ʻIkai ʻĀ Fuoloa
ʻI he hokosia e taimi ke u ʻosi ai mei he kolisí, ne u ʻiloʻi kuo faitāpuekina ʻe he ngaahi tefitoʻi moʻoni ʻo e ongoongoleleí ʻa ʻeku moʻui fakaemāmaní—pea pehē foki ki heʻeku moʻui fakalaumālié.
ʻI heʻeku kei finemuí pē, ko e konga lahi ʻo hoku ngaahi uiuiʻí ko e faiako ʻi he fānau Palaimelí, pea naʻe kaunga lahi ʻeni ki heʻeku fili ke maʻu haku mataʻitohi ʻi he ako ki he ngaahi lautohi siʻí. Ka naʻe ʻikai ko ʻeku fili pē ʻa e tafaʻaki ke u ako mataʻitohi aí, ʻa e meʻa naʻe tākiekina ai ʻeku akó ʻe he ngaahi akonaki ʻa e Siasí. Naʻe mahino ʻaupito ʻeni ʻi he taimi ne u teuteu ai ke ʻosi mei he akó.
Ko e meʻa fakaʻosi ke u fakakakató ko ha pepa naʻe fie maʻu ke u maluʻi ʻi ha sivi tali fehuʻi naʻe fai mo ha kau fakamaau ʻe toko tolu. Ko e niʻihi ʻo e kau fakamāú ne nau faiako ʻi heʻeku ngaahi kalasí.
Naʻe ʻosi lelei ʻeku pepá, ko ia ko e efiafi ko ia kimuʻa he siví, ne u nofo ai mo e fāmili ʻo e tamasiʻi naʻá ma kaumeʻá. ʻI he ʻai ke u foki ki ʻapí, naʻe talamai ʻe heʻene faʻeé ʻa ʻene fakaʻamu te u maʻu ha sivi lelei peá ne pehē mai, “Kapau te ke mateuteu ʻe ʻikai te ke manavahē” (T&F 38:30).
Ne hoko mai e ʻaho hono hokó. Ne haʻu ki heʻeku manatú ha ngaahi meʻa lahi. Ne u manatuʻi ʻeku fakakaukau ke u mavahe mei he kolo tupuʻangá ke hoko atu ʻeku akó; ne u manatuʻi e ngaahi feilaulau lahi naʻe fai ʻe hoku fāmilí ke fakapaʻanga ʻeku akó. He ʻikai te u ʻai ke siva ʻenau ʻamanakí. Kuo pau ke u lavaʻi ʻeku sivi fakaʻosí.
Ne tatali foki mo hoku kaungāakó ke fai ʻenau siví. Ne mau hohaʻa kotoa pē ki he ngaahi fehuʻi ʻe fai mai ʻe he kau fakamāú, ka ne u ongoʻi fiemālie pē he ne u ʻosi lotu ʻo kole ha tokoni peá u ʻiloʻi foki naʻe ʻafioʻi ʻe he ʻOtuá ʻeku feinga ke fokotuʻutuʻu, fai e fekumí, mo tohi ʻeku pepá.
Naʻe hoko hoku taimí. Hili hono fakamatalaʻi ʻeku pepá ki he kau fakamāú, naʻe kamata leva ʻeku tali fehuʻí. Hili ʻenau fai ha ngaahi fehuʻi lahi kau ʻo ki he kaveinga ne u hikí, naʻe fehuʻi mai ʻe ha taha ʻo e kau fakamāú, “Ko e hā e lahi ʻo e ngāue naʻá ke fai ki he pepa ko ʻení?”
Ne u taliange, “Lahi ʻaupito. Ne u fai e meʻa kotoa pē ne u lavá he naʻá ku fakaʻamu ke ʻoatu ai ha ngaahi fakakaukau foʻou.”
“Naʻá ke ʻā fuoloa he poʻulí ʻo ngāue ki ai?”
Ne u pehē ange, “ʻIkai, ʻoku ʻikai te u faʻa ʻā fuoloa au ʻo fai ʻeku ngaahi ngāue fakaakó.” “ʻOku ou fokotuʻutuʻu ʻeku ngāue he ʻahó ke u lava ʻo fai ia ke ʻosi.”
