Pōpoaki ʻa e Faiako ʻAʻahí
Fekumi Fakamātoato ʻi he Folofolá
Akoʻi ʻa e ngaahi potufolofola mo e ngaahi fakamatala ʻe tokoni ke mahino e ngaahi tefitoʻi moʻoni ko ʻení ki he kau fafine ʻokú ke ʻaʻahi ki aí. Fakaafeʻi e niʻihi ʻokú ke akoʻí ke nau vahevahe atu ʻa e ongo ʻoku nau maʻú mo e meʻa kuo nau akó.
Ko e Hā Ka Tau Fekumi Ai ʻi he Folofolá?
Palesiteni Hauati W. Hanitā (1907–95): “ʻOku ou fokotuʻu atu ke hoko ʻa e ngaahi fakahā ʻa e ʻOtuá ko e tuʻunga moʻui ia ke tau moʻui ʻakí pea kuo pau ke tau fuatautau mei ai ʻa ʻetau fili mo ʻetau ngāue kotoa pē. Pea pehē pē ki he taimi ʻoku mafasia ai ho lotó mo faingataʻaʻiá, tafoki ki he folofolá mo e kau palōfitá ka ke lavaʻi ia” (“Fear Not, Little Flock,” ʻi he 1988–89 Devotional and Fireside Speeches [1989], 112).
Palesiteni ʻĒsela Tafu Penisoni (1899–1994): “Ko ha niʻihi pē ʻeni ʻo e ngaahi talaʻofa kuo fai ʻe he ʻEikí kiate kinautolu te nau fekumi pea talangofua ki Heʻene folofolá—ko e lavameʻa ʻi he anga-māʻoniʻoni, mālohi ke fakaʻehiʻehi mei hano kākaaʻi kitautolú mo tekeʻi ʻa e ʻahiʻahí, maʻu ʻa e fakahinohino ʻi heʻetau moʻui fakaʻahó pea mo fakamoʻui hotau laumalié. … ʻOku ʻi ai ha ngaahi tāpuaki pau ʻoku toki maʻu pē ʻi he folofolá, ʻi he fekumi pea talangofua ki he folofola ʻa e ʻOtuá pea pikitai ki aí. …
“… Toe fakatukupaaʻi kimoutolu ke ako ʻa e folofolá. Mou tokanga ke lau fakaʻaho ia koeʻuhí ke mou maʻu ʻa e mālohi ʻo e Laumālié ke tokoniʻi kimoutolu ʻi homou ngaahi uiuiʻí. Lau ia ʻi homou ngaahi fāmilí pea akoʻi hoʻomou fānaú ke nau ʻofa mo mataʻikoloa ʻaki ia” (“The Power of the Word,” Ensign, May 1986, 82).
Palesiteni Sipenisā W. Kimipolo (1895–1985): “ʻI he fakaʻau ke ke maheni ange mo e ngaahi moʻoni ʻo e folofolá, ʻe toe lelei ange hoʻo tauhi ʻo e fekau lahi hono uá, ke ʻofa ki ho kaungāʻapí ʻo hangē pē ko koé. Mou mataotao ʻi he folofolá—ʻo ʻoua ʻe tuku hifo ʻa e niʻihi kehé, ka ke hiki hake ʻa kinautolu! He ko hai ʻe fie maʻu lahi ange ke ne ‘mataʻikoloa ʻaki’ ʻa e ngaahi moʻoni ʻo e ongoongoleleí (ʻa ia te nau maʻu tokoni mei ai ʻi honau taimi faingataʻaʻiá), ka ko e kau fafine mo e ngaahi faʻē ʻoku nau fakahoko ʻa e konga lahi ʻo hono ʻohake mo akoʻi ʻo e fānaú?” (“The Role of Righteous Women,” Ensign, Nov. 1979, 102).
ʻE Founga Fēfē Haʻaku Mataʻikoloa ʻAki e Folofolá?
2 Nīfai 4:15: “He ʻoku fiefia ʻa hoku laumālié ʻi he ngaahi folofolá, pea ʻoku fakalaulauloto ki ai ʻa hoku lotó, pea ʻoku tohi ia ʻe hoku lotó ke ako mei ai pea ʻaonga ki heʻeku fānaú.”
Suli B. Peki, palesiteni lahi ʻo e Fineʻofá: “Ko e founga lelei ʻe taha ke kamata ʻaki hono ako ʻo e folofolá ko hono ‘fakatatau’ ia kiate kitautolu (vakai, 1 Nīfai 19:23). ʻOku kamataʻaki ʻe ha kakai ʻe niʻihi hano fili ha kaveinga ʻi he Fakahinohino ki he Ngaahi Folofolá, ʻoku nau fie ʻilo lahi ange ki ai. Pe ko ʻenau kamata pē ʻi he kamataʻanga ʻo ha tohi ʻi he folofolá ʻo fekumi ai ki ha ngaahi akonaki pau. …
“Ko e hā pē founga ʻe kamata ʻaki ʻe ha taha hono ako ʻo e folofolá, ko e kī ki hono maʻu ʻo e ʻilo ʻoku mahuʻingá, ko e hokohoko atu pē ʻo e akó. He ʻikai pē te u teitei fiu ʻi he fekumi ki he ngaahi koloa mahuʻinga ʻo e moʻoní ʻi he folofolá he ʻoku nau akoʻi ia ʻi he ‘lea mahinongofua, ʻio ʻi he lea mahinongofua tahá’ (2 Nīfai 32:7). ʻOku fakamoʻoni ʻa e folofolá kia Kalaisi (vakai, Sione 5:39). ʻOku nau talamai ʻa e ngaahi meʻa ʻoku totonu ke tau faí (vakai, 2 Nīfai 32:3). ʻOku nau ‘fakapotoʻi [kitautolu] ki he fakamoʻuí’ (2 Tīmote 3:15).
“Tuʻunga ʻi heʻeku lau e folofolá pea mo e ngaah lotu ʻoku ou fai ʻi heʻeku ako folofolá, kuó u maʻu ai ha ʻilo ʻokú ne ʻomi kiate au ʻa e nongá mo e tokoni ke tukutaha hoku iví ʻi he ngaahi meʻa ʻoku taʻengata hono mahuʻingá. Tupu mei heʻeku kamata lau fakaʻaho ʻa e folofolá, kuó u ako ai ʻo kau ki heʻeku Tamai Hēvaní, Hono ʻAlo ko Sīsū Kalaisí pea mo e meʻa ʻoku fie maʻu ke u fai ke u hangē ai ko Kinauá” (“ʻOku Fiefia ʻa Hoku Lotó ʻi he Ngaahi Folofolá,” Liahona mo e Ensign, Mē 2004, 108–9).
Palesiteni Tōmasi S. Monisoni: “ʻOku fakamatamataleleiʻi ʻe he ngaahi tohi folofola māʻoniʻoní ʻetau ngaahi tukuʻanga tohí. Fakapapauʻi ʻoku nau fafangaʻi hotau ʻatamaí mo tataki ʻetau moʻuí” (“The Mighty Strength of the Relief Society,” Ensign, Nov. 1997, 95).
Taá naʻe fai ʻe Craig Dimond; ʻata mei muí ʻe Shannon Gygi Christensen