Savali a le Au Peresitene Sili
Sugar Beets ma le Taua o se Agaga
I ni tausaga se tele ua mavae, na tuuina mai ai e Epikopo Marvin O. Ashton (1883–1946), o le na i ai i le Au Epikopo Pulefaamalumalu, se faataitaiga ou te fia faasoa atu ia te outou. Ia tatou vaavaai faalemafaufau, pe afai e mafai, i se faifaatoaga o loo aveina se loli tele o lona pusa e leai se fale, ae o loo tumu i sugar beets e agai atu i se falegaosi oloa e viliina ai le suka. A o alu atu le loli a le faifaatoaga i se auala pefu lauleaga, na faapea ona toulu ese ai mai le loli nisi o sugar beets ma paepae ai i autafa o le auala. Ina ua ia iloaina ua toulu ese nisi o beets, na ia faatonuina ona fesoasoani, “E tele foi le suka i mea la ua toulu. Tatou toe foi e aumai!”
I lou faaaogaina o lenei faataitaiga, o sugar beets ua faatusaina i tagata o lenei Ekalesia lea o loo i ai se matafaioi a i tatou ua ta’ua o taitai mo i latou; ma o i latou ua pauu ese mai le loli ua faatusaina i alii ma tamaitai, talavou ma tamaiti o e, po o le a lava se mafuaaga, ua latou o ese ai mai le ala o le toaaga [i le Ekalesia]. O le toe faaupuina o le faamatalaga a le faifaatoaga e uiga i sugar beets, ou te faapea atu ai e uiga i nei agaga, e pele i lo tatou Tama ma lo tatou Matai: “E tutusa lava le taua ma i latou ua pauu ese. Tatou toe foi i tua e aumai i latou!”
I le taimi lenei, i aso nei, o nisi o i latou ua maua e le tatafe o manatu taatele. O isi ua felafoai solo e le tai fanae o taimi faigata. Ae o isi o loo tosoina i lalo ma lelemoina i le vivili o agasala.
E le tatau ona tupu se mea faapea. Ua tatou maua aoaoga faavae o le upumoni. Ua ia i tatou polokalama. Ua ia i tatou tagata. Ua ia i tatou le malosi. O la tatou misiona e sili atu nai lo na o fonotaga. O la tatou galuega o le faaolaina o agaga.
O la Tatou Galuega: Faaolaina o Agaga
Na faamamafa mai e le Alii le taua o alii po o tamaitai taitoatasi, talavou po o le tamaitiiti ina ua Ia folafola mai:
“Ia manatua e taua tele le aoga o agaga i le silafaga a le Atua. …
“Afai foi e faapea ona oulua galulue i o oulua aso uma i le alagaina o le salamo i lenei nuu, ma aumaia, tau lava o se agaga e toatasi ia te au, faauta i le tele o lo outou olioli faatasi ma ia i le malo o lo’u Tama!
“Ma o lenei, afai o le a tele lo outou olioli faatasi ma se agaga e toatasi ua oulua aumaia ia te au i le malo o lo’u Tama, faauta i le sili atu o lo outou olioli pe afai lua te aumaia ni agaga e toatele ia te au!” (MFF 18:10, 15–16).
Ia manatua ua ia te oe le aia tatau mo faamanuiaga a lo tatou Tama i lenei galuega. Na te lei valaauina oe i lou valaauga faamamaluina ina ia e savali toatasi, e aunoa ma se taiala, ma faalagolago i le laki. O le eseesega, Na te silafia ou tomai, Na te silafia foi lou tuuto, ma o le a Ia faaliliuina ni ou le atoatoa o i ai i ni malosiaga taua. Ua Ia folafola mai: “Ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou” (MFF 84:88).
Taitai o le Peraimeri, pe o outou iloa ea tamaiti o loo outou tautuaina? Taitai o Tamaitai Talavou, pe o outou iloa ea a outou tamaitai talavou? Taitai o le Perisitua Arona, pe o outou iloa ea ia alii talavou? Taitai o le Aualofa ma le Perisitua Mekisateko, pe o outou iloa ea alii ma tamaitai ua tofia outou tou te pulefaamalumalu ai? Pe o outou malamalama ea i o latou faafitauli ma o latou faigata, o latou faanaunauga, sini, ma faamoemoega? Pe o outou iloa ea le mamao na latou malaga mai ai, faalavelave na latou oo i ai, avega o loo latou tauamoina, ma faanoanoaga o loo latou tauaveina?
Ou te uunaia outou e aapa atu ia i latou o loo outou tautuaina ma ia alolofa ia i latou. A e alofa moni ia i latou o loo e tautuaina, o le a latou le oo lava i lena tulaga taufaamatau o le “Nuu o Leai”—leai i le avea ma se tagata e manatu popole i ai, leai i le avea ma se tagata na mauaina se fesoasoani na manaomia. Atonu e le o lou avanoa le tatalaina o faitotoa i aai po o faitotoa o maota tetele, ae o le a oo mai le fiafia moni ma le olioli tumau ia te oe ma i latou uma taitoatasi e te tautuaina a o e uuina se lima ma aapa atu i se loto.