Naʻe ʻasi lelei mai e mataʻi ʻohovale ʻa e kau fakamāú. Naʻe pehē mai ʻa e fakamaau tatau pē, “ʻOku ngalikehe kiate au hoʻo talamai naʻe ʻikai te ke ʻā fuoloa he poʻulí. ʻOku mau ʻiloʻi kuo lahi e pō ne ʻā fuoloa ai ho kaungā-akó.”
Naʻe pehē ʻe ha taha ʻo e kau fakamāú, “Te u talaatu ha meʻa ʻo kau ki he taʻahine ako ko ʻení. ʻOku ʻi ai hono taimi ʻoʻona ki he meʻa kotoa pē. ʻOku lava ke u talaatu ʻeni he ʻoku ou ʻiloʻi ia. ʻOku ʻi ai hono taimi ki heʻene akó, ki hono ngaahi kaungāmeʻá, ki hono fāmilí, pea ʻokú ne ʻalu foki ki he lotú.”
“Moʻoni?” naʻe toe ʻohovale pē ʻa e fakamaau ʻe tahá. “Ko e siasi fē ʻokú ke ʻalu ki aí?”
“Ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Naʻe pehē mai ʻa e toko taha, “ʻIo, ʻoku ou ʻiloʻi e siasi ko ʻená.”
“Pea ʻoku akoʻi kimautolu ke mau mohe efiafi ke maʻu longomoʻui ʻi he ʻaho hono hokó.”
Ne u ongoʻi nonga mo malu ke u fakamatala ʻo kau ki he ongoongoleleí, neongo ne u ʻohovale hono fai mai e ngaahi fehuʻi fekauʻaki mo e tui fakalotú, ʻi ha sivi fakaʻatamai.
“Naʻe tohi hoʻo pepá ʻi ha laumālie makehe. ʻOku tōtōatu ʻaupito. ʻA ia te u pehē ko e tupu foki ʻeni mei he ngaahi ʻulungāanga naʻe akoʻi kiate koe ʻe homou siasí.”
Ne u pehē ange, “ʻIo.” “Naʻe akoʻi au he lotú ʻi he founga akoʻi ʻo e fānaú, pea naʻe tokoni lahi ia ki heʻeku ako mataʻitohí.”
Ne kiʻi tūkuhua mai e taha ʻo e kau fakamāú, “Lelei ʻaupito hoʻo ngāue ki he kaveingá ʻo hangē pē ko e manako ʻa e iká ki he vaí.” “ʻOku mau ʻamanaki pē he ʻikai tuku hoʻo ʻalu ki he lotú, he ʻoku tokoni lahi atu ʻaupito e ngaahi tuʻunga ʻulungāanga mahuʻinga kuó ke maʻu mei aí.”
Ne taimi siʻi pē kuo talamai ke u hū atu mei he lokí kae lava ke ngāue e kau fakamāú ki he aofangatukú. ʻI he ʻosi ha miniti ʻe ua mei ai naʻa nau toe ui au ke u hū ange.
“Naʻe ʻikai ke faingataʻa ʻemau lototaha ki he olá. ʻI heʻemau vakai ki he makehe atu pē ho ʻulungāangá, ki he lelei ho ngaahi māká, mo e pepa naʻá ke taukaveʻi he ʻaho ní, kuo mau lototaha ai ke fakahā atu kuó ke ʻosi ʻi he lāngilangi. Mālō e ako!”
Ne tangi fiefia hoku fāmilí heʻeku talaange ʻení.
ʻOku ou fakamoʻoni naʻe fekau ʻe he Tamai Hēvaní ke tau “ʻalu ʻo mohe ʻi he teʻeki ai ke fuoloa ʻa e poʻulí, koeʻuhí ke ʻoua naʻa mou helaʻia; ʻā hengihengi hake koeʻuhi ke logomoʻui ʻa homou sinó mo e ʻatamaí” (T&F 88:124), pea naʻá Ne fai ʻeni mo fakataumuʻa ke tāpuakiʻi kitautolu. ʻOku ou fakamālō kiate Ia ʻi Heʻene tuku ke ʻomi ʻe he ongoongoleleí ʻa e fiefiá kiate kitautolu ʻi he tapa kotoa pē ʻo ʻetau moʻuí.
Taá naʻe fai ʻe Christina Smith