Fakamolemole ʻo Fakamoʻui ʻEku Tamaí
Ko ʻeku tamaí naʻe fekumi ki he moʻoní ʻo ne ʻilo ai e ongo faifekaú. Naʻá na akoʻi kiate kimautolu ʻa e ongoongoleleí, pea ʻikai fuoloa mei ai kuo papitaiso kimautolu—ʻeku ongomātuʻá mo e ngaahi tuongaʻane mo e tokoua ʻe toko nima. Ne fakaʻau ʻo mālohi ange ʻemau fakamoʻoní. Naʻa mau ako ha ngaahi meʻa lahi, kae tautautefito pē ki he Fakamoʻuí mo e ngaahi fāmilí.
ʻI he 1992, ne mahaki mafu ai ʻeku tamaí lolotonga ʻene hoko ko e pīsope homau uōtí ʻi he ʻOtu Filipainí. Ne leleakiʻi ia mei hono ʻōfisí ki falemahaki. Ne fakaʻohovale ki hoku fāmilí hono talamai naʻe tuku ia ʻi he loki ʻo e kau faingataʻaʻia lahí. Naʻa mau manavasiʻi. Ne siʻisiʻi e ngaahi faingamālie ke moʻui ʻeku tamaí. Naʻe tangi ʻeku faʻeé mo ne kole kiate kimautolu kotoa ke mau lotu.
Hili pē iá naʻe ʻikai ke u toe fakatokangaʻi e taimí—he naʻe foki mai ki heʻeku manatú ha ngaahi meʻa lahi. Ne u punou ʻo lotu kae tafe pē hoku loʻimatá. Naʻe mamahi lahi hoku lotó, peá u ongoʻi ʻe pā hoku mafú. Ne u loto ke u kaikaila ke fakafiemālieʻi e mamahí pea toʻo atu e ongoʻi manavasiʻi ne u maʻu ʻi he ʻaho ko iá. Ka ko e meʻa pē ne u faí ko e lotu, “Fakamolemole ʻo fakamoʻui ʻeku tamaí.” Ko ha lotu fakamātoato ʻeni naʻe fakataumuʻa ke ongona.
Naʻe fakangofua au he pō ko iá ke u hū ki he loki ʻo e kau faingataʻaʻia lalahí. Kuo ʻikai toe ʻā ʻeku tamaí, pea ne u teuteu mo ʻeku faʻeé mo e toenga ʻo e fānaú ki he meʻa ʻe hokó. Ko ha meʻa fakamamahi moʻoni ʻeni ki homau fāmilí. Naʻe tuʻu taʻemahino mo taʻepau ʻa e kahaʻú. ʻI heʻeku lea fakamāvae loto pē kiate iá, naʻá ku manatuʻi ʻemau fuofua efiafi fakafāmili ʻi ʻapí. Naʻa mau sio he foʻi faiva ʻa e Siasí ko e Families Are Forever.
Kimuʻa peá u mohe he pō ko iá, naʻe foki fakalongolongo atu ʻeku tamai fakaemāmaní ki heʻene Tamai Hēvaní.
Naʻe hanga ʻe he mālōlō ʻa ʻeku tangataʻeikí ʻi hoku taʻu 22, ʻo fakaʻilongaʻi e kamataʻanga ʻo ha ngaahi liliu lahi fau ʻi heʻeku moʻuí. ʻI heʻene mamaʻó, ne u ʻiloʻi ai ha ngaahi mālohinga naʻe ʻikai te u ʻilo ne u maʻu. Kuo lahi ange ʻa e ngaahi meʻa kuó u fakahoko ʻi heʻeku moʻuí ʻa ia naʻe ʻikai ke u mei lavá, koeʻuhí pē ko e liliu mo e tupulaki ne hoko kiate aú.
ʻI he ʻikai ke tali ʻe he Tamai Hēvaní ʻeku lotú, naʻe ʻikai pē haʻaku fakakaukau ʻaʻaku naʻe ʻikai te Ne ongoʻi. ʻOku ou ʻilo naʻá Ne fanongo mai. Naʻá Ne ʻafioʻi lelei e meʻa ne u ongoʻí. Naʻá Ne ʻafioʻi lelei e meʻa naʻe fie maʻu ʻe homau fāmilí he taimi ko iá, pea ko e meʻa ia naʻá Ne foaki kiate kimautolú—ʻa e mālohi ke ikunaʻi ʻa e ngaahi faingataʻa ʻo e moʻuí, ʻa ia ko e mālohi ke fehangahangai mo e meʻa moʻoni ʻoku hokó. Naʻá Ne akoʻi kimautolu ʻi he founga ke mau tali e ngaahi ʻahiʻahí ʻaki ʻa e tuí.
Kuo laka hake ʻeni he taʻu ʻe 15 mei he ʻaho fakamamahi ko iá. ʻOku ou kei ako pē, pea ʻoku ou kei tupulaki pē ʻi he ongoongoleleí. ʻOku ʻi ai hoku fāmili he taimí ni, pea ʻoku ou fiefia kuo silaʻi kimautolu ʻi he temipalé. ʻOku ʻikai teitei toʻo ʻeku tokangá mei he palani ko ia ʻo e ongoongoleleí naʻe akoʻi kiate kimautolu ʻe heʻemau tamaí.
Koeʻuhí ko e Fakaleleí mo e Toetuʻu ʻa Sīsū Kalaisí, ʻoku ou ʻiloʻi ai ʻe toe fakataha homau fāmilí ʻi ha ʻaho. ʻOku kei lōloa pē fononga ke faí, ka ʻoku ou fiefia he fakakaukau atu te u sio ki heʻeku tamaí ʻi he ngataʻanga ʻo e fononga ko iá.