Aoaoina o se Uo

Christian S., 10 tausaga, Arisona, ISA

Sa ou alu i se malaga faaleaoaoga mo ni aso se lua faatasi ma isi tamaiti o le vasega lima ma le ono e suesue ai le olaga i aso anamua i toega o meaola ma laau. Sa matou nonofo faatasi ma nisi o au uo e toatolu i se potu o le faletalimalo. Na maua e se tasi o au uo se Tusi Paia i totonu o le pusatoso o le laulau. Sa ia suesueina nisi o itulau ma fesili mai pe mafai ona ou fesoasoani atu ia te ia e faitau. Sa ou tei ona na te lei iloa ma se tala o le Tusi Paia lea na ou faapea ua iloa uma e tagata. Sa ou aoao atu ia te ia e uiga i le Foafoaga, Atamu ma Eva, ma le Toetu. Sa ou faamatala foi ia te ia e uiga ia Iosefa Samita. Sa ou faamatala atu ia te ia nisi o tala na ou aoaoina i le Peraimeri.

Ina ua uma lea, sa ou lagonaina e tatau ona fai se ma tatalo. Sa ou tuuina atu i lau uo na te faia le tatalo. Sa ou faataitaiina atu ia te ia i le faia taitasi o se fasifuaitau i le taimi ma tuu atu na te toe faia. Na ou maua se lagona fiafia, ma na fai mai foi lau uo na manaia ona faalogona i lona loto.

Ou te lei mafaufauina lava e tupu se mea faapea i se malaga faaleaoaoga. Sa ou fiafia aua ina ua ou maua se avanoa e avea ai ma se faifeautalai, sa ou saunia ma ou te lei fefe foi e faasoa atu ou talitonuga.