Ol Kwestin mo Ansa
“Long famle blong mi, mi mi yang bitim ol narafalawan; i gat plante yia bitwin ol brata mo sista blong mi mo mi. Oltaem nomo mi filim se ol brata mo sista blong mi oli no tingting long mi long ol aktiviti mo ol storian blong olgeta. Wanem nao mi save mekem blong rilesensip blong mifala i kam antap?”
Jalenj ia i save kam wan janis blong letem ol brata mo sista blong yu oli save se yu wantem blong tekempat moa long ol laef blong olgeta tu. Ating oli no save yu se yu filim se oli no tingting long yu. Yu save toktok long papa mo mama blong yu abaot samting ia. Bae tufala i gat sam gudfala aedia blong givim.
Givim tingting, long ol brata mo sista blong yu, abaot sam aktiviti we yu save mekem wetem olgeta, mo tingting long ol topik we yu save tokbaot wetem olgeta. Kipim long maen ol taem mo ol intres blong olgeta taem yu stap planem ol wei blong spendem taem wetem olgeta. Taem yu lisin long olgeta mo soemaot intres long ol aktiviti blong olgeta, bae i no mekem rilesensip blong yufala i kam antap nomo, be i save helpem yu tu blong lanem samting. Oli stap go tru long ol samting we yu bae yu go tru long olgeta long sam yia we bae i kam.
Tingbaot se ol famle oli impoten long plan blong Papa long Heven. Sapos yu prea from help blong Hem, Hem i save givim ol aedia long yu blong mekem rilesensip blong yu i kam antap wetem ol brata mo sista blong yu. Gat strong tingting blong mekem folem ol smol toktok blong Tabu Spirit we yu kasem.
Toktok wetem Olgeta
Long famle blong mi, mi tu, mi yangfala evriwan long ol brata mo sista, be wanem mi bin faenemaot hem i we ol brata mo sista blong mi oli wantem blong save mi semmak olsem we mi tu mi wantem blong save olgeta. Ating ol brata mo sista blong yu bae oli glad sapos yu ringim olgeta jes blong toktok o invaetem olgeta blong go kakae lanj samtaem. Talem long olgeta wanem i stap gohed long laef blong yu. Bae i minim plante long olgeta se yu no fraet blong serem ol tingting mo filing blong yu wetem olgeta. Mo tu, tokbaot ol topik long saed blong spirit wetem olgeta. Bae i helpem yu blong yufala i kam kolosap moa, i no wetem yufala nomo, be wetem Papa blong yufala long Heven tu.
Kelsi H., 16, Albeta, Kanada
Stap Wan Gud Eksampol
Mi tu, mi gotru long had situesen olsem ia. Mi ting se gudfala samting we yumi save mekem hem i blong kam wan eksampol long ol bigfala brata mo sista blong yumi. Long wei ia, lav mo pis bae i save stap long medel blong yumi. Yumi mas talem long olgeta hamas yumi lavem olgeta, mo yumi mas traem blong stap wan olsem wan famle. Mo afta, bae oli luksave hamas yu lavem olgeta. Mi save se ol samting ia bae i wokaot step folem step.
Adam B., 16, Gyor-Moson-Sopron, Hangari
Spendem Taem Tugeta
Hem i had samtaem blong spendem taem wetem ol bigfala brata mo sista blong yumi from skul mo ol narafala aktiviti we oli gat evri dei. Be taem yu gat taem, go mo toktok wetem olgeta, talem long olgeta abaot dei blong yu, mo faenemaot wanem oli stap mekem. Sapos yu gat ol problem wetem wan samting, yu save askem tingting blong olgeta blong oli save se yu no tingting nating long ol aedia blong olgeta. Tritim olgeta long wei we yu wantem olgeta blong oli tritim yu. Yu save plei ol gem mo spendem taem tugeta—bae i save help bigwan. Yu mas talem long olgeta hamas yu lavem olgeta. Be, hem i moa impoten blong yu prea. Papa long Heven bae i helpem yu oltaem.
Katerin M., 14, Aedaho, YSA
Tritim Olgeta wetem Kaen Fasin
Olsem yangfala pikinini long famle blong mi, samtaem mi filim se mi no stap insaed long ol aktiviti mo ol storian blong ol bigfala brata mo sista blong mi, mo long mi, hemia i mekem mi harem nogud. Be taem mi tingbaot Jisas Kraes, mi luksave se taem mifala i serem ol sem valiu wetem famle blong mi, mifala i save mekem wanwan long mifala i kam strong moa mo leftemap tingting blong mifala wanwan. Tritim evriwan wetem kaen fasin mo respek. Soem intres long olgeta, mo letem olgeta i save se yu kea long olgeta.
Josef M., 16, Lite, Filipin
Glad long Evri Taem Tugeta
Samtaem mi filim se oli bin fogetem mi from ol sista blong mi oli gat ol aktiviti blong olgetawan, olsem papa mo mama blong mi i stap gat. Taem, taem i stap pas, mi bin kam blong andastanem se evriwan ia oli lavem mi mo hemia i no from se oli no wantem blong spendem taem wetem mi, be from evri samting i gat wan taem blong hem. Hem i impoten se yu mas glad long evri taem we yu stap wetem olgeta, blong laf, blong stap kaen, mo antap long evriwan ia blong soemaot long olgeta lav blong yu. Hem i impoten blong yu prea mo askem Papa blong yumi blong i helpem yu blong stap kolosap long ol brata mo sista blong yu. Hem bae i harem yu mo bae i helpem yu.
Robeto S., 18, Santiago, Jile
Tekem Taem blong Toktok
Mi mi las bon blong seven pikinini. Taem mi bin smol, mi filim se mi no stap insaed long eni samting, be mi luksave tu se oli lavem mi, iven moa bitim tingting blong mi. Ating bae yu no save talem long olgeta naoia, be ol gudfala taem we mi bin gat wetem ol bigfala brata mo sista blong mi hem i blong toktok wetem olgeta. Mi luksave se oli trastem mi tumas, mo i stil semmak yet. Blong save toktok wetem olgeta, bae mi traem blong helpem olgeta long ol wok blong olgeta, stap kaen long olgeta, traem blong mi no rao wetem olgeta, mo kam pat blong grup blong olgeta blong olgeta tu oli save helpem mi. Hemia i bin helpem mi blong mi filim se mi tu mi gat pat insaed long ol aktiviti, mo blong mi filim lav.
Maria H., 19, Meksiko Siti, Meksiko