Manatu mo Afiafi Faaleaiga

O nei fautuaga faaleaoaoga e mafai ona faaaoga i potuaoga faapea foi i le aiga. E mafai ona e fetuunaia nei manatu i lou aiga po o le vasega.

“Tala o Tusitusiga Paia e avea o ni Mamanu mo o Tatou Olaga,” i. 16: Amata i le faitauina o le tala ia Tavita ma Koliata, e faaaoga ai le faataitaiga mai le tusiga. A o e faamatalaina se isi tala mai tusitusiga paia, ia saili mo le “latou-iina-i aso la.” Lisi mea ia i se pepa. Ia fesili pe faapefea ona tutusa le tala i o tatou nei aso, lisi ai le “o au-iinei-i aso nei.” Ia talanoaina pe mafai faapefea ona fesoasoani lenei metotia i au suesuega faaletagata lava ia o tusitusiga paia ma suesuega a lou aiga.

“Tauagafau: O Se Mataupu Faavae Taua mo Tagata Uma i Taimi Uma,” i. 28: Ia saunia ma le agaga tatalo le lesona lenei, ona o se tasi lenei o autu maaleale. Ia faamalamalama atu le uiga o le tauagafau ma pogai ua taua ai, e faaaoga ai vaega “O Le A Le Tauagafau?” “Aisea e Tatau ai ona Tauagafau?” ma le “O Se Mataupu Faavae Taua.” Ia faamamafa atu le manatu e faapea, o le tauagafau e valaaulia ai le mafutaga ma le Agaga Paia. Faamatala atu le tala mai le vaega “O Faamanuiaga e o Mai Faatasi ma le Tauagafau,” ma valaaulia tagata o le aiga e faasoa mai ni faamanuiaga ua latou mauaina pe matauina mai le faia o lavalava tauagafau.

“O Mea Matagofie O Loo i Luma Atu,” i. 36: Faitau le tala, ma tuu atu i tagata o le aiga e lisi ni tulaga e manaomia ai le lototele. (Atonu e manaomia ona e faamalamalama atu le manatu o le lototele i tamaiti e laiti ifo. O tala o loo i itulau U6–U7 o ni faataitaiga lelei ia.) Ia talanoaina pe na faapefea ona maua e le faifeautalai le lototele ma pe mafai faapefea ona faaaoga e tagata o le aiga ia nei lava mataupu faavae e faatatau i aitema o loo i a latou lisi.

“Ia Fai e Le Aunoa le Taumafaiga,” i. 38: Tuu atu i tagata taitoatasi o le aiga se solo. Fai i tagata taitoatasi e gaugau le solo ae tuu i ona tua le lima e tasi, ma vaai po o ai e vave lona gaugauina o le solo. Faasoa atu tala mai le soifuaga o Elder Octaviano Tenorio. Ia talanoaina po o a uiga na ia te ia na fesoasoani ai i lona ausiaina o ana sini. Fai atu i tagata o le aiga e faaaoga o latou lima ta’ilua e gaugau ai i o latou luma le solo. Ia talanoaina pe aisea e fesoasoani ai le tuu atoa o se taumafaiga e ausia ai se taunuuga sili atu.