Ol Blesing blong Givhan
Ol memba blong Jos oli blesem ol laef mo mekem ol testemoni oli kam moa strong taem oli folem eksampol blong Sevya blong givhan long ol narafala man.
Wan gudfala eksampol hem i ministri blong Presiden Tomas S. Monson we ol memba blong Jos blong Jisas Kraes blong Ol Lata-dei Sent oli save gud long hem. Blong moa long siksti yia nao hem i bin stap stretem ol han blong hem i go long olgeta we oli stap long nid, i leftemap tingting mo i givim pis long plante man mo i givhan hemwan long olgeta we oli sik mo oli stap harem nogud.1
“Tedei i gat ol hat blong mekem oli glad, i gat ol wok blong mekem—iven ol sol we oli impoten tumas blong sevem,” Presiden Monson i bin talem. “Olgeta we oli sik, olgeta we oli taed, olgeta we oli hanggri, olgeta we oli kolkol, olgeta we oli gat kil, olgeta we oli stap olgetawan, olgeta we oli olfala, olgeta oli stap wokbaot olbaot, evriwan long olgeta ia, oli stap krae from help blong yumi.”2
Long ministri blong hemwan, Presiden Monson i bin soemaot se fasin blong lukaotem mo fasin blong givhan hem i tu defren samting. Ol jos memba oli lukaotem ol program mo odinens, be oli givhan long wanwan man, oli lavem olgeta mo oli kam blong helpem olgeta. Taem hem i stap stretem ol han blong hem blong helpem ol narafala man, Presiden Monson i stap mekem olsem Sevya, we “i no kam blong [bae] ol man oli mekem wok blong hem, be i kam blong mekem wok blong olgeta” (Mak 10:45).
Olsem we ol fo stori ia oli tokbaot, ol Lata-dei Sent we oli “go, mo mekem … olsem we hem i mekem” (Luk 10:37), oli blesem ol narafala man, oli blesem Jos, mo olgetawan.
Woman Sameria wetem Flaoa blong Mekem Pankek
Blong mi kam gud bakegen folem smol operesen ia i no bin isi olsem we oli bin mekem mi, mi tingting long hem. Be olsem presiden blong Rilif Sosaeti long wod, mi bin filim se mi mas stap helpem ol narafala man, mo mi no mas askem help long olgeta. Long Mandei moning, tri dei afta we mi kamaot long operesen, mi mas wekemap seven pikinini blong mi mo mekem olgeta oli rere blong go long skul. Mi stap tingting sapos i gud blong mi mekem bigfala gel blong mi i stap long haos blong helpem mi blong lukaotem bebi.
Taem ol tingting ia oli stap go tru long hed blong mi, bel blong doa i ring. Viki Wudad, fas kaonsela mo wan gudfala fren blong mi, tufala i bin kam blong helpem mi. Hem i talem se hem i kam blong mekem sam pankek. Hem i stap holem wan bol blong flaoa blong mekem pankek mo i askem weaples nao bae hem i save faenem fraenpan. Ol pikinini oli bin glad tumas.
Afta long brekfas, Viki i mekem ol pikinini blong mi oli go long skul, i klinim ples, mo i karem bebi i go hom wetem hem kasem taem bebi ia i silip long medeldei. Afta, taem mi askem hem se huia nao i stap lukaotem ol yangfala pikinini blong hemwan, hem i talem long mi se hasban blong hem i kamaot kwik long wok long dei ia blong mekem se hem i save helpem mi.
Seves blong Viki mo hasban blong hem long dei ia i givim taem long mi blong karembak ol paoa blong mi, mo blong mi save harem gud hariap.
Beveli Askrof, Arisona, YSA
Mekem Olsem long Olgeta Ia we Oli Daon Moa
Wan dei taem mi stap long hom wetem smol boe blong mi, mi bin glis long wan step mo mi bin foldaon. Bel blong mi i bin soa blong sam dei, mekem se mi bin go luk wan dokta.
Mi bin gat bel long taem ia, mo ol tes oli soemaot se plasenta (basket blong fidim bebi) i bin foldaon. Kondisen ia i nidim mi blong mi mas spel gud, o bae mi lusum bebi ia.
Mi bin wari from mifala i bin gat tri smol pikinini finis mo mifala i no gat mane blong pem wan blong givhan. Ol sista long branj blong mi, oli bin faenemaot abaot kondisen blong mi ia, mo oli bin kam blong helpem mi. Oli bin oganaesem olgetawan long tri grup blong oli save helpem mi long moning, aftenun, mo long naet.
Oli bin kam blong was, aeanem ol klos, kuk, klinim ples, mo helpem ol pikinini blong mi wetem ol homwok blong olgeta. Wan sista we nem blong hem Rute, we i jes baptaes nomo long Jos taem we mi bin stap silip nomo long bed, i kam blong mifala i save gud hem long hom. Rute, wan nes, i help long naet mo i stap givim ol stik meresin long mi.
Mi no nidim blong askem eni samting; ol sista ia oli save wanem mi nidim mo oli tekem kea long evri samting. Taem oli gat plante help, bae wan sista i sidaon mo i storian wetem mi. Oli mekem olsem ia blong tri manis.
Ol sista ia oli bin givim long mi paoa, lav, mo dedikesen. Oli givim ol taem mo talen blong olgeta. Oli bin mekem ol sakrifaes blong stap wetem mi. Oli neva askem eni samting long mi. Oli lavem mi mo givim seves long mi, oli folem eksampol blong Lod, we i bin tijim yumi, “Tru mi talem long yufala, taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo” (Matiu 25:40).
