Ngaahi Fehuʻi mo e Talí
“ʻOku ʻikai mālohi ʻeku ongomātuʻá ʻi he Siasí. Ko e hā ha founga ʻe hokohoko atu ai ʻeku mālohí, taʻekau ai ʻena tokoní?”
Ko ha tuʻunga faingataʻa ʻeni he ʻoku meimei ko e mātuʻá ʻoku tau faʻa kumi tataki mo e fakahinohino mei aí. Ka ʻoku ʻi ai e ngaahi meʻa te ke lava ʻo fai ke kei hokohoko atu ai pē hoʻo mālohí, pea ʻe tokoni hoʻo fai ʻa e ngaahi meʻá ni ke ke hoko ai ko ha faʻifaʻitakiʻanga lelei ki hoʻo mātuʻá.
Kei hokohoko atu pē hoʻo lotu mo ako e folofolá ke fakaafeʻi mai ki hoʻo moʻuí e ueʻi ʻa e Laumālié. ʻOku fanongo ʻa e Tamai Hēvaní ki hoʻo lotú pea te Ne tali mai.
Sio ki ho kāinga kehé pe Kāingalotu ʻo e Siasí ke maʻu mei ai e faʻifaʻitakiʻanga mo e tokoni te ke fie maʻú. Hangē ko ʻení, kole ki hoʻo ongo faiako fakaʻapí pe pīsopé pe palesiteni fakakoló ke foaki hao tāpuaki fakataulaʻeiki kapau ʻoku ʻikai ha kau maʻu lakanga fakataulaʻeiki moʻui taau ʻi homou ʻapí.
Te ke lava ʻo fakamālohia ho ngaahi tokouá, tuongaʻane pe tuofāfiné mo hoʻo mātuʻá ʻaki ʻa e faʻifaʻitakiʻanga ʻo hoʻo tuí. Te ke lava ʻo fakahoko ha efiafi fakafāmili ʻi ʻapi, lotu fakafāmili, pe ako folofola fakafāmili mo ho ngaahi tokouá, tuongaʻane pe tuofāfiné. Mahalo pē ʻe fie kau atu ki ai hoʻo ongomātuʻá.
Kae mahuʻinga tahá, hokohoko atu hoʻo ʻofa ʻi hoʻo ongomātuʻá. ʻOua naʻá ke fakamāuʻi kinaua. Ka ke angaʻofa mo faʻa kātaki. ʻOkú na kei fie maʻu pē hoʻo ʻofá mo e poupoú, hangē ko hoʻo fie maʻu ʻena ʻofá mo e poupoú.
Lotua hoʻo Ongomātuʻá
Fakaafeʻi hoʻo ongomātuʻá ke mou lotu fakafāmili. Fakaafeʻi kinaua ki he ngaahi ʻekitivitī ʻa e Siasí. Fokotuʻutuʻu ha ngaahi efiafi fakafāmili ʻi ʻapi. Faʻa lotua kinaua, pea feinga ke ke hoko ko ha faʻifaʻitakiʻanga lelei. ʻI he founga ko iá te ke lava ai ʻo fakamālohia ho fāmilí mo hoʻo fakamoʻoní, te ke ongoʻi fiefia ange ai, pea ʻe tokoniʻi koe ʻe he ʻEikí ke ke kei mālohi ai pē ʻi he Siasí. Fai ia ʻi he tui mo e līʻoa, pea te Ne tali hoʻo ngaahi lotú.
Sōnia B., taʻu 20, Iukatani, Mekisikou
ʻOua Naʻá ke Foʻi
ʻOku ʻikai ke Siasi ʻeku tamaí, pea ʻikai ke mālohi ʻeku faʻeé mo hoku ngaahi tokouá he Siasí. ʻOku fakamamahi kiate au ʻenau taʻetokaʻi e ngaahi meʻa ʻoku ou tui ki aí. Ka kuo tupulaki ʻeku tuí ʻi heʻeku ʻalu ki he seminelí, lotú, mo e Mutualé pea ʻi heʻeku lotu mo ako e folofolá. Ko e faleʻi lelei taha pē ʻe lava ke u ʻoatú ke ʻoua naʻá ke foʻi.
ʻAmenitā B., taʻu 16, Nevata, USA
Ngaahi Founga Ke Kei Mālohi ai he Siasí
ʻOku ou ʻiloʻi ha taʻahine ʻoku fakaofo ʻaupito ʻene ngāue mālohi he Siasí neongo ʻa e māmālohi pē ʻa ʻene ongomātuʻá. Ko ha fakalotolahi ia ki he fānau fefine kehé he kuó ne ʻosi maʻu hono mētali ʻo e Kau Finemuí. ʻOkú ne pehē ʻoku hoko hono tokoniʻi ia ʻe he kau finemui kehé, ʻene maʻulotu maʻu peé, mo ʻene fetuʻutaki maʻu pē mo ʻEne Tamai Hēvaní, ko ha ngaahi founga fakaʻofoʻofa kotoa ia ke tokoni ke ne kei mālohi ai he Siasí.
