Tulaga Faatonuina: E Talafeagai mo Tagata Uma
Ua iloa e tagata matutua o se tasi o siteki i Egelani mo i latou lava ia faamanuiaga e oo mai mai le gauai atu ma le toto’a i le Mo Le Malosi o le Autalavou.
E fiafia lava Sarah Edwards, Emily Bowles, ma Eleanor McKee i faiga faatauga, ma a latou o atu i faleoloa i Northampton, Egelani, o nei tamaitai talavou o le Au Paia o Aso e Gata Ai, latou te aveina ni tupe ma se tamaitusi faapitoa. O lena lava foi tamaitusi e taialaina ai o latou matua pe a latou faatauina mai ni lavalava pe sue foi se ata tifaga e matamata ai.
I le Siteki a Northampton Egelani, ua fai ai e le au matutua faapea foi le tupulaga ia le Mo Le Malosi o le Autalavou ma se vaega o o latou olaga. Ua fesoasoani ai i matua e iloilo ia ata tifaga ma polokalama o le televise latou te matamata ai ma gaoioiga latou te auai i ai. Ua fesoasoani ai foi i isi e tausi atili ma fiafia ai i le Sapati faatasi ma o latou aiga. O le mea moni, na amata ona ta’u e tagata matutua o le siteki o le “Mo Le Malosi o Oe” aua e faatatau tonu foi ia i latou.
Na saunoa Peresitene Clive Joliffe, o le na faamaloloina mai le avea ai ma peresitene o le siteki i le tausaga ua tea, “Sa matou talanoaina ma tatalo e uiga i le fesoasoani i aiga ia alualu i luma i totonu o le talalelei ma fesoasoani foi e saunia a matou fanau mo ni misiona ma faaipoipoga i le malumalu, ma na musuia i matou e faaaoga le tamaitusi Mo Le Malosi o le Autalavou. Sa matou mananao ia malamalama le aiga atoa i tulaga faatonuina o le a faapea ona aumaia le fiafia ma le olioli i tagata uma o le aiga.”
Ua matauina ma talisapaia—e le autalavou a le siteki—le eseesega ua faia e lenei faamamafaga i o latou lava aiga. “E taua tele le lagolagoina o tulaga faatonuina, ma i le avea ai ma ni talavou matou te faalagolago atu i tagata matutua, o lea o le Mo Le Malosi o le Autalavou e faamanatu atu ai ia i latou ia tulaga faatonuina e tatau ona tatou ola uma ai,” o le tala lea a Eleanor McKee, 19. “E aoga mo i tatou uma le faamanatu mai i mea ua faamoemoeina mai ia i tatou, ma ia mautinoa e le eseese ni tulaga faatonuina mo tagata eseese.”
Na faaopoopo mai Daniel Kitsell e sefulufitu tausaga o le Uarota a Huntingdon, “Ou te fiafia i le Mo Le Malosi o le Autalavou aua e le mo na o le autalavou, ae ua ou iloa o loo faalogo foi i ai ou matua, ma ua fesoasoani ia i laua e tausia ai tulaga faatonuina.”
O se tasi o aiga ua lagonaina le aoga o le mulimuli ai i lenei fautuaga o le aiga lea o Epikopo Richard Auger o le Uarota a Banbury; ma lona faletua o Gill; ma o la afafine e toalua o Hana ma Salote, lea e lei leva ona uma a la faaipoipoga na faia i le Malumalu o Lonetona Egelani. O Epikopo Auger, o se alii ofisa suesue i le Ofisa o Leoleo i Thames Valley, ua matua silafia lelei le maualalo o tulaga faatonuina o le lalolagi ma o latou aafiaga i le autalavou ma a latou amioga. “Ma te faaaogaina ma Gill le Mo Le Malosi o le Autalavou e aoao ai i le tulaga faamatua ina ia mafai ona ma ogatusa i taimi uma ma faavae i tusitusiga paia,” o lana saunoaga lea.
“Mai lava i olaga talavou o teineiti, sa matou faaaogaina ai lava o se taiala sauniuni ma le tele o isi auala eseese. A mananao teineiti e o e fai se faatauga mo o laua lavalava, o se mea sa ma popole ai lava, o lea sa ma tuu ai i laua e o ma ave le tamaitusi Mo Le Malosi o le Autalavou ina ia mafai ona la tilotilo i ai pe a faia ni filifiliga.”
Fai mai Hana, e 21 ona tausaga, “Sa ma tuuina le tamaitusi i totonu o a ma atotupe ona o loo ta’u manino mai ai lava lavalava e talafeagai ma lavalava e le talafeagai.” Na iloa foi e le auso lenei e mafai ona la faia nisi o lavalava ia sili atu ona tauagafau i le toe suiina teisi pe faaopoopo foi i ai ni teuteu. Na faaopoopo mai Salote, e 19 tausaga, “Ma te lei manatu lava ma Hana na faia e o maua matua ni filifiliga mo i maua. Na ma iloaina sa mulimuli o ma matua i le perofeta ma le Faaola, ma o le mulimuli ai i o maua matua, o le a ma ola ai foi i taimi uma i aoaoga a le Faaola.”
