Paionia i Ghana

Ina ua faalogo GayLynn Ribeira, o se tagata aoga tusiata i le Iunivesite o Polika Iaga, i tala ofoofogia e uiga i le Au Paia paionia i Ghana, na ia iloaina na manao e fatufatuai o latou ata mo lana galuega faatino o le faailoga o le tagata malaga i faatufugaga maoae. I le tautoulu o le 2005, na amata ai ona ia sailia se auala e fai ai lenei mea. O le taunuuga o se foai na mafai ai e i latou ma nisi tamaiti aoga se toatolu o—Jesse Bushnell, Emmalee Glauser Powell, ma Angela Nelson—ona i ai i Ghana ia Me ma Iuni o le 2006. O le tasi o le aiga faiaoga o le IPI o Richard Hull na taitaia le galuega faatino. Na ao mai e le toalima lenei ia tala ma ata e le gata o le Au Paia paionia ae faapea foi i tagata fou o le ekalesia. O le anoano o faamatalaga na aoina na liliuina i ni ata vali i masina na sosoo ai o le malaga ma na faatautauina i puipui o le B. F. Larsen Gallery i le IPI ia Oketopa 2007. O loo i lalo ia nisi o na faiva alofilima.

1. Tu Toatasi—Mo Se Mea, Adjoa, saunia e Angela Nelson

“E manaia le avea ma se tagata o le ekalesia pe a e i ai i le aiga pe i ai foi faatasi ma tagata,” o le tala lea a Adjoa Amoa-Ampah, o le o loo a’oga ia avea ma se fomai. “Ae o se tamaitai moni o le Au Paia o Aso e Gata Ai, e mafai lava ona ia ta’uina o ia o se tagata o le ekalesia pe afai e na o ia. O nisi taimi e faauigaseseina ai le Ekalesia, o lea e taua ai lou avea ma se faataitaiga o le upumoni.”

2. Joseph William Billy Johnson: E Paia i le Alii, saunia e Emmalee Glauser Powell

“Na ala mai ia te ia le loto faafetai ma le alofa,” na tusia ai e le tusiata e uiga ia Tuagane Johnson o Cape Coast. “Na ia aoaoina atu le talalelei mo le 14 tausaga, ma na silia ma le afe tagata na saunia e papatiso ina ua taunuu atu faifeautalai i le 1978. O ia o se tamalii na faapaiaina lona soifua ma lona agaga i le Atua. Na ia musuia au e taumafai atili ina ia avea uiga faaKeriso o le alofa ma le alofa mama o se vaega o lo’u tagata.”

3. Bitner Johnson: Atalii o le atalii o le Peteriaka, saunia e Jesse Bushnell

Na faaigoaina ia Peresitene Gordon Bitner Hinckley, o Bitner Johnson o le atalii o Brigham Johnson ma o le atalii o le atalii o Joseph William Billy Johnson.

4. Taeao Busua, saunia e GayLynn Ribeira

5. E Taitaiina A Outou Fanau i le Malamalama ma le Upu Moni, saunia e GayLynn Ribeira

O Epikopo Kofi Sosu ma lona faletua o Linda, o Kumasi e faamalolosia lo laua aiga e ala i le faia e le aunoa o tatalo faaleaiga, suesueina o tusitusiga paia, ma afiafi faaleaiga.

6. Dr. Emmanuel Kissi—“Na Ia Faatuina i Luga le Fafine,” saunia e Jesse Bushnell

I le 1983 na oo atu ai se fafine na matua pagatia i le mativa ma se tamaitiiti na matua matautia le paee i le fomai o le Au Paia o Aso e Gata Ai, o Emmanuel Kissi mo se fesoasoani. Na i ai ia Dr. Kissi ni taumafa na auina mai ia te ia mai le Ekalesia e togafiti ai i latou e paeee. Na ia tuuina atu i le fafine, e aunoa ma se totogi ia araisa, sana, pi, ma gao faimeaai. Na faapau le fafine i luma o le fomai i le loto faafetai. Na faatu i luga e Dr. Kissi le fafine ma fai atu i ai, “O meaai nei na auina mai e le Atua mo oe. E tatau ona e tuuina atu atoa lau faafetai ia te Ia.”

7. Uso i Siona, Emma Boateng, saunia e Angela Nelson

“Na pei lava ua matou mauaina se uso ua leva ona leiloa,” na tusia ai e le tusiata o Angela Nelson e uiga i le faifeautalai ua maea lana misiona o Emma Boateng. “Sa fai o ia ma a matou taiala i Kumasi ma na i ai lava ia te ia lena susulu o se faifeautalai. Sa suesu e Ema le faiga o tala tusitusia, auai i le inisitituti, na i ai ona atugaluga ma faamoemoega e tafao faamasani, ma sa taumafai e faatumau ona avea le talalelei ma totonugalemu o lona olaga. E tutusa lava foi aafiaga na oo ia te ia e pei ona sa ia i matou a o matou talavou matutua nofofua.”

