ʻOku Totonu Nai ke Tuku ʻa e Akó Ka u Ngāue Fakafaifekau?
Ne u ʻosi mei he akoʻanga māʻolungá ʻi he 1992 peá u fakafonu he taimi pē ko iá ʻeku ʻū pepa ngāue fakafaifekau taimi kakató. ʻI he taimi ne aʻu mai ai hoku uiuiʻí, ko hono toki tali ia au ki ha taha ʻo e ngaahi ʻunivēsiti lelei taha ʻi Naisīliá ke u ako fakafaitoʻo ai.
ʻOku fai ha feʻauʻauhi ia ke hū ki he akoʻanga fakafaitoʻó ʻi Naisīlia pea ʻoku ʻikai tukuange noa ia ke mole. ʻI hono fakalotoʻi au ʻe hoku ngaahi kaungāmeʻá mo e kau mēmipa ʻo hoku fāmilí ke ʻoua te u tokanga ki hoku uiuiʻi ngāue fakafaifekaú, ne u talaange ʻoku ʻi ai hoku fatongia ke ngāue pea ne u nofo ʻo hanganaki mai ki ai talu ʻeku kau ki he Siasí he taʻu ʻe ono kimuʻá. Ne u ʻiloʻi fakapapau ʻe toe tali pē au ki he akoʻanga fakafaitoʻó hili ʻeku ngāue fakafaifekaú, ka naʻe pehē ʻe ha tokolahi te u fakameʻapangoʻia he fili naʻá ku faí.
ʻOku ou fakamālō ki he kau faiako fakaʻapí, kau mēmipa ʻo e fāmilí, mo e ngaahi kaumeʻa ʻi he Siasí naʻa nau poupouʻi ʻeku fili ke ngāue fakafaifekaú. ʻI heʻeku ʻalu ki he seminelí, ako folofolá, mo moʻui ʻaki e ongoongoleleí, ne lava ai ke u tuʻumaʻu ʻi he ngaahi meʻa ne u tui ki aí.
Ne u fokotuʻu ha ngaahi taumuʻa fakatāutaha mo ngāue mālohi ʻi heʻeku hoko ko e faifekaú. Hili ha māhina ʻe uofulu mā fā mei ai naʻe tukuange fakalāngilangi au. ʻOku tāpuakiʻi ʻe he ʻEikí ʻa e kau ʻosi ngāue fakafaifekaú ka naʻe ʻikai te ne talaʻofa mai te nau hao mei he ʻahiʻahí. Ki he niʻihi ʻosi ngāue fakafaifekau ʻi Naisīliá, ʻoku kau ʻi he ngaahi ʻahiʻahi ko iá ʻa e taʻemaʻu ngāué mo e ʻikai ha paʻanga ke fai ʻaki ha akó.
Lolotonga e taʻu ʻe tolu hili ʻeku ngāue fakafaifekaú, ne u fai ha sivi hū ʻe tolu peá u lava, ka naʻe ʻikai toe tali au ke u hū ki he akoʻanga fakafaitoʻó. Naʻe ʻikai maʻu haʻaku ngāue lolotonga e taʻu ʻe tolu ko iá. Naʻe ʻahiʻahiʻi au ke u tui naʻe moʻoni pē ʻa e niʻihi ʻo hoku ngaahi kaungāmeʻá mo e kau mēmipa hoku fāmilí, ko ha fehālaaki ia ne u faí hono tuku ke mole ʻa e faingamālie ke u hū ai ki he akoʻanga fakafaitoʻó.
Ne u ako ʻi heʻeku ngāue fakafaifekaú ke tekaki atu ʻeku kavengá ki he ʻEikí, ko ia ne u tuku ke Ne tataki ʻeku moʻuí ʻo fakatatau mo Hono finangaló. ʻI heʻeku fai pē iá, naʻe kamata ke iku lelei ʻeku meʻa kotoa pē—kae ʻikai ʻi he founga ne u palani ki aí.
ʻI he Sāpate ʻaukai ʻe taha ne u fakakaukau ai ke u ʻaukai mo kolea fakamātoato e tokoni ʻa e ʻEikí. ʻI he efiafi ko iá ne fai mai ha tukituki ʻi he matapaá. ʻI heʻeku fakaava hake e matapaá, ne u ʻohovale ke sio ki haku maheni ne ma feʻiloaki lolotonga ha ako fekauʻaki mo e maluʻí ʻi he māhina ʻe ono kimuʻa aí. Naʻá ne talamai ʻoku ʻatā ha faingamālie ki ha taha ke ne tokangaʻi e tafaʻaki fakamaluʻí ʻi ha kautaha naʻe ngāue ai hono taʻoketé pea ʻoku fie maʻu fakavavevave ʻe he kautahá ha taha ki he ngāue ko ʻení. Ko au tokotaha pē naʻá ne fakakaukau ki aí.
ʻI he ʻaho hono hokó ne fakangāueʻi au ʻe he kautahá. Naʻe fakamoʻoniʻi kiate au ʻe he meʻa makehe ko ʻení kuo ʻikai liʻaki au ʻe he Tamai Hēvaní pea naʻe fie maʻu ke u falala kiate Ia. Ne hoko e ngāue ko iá ko ha matapā ia ki ha ngaahi ngāue kehe.
ʻOku ʻikai ke tau fakafuofuaʻi e ngaahi tāpuaki fakalangí mei he ngaahi lavameʻa fakaemāmaní pē. Ne taʻu lahi ʻeku fāinga ke ʻi ai haku tuʻunga malu fakaemāmani hili ʻeku ngāue fakafaifekaú, ka naʻe tāpuakiʻi fakalaumālie au ʻe he ʻEikí. Naʻe fakahinohinoʻi au ʻe hoku tāpuaki fakapēteliaké ke u mali pea talamai ai te u maʻu ha faingamālie ki ha tuʻunga fakaako māʻolunga ange. Naʻe hoko ia.
Neongo naʻe ʻikai pē te u hū ki he akoʻanga fakafaitoʻó, ka naʻá ku maʻu ha mataʻitohi tuʻunga tatau pē ʻi he tauhi tohí mo e fiká. Naʻe iku pē ʻo tāpuaki au ʻe he ʻEikí ʻaki ha koloa feʻunga ke u lava ʻo mali.
Kapau te tau fakahoko ha ngāue fakafaifekau lāngilangiʻia, ʻoku haʻisia ʻa e ʻEikí ke tāpuakiʻi kitautolu ʻi heʻetau fekumi ki ha ngaahi faingamālie fakaako māʻolunga ange kimui ai. He ʻikai ha meʻa ʻi he moʻui ʻa ha talavou pe finemui te ne lava ʻo lakasi ʻa e ngaahi meʻa ʻoku aʻusia, ako, tāpuakiʻi ʻaki kita ʻi he ngāue fakafaifekau taimi kakató.