Wan Pipol we I Stap Go long Tempol
Famle histri, fasin blong felosip, mo ol baptaes blong olgeta we oli ded finis i helpem ol adalt memba blong kasem ol tempol endaomen blong olgeta.
Gari mo Jenifa Taka, tufala i bin gat wan drim. Tufala tugeta i wantem wan famle we i no save finis. Be kolosap Jenifa i lusum hop. Rod blong kasem drim ia hem i lid i go long tempol, wan samting we Gari i no rere from.
Afta bisop blong tufala i bin kasem wan aedia we i kam tru long fasin we God i toktok long man, we bae i helpem famle Taka—mo tu, bae i helpem plante long ol narafala memba long Tri Foks Wod, Bosman Montana Stek—blong oli kasem drim blong wan famle we i no save finis. Sam yia i pas Bisop Aron Baksuk i bin stap long wan miting blong ol bisop mo ol niu konvet long stek. Eria Seventi we i bin prisaed long taem ia i bin askem wan niu memba, “Yu bin go long tempol blong mekem ol baptaes blong ol dedman finis?” Hem i bin mekem.
Bisop Baksuk i neva tingting blong tekem ol adalt we oli no endao yet blong go long tempol. Nekis wik long hem, Bisop i bin mekem wan apoenmen wetem Bilings Montana Tempol, blong ol adalt long wod blong hem oli mekem ol baptaes blong ol dedman. Visit i go long tempol hem i bin wan sakses, mo long ol manis we i folem, ol elda mo ol hae pris long wod oli bin joenem moa long ol adalt we oli no bin endao blong go long tempol. “Hem i wan pruf se hem i bin wan eksperiens blong olgeta long saed blong spirit, we i putum tugeta ol tingting mo komitmen blong olgeta blong kasem ol endaomen blong olgeta,” Bisop Baksuk i talem.
Stap Rere
Blong rere, ol adalt memba oli wok wetem bisop blong oli kam klin inaf blong go long tempol. Afta, oli tekem ol klas blong rere blong go long tempol. Intres blong olgeta long klas i kam antap afta we oli mekem ol baptaes blong ol dedman. Oli bin faenem se blong tokbaot tempol long klas hem i wan samting, be blong filing stret Spirit blong Lod insaed long tempol hem i wan nara samting tu.
“Blong gat joes blong tekem long tempol wan we i no rere blong kasem moa kavenan be blong hem i tekempat long ol odinens, hem i stil wan impoten eksperiens long hem,” Bisop Baksuk i talem. “Mi ting se hem i go gud wetem filing ia we Jos i stap traem blong pasem tru long ol buklet blong hem blong rere blong go long tempol we oli singaotem: ‘Kam long Tempol!’”1
Presiden blong kworom blong ol elda blong Tri Foks Wod, Deved Boed i talem se blong atendem tempol blong mekem ol baptaes i mekem wan gol i hapen: “Oli stat blong luk se hem i posibol blong oli save kasem ol endaomen blong olgetawan. Plante long olgeta oli no iven putum ol leg blong olgeta long ol yad blong tempol bifo, mekem se, ol trip blong baptaes ia oli givim spesel janis ia long ol memba.”
Plante long ol aktiv memba long wod oli mekem ol baptaes blong ol dedman bifo oli kasem ol endaomen blong olgetawan. “Hem i neva bin wan kwestin blong fasin blong stap klin inaf,” Bisop Baksuk i talem. Be “hem i wan kwestin blong stap rere. Sam oli bin klin inaf mo rere blong mekem ol baptaes be oli no bin rere long saed blong tingting o long spirit blong mekem ol kavenan blong endaomen.” Blong ol man, hemia i wan taem tu blong oli rere blong kasem Melkesedek Prishud.
Famle histri tu i muvum tempol wok. Ol memba blong wod, olsem Lari mo Karolin Isom, tufala i wok long famle histri senta blong givim plante handred famle nem. Ol trifala bigfala wok ia—klas blong rere blong go long tempol, famle histri, mo wosip long tempol—oli wok tugeta. Olgeta we oli stap mekem famle histri oli stap glad blong stap givim ol nem long olgeta we oli stap go long tempol. Ol memba we oli stap go long tempol oli glad blong mekem tempol wok blong ol famle blong olgetawan mo blong ol narafala memba blong wod blong olgeta tu. Mo blong stap long tempol hem i helpem ol memba blong oli rere blong oli save gobak long tempol.
