Na Faatumulia o Matou Loto i le Alofa Mama
Na foliga mai na tuputupu pea le ola vavamamao o la’u fanau teine, e 8 ma le 10 tausaga. I le avea ai ma o laua tina, na tiga lava lou loto i le vaaia o lo la fe’aina’i ma foliga faasiasia na masani ona faaali atu e le tasi i le isi.
O le taimi lea, na ou tatalo faatauanau ai lava i le Alii e fesoasoani mai i ou lava vaivaiga. Na ou tatalo ina ia fesoasoani mai o Ia ia ou iloa mea na manaomia ona ou iloa e uiga i le alofa mama, ma sa taitaiina atu ai i nisi o fuaitau matagofie o mau.
O se tasi po, na iu lava ina tauaimisa lau fanau. Sa ou ita ma, ina ua uma ona ou avaavau ma otegia i laua, ona ou matele loa lea i fafo e tau faatea lou le fiafia ma ou mafaufau. Ina ua tuanai ni nai minute, na amata ona faamalūlūina e le Agaga lou loto, ma musuia au ou te alu i totonu o le fale ma faatoese atu i lau tamateine matua, o le sa sili ona afaina i lou ita.
A o ou ulu atu i lona potumoe, na ou vaaia lau tamateine e 10-tausaga o tootuli i talaane o lona moega, ma tagi ai. Sa tilotilo mai o ia ia te au ma le maligi o ona loimata ma fai mai, “Ua ou le iloa se mea a fai.” Sa fai mai o ia, na manao e tatalo ma faitau ana tusitusiga paia ina ia ona maua ai ni lagona lelei, ae sa le mafai ona sa faanoanoa lava o ia.
Ina ua ia faamalie mai ona o lana mea sa fai i le matou finauga, ma faapea mai sa le tuuaia au, sa ou lagona lava le maasiasi. Sa ma talatalanoa laitiiti ona ma liliu atu ai lea i tusitusiga paia, lea na ou faitau atu ai ia te ia e uiga i le alofa mama, “o le alofa mama o Keriso” (Moronae 7:47), ma faasoa atu nisi o mea na ou aoaoina. O le taimi tonu lena na autilo mai ai lona uso laitiiti i totonu o le potu, ma sa valaauliaina o ia matou te auai faatasi. Ona ou faamatala atu lea o mea na ma faitauina e uiga i le alofa mama, i ni upu na mafai ona malamalama ai se teineitiiti e valu tausaga.
Ina ua uma ona ou faia, sa taufai tilotilo mai le autamaitai ia te au ma ni mata lapopoa ma faailoa mai se naunautai ina ia faatumulia i lenei alofa tele o loo ta’ua mai i tusitusiga paia. Ona matou tootutuli lea ma, e pei ona fautua mai Mamona, ma ole atu ma le faamaualalo i le Tama ia faatumulia i matou i lenei alofa (tagai Moronae 7:48).
O le ootia i le Agaga, sa le mafai ai ona taofiofi o matou loimata. Sa matou tutu a’e i luga, ma feopoa’i, ma fefaaalia’i lo matou alolofa o le tasi i le isi. O le taimi lena na ou vaaia ai le amata fotu ae o se usoga ma se faauoga e faavavau i le va o lau fanau teine, ma sa faatoafilemuina ai au.
Talu mai lava lena taimi o loo faaauau pea ona tuputupu ae la laua mafutaga. Ua ia i laua se naunautaiga tele e faaleleia o laua eseesega, faaali atu le onosai tele, ma fetufaai i a laua meatotino. Ou te faafetai lava ona o o laua faanaunauga ma taumafaiga amiotonu.
O le a ou teufatuina pea lena aafiaga, ma tatalo ina ia tele pea nisi aafiaga faapena a o faaauau ona matou faamalolosia sootaga o le alofa mama ma le alofa i lo matou aiga.