Visiting Tijing Mesej

Fidim Gud Nekis Jeneresen

Tijim ol skripja mo ol toktok ia o, sapos i gat nid, tijim wan narafala prinsipol we bae i save blesem ol sista we yu stap visitim. Serem testemoni blong yu abaot doktrin ia. Invaetem olgeta we yu stap visitim blong serem wanem oli bin filim mo lanem.

Hem i wan impoten duti we yumi kaon long hem long ol nekis jeneresen (luk long D&C 123:11:).

Wanem Hem I Responsabiliti blong Mi long Nekis Jeneresen?

Elda Nil A. Makswel (1926–2004) blong Kworom blong olgeta Twelef Aposol: “Lod i bin kipim gud olgeta from taem ia, naoia yumi mas lukaotem gud [nekis jeneresen] … mo rere from spesel taem blong olgeta long histri blong man! Oli bin holembak olgeta blong oli kam long taem ia, be naoia, yumi nidim blong pusum olgeta i go fored blong oli mekem wok we oli bin jusum blong olgeta blong wokem… .

“Ol yut oli no olsem ol fiuja konvet. I gat ol impoten taem, taem we ol sol blong olgeta i stat blong tanem—i go long Lod o longwe long Hem. Ol taem blong desisen ia, oli no save krietem olgeta oltaem, be taem oli kamaot, bae yumi no mas westem. Oltaem, ol taem ia oli kamaot long ol kwaet mo revren storian wetem ol papa mo mama, ol bubu, wan bisop, wan adalt lida, o wan stret mo gud fren” (“Unto the Rising Generation,” Ensign, Epril 1985, 8, 10).

Elda Ronal A. Rasban blong Presidensi blong olgeta Seventi: “Jeneresen blong yumi we i stap kam i gud inaf blong kasem ol gudfala hadwok blong yumi blong sapotem mo mekem olgeta i kam moa strong long rod blong olgeta blong kam wan adalt… . … Long evri aksen we yumi tekem, long evri ples we yumi go, wetem evri Lata-dei Sent yang man o woman we yumi mitim, yumi nidim blong gat wan bigfala save long nid ia blong mekem olgeta i kam moa strong, blong fidim olgeta, mo blong kam wan gud eksampol long ol laef blong olgeta” (“Our Rising Generation,” Liahona, Mei 2006, 47).

Olsem Wanem Mi Save Fidim Gud Nekis Jeneresen?

Presiden Godon B. Hinkli (1910–2008): “Neva fogetem se ol smolwan ia oli ol boe mo gel blong God, mo se wok blong yu i blong lukaotem olgeta blong wan sot taem nomo, se Hem i wan papa bifo yu kam wan papa o mama, mo se Hem i no givimaot raet o intres blong Hem olsem wan papa blong ol smol wan ia blong Hem… . Resemap ol pikinini blong yu wetem lav, fidim gud olgeta mo tijim olgeta long ol wei blong Lod. Tekem gud kea long ol smolwan blong yufala. Welkamem olgeta long ol hom blong yufala, mo fidim mo lavem olgeta wetem evri hat blong yufala. Long ol yia we oli stap kam, ating bae oli mekem sam samting we yufala i no wantem olgeta blong oli mekem, be traem wet smol, wet smol. Yu no bin mekem nogud sapos yu bin traem bes blong yu” (“Words of the Living Prophet,” Liahona, Mei 1998, 26–27).

Juli B. Bek, Rilif Sosaeti jeneral presiden: “Blong fidim gud, i minim blong tijim, kea from, mo mekem i gro. … Fasin blong fidim gud olgeta, i nidim oganaesesen, fasin blong save wet longtaem, lav, mo wok. Blong givhan blong mekem man i gro tru long fasin blong fidim gud man, i tru, hem i wan paoa mo hem i wan impoten rol we oli givim nomo long ol woman” (“Mothers Who Know,” Liahona, Nov. 2007, 76, 77).

Barbara Tomson, seken kaonsela long Rilif Sosaeti jeneral presidensi: “Olsem ol sista blong Rilif Sosaeti yumi save helpem wanwan long yumi blong mekem ol famle oli kam moa strong. Yumi gat ol janis blong givim seves long plante samting. Oltaem yumi stap wok wetem ol pikinini mo yut we oli nidim stret samting we yumi stap givimaot. Yufala, ol olfala sista i gat ol gudfala advaes mo eksperiens blong serem wetem ol yangfala mama. Samtaem wan Yang Woman lida o wan Praemeri tija i talem o mekem stret samting we i nid blong sapotem wanem wan papa o mama i stap traem blong tijim. Mo i klia se yumi no nidim eni spesel koling blong stretem ol han blong yumi blong helpem wan fren o neiba” (“I Will Strengthen Thee; I Will Help Thee,” Liahona, Nov. 2007, 117).

Foto pikja mo bakgraon i kam long Greg Daemon