O Mai e Faalogo i le Siufofoga o se Perofeta
Amuia E Faatupuina le Filemu
Mai se saunoaga na tuuina atu i le Iunivesite o Polika Iaga i le aso 6 o Fepuari, 1994.
A e matamata i lau nusipepa ma lau televise, e le tele ni mea e te vaaia ai e uiga i le filemu. O aso uma lava e tumu ai tala fou i vevesi i le salafa o le lalolagi.
Ua fetalai mai le Faaola, “Amuia i latou uma e faatupuina le filemu, aua e ta’ua i latou o fanau a le Atua” (3 Nifae 12:9).
I le taimi na ou faitauina ai lena mau a o ou laitiiti, sa ou mafaufau lava i le folafolaga. Sa lei pei o se mea e sili ona matagofie. Ae ua ou iloaina nei o le folafolaga e matagofie ma mautinoa. O i latou o le a mauaina le ola e faavavau o le fanau a le Atua.
Ou te molimau atu e silafia oe e le Atua. E popole o Ia mo i latou o loo siomia oe, ma e alofa ia te oe. O oe o Lona soo, ma o lena mea ua avea ai oe ma se malamalama i tagata. A e galue ma le faatuatua e ofo atu le talalelei ma le filemu ia i latou o loo vagaia oe, o le a latou lagonaina le malamalama o le Faaola. O le a e faasinoina le ala.
Ou te molimau atu ia te outou o loo soifua le Atua; o Iesu o le Keriso. Ou te lagonaina Lona alofa mo oe. Ua ou iloa na fetalai le Faaola i le upu moni ina ua Ia fetalai mai, “Amuia e faatupuina le filemu.”
O Se Afiafi Faaleaiga e le Filemu
E i ai i aiga uma ni taimi latou te manaomia ai se faatupu filemu. O Peresitene ma Tuafafine Eyring e toafa o la atalii ma ni afafine e toalua. I se tasi taimi a o laiti le la fanau, sa aoao atu ai e Peresitene Eyring i se lesona o le afiafi faaleaiga e uiga i le filemu. A o faia lana aoaoga, sa ia matauina ai ona atalii laiti o kiki e le tasi le isi! Ae a o faasolo ina matutua na alii e toalua, sa la aoaoina le ala e avea ai ma ni faatupu filemu ma avea ai o ni uo ma ni fesoasoani sili a le tasi i le isi.
O a nisi taimi e manaomia ai e lou aiga se faatupu filemu? O le a se mea e mafai ona e faia e fesoasoani ai?
Manaomia se Faatupu Filemu!
O se tulaga lenei na manaomia ai se faatupu filemu. Faatulaga ata i le faasologa mai le muamua e oo i le mulimuli e iloa ai le ala na aafia ai se aiga o se tasi o tamaitiiti na manao ina ia avea ma se faatupu filemu.
A
E
I
O
Mafuaaga Na Tatou Maua ai Faaamuia
“Amuia e faatupuina le filemu” o se tasi lea o aoaoga a Iesu e ta’ua “o Faaamuia” (tagai Mataio 5:1–11). O Faaamuia o auala ia e ola ai i se olaga fiafia. O loo tau mai i faaamuia taitasi se faamanuiaga faapitoa tatou te maua pe a tatou mulimuli i se aoaoga faapitoa. O le mafuaaga lenei na tatou maua ai Faaamuia:
1. I se tasi aso na mulimuli atu ai se motu o tagata ia Iesu. Sa latou faalogo e mafai ona Ia faamaloloina tagata ma faia isi vavega. Sa latou fia faalogo i Lona aoao atu.
2. Sa latalata Iesu i se maupuepue, po o se mauga. Na afio atu o Ia i se itu mapuepue ma tuuina atu ai sa na fetalaiga, po o se lauga.
3. I Lana lauga, na aoao atu ai Iesu i tagata i le ala e tatau ona latou ola ai ina ia faamanuiaina i latou e le Atua. O le upu faaamuia o lona uiga “ia fiafia” po o le “ia faamanuiaina.”
4. O le fetalaiga na tuuina atu e Iesu i lena aso na ta’ua o le Lauga i luga o le Mauga. Ina ua mavae Lona toetu, na tuuina atu foi e Iesu se lauga faapena i tagata i Amerika a o Ia asia i latou (tagai 3 Nifae 12:3–11).
Alii o le Filemu, saunia e Simon Dewey; ata pue o lupe © Corbis; Lauga i luga o le Mauga, saunia e Harry Anderson; ata na tusia e Beth Whittaker