Taimi o Fetufaaiga

O Le A Malosi Lo Matou Aiga

Saunia e Cheryl Esplin

“E le ia te outou foi le manatu e faasaunoa le tasi i le isi, a e nonofo i le filemu” (Mosaea 4:13).

O se maea e fai mai i ni fuafuati se tele e fili mau faatasi. Afai e motu pe oti ese se fuafuati se tasi, o le a vaivai le maea.

E mafai ona faatusatusa lou aiga i se maea. O tagata taitoatasi e mafai ona faatusa i se fuafuati. A outou galulue faatasi mo le lelei, o le a malosi atu le aiga. E tofu tagata uma o le aiga ma se tiutetauave e fesoasoani ai e fefaamalosia’i ai e le tasi le isi.

Mafaufau ia Nifae ma le ala na fesoasoani ai e faamalosia lona aiga. A o latou malaga i le vao, na gau le aufana a Nifae. Sa le mafai ona maua ni a latou meaai, ma sa latou vaivai uma ma fiaaai. Na feita le toatele o le aiga ia Nifae, ma sa latou muimui i le Alii.

Sa le’i muimui pe ita Nifae. Sa ia faia se isi aufana i se laau ma se aū i se fasilaau sa’o. Sa fesili o ia i lona tama o Liae, po o gafea e tatau ona alu e sue mai ai se meaai. Ona mafai ai lea e Nifae ona aumai ni meaai mo lona aiga. Sa latou fiafia, ma faamaualaloina i latou lava ma tuuina atu le faafetai i le Alii. (Tagai 1 Nifae 16:18–32.)

Tou te mafaia ma tagata o lou aiga ona fesoasoani le tasi i le isi ia malolosi e ala i le tatalo faatasi, fesoasoani le tasi i le isi, faaali atu le agalelei ma le alofa, faitau faatasi i tusitusiga paia, fiafia faatasi i gaoioiga, ma le faia o afiafi faaleaiga.

Gaoioiga

Aveese le itulau U5 mai le mekasini, ma faapipii i se pepa malo. I le afiafi faaleaiga, ia talanoa e uiga i mea e mafai ona faamalosia ai lou aiga. Ia tusi manatu nei i luga o le siata. Ua uma ona fautuaina atu ni manatu se lua. Faatautau le siata i se mea e mafai ona iloa atu ai e lou aiga ma ia vaavaai atu i ai e le aunoa.

O Le A Malosi Lo Matou Aiga

1. E mafai ona tatalo faatasi lo matou aiga.

2. E mafai ona mafuta faatasi lo matou aiga.

3.

4.

5.

6.

Manatua: O lenei gaoioiga e mafai ona kopiina pe lolomiina mai le Initoneti i le www.liahona.lds.org.

Manatu mo Taimi o Fetufaaiga

1. O tatalo faaleaiga e faamalosia ai lo’u aiga. A o faitau leotele e le tamaitiiti aupito matua le 3 Nifae 18:21, ia fesili atu i isi tamaiti e faalogo i mea ua poloaiina i tatou e Iesu Keriso e fai (tatalo i o tatou aiga). Aumai ni tali. Fai atu i ni tamaiti se toaono e o mai i le pito i luma o le potu. Faapipii se tasi o fasipepa o upu i tamaiti taitasi i soo se faasologa: faaleaiga, o tatalo, o le a, faamalosia ai, lo’u, aiga. Fai i tamaiti e fesoasoani e faasa’o tulaga o tamaiti ina ia i ai upu i le faasologa sao. Ia fai faatasi le fuaiupu. Faaali atu le Pusa Ata o le Talalelei 606 (Tatalo Faaleaiga), ma faamalamalama atu, ua uunaia i tatou ia fai tatalo faaleaiga i po uma ma taeao uma. Tuu atu i tamaiti e fautua atu ni mea e mafai ona latou faia e fesoasoani ai i tatalo a o latou aiga. Tusi a latou fautuaga i luga o le laupapa. Tuu atu i tamaiti e moeiini o latou mata ma vaai faalemafaufau i o latou aiga o tootutuli faatasi a o e usuina se pese po o se viiga e faatatau i le tatalo. Ia tufa atu ni penitala ma ni fasipepa o loo tusia ai upu nei “O tatalo faaleaiga o le a faamalosia ai lo’u aiga.” Fai i tamaiti e tusi se ata o o latou aiga o loo tootutuli e tatalo. Ia uunaia i latou e ave le ata o le afiafi faaleaiga ma tautau i se nofoaga o le a faamanatu atu ai i o latou aiga e fai ia tatalo faaleaiga.

2. O le faitauina o tusitusiga paia e faamalosia ai lo’u aiga. Ia faaali atu le Tusi Paia, Tusi a Mamona, Mataupu Faavae ma Feagaiga, ma le Penina Tau Tele. Taaalo i se taaloga matemate e ala i le tuuina atu o ni faaataataga e fesoasoani ai ia latou mateina po o le fea o tusi e fa o loo e faatatau atu i ai. Mo se faataitaiga: “O le tusi lenei o loo faamatala mai ai le talafaasolopito a Iosefa Samita ma o loo i ai Mataupu Faavae o le Faatuatua” (Penina Tau Tele). A o faailoa mai ia tusi taitasi o tusitusiga paia, tuu atu i tamaiti e ta’u faatasi le igoa. Aoao atu o tusitusiga paia o le afioga a le Atua. O loo aoao mai ai e uiga ia Iesu Keriso ma Lana talalelei. O tusitusiga paia e mafai ona faamalolosia ai o tatou aiga pe afai tatou te faitauina e le aunoa. Tufa atu se tasi o mau nei o tusitusiga paia i vasega taitasi: Esoto 20:12; Ioane 13:34; Efeso 4:32; 1 Nifae 3:7; 3 Nifae 18:21; Mataupu Faavae ma Feagaiga 59:7. Tuu atu i tamaiti taitoatasi se fasipepa e le o tusia ai se upu ma se penitala. Fai i tamaiti ia faalogologo lelei a o faitauina e o latou faiaoga le mau. Ona sue lea e tamaiti taitoatasi se mea se tasi o loo ta’u mai i le mau o le a fesoasoani e malosi ma fiafia ai lona aiga. Fai i tamaiti e tusi i luga o le fasipepa ona fetufaai atu ai lea i isi tamaiti o le vasega. Valaaulia vasega taitasi e faitau atu a latou fasipepa o upu i le Peraimeri atoa. Faamatala e uiga i se aafiaga na faamalosi ai lou aiga e tusitusiga paia. Ia uunaia tamaiti e faitau le tagata lava ia ma faitau o se aiga i tusitusiga paia.

Ata na tusia e Dilleen Marsh