8. Epikopo Kofi Sosu ma Lona Tuaa: Loto Faamagalo o le Tama ma le Atalii, saunia e Emmalee Glauser Powell

Ina ua maea lana misiona, sa manao Kofi e toe foi atu i lona aiga, ae na faato o ia e lona tama. Sa ia lagonaina e tatau ona alu pea i lona aiga. Ina ua ia taunuu atu, na vaai mai lona tama ia te ia ma fai mai, “Faatali.” O lea na tu ai o ia.

“O ai oe?” na fesili ai lona tama.

“O au o lou atalii.”

“Lo’u atalii?”

“Ioe, o lou atalii o Kofi.” O lea faamatalaga na ia vaaia ai le maligi o loimata o lona tama. Na tu ae i luga lona tama ma fusi o ia.

“Oi, lou atalii e, lou atalii e. Ua ou salamo. Ua ou iloa na e faia le mea sao. Ua ou taliaina oe o lo’u atalii.”

9. Viliamu ma Salote Acquah: Loto e Tasi ma le Mafaufau e Tasi, saunia e Emmalee Glauser

O Viliamu ma Salote (o tagata o le ekalesia i le 30 tausaga) na ola ae faatasi i totonu o le talalelei i le tele o tausaga o faigata ma le olioli. O nei mea uma, ua tasi ai i laua ma le Atua faapea le tasi i le isi. La te uulima e faaali ai lo la alolofa o le tasi i le isi—o mea na aoao mai e Viliamu mai ulugalii faamisiona o e na aoaoina o ia e tatalo ma ia iloa o ia o se atalii o le Atua.

10. Matafaga o Papatisoga, saunia e Jesse Bushnell

O le matafaga toafilemu lenei na avea ma nofoaga na papatisoina ai le faitau selau o tagata Ghana.

11. Theodora Acquah: Afafine o le Tupulaga Lona-Tolu, saunia e Jesse Bushnell

O Theodora o se tupulaga lona tolu o le Au Paia o Aso e Gata Ai i Cape Coast, e faafetai ai i le faatuatua o lona tinamatua o le na auai i le Ekalesia ma aoaoina lana fanau ma fanau a lana fanau i le talalelei. I le avea ai ma se tagata fou o le Au Paia o Aso e Gata Ai, na avea ai ma tiute o le tinamatua o Theodora le saluina o le falelotu, lauina mai o pakete vai e olo ai le fola, ia mautinoa e mama mea uma a o lei amataina le lotu.

12. Le Faavae Malosi, Auaiga o Kaku, saunia e Angela Nelson

“Ina ua valaaulia i matou e Tuagane ma Uso Kaku i lo latou fale i Cape Coast, na ou lagonaina na pei lava na ou savali atu i totonu o lo’u lava fale i Iuta,” na tusia ai e le tusiata o Angela Nelson. “O le vaega na sili ona ou fiafia i ai o le taimi lea ua maea le vavao i le taumafataga o le afiafi, na faapotopoto ai tamaiti uma e vagaia o latou matua ma a latou tusitusiga paia na matalatala. O le a le galo lava ia te au lo’u i ai i lenei aiga ma le vaavaai atu i tamaiti o tilotilo atu i o latou matua mo le taitaiga ma le liliu atu o o latou matua i tusitusiga paia mo ni tali.”

13. Hana, saunia e Richard Hull

E uiga i le ata lenei o Hana Bafuh, o se Au Paia o Aso e Gata Ai i Kumasi, na fai mai ai le tusiata, “Na ou taumafai e pueina ona uiga fiafia ma le naunautai.”

14. Gaseseina o le Taumafataga o le Afiafi, Emma Boateng, saunia e Angela Nelson

“Na pei lava o loo matamata i se siva; na ogatasi lelei lava le tasi ma le isi,” na tusia ai e Angela Nelson, i le faamatalaina o le faiga e le auaiga o Boateng o le meaai masani o le masi, mai le manioka. “E sii faamaualuga e se tasi le pou ma tuu i lalo a e o le isi na te faaputuina faavave ia manioka ia fetaui tonu ma le oo ifo o le tu’i a le isi. E i ai foi se pao gatasi i o latou olaga i aso uma, o se maelega i le tausiga o poloaiga. O le taimi iinei e fua i sootaga, i le fesoasoani atu i uo ma aiga, ae le o mea e maua. Ou te vaaia se tautinoga mautu ina ia ogatusa—ae maise lava i a latou molimau.”