Selasī C., taʻu 17, ʻOkalahoma, USA
Ko ha Hūfangaʻanga Malu
ʻOku ou fakafalala ki he lotú mo e ako folofolá ke ne fakamālohia ʻeku fakamoʻoní, pea ʻoku ʻi ai hoku hūfangaʻanga malu ʻi heʻeku kau ki he Sikautí mo e polokalama ʻa e Kau Talavoú mo fakahoko foki hoku ngaahi uiuiʻí. ʻOku tokoni foki e akonaki ʻa e kau palōfitá mo hono fili e ngaahi kaungāmeʻa leleí. Manatu ke tā maʻu pē ha sīpinga lelei ki ho fāmilí ʻaki hono fakahā kiate kinautolu ha ʻofa moʻoni, tokanga, mo e fakaʻapaʻapa. Kapau te ke fai hoʻo kongá, ʻe fai foki ʻe he ʻEikí Haʻaná.
ʻEletā Uikihami, taʻu 21, Misiona Kalefōnia Seni Felenisisikoú
Maʻu ʻo e Loto-toʻa mei Heʻenau Faʻifaʻitakiʻangá
ʻOku māmālohi pē ʻeku faʻeé, pea ʻikai ke Siasi hoku ngaahi kāinga kehé. Ko e meʻa ʻoku ou faí ko e falala ki hoku kau takí mo hoku kaungāmeʻá; ʻoku nau tokoniʻi maʻu pē au. Kuo nau mahuʻinga kotoa pē ʻi heʻeku moʻuí talu mei heʻenau tokoni ki heʻeku founga moʻuí mo ʻeku taumuʻa ke u ʻalu ʻo ngāue fakafaifekaú. ʻOku hanga ʻe heʻenau ngaahi tā sīpingá ʻo fakalotolahiʻi lahi au. ʻOku fie maʻu ke ke fakahoungaʻi ʻa e feohi fakakaumeʻa ʻa e kakai ʻoku nau tokoni ke langaki hake hoʻo moʻuí ʻi hoʻo hoko ko e mēmipá peá ke fakamoleki ha taimi lahi ange mo kinautolu, he ʻe ʻi ai maʻu pē ha ngaahi meʻa lahi ange ke ke ako.
ʻAivena S., taʻu 20, Puenosi ʻAealesi, ʻĀsenitina
Fakahā ʻa e ʻOfa ki Hoʻo Ongomātuʻá
Hokohoko talanoa pē mo hoʻo ongomātuʻá, pea feinga ke na poupou atu kiate koe. Fakahā kiate kinaua hoʻo ʻofá mo e houngaʻiá, pea talaange hono mahuʻinga kiate koe ke ke ʻalu ki he lotú. Kole ki hoʻo kau takí ke tokoni atu ʻi hono ʻave koe ki hoʻo ngaahi fakatahá mo e ngaahi ʻekitivitií pea vakai angé pe ʻe lava hoʻo pīsopé ʻo feinga ke talanoa ki hoʻo ongomātuʻá. Lotu ʻo kole ki he Tamai Hēvaní ke poupou atu, pea lotua ke kamata sio hoʻo ongomātuʻá ki hono mahuʻinga kiate ʻa e mālohi ʻi he Siasí. ʻE lava foki ke ke toe mālohi ange ʻi haʻo lau fakaʻaho e Tohi ʻa Molomoná mo tauhi e ngaahi fekaú.
Keleki L., taʻu 16, Misuli, USA
Founga Tokoni ʻe Ua
ʻOku lahi ʻeku sio ʻi he tūkunga ko ʻení ʻi heʻeku ngāue fakafaifekaú, pea ʻoku loto-toʻa ʻa e fānau ʻoku nau fehangahangai mo ʻení. ʻOku founga fēfē ʻenau fakahoko iá? ʻAki ʻenau fokotuʻu ha founga tokoni ʻi loto he Siasí ʻo fakafou ʻi honau ngaahi kaungāmeʻá mo e kau takí pea ʻi heʻenau fokotuʻu ha founga tokoni mo e ʻEikí ʻo fakafou ʻi he lotú, lau folofola fakaʻahó, mo e maʻulotú. ʻE lava ke ke fakahoko ia ʻaki hono fai e ongo meʻá ni!
ʻEletā Sōnasi, taʻu 21, Misiona Tahiti Papeʻeté