Uo i le Uo
Tatalo ma Pese i le Tama Faalelagi
“O le pese a e amiotonu o le tatalo lea ia te au, ma o le a tali i se faamanuiaga i o latou luga” (MFF 25:12).
A o ou laitiiti, sa masani ona leiloloa mea ia te au. Ou te sueina solo, ae le maua lava. A uma ona sue faalua pe faatolu le fale atoa e aunoa ma le mauaina o se mea, ona ou tatalo lea i le Tama Faalelagi e fesoasoani mai ia te au. Ae a amata ona ou toe sueina, ona ou tau ai lea i le mea na leiloa. Na tupu faafia lena mea ia te au a o ou laitiiti. O na taimi na fesoasoani ou te aoao ai e talitonu e faafofoga ma tali mai le Tama Faalelagi i au tatalo.
Ina ua faasolo ina ou matua, sa faamalosia la’u molimau a o tali mai e le Tama Faalelagi au talosaga. E le mafai ona tuulafoaiina oe e le Tama Faalelagi. Fai mai le mau, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou” (Mataio 7:7). Ou te iloa afai e te ole atu ma se loto faamaoni ma le manatu tonu i ai, o le a tuuina mai ia te oe e le Tama Faalelagi tali o loo e sailia.
A o ou laitiiti, ou te fiafia lava i pese o le Peraimeri. Sa ou fiafia e usuina, e ui ina sa ou le malamalama i le tele o taimi i upu uma. A o ou tuputupu ae, na ou manatuaina ia pese, ma na fesoasoani ou te faia ai mea sao. O loo ou fiafia pea e usuina ia pese. Ou te manatua le “E tolu lanu a le Peraimeri—mumu, samasama, ma le lanumoana. E tofu ma uiga mo oe ma au. E tofu ma faailoga moni!”1 Ou te manatuaina foi le “Afai ua e faauu, ana nei tumau ai. Vave ona faau i luga ia lalo, ma ataata mai.”2 O le pese e faatatau i le tagata poto ma le tagata valea, o se tasi lea o pese e sili ona ou fiafia i ai.3
Ua ou iloa o pese o le Peraimeri na avea ma se punavai o le malosiaga mo au. O le taimi nei, ou te fiafia lava e vaai atu i tamaiti o aoaoina pese o le Peraimeri. Ou te iloa o le a fesoasoani atu pese ia te oe e pei ona sa fesoasoani ai ia te au.
O le tatalo ma le usuina o pese o le Peraimeri a o ou laitiiti, na fesoasoani ou te iloa ai le Tama Faalelagi. Ua ou iloa o au o se atalii o le Atua. Na ou iloaina lava. E tusa pe ou te faia ni mea sese, e agaalofa ma agalelei lava o Ia ia te au. Ua ou aoaoina afai e te fai se mea sa’o se tasi faigofie, laitiiti, Na te sasaa mai faamanuiaga i ou luga. E leai lava se masalosalo i lena mea. Na te silafia au. E alofa o Ia ia te au. O au o Lona atalii.
E pei foi o au, o oe o se atalii po o se afafine o lo tatou Tama oi le Lagi. Pe o le a lava se mea e tupu, e tusa pe o ese nisi mai ia te oe, ae o le a le aluese lava lo tatou Tama oi le Lagi. E i ai lava o Ia iina i taimi uma. E alofa ia te oe.
Ata na tusia e Matt Smith
Ata mai le faaaloaloga a Elder Teh