Ples blong Pis
Long tufala yang woman ia blong Dominik Ripablik, tempol hem i moa bitim wan naesfala bilding. Hem i wan gudfala samting we i mekem tufala i tingbaot ol bigfala hop mo drim blong tufala.
Dilsia Soto, we i gat 16 yia, i stil tingbaot yet dei ia we oli bin dediketem tempol long hom taon blong hem long Santo Domingo long Dominik Ripablik: “Mi bin gat naen yia nomo long taem ia, be mi talem, ‘Kas! Wan tempol long ples ia!’ Oltaem mi stap luk ol man oli go long ol narafala kantri blong go sil mo blong mekem ol kavenan. Mi stap talem long miwan, ‘Naoia famle blong mi mo mi bae i nomo go long wan narafala kantri from mifala i gat wan tempol blong mifala i stap kolosap nao.’”
Tedei tempol ia i stanap naes mo i stanap hae long kapitel siti, wetem ol naesfala garen raon long hem we oli stap lukaotem gud mekem se taem ol man oli pas kolosap, oli ting se hem i wan katedral. Dilsia i glad blong eksplenem se hem i moa tabu bitim hemia. Long ol yad blong tempol i gat wan kwaet filing blong respek long ea we i defren long bisi ea blong ol rod mo ol maket long taon.
Hem i long ples blong pis ia we Dilsia mo fren blong hem Kelsia St. Gardien, we i gat 14 yia, i bin kam long hem. Tufala tugeta i memba blong Mirado Wod blong Santo Domingo Dominik Ripablik Indipendensia Stek. Tufala tugeta i bin go long tempol finis blong mekem ol baptaes blong ol dedman. Be long dei ia, tufala i kam nomo blong wokbaot long ol garen, blong toktok, mo blong filim aotsaed long bilding ia, Spirit we tempol i holem insaed.
Ol Strong Tingting blong Dilsia
“Mi gat wan bigfala lav long Lod, mo mi glad tumas long wanem Hem i bin mekem long laef blong mi,” Dilsia i talem. “Ol stret famle blong mi oli ol memba blong Jos, be ol anti, ol angkel, mo ol kasen oli no memba yet. Taem oli kam long haos blong mi, oltaem mi gat wan Buk blong Momon i stap rere from samtaem bae i save gat wan janis blong serem gospel wetem olgeta.” Hem i serem tu gospel wetem ol fren mo “wetem eniwan we mi mitim we i gat tru intres.” Mo evri taem hem i mekem samting ia, hem i talem, “mi filim Spirit i strong. Evri taem mi serem testemoni blong mi, mi filim fulwan bakegen se Jos i tru evriwan.”
Hem i tingbaot wan seminari lesen abaot plan blong fasin blong sevem man. Hem i talem, “Bifo long wol ia, yumi bin stap long wan bigfala Kaonsel long Heven, mo yumi bin jusum blong folem Papa blong yumi long Heven mo akseptem sakrifaes we Jisas Kraes bae i mekem long bihaf blong yumi. Tija blong mifala i eksplenem se yumi save se yumi bin obei long Papa long Heven long taem ia from yumi stap long wol ia naoia wetem ol bodi blong mit mo bun. Taem hem i talem samting ia, mi save se ol samting ia oli tru. Long naet ia, long ol prea blong mi, mi bin krae mo talem tangkyu long God from save ia.”
Dilsia i kwotem Fas Korin 3:16: “Ating yufala i save finis we yufala i olsem haos blong God, mo we Spirit blong God i stap finis long yufala?” Hem i talem “Sapos mi tu mi wan tempol, mi nidim blong stap klin mo stap naes olsem wan tempol. Hem i wan gudfala blesing blong stap long Jos ia mo blong kam wan woman wetem klin fasin!”
Hem i talem se bigfala tingting blong hem i blong laef wetem Papa blong hem long Heven bakegen sam dei. “Mi mi glad tumas se Hem i bin givim tempol long yumi, blong yumi save mekem evri samting we yumi nidim blong mekem blong gobak stap wetem Hem.” Dilsia i talem. “Gudfala wei blong talem tangkyu long Hem i blong laef long wei we Hem i askem yumi blong laef folem.”
Dilsia i talem, “Lod i wantem yumi blong go insaed long haos blong Hem, blong lanem abaot Hem, mo blong mekem ol rod blong yumi blong go laef long ol taem we i no save finis wetem Hem.” Hem i talem se hem i laekem blong tekempat long ol baptaes blong ol dedman from “hem i wan wei blong helpem olgeta we oli stap wet long narasaed blong vel, blong mekem wan samting we oli no save mekem blong olgetawan.”
Ol Komitmen blong Kelsia
Kelsia i agri. Hem i talem, “Ol bubu blong yumi oli nidim yumi blong mekem wok blong olgeta, mo mi save se bae oli glad long yumi from. Be mi stap wet nomo blong save luk bubuwoman blong mi we mi no bin save long laef ia. Bae mifala i mekemsua se oli mekem tempol wok blong hem.”
Taem oli tokbaot tempol i mekem Kelsia i stap sore. “Mi mi wantem blong mekem ol desisen we bae oli helpem mi blong mi sil long famle blong mi,” hem i talem. “Yumi mas respektem gospel mo blong kipim ol komanmen al pie de la letra [stret olsem loa ia i talem],” hem i talem. “Yumi mekem from yumi lavem Papa blong yumi long Heven, mo fasin blong obei hem i olsem wei we yumi soemaot tangkyu blong yumi long Hem.”
Famle blong Kelsia i bin joenem Jos long Disemba 2006, sikis yia afta we papa mo mama blong hem oli bin muvaot long Haiti i go long Dominik Ripablik. “Mi glad tumas long ol misinari we oli bin noknok long doa blong mifala. Hem i gud tumas blong filim Spirit mo blong lan abaot plan blong Papa long Heven we Hem i gat blong yumi. Stat long taem ia we gospel i bin kam long ol laef blong mifala, famle blong mi i stap kolosap oltaem. Mi mi glad tumas we Hem i bin givim long mi wan famle we i save stap wan, iven long ol rabis hadtaem. Mo blong save se mifala i gat janis blong save sil blong taem we i no save finis, i luk olsem wan long ol blesing we i bigwan bitim ol narafalawan.”
Papa mo mama blong Kelsia, tufala i stap tekem wan klas blong rere blong go long tempol naoia, mo hemia i mekem Kelsia i tingbaot dei ia we bae hem i mared long tempol. “Hemia i stamba gol blong mi, se bae fiuja hasban blong mi mo mi, bae mitufala i mas klin inaf blong gat mitufala bakegen, mo blong mitufala i klin inaf blong kam wan famle we i no save finis.”
Stap Serem Pis
Tu fren i bin wokbaot pasem pol blong flag blong kantri blong tufala we i stap flae long win. Dilsia i talem “