Ngaahi Fehuʻi mo e Tali ki Kau hono Fokotuʻu ʻo e Siasí
Ko e hā ʻoku fakahingoa ai e Siasí kia Sīsuú?
Naʻe pehē ʻe Sīsū ʻoku fakahingoa ki aí he ko Hono Siasi (vakai, 3 Nīfai 27:8). Naʻá Ne fokotuʻu ia ke tokoni ke tau toe foki ki he Tamai Hēvaní. Ko Sīsū Kalaisi ʻa e ʻulu ki he Siasí.
ʻOku ʻuhinga ki he hā ʻa e “ʻaho kimui ní”?
Naʻe folofola ʻa Sīsū, “He ʻe ui peheʻi ʻa hoku siasí ʻi he ngaahi ʻaho fakaʻosí, ʻio, ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní” (T&F 115:4). ʻOku ʻuhinga ʻa e “ʻAho Kimui ní” ki he ngaahi ʻaho fakaʻosí, ʻa e kuonga ʻoku tau lolotonga moʻui aí.
ʻOku ʻuhinga ki he hā ʻa e “Kau Māʻoniʻoní”?
ʻOku ʻuhinga e “Kau Māʻoniʻoní” ki he kāingalotu ʻo e Siasi ʻo Kalaisí. ʻOku fakamatala e folofolá ʻo kau ki he Kau Māʻoniʻoni ʻi ha vahaʻataimi lahi.
Kuonga ʻo e Fuakava Motuʻá: Teutalōnome 33:3; Saame 30:4
Kuonga ʻo e Fuakava Foʻoú: 1 Kolinitō 1:2
Kuonga ʻo e Tohi ʻa Molomoná: 1 Nīfai 14:14; Molonai 8:26
Kuonga ʻo Siosefa Sāmitá: Tokāteline mo e Ngaahi Fuakava 57:1; 84:2
ʻOku ui foki e kāingalotu ʻo e Siasí he kuongá ni ko e Kau Māʻoniʻoní.
Naʻe fokotuʻu fēfē ʻe Sīsū Kalaisi Hono Siasí?
Naʻe fokotuʻu ʻe Sīsū Hono Siasí he taimi naʻá Ne nofo ai ʻi he māmaní, he taimi naʻá Ne ʻaʻahi ai ki he konitinēniti ko ʻAmeliká, mo e taimi naʻá Ne toe fakafoki mai ia ʻi he Palōfita ko Siosefa Sāmitá. Naʻá Ne fili he taimi takitaha ha Kau ʻAposetolo pe kau ākonga ʻe Toko Hongofulu Mā Ua ke tokoni kiate Ia ʻi hono langa hake ʻo e puleʻanga ʻo e ʻOtuá ʻi he māmaní, ʻaki ʻenau akoʻi e ongoongoleleí (vakai, Maʻake 16:14–15; 3 Nīfai 12:1).
Naʻe uiuiʻi foki ʻe Sīsū ha palōfita ke ne tataki e Siasí. Ko e Palesiteni ʻo e Siasí ʻa e palōfitá. Naʻe uiuiʻi ʻe Sīsū ʻa Siosefa Sāmita ke hoko ko e ʻuluaki palōfita ʻi he ngaahi ʻaho kimui ní. Ko Tōmasi S. Monisoni ʻa e Palesiteni hono 16 ʻo e Siasí. Ko e palōfitá tokotaha pē ʻe lava ke ne maʻu fakahā maʻá e Siasí fakakātoa.
Kau ʻAposetolo ʻe Toko Hongofulu Mā Ua ʻi he kuonga ʻo e Fuakava Foʻoú
Kau ākonga ʻe Toko Hongofulu Mā Ua ʻi he kuonga ʻo e Tohi ʻa Molomoná
Kau Palōfita ʻi he Ngaahi ʻAho Kimui Ní
Siosefa Sāmita, ko e fuofua Palesiteni ʻo e Siasí
Tōmasi S. Monisoni, ko e Palesiteni hono 16 ʻo e Siasí
Ko e hā e founga ʻoku tokoni ai e kau taki hotau Siasí kia Sīsuú?
ʻOku tokoni e kau taki kotoa ʻo e Siasí kia Sīsū ʻaki ʻenau tokoniʻi e toenga ʻo e kāingalotu ʻo e Siasí.
ʻOku fakahinohinoʻi ʻe he palōfitá ʻa e Kau ʻAposetolo ʻe Toko Hongofulu Mā Uá.
ʻOku fakahinohinoʻi ʻe he Kau ʻAposetoló ʻa e Ngaahi Kōlomu ʻo e Kau Fitungofulú.
ʻOku tokoni ʻa e Ngaahi Kōlomu ʻo e Kau Fitungofulú ki he Kau ʻAposetoló ʻi hono akoʻi e kau palesiteni fakasiteikí mo e fakavahefonuá.
ʻOku tokoniʻi ʻe he kau palesiteni fakasiteiki mo e fakavahefonuá ʻa e kau pīsopé mo e kau palesiteni fakakoló.
ʻI he ngaahi uōtí mo e koló, ʻoku tataki ai ʻe he kau pīsopé mo e kau palesiteni fakakoló ʻa e kau palesiteni Fineʻofá, kau palesiteni ʻo e Kau Talavoú mo e Kau Finemuí, kau palesiteni ʻo e Palaimelí, kau palesiteni ʻo e Lautohi Faka-Sāpaté, kau faiako fakaʻapí mo e kau faiako ʻaʻahí, pea mo e kau taki kehe pē.
ʻOku tokoniʻi kitautolu kotoa ʻe he kau taki mo e kau faiako ʻi he ngaahi uōtí mo e koló.
Ko e hā ha founga ʻe lava ke ke tokoni ai kia Sīsuú?
ʻOkú ke tokoni kia Sīsū ʻi he taimi ʻokú ke tauhi ai ʻEne ngaahi fekaú. ʻOkú ke tokoni kiate Ia ʻaki hoʻo muimui ʻi he palōfitá. ʻOkú ke tokoni kiate Ia ʻi he taimi ʻokú ke ako ai kiate Ia ʻi hoʻo ʻalu ki he lotú mo lau e folofolá. ʻOkú ke tokoni kiate Ia ʻi he taimi ʻokú ke fili ai ʻa e totonú. ʻI hoʻo fai e ngaahi meʻá ni, ko hoʻo teuteu ia ke ke hoko he kahaʻú ko ha taki ʻi Hono Siasí, ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Vakai ki Hoku Ongo Nimá mo e Vaʻé, tā ʻe Harry Anderson; Toko Toluʻi Nīfaí, tā ʻe Gary L. Kapp; faitā ʻa Welden C. Andersen; konga ʻo e tā ʻo Siosefa Sāmita ko e Siʻí, ʻi he angalelei ʻa e Community of Christ Archives, Tauʻatāina, Misuli; tā ʻo Palesiteni Monisoní naʻe fai ʻe David Newman