Sam Tingting blong Famle Haos Naet

Ol tingting blong tij ia oli givim blong givim yu sam tingting. Yu save jenisim sam pat blong oli stret blong yu save yusum wetem famle blong yu.

“Ol Blesing blong Tempol,” p. 12: Soemaot wan pikja blong wan tempol. Putum wan pikja blong wan famle long saed blong pikja blong tempol. Taem yu stap talemaot sot stori ia, muvum pikja blong famle i go kolosap long tempol. Askem ol memba blong famle se oli filim olsem wanem taem famle i kasem tempol. Ridim Doctrine and Covenants 109:7–23, lukaotem sam moa wei blong rere blong go long tempol mo ol blesing we oli kam taem yu stap go atendem tempol. (Luk tu long toktok blong Silvia H. Olred “Ol Tabu Tempol, Ol Tabu Kavenan,” we i kam long Oktoba 2008 jeneral konfrens.)

“Mi? Wan Man blong Lukaot long Sipsip long Isrel?” p. 30: Ridim seksen blong “Lidim Olgeta i Kambak,” mo toktok raon long olsem wanem yumi save kam ol man blong lukaot long sipsip long ol narafala man. Olsem wan aktiviti blong ol yang pikinini, tekem olgeta oli gat wanwan taem blong go haed mo lukaotem ol narafalawan olsem wan man blong lukaot long sipsip i stap lukaotem sipsip we i lus. Tingting long ol pipol we yu save helpem blong karem olgeta i kambak “insaed long yad.” Endem wetem wan prea blong kasem givhan long olsem wanem blong helpem olgeta. (Luk tu long toktok blong Elda Eduado Gavaret, “Kambak Hom,” long Oktoba 2008 jeneral konfrens.)

“Stat wetem Prea,” p. 40: Talemaot sot ol stamba poen long stori ia. Ridim bakegen fas paragraf long seksen ia “Wan Man blong Toktok Wetem.” Askem ol memba blong famle blong serem ol taem we oli bin kam strong moa olsem wan famle taem oli mekem famle prea. Blong talemaot gud se hem i impoten blong prea from ol narafalawan, tingting blong ridim trifala las paragraf blong toktok blong Elda Deved A. Bedna, “Prea Oltaem,” we i kam long Oktoba 2008 jeneral konfrens.

“Merikel blong Totila,” p. F6: Ridim stori, mo toktokraon long ol jalenj we famle blong Raoul i fesem taem oli stap rere blong go long tempol. Tingting blong mekem sam totila (pankek blong ol man Meksiko we oli mekem wetem flaoa blong kon mo putum mit o faol insaed) olsem wan famle o aktemaot ol step blong mekem ol totila, stat wetem taem oli planem ol kon i go kasem taem oli salem ol totila long ol turis. Blong endem, ridim toktok blong Elda Denis B. Nuenjwanda.

Yusum Gospel

“Hem i no had blong tekem ol prinsipol blong toktok we i no gat en mo yusum olgeta long ol spesel nid blong yumi. Blong ol gudfala samting oli kamaot long trutok, oli mas kam pat blong ol laef blong ol man.”

Elda Brus R. MaKonki (1915–85) blong Kworom blong olgeta Twelef Aposol, long Teaching, No Greater Call (1999), 9–10.

Rikwes blong ol Stori

Wanem nao ol eksperiens we oli bin helpem yu blong save moa abaot Sevya? Olsem wanem nao yu bin kam blong andastanem moa mo kasem wan bigfala glad abaot fasin blong sakem sin, fogivnes, Atonmen, sakramen, o ol narafala pat blong ministi mo misin blong Sevya? Plis sendem wan stori we i tokbaot gud ol eksperiens ia blong yu mo wanem nao yu bin lanem aot long olgeta eksperiens ia i kam long [e-mail].