he Liahona ʻo ʻEpeleli 2008. Ke maʻu ʻa e lēsoni, ngaahi fakahinohino mo e ʻekitivitī ʻoku fekauʻaki mo e ngaahi fakakaukau ko ʻení, vakai ki he “Tokanga ki he Kau Palōfitá—Muimui Ki Heʻenau Leá” ʻi he peesi K4 mo e K5 ʻo e konga ʻa e fānaú ʻi he pulusinga ko ʻení.

1. Fakaʻaliʻali ange ʻa e Ngaahi Fakatātā ʻo e Ongoongoleleí 102 (Foʻu ʻo e ʻAʻaké) mo e 520 (Kōtoni B. Hingikelī). Fakafehoanaki pea fakafaikehekeheʻi ange ʻa e palōfita ko Noá mo Palesiteni Kōtoni B. Hingikelī (1910–2008). Tokoni ke ʻilo ʻe he fānaú neongo ko e fāmili pē ʻo Noá naʻa nau fakafanongo ki heʻene ngaahi leá, ʻoku tokolahi ha niʻihi ʻo e kāingalotú naʻa nau fakafanongo ki he faleʻi ko ia ʻa Palesiteni Hingikelī ke lau ʻa e Tohi ʻa Molomoná. Fakaafeʻi ha fāmili ʻi hono fakangofua ʻe he pīsopé pe palesiteni fakakoló ke nau vahevahe ʻa e meʻa ne hoko kiate kinautolu ʻi heʻenau muimui ko ia ki he palōfitá, ʻo lau ʻa e Tohi ʻa Molomoná.

Tokoni ki he fānaú ke nau kumi ʻa e 2 Nīfai 32:9. Ako maʻuloto ʻa e kupuʻi lea “ʻOku ou pehē kiate kimoutolu, kuo pau ke mou lotu maʻu pē.” Ako ha foʻi hiva pe himi fekauʻaki mo e lotú. Fakamoʻoni ki he Tohi ʻa Molomoná mo e mālohi ʻo e lotú.

2. Faʻu ha pāsolo “Muimui ki he Palōfitá” ʻaki haʻo fakaʻaongaʻi ʻa e tohi lēsoni Palaimeli 3, lēsoni 8. Fakaʻata lahi ʻa e tā takitaha ʻi he pāsoló ki ha laʻi pepa kehe. Fokotuʻu ʻa e fakatātā ʻo e kiʻi tamasiʻí ʻi ʻolunga he tafaʻaki toʻohema ʻo e palakipoé pea ʻai ʻa e fakatātā ke ne fakafofongaʻi ʻa e Fakamoʻuí ʻi he tafaʻaki toʻomataʻú ʻi lalo ʻo e palakipoé. Fakapipiki takai ʻa e ngaahi fakatātā kehé ʻi he lokí. Hiki leva ʻi ha ngaahi laʻi pepa makehe ʻa e ngaahi kupuʻi lea ʻoku ʻalu fakataha mo e laʻi fakatātā takitaha. ʻE fakaʻaongaʻi ʻeni ke nau hoko ko ha ngaahi tokoni (clues).

Hivaʻi ʻa e veesi 9 ʻo e “Muimui he Palōfitá” (Tohi Hiva ʻa e Fānaú, 58–59) pea kole ange ki he fānaú ke nau fakafanongo pe ko e hā ʻa e meʻa te tau maʻu ʻo kapau te tau muimui ki he palōfitá. Akoʻi ange ʻoku ʻomi ʻe heʻetau palōfitá ha ngaahi fakahinohino lolotonga ʻetau fonongá. Kapau te tau muimui kiate ia, ʻe lava ke tau toe foki ʻo nofo mo e Tamai Hēvaní mo Sīsū Kalaisi.

Fakaafeʻi ha kiʻi tamasiʻi ke ne fili ha tokoni (clue). Kole ange ki heʻene kalasí mo e faiakó ke nau fakatātaaʻi ʻa e tokoní (clue) ko iá ke mateʻi ʻe he fānau kehé. ʻI he taimi ʻe tali ai ʻe ha taha ʻo tonú, ʻai ke ne kumi ʻa e fakatātā ʻoku ʻalu fakataha mo iá ʻi he lokí. Fokotuʻu ʻa e fakatātaá ki he palakipoé, ke haʻu mei he fakatātā ʻo e kiʻi tamasiʻí ki he fakatātā ʻo e Fakamoʻuí. Hivaʻi leva ʻa e tau ʻo e “Muimui he Palōfitá” hili hano fokotuʻutuʻu ʻa e fakatātā takitaha ki he palakipoé. Hokohoko atu hono fakatataaʻi ʻo e ngaahi tokoní (clues) mo hono fokotuʻu ʻa e ngaahi fakatātaá ʻi he palakipoé kaeʻoua kuo mateʻi kotoa kinautolu. Fakamoʻoni ki he ngaahi tāpuaki ʻoku maʻu mei he muimui ki he kau palōfitá.

