Taimi Feʻinasiʻakí
Tokanga ki he kau Palōfitá—Muimui ʻi Heʻenau Ngaahi Leá
“Ko e moʻoni ʻe ʻikai fai ha meʻa ʻe [he ʻEiki] ko e ʻOtuá, kae taʻe fakahā ia ki heʻene kau tamaioʻeiki ko e kau palōfitá” (Āmosi 3:7).
ʻOku tau maʻu ha māmani ʻoku puputuʻu hono kakaí. Vakai ki he ongoongó ka ʻoku ʻikai te ke tui ki ai.
ʻE lava ke tataki kitautolu ʻi hotau halá,
ʻO ka tau tokanga ki he kau palōfitá—muimui heʻenau leá].
ʻOku akoʻi koe ʻe he ngaahi lea ko ʻeni mei he “Muimui ʻi he Palōfitá” (Tohi Hiva ʻa e Fānaú, 110–11) ke ke tokanga pea muimui ʻi he palōfitá. ʻOku ʻuhinga ʻa e ongo foʻi lea ko e tokangá mo e muimuí ke fanongo mo talangofua. Te ke lava ʻo fakakaukau ki ha taimi naʻá ke fanongo ai ki he palōfitá? Te ke lava ʻo fakakaukau ki ha taimi naʻá ke fili ai pe ko ho fāmilí ke talangofua pea fai ʻa e meʻa naʻe kole atu ʻe he palōfitá ke faí? Ko e hā e ongo naʻá ke maʻu ʻi hoʻo talangofuá?
Fanongo ki hano vahevahe ʻe ha fānau Palaimelí hono ʻuhinga ʻo e muimui ʻi he palōfitá. Naʻe pehē ʻe ʻOsitini, “ʻOku ou fiefia ʻi he taimi ʻoku ou fai ai e meʻa ʻokú ne talamaí.” Naʻe pehē ʻe Linisī, “Kuo kole mai e palōfitá ke u tui e vala ʻoku tāú, maʻulotu, lau ʻeku folofolá, mo lotu. ʻOkú ne fie maʻu ke u papitaiso, fili ʻa e totonú, pea muimui ʻi he faʻifaʻitakiʻanga ʻa ʻeku faʻeé mo e tamaí.”
ʻOku pehē ʻi he Tokāteline mo e Ngaahi Fuakava 21:5, “He kuo mou tali ʻene leá, ʻo hangē ko e lea ia mei hoku ngutu ʻoʻokú.” ʻOku akoʻi atu ʻe he potufolofola ko ʻení ʻe leaʻaki maʻu pē ʻe he palōfitá ʻa e meʻa ʻoku fie maʻu ʻe he Tamai Hēvaní ke ke ʻiloʻí. ʻE fakahā atu maʻu pē ʻe he palōfitá ʻa e founga ke ke mouʻiʻaki ka ke lava ʻo foki ki he Tamai Hēvaní ʻi ha ʻahó.
ʻEkitivitií
Toʻo e peesi K4, pea fakapipiki ia ʻi ha pepa fefeka. Fanongo ki he lea ʻa e palōfitá ʻi he konifelenisi lahí, pea fili ha meʻa ʻe tolu ʻokú ne kole atu ke ke fai. Hiki kinautolu ʻi he pousitaá. Tautau e pousitaá ʻi ha feituʻu ʻe lava ke ke sio ki ai ke fakamanatu atu ke ke muimui ʻi he palōfitá.
Ngaahi Fakakaukau ki he Taimi Feʻinasiʻakí
-
Fakamatala nounou ki he haʻu ʻa Sione Papitaiso kia Siosefa Sāmita ke toe fakafoki mai e Lakanga Taulaʻeiki Faka-ʻĒloné mo hono toe fakafoki mai ʻe Pita, Sēmisi mo Sione ʻa e Lakanga Taulaʻeiki Faka-Melekisētekí. Fakamatala ki he anga hono tāpuakiʻi ʻe he Tamai Hēvaní ʻa e kāingalotu ʻo e Siasí ʻo fakafou ʻi he lakanga fakataulaʻeikí. Fakaafeʻi ha taki lakanga fakataulaʻeiki kuo ʻosi fakangofua ʻe he pīsopé pe palesiteni fakakoló ke lea ki he Palaimelí fekauʻaki mo e founga ʻoku faitāpuekina ai ʻe he lakanga fakataulaʻeikí ʻenau moʻuí. ʻOmi ha pepa mo e peni vahevahe, kala, pe peni fakaʻilonga. Fakaafeʻi e fānaú ke nau tā ha ngaahi sīpinga ʻo hono tāpuakiʻi ʻenau moʻuí ʻe he lakanga fakataulaʻeikí. Fakaafeʻi ha kiʻi tamasiʻi pe taʻahine ke ne lau ʻa e Tokāteline mo e Ngaahi Fuakava 107:64–67. Fehuʻi ange: “Ko hai ʻa e ‘Taulaʻeiki Lahi Pule ki he Lakanga Fakataulaʻeiki Māʻolunga ʻo e Siasí’?” Akoʻi ange ki he fānaú ʻoku maʻu ʻe hotau palōfitá ʻa e ngaahi kī kātoa ʻo e lakanga fakataulaʻeikí; ʻa ia ko e pehē, ʻokú ne maʻu ʻa e mafai ke ne tokangaʻi kātoa e Siasí. Hivaʻi ʻa e “Fakamālō ki he ʻOtuá“ (Ngaahi Himi, fika 10). Fai hoʻo fakamoʻoni ki he palōfitá pea mo e lakanga fakataulaʻeikí.
-
Fakaʻaliʻali ʻa e Fakatātā ʻo e Ongoongoleleí, fika 520 (Kōtoni B. Hingikelī) pea vahevahe ʻa e talanoa ko ia naʻe fai ʻe Palesiteni Hingikelī (1910-2008) kau ki ha fefine naʻá ne fakamolemoleʻi ha talavou koeʻuhí ko ha fili hala naʻá ne liliu ʻene moʻuí ʻo taʻe ngatá (vakai “Ke ke Faʻa Fakamolemole Ange,” Liahona, Māʻasi 2007, K2–K3). Fakamatala ange kuo akonekina kitautolu ʻe hotau kau palōfitá ke tau faʻa fakamolemole. Ngāueʻaki ʻa e fakatulamá ke fakakau e fānaú ki hono ako ʻo e ngaahi talanoa mei he folofolá fekauʻaki mo e fakamolemolé (vakai “Fakatulamaʻí,” ʻOku ʻIkai ha Ui ʻe Mahuʻinga Ange ʻi he Faiakó [1999], 203–04). Hangē ko ʻení: Sēnesi 42–45—ʻOku fakamolemoleʻi ʻe Siosefa hono ngaahi tokouá; 1 Nīfai 7—ʻOku fakamolemoleʻi ʻe Nīfai hono ongo tokouá. Fai hoʻo fakamoʻoni ki he Fakalelei ʻa e Fakamoʻuí. Tokoniʻi e fānaú ke mahino kiate kinautolu ʻEne fakahoko ke tau lava ʻo fakatomalá pea fakamolemoleʻi ai kitautolu ke tau lava ʻo toe foki ʻo nofo fakataha mo e Tamai Hēvaní.