Fai mai nisi o tagata matutua, e faaopoopo atu i le tuuina mai ai o tulaga faatonuina o le tauagafau ma filifiliga poto i ala o faasalalauga, ae ua aoga foi le tamaitusi ia i latou e ala lea i le fesoasoani ia latou faalogo atu ma le toto’a i fautuaga faaperofeta i le tausia o le Sapati. E vaai atu Sue Preece, o le peresitene o le Aualofa i le Uarota a Kettering, o le Mo Le Malosi o le Autalavou o se “meafaigaluega lea mo i tatou e faaaoga a o tatou taumafai atu mo le atoatoa. E le faapea e gata lo tatou manaomiaina o na taiala pe a atoa lo tatou tai 18 tausaga. Latou te musuia au e fai se iloiloga o au amioga, ma ua i ai nisi o suiga na faia i lo’u olaga lea e atili latalata atu ai a’u i lo’u Tama oi le Lagi. Mo se faataitaiga, ua avea le Sapati ma se toomaga moni mo au, e ala i le faia o se suiga laitiiti i le ala na ou tausia ai lenei aso.”
Na faamatala mai e Sister A. J. Hough, o se tasi foi o le Uarota a Kettering, le ala na fesoasoani ai le faamamafaga o le Mo Le Malosi o le Autalavou ia te ia e avea ai ma se matua lelei atu: “O le i ai o se fanau talavou e toatolu, na ou manao ai ia mautinoa, ou te ola atoatoa foi au i tulaga faatonuina. Sa ou manao lava e sue ni auala e mafai ona ou ‘siitia ai le alafua’ ma avea ma se faataitaiga lelei. Sa ou filifilia loa le vaega o le ‘Tausia o le Aso Sapati’ ma ou faatutuina ai ni sini fou e faaleleia atili ai le avea o au lava ma faataitaiga. Ou te faamoemoe e mafai ona avea au ma se faatosinaga lelei ia i latou e sili ona ou alofa i ai—o lo’u aiga. Ua matou faaaogaina le tamaitusi i afiafi faaleaiga. Ma e tusa lava pe o matou fatufatuina ni mea fou mo a matou gaoioiga faaleaiga pe fuafua mamao foi ina ia tausia atoatoa ai le Sapati, matou te faaaogaina lava nei tulaga faatonuina e taiala ai i matou.”
O ituaiga faataitaiga na e le o mou atu mai le autalavou a le siteki. E pei foi o le toatele o alii talavou, e fiafia lava le ositaulaga e 16-tausaga o Josh Reynolds mai le Uarota a Kettering i le soka ma sa maua foi lona muai faamanuiaina a o laitiiti. Ae peitai na aliae se feteenaiga ina ua manao e taaalo faatasi ma nisi o ana uo i se au a le lotoifale lea sa faia ana taaloga i Aso Sa. “Sa faamalamalama mai e lou tina ma lou tama le mafuaaga ma le auala e tatau ai ona matou tausia le Aso Sapati ia paia, o ni tagata o le Ekalesia. Sa ou taliaina lenei faamalamalamaga ma i se taimi mulimuli ane ou te lei toe lagonaina lou le fiafia. Ou te matua faafetai lava i ou matua mo le faia o se faataitaiga lelei mo au ma le aoaoina o au ia tausia le aso Sapati ia paia.”
Fai mai Heather Slattery, o se matua o se fanau e toalima, o le Uarota a Kettering, “O nisi taimi i le avea ai o ni matua ma ni tagata matutua, tatou te manatu ai o nei tulaga faatonuina o ni tulaga faatauaina a le autalavou ma galo ai e tutusa lava lo tatou aafia gofie i faaosoosoga e pei foi o le tupulaga talavou. O le Mo Le Malosi o le Autalavou o se faamanatu faifaipea e tatau ona tatou pipii mau i le ai uamea faatasi ai ma o tatou tagata talavou ma galulue faatasi, faamalolosia ma lagolago e le tasi le isi o ni fanau a lo tatou Tama Faalelagi.”
E le fesiligia lava o loo lagona e tagata o le siteki a Northampton le malosi atu i le avea ai o ni tagata taitoatasi ma ni aiga e ala i le mulimuli i taiala o loo i le Mo Le Malosi o le Autalavou. Na aoteleina e Peresitene Joliffe ona lagona: “O le tamaitusi ua musuiaina ma ua tuuina mai ina ia mafai e i tatou taitoatasi ona iloa manino le mea o loo faamoemoeina mai e le Tama Faalelagi mai i Ana fanau. Sa ou taumafai lava e ola i tulaga faatonuina ina ia mafai ona faamalosiauina la’u fanau e mulimuli i au faataitaiga. E malosi lau molimau ua faamanuiaina i tatou i le mauaina o fautuaga manino i le auala e tatau ona tatou ola ai ina ia mafai ona tatou agavaa mo mea uma o loo i le Tama mo i tatou.”
Ina ua feagai Iose Reynolds ma se filifiliga e uiga i le auai i taaloga e fai i Aso Sa, na fesoasoani faataitaiga lelei ma aoaoga a ona matua ia te ia i le faia o le filifiliga sao.
Ua iloa e Sara Edwards, Elenoa McKee, ma Emele Bowles o le Mo Le Malosi o le Autalavou o se taiala aoga tele pe a latou faia ni faatauga o lavalava.
O le auaiga o Auger—o Salote, Gill, Lisati, ma Hana—ua leva ona latou iloaina, e taua tele i matua ma tamaiti ona tutusa o latou manatu i mataupu e uiga i tulaga faatauaina.
Ata na pueina e Simon Jones