Maʻá e fānau lalahí: Fili ha ngaahi potufolofola ʻe faitatau mo e ngaahi tokoni ko ʻení pea hiki ʻa e ngaahi potufolofolá ʻi he tokoní. Kole ange ki he fānaú ke nau kumi ʻa e potufolofolá pea tomuʻa lau ia kimuʻa pea nau fakatātaaʻi ʻa e tokoní.

3. Fakatātaaʻi ʻi he hiva: “Fakamālō ki he ʻOtua” (Ngaahi Himí, fika 10). Ngūnguuʻi pe tā aʻ e ʻuluaki lainé. Kole ange ki he fānaú ke hiki honau nimá ʻo kapau kuo nau ʻosi fanongo ʻi he himi ko ʻení. Lau ange leva ʻa e ʻuluaki foʻi lea ʻe tolú: Fakamālō ki he ʻOtua,” pea fakamatalaʻi ʻoku hanga ʻe he himi koʻení ʻo talamai ʻa e ngaahi tāpuaki kuo tau maʻu mei he Tamai Hēvaní pea ʻi heʻetau hivaʻi ʻa e himi ko ʻení, ko ha faingamālie ia ke tau fakamālō ai koeʻuhí ko ʻEne ngaahi tāpuakí. Fakaafeʻi ʻa e fānaú ke nau vahevahe ʻa e ngaahi meʻa ʻoku nau ʻilo mo ongoʻi fekauʻaki mo e himi ko ʻení.

Hiki hake ha tohi himi pea fakahā ange kiate kinautolu ʻa e feituʻu ʻoku maʻu ai ʻa e himi ko ʻení. Talaange ko e foʻi lea ko ia ko e fofonga fiefia ʻokú ne fakamatalaʻi ʻa e founga ʻoku totonu ke hivaʻi ʻaki iá. Tokoni ki he fānaú ke nau ongoʻi ʻa e ongo ʻo e fasí ʻaki haʻamou pasi ʻa e taimi 4/4 ʻo hono tā ʻo e hivá ʻi hono tā ko ia ʻe he tokotaha tā pianó ʻa e ʻuluaki laine. Hili ia, pea ʻai ke pasi ʻa e fānaú ʻo fakatatau ki he ongo ko ia ʻo e ʻuluaki laine. Vaeua ʻa e lokí. ʻAi e tafaʻaki ʻe taha ke nau pasi ʻo fakatatau mo e taimi hono tā ʻo e hivá, pea pasi ʻa e tafaʻaki ʻe tahá ʻo fakatatau mo e ongo ʻo e lainí. Fetongi leva ʻa e ongo tafaʻakí pea toe fai pē ʻa e meʻa tatau.

ʻI hoʻo akoʻi ko ia ʻa e ngaahi lea ʻo e himí, fakaafeʻi ʻa e fānaú ke nau fakafanongo ki he ngaahi tāpuaki kuo foaki ange ʻe he Tamai Hēvaní kiate kinautolú mo e founga ʻoku tokoniʻi ai kitautolu ʻe he ngaahi tapuaki ko ʻení (hangē ko ʻení: ko e ongoongoleleí, ko ha palōfita ke tataki kitautolu mo e ngaahi alā meʻa pehē). Tokoni ke ʻiloʻi ʻe he fānaú ʻa e ngaahi kupuʻi lea ʻokú ne fakamatalaʻi ʻa e ngaahi meʻa ʻoku totonu ke nau fai koeʻuhí kuo tāpuekina kinautolu (hangē ko ʻení: [“fiefia ke ngāue” mo e “fiefia ke fai ho finangaló”]).

Vahevahe ʻa Mōsaia 2:41. Fakamoʻoni ʻoku tapuekina kitautolu pea tau fiefia ʻi he taimi ʻoku tau fai ai ʻa e meʻa ʻoku kole mai ʻe he palōfitá.