Long ol las yia we i jes pas, 22 memba blong Tri Foks Wod oli bin tekem klas blong rere blong go long tempol, mo 14 long olgeta oli bin stat blong go long tempol oltaem blong mekem ol baptaes blong ol dedman. Afta, taem klas i en, 13 long olgeta 14 memba ia oli bin kasem ol endaomen blong olgetawan. Sam long olgeta oli singgel mo sam oli wido, be ol narafalawan, olsem Gari mo Jenifa Taka, oli bin sil olsem wan famle.
Fasin blong felosip
Gari i bin joenem Jos long 1992, sam manis bifo hem mo Jenifa i bin mared. Jenifa hem i wan memba. Be from ol longfala aoa blong wok mo fasin blong stap joen wetem ol rong fren i mekem i had blong Gari i stap aktiv long Jos, iven wetem sapot blong waef blong hem. Hem i talem se hem i bin spendem plante yia blong “kaekae tabak’ mo talem ol rabis toktok.’”
Taem gel blong tufala, Kodi, i bon, Sista Taka i traem blong resemap hem long gospel mo stap tekem hem i go long jos, nomata we Brata Taka i no wantem eni tul blong Jos long hom. Nomata we Brata Taka i leftemap tingting blong famle blong hem blong go long jos, hem i no stap go. Taem Kodi i gat eit yia, wan misinari i baptaesem hem, i no papa blong hem. Brata Taka i talem, “Mi glad tumas we mi bin stap longwe, be hem i wan bigfala harem nogud—blong stap lukluk be i no tekem pat long hem.”
Long ol yia we oli folem, fasin blong felosip i bin helpem Gari blong kambak long ol Jos aktiviti. Jenifa bae i invaetem ol memba blong wod o ol misinari blong oli kam kakae dina long haos blong tufala, mo hem i save se bae hemia i givim wan janis long olgeta blong toktok wetem Gari. Hem i talem tangkyu long olgeta memba mo misinari ia blong stap soemaot gud eksampol long hem.
Eksampol, Del Praes i bin tijim mama blong Jenifa long hom mo hem i save gud Gari mo Jenifa long wei ia. Taem Brata Praes i mekem hom tijing wetem Brata Taka, tufala i no tokbaot gospel fastaem. Tufala i tokbaot wan samting we tufala i laekem tumas: sut long masket long bus. Ol famle Praes oli sidaon tu wetem famle Taka long ol wod aktiviti, oli iven karem ol kaekae blong stoakabod blong olgeta mo oli givim long ol famle Taka taem Brata Taka i nomo gat wok; mo oli givim long olgeta hani we i kamaot long hanibi blong olgeta. Hani hem i wan bes samting we famle Taka i laekem blong putum long tos bred blong olgeta. Smol presen ia, olsem we Brata Praes i tokbaot, hem i blong “bildimap rilesensip.”
Mekem Ol Smol mo Simpol Samting
Kaonsel we i bin kam long stek presiden blong olgeta i bin helpem famle Taka tu. Presiden Deved Hip i bin askem ol memba blong stek blong mekem “seven smol mo simpol samting” ia: (1) Wanwan i ridim ol skripja blong olgeta evri dei; (2) ridim ol skripja faef taem long wan wik olsem wan famle; (3) gat wanwan prea evri moning mo naet; (4) mekem famle prea evri moning mo naet; (5) go long jos evri Sandei olsem wan famle; (6) mekem ol famle haos naet evri Mandei naet; mo (7) go long tempol evri manis.
Gari i save luk se ol samting ia bae oli helpem famle blong hem blong oli kam moa kolosap—samting we hem i wantem tumas—mekem se famle Taka i save stat blong gat famle prea, skripja stadi, mo famle haos naet. Ol hadwok ia oli bin helpem Gari blong i save gat intres long invitesen blong bisop blong hem i rere blong go long tempol.
Long Jenuware 2006, famle Taka i bin go long wan faeasaed long hom blong bisop. Bisop Baksuk i singao-tem Gari i go long wan kona mo i tokbaot tempol long hem. Long sem taem ia, Gari i bin givim tin tabak blong hem we hem i stap kaekae i go long bisop blong tabak i nomo gohed blong stap olsem wan temtesen long hem. Hem i gat plante kwestin blong bisop long taem ia mo long ol intaviu we oli folem. Bisop i talemaot gud se Gari i mas laef folem ol kavenan we hem i bin mekem long taem blong baptaes blong hem, blong hem i save stap klin inaf blong kasem Spirit.