Enils do Rosio Ferera da Silva, Parana, Brasil
Karem Ol Klos blong Olgeta Nomo I Kam
Taem hasban blong mi, Brandon, i stap long Olando, Florida, long wan trip blong bisnis, hem i bin wekap wan naet wetem wan strong fiva mo i gat hadtaem blong pulum win. Hem i ringim ambulans blong i tekem hem i go long hospital, mo long ples ia nao hem i jes lanem se hem i gat wan series kes blong nemonia (wan rabis sik we wan lang i no wok mekem se yu no save pulum gud win).
From se Brandon mo mi i gat ol smosmol pikinini we oli jes wokbaot nomo, mi no save livim kwik hom blong mifala long Pensilvania i go long Florida. Mi ringim Brandon evri dei, wetem hop se bae hem i oraet blong hem i kambak long mifala.
Be, helt blong Brandon i jes go nogud moa. Taem wan nes long hospital i talem long mi se mi mas go kwik long hospital, mi stat blong tingbaot se bae huia nao bae i save lukaotem ol pikinini blong mitufala.
Mama blong mi i agri blong askem spel long wok, mo bae hem i kam kwik olsem we hem i save mekem, be plen blong mi bae i aot bifo hem i kasem hom blong mi. Mi bin ringim sam fren blong luk sapos oli save lukaotem ol boe blong mi kasem taem mama blong mi i kam. Wan fren long Rilif Sosaeti, Jaki Ols, i talem se bae hem i glad blong lukaotem ol pikinini blong mi.
“Karem ol klos mo ol napkin blong olgeta nomo i kam,” Jaki i talem, “mo bae mi lukaotem olgeta blong hamas dei we yu nidim blong go stap wetem hasban blong yu.”
Mi stat blong no wantem letem sista ia i lukaotem ol pikinini blong mi, from hem i gat tri pikinini blong hemwan, hem i gat wan bisi laef, be hem i gohed blong talem se evri samting i oraet nomo. Sot taem afta, taem mi go blong putum ol pikinini blong mi long haos blong Jaki, hem i bin leftemap tingting blong mi mo i talem, “No wari long olgeta. Yu wari nomo blong mekem Brandon i oraet mo karem hem i kambak long hom. Mi bin lukaotem ol smosmol pikinini bifo.”
Mi save long taem ia se bae ol boe blong mi bae oli sef, hapi, mo bae oli oraet, mo i bin olsem. Mi bin go stap wetem hasban blong mi, we i bin sik tumas long taem ia we mi bin kamaot long hospital. Be afta sam dei i pas, hem i jes oraet mo mifala i bin gobak hom.
Mi mi glad tumas long wan gudfala fren we i bin ansa long nid blong mi—bitim wanem we mi bin askem hem blong mekem—mo i bin givhan long mitufala long wan taem blong nid.
Keli Paks, Pensilvania, YSA
Seves long Saed blong Bed
Brata Andesen, wan Yang Man presiden blong 35 yia we i wok gud, hem i stret kaen lida blong ol yut we evriwan oli laekem: hem i wan riten misinari, papa blong faef pikinini, ona blong wan bisnis, mo hem i yang long hat. Be naoia hem i gat lukemia (taem i gat tumas waet blad sel long bodi mo i mekem yu sik tumas, samtaem yu save ded from). Afta taem hem i kasem nius ia long bisop blong hem, Raea Hil, fas asisten blong kworom blong ol pris, i tekem aksen; hem i singaotem ol pris long kworom blong hem we oli aktiv mo olgeta we oli no aktiv tumas.
“Bae yumi go long hospital blong luk Brata Andesen. Yumi nidim evriwan. Yu save kam?” hem i ripitim toktok ia long evri telefon kol we hem i stap mekem.
“Mi no sua sapos mi save kam,” wan pris i talem. “Ating bae mi nidim blong wok.”
“Bae mifala i wet kasem taem yu finis wok,” Raean i ansabak long hem. “Hemia i wan samting we yumi evriwan i mas mekem tugeta.”
“OK,” memba blong kworom ia i talem. “Bae mi luk sapos mi save jenisim taem blong wok wetem wan narafala man.”
Evriwan long ol 11 pris ia oli bin go long hospital. Olgeta we oli no aktiv tumas mo olgeta we oli neva mestem wan Sandei miting oli bin stap tugeta long hospital. Tugeta, oli laf mo krae mo prea mo mekem ol plan blong fiuja. Long ol manis we i folem, oli bin putum taem blong go rabem ol leg blong Brata Andesen taem blad i no ron gud long bodi blong hem; oli tekem ol taem blong givim blad blong tu aoa blong hem i save kasem blad blong olgeta nomo, mo oli iven draev blong 32 kilomita long naet long wan danis blong skul wetem ol gel fren blong olgeta (wetem tu yang woman we tufala i no memba blong Jos) i go long saed blong bed blong brata Andesen blong oli serem ol eksperiens blong olgeta blong hae skul wetem hem.
Long ol las dei blong hem, Brata Andesen i bin askem olgeta blong sevem ol misin, blong mared long tempol, mo blong stap lukaotem wanwan long olgeta. Moa long 12 yia afta, taem oli kambak hom long ol misin blong olgeta, oli mared long tempol, mo oli statem ol famle blong olgetawan, oli stil stap tingbaot ol eksperiens long saed blong spirit we ol wota blong ae i bin ron from seves blong olgeta we oli bin mekem tugeta wetem lida blong olgeta we oli lavem tumas.
Noman Hil, Teksas, YSA
Ol pikja i kam long Greg Tokelson