O Lesona e Manatua i le Loto
Ae ina nei e lotovaivai i au taumafaiga, ia manatua o nisi taimi e le ogatasi ai o tatou manatu ma le taimi fuafuaina a le Alii. A o avea au ma se epikopo i le tele o tausaga ua mavae, na oo mai ai se tasi o taitai o tamaitai talavou o Jessie Cox, ma faapea mai, “Epikopo, o au o se tagata toilalo!” Ina ua ou fesiligia pe aisea ua ia manatu ai faapea, na fai mai o ia, “E lei i ai se tasi o au teineiti o le Mutuale na faaipoipo i le malumalu, e pei ona sa tatau ona faia ai e se faiaoga lelei. Sa ou taumafai lava i le mea sili na ou mafaia, ae foliga mai sa lei lava le lelei o le mea sili na ou mafaia.”
Sa ou taumafai e faafiafia Jessie i le ta’u atu lea ia te ia, o au i le avea ai ma ona epikopo, na ou iloaina sa ia faia mea uma na mafai ona ia faia. Ma a o ou mataituina na tamaitai i le faagasologa o tausaga, na ou iloa ai na iu lava ina faamauina i latou uma taitoatasi i le malumalu. Afai e tusi lolomi le lesona i le loto, e le o maimau.
Ua ou aoaoina a o ou vaai atu i auauna faamaoni e pei o Jessie Cox e faapea, e mafai ona avea taitai taitoatasi ma se leoleo mamoe moni, e auauna atu i lalo o le taitaiga a lo tatou Leoleo Mamoe sili ma Lelei, ua faamanuiaina e taitai ma faapelepele ma tausia i latou o e iloa ma fiafia i Lona siufofoga (tagai Ioane 10:2–4).
Sailia o le Mamoe ua Se
Sei ou faasoaina atu se isi aafiaga na ou maua a o avea au ma se epikopo. Na ou matauina i se tasi taeao o le Aso Sa, e le o i ai foi Lisati i le sauniga perisitua, o se tasi lea o o matou ositaulaga e tau lē sau i le lotu. Na ou tuua le korama e vaai e le fautua ae ou alu i le fale o Lisati. Na fai mai lona tina o loo faigaluega o ia i se faletaavale i le siakiina o taavale. Na ou alu atu i le fale enisinia e sue Lisati ma ou tilotilo solo ae ou te lei maua o ia. Na faafuasei ona ou maua se musumusuga ou te tilotilo i lalo o le lua suauua sa i le isi itu o le fale. Mai le pogisa na mafai ona ou iloa atu ai ni mata susulu se lua. Na ou faalogo atu o fai mai Lisati, “Ua e maua au, Epikopo! O le a ou alu atu i luga.” A o ma talanoa ma Lisati, sa ou ta’u atu i ai lo matou matua misia ma le manaomia o ia. Na mafai ona ou maua mai ia te ia se tautinoga e auai mai i ana sauniga.
Na tele se alualu i luma o lona toaga mai. Na iu ina siitia ese atu i latou ma lona aiga, ae o le lua tausaga mulimuli ane, na ou maua ai se valaaulia e lauga i le uarota a Lisati a o lei alu o ia i lana misiona. I lana tautalaga i lena aso, na fai mai ai Lisati, o le mea atoa na suia ai lona olaga, o le taimi lea na maua atu ai o ia e le epikopo o lafi i totonu o le lua suauua ma fesoasoani ai e toe faatoaga mai o ia.
O’u uso e ma tuafafine pele, o lo tatou tiutetauave, o lo tatou tiute paia, le aapa atu ia i latou uma, ua valaauina i tatou e pa’i atu i o latou olaga. O lo tatou tiute o le taitai atu o i latou i le malo selesitila o le Atua. Talosia ia tatou manatua i taimi uma o le valaauga i se tulaga faaleautaitai e le o se mea e tatou te faamaepaepa ma i tatou, ae o se tiutetauave. Talosia ia tatou aapa atu e laveai i latou o loo manaomia la tatou fesoasoani ma lo tatou alofa.
Pe a tatou manuia, pe a tatou aumaia se tamaitai po o se alii, o se teine po o se tama e toe faatoaga mai, o le a tatou tali atu i se tatalo faamaoni a se ava po o se tuafafine po o se tina, ma fesoasoani foi e faataunuu se manaoga sili o se tane po o se tuagane po se tama. O le a tatou faamamaluina se taitaiga a se Tama alofa ma mulimuli i se faataitaiga a se Atalii usiusitai (tagai Ioane 12:26; MFF 59:5). Ma o le a faavavau ona faamamaluina o tatou igoa e i latou na tatou aapa atu i ai.
Ou te tatalo ma lou loto atoa ina ia taitaiina pea i tatou e lo tatou Tama Faalelagi a o tatou taumafai e auauna atu ma laveai mai Ana fanau.
Ata na tusia e Jeff Ward; ata na pueina e David Newman