Ol Taka oli stat blong tekem klas blong rere blong go long tempol, mo Jenifa i stat blong go long tempol wetem wod blong hem evri manis blong mekem ol baptaes blong ol dedman. Gari i stap wok blong i kam klin inaf blong hem tu i go. Gel blong tufala, Kodi, we i gat 11 yia long taem ia, i bin glad tumas blong save go long tempol i no longtaem blong mekem ol baptaes. Taem Kodi i kasem 12 yia, Gari i bin go long tempol wetem hem. Hem i fastaem blong tufala tugeta blong go insaed long tempol.
Kodi i talem, “Hem i naes tumas. Ples i kwaet mo i gat pis long hem. Papa blong mi i bin kam tu, mekem se hem i wan bigfala samting.” Gari i talem se hem i filim wan “pis mo glad we hem i no bin save long hem long fas taem ia.”
Nekis Sandei long klas blong rere blong go long tempol, Gari hem i wan defren man. “Hem i bin filim paoa blong Spirit,” Sista Elna Skofil we i bin stap tijim klas blong sam yia finis nao i talem. Gari i stap afta long ol klas mo askem ol kwestin. Hem i bin filim Spirit long tempol mo i wantem blong gobak—i no blong mekem ol baptaes nomo be blong kasem endaomen blong hem mo blong famle blong hem oli sil long hem.
Long nekis manis, ol Taka oli bin go bakegen long tempol wetem bisop mo ol memba blong wod.
Stap Winim Ol Tes
Long ol wik bifo Brata mo Sista Taka tufala i kasem ol endaomen blong tufala mo sil long tufala, tufala i bin filim fasin blong agens we i kam long enemi. Gari i bin stap mekem progres, be hem i stap gat ol tu tingting abaot hemwan, se hemi i klin inaf blong go long tempol o nogat. Drim blong wan famle we i no save finis i stap kam kolosap nomo, be oli filim se bae oli no save kasem. Ol Taka oli save se oli mas prea tugeta oltaem, mo askem help blong kasem paoa. “Mifala i kasem paoa ia oltaem, taem mifala i filim wan pis mo promes se evri samting oli stap long ol han blong Lod,” Sista Taka i talem. “Iven go kasem taem we mifala i bin wokbaot i go insaed long tempol, kwaet Spirit blong Hem i bin stap wetem ful famle blong mifala.”
Afta we Gari mo Jenifa i bin kasem ol endaomen blong tufala, tufala i bin nildaon long siling rum wetem ol pikinini blong tufala, Kodi mo Garet, we tufala i werem ol waet klos nomo. Taem Garet we i gat sikis yia i luk mama blong hem i stap krae, hem i pusum han blong waepem ol wota blong ae long fes blong mama blong hem. Gari mo Kodi, tufala tu i stap krae tu, from tufala i glad. Iven man we i silim olgeta i bin krae tu.
Ol Taka oli talem se naoia famle blong olgeta i stap harem gud from oli gat ol strong rilesensip mo gudfala komunikesen. Gari i talem, “Mifala i glad moa. Mi mo waef blong mi i stap kolosap moa, mo ol pikinini blong mitufala oli save luk samting ia.” Gari i filim se hem i wan eksampol we i gud moa long ol memba blong famle blong hem we oli no memba blong Jos, mo hem i hop se ol famle long wod blong hem bae oli wantem ol sem blesing ia we Lod i bin givim long olgeta, famle Taka, tru long tempol.
Lef: foto blong Bilings Montana Tempol we i kam long Stiv Bandeson; foto blong ples blong baptaes blong Bilings Montana Tempol we i kam long Noman Jaels; raet: foto i kam long Drek Busat, © Busath Photography
Gari, Jenifa, Kodi, mo Garet Taka oli glad blong stap long Bilings Montana Tempol long dei blong siling blong olgeta.
Ol memba blong Tri Foks Wod oli draev blong tu aoa mo haf oltaem blong givim seves long Bilings Montana Tempol. Sam long olgeta we oli kam long tempol, oli ol adalt we oli stap mekem ol baptaes blong ol dedman mo semtaem oli stap rere wetem ol patna blong olgeta blong kasem ol endaomen blong olgeta mo blong oli sil.
Famle Taka i glad blong givim pikja ia