Fanongonongo ha Temipale Fo‘ou ma‘a ‘Ele Salavatoa
ʻI he ʻaho 18 ʻo Nōvema, 2007, naʻe fanongonongo ai ʻe he Kau Palesitenisī ʻUluakí ha palani ke langa ha temipale ʻi he fonua ko ia ko ʻEle Salavatoa ʻi ʻAmelika Lotolotó.
Ko ha fanongonongo fakafiefia ʻeni ki he kāingalotu ʻi ʻEle Salavatoá, he ʻoku ʻikai ngata ʻi heʻenau fononga mamaʻo ki he Temipale Kuatemala Siti Kuatemalá, ka ʻoku nau toe fahangahangai foki mo e fakautuutu ko ia ʻa e kaihaʻa fakamālohi ʻi he ngaahi halá.
Naʻe pehē ʻe Palesiteni Manuele ʻĒneasi Lōpesi ko e Palesiteni Fakasiteiki ʻo e Siteiki Seni Salavatoa ʻEle Salavatoá, “ʻOku mau ʻalu atu mo lotu loto pē. Kuo pau ke mau ʻalu ke fakahoko ʻa e ngaahi ouaú ni.”
Neongo ʻa e ngaahi faingataʻá, kuo toe tokolahi ange ʻa e kāingalotu ʻoku nau ʻalu maʻu pē ki he temipalé ʻi he Siteiki Seni Salavatoa ʻEle Salavatoá.
ʻOku pehē ʻe lava ke fakasiʻisiʻi ange ʻa e fefonongaʻaki houa ʻe 32 angamaheni ʻa e Kāingalotu ʻi ʻEle Salavatoá ki he temipalé ki ha houa nai pē ʻe 6 pe 7.
ʻI hono fanongonongo ko ia ʻ o e Temipale Seni Salavatoa ʻEle Salavatoá ʻoku aʻu ai ʻo ono ʻa e ngaahi temipale ʻoku lolotonga ngāue, fanongonongo pe lolotonga langa ʻi he ʻĒlia ʻAmelika Lotolotó, ʻa ia ʻoku kau ai ha ngaahi fonua ʻe fitu ʻoku kamata mei Mekisikou ʻi he tokelau-hihifó ki Kolomupia ʻi he tonga-hahaké.
Ko e ngaahi temipale ʻoku lolotonga ngāue ʻi he ʻēliá, ko e Temipale Kuatemala Siti Kuatemalá, ʻa ia ne fakatapui ʻi Tīsema 1984 mo e Temipale Seni Hosē Kosita Liká, ʻa ia ne fakatapui ʻi Sune 2000. Naʻe kamata ʻa e ngāue ki he Temipale Panamā Siti Panamaá ʻi ʻOkatopa 2005.
Kuo fakahā foki ʻe langa mo ha ongo temipale kehe ʻe ua, Temipale Ketisaletenako Kuatemalá, ʻa ia ko e temipale ia hono ua ʻi he fonua ko iá mo e Temipale Tekuisikalapa Honitulasí pea ʻokú na kei tali ki hono tanupoú.
ʻI he taimi ʻe ʻosi ai ʻa e ngaahi temipale ko ʻeni ʻe ono ʻi ʻAmelika Lotolotó, ʻe fakaʻaongaʻi ia ʻe ha kāingalotu ʻe toko 600,000 nai ʻa ia ʻoku nofo ʻi ha ngaahi siteiki ʻe 100 ʻi ha misiona ʻe 12.
Toʻo mei he Church News, Nōvema 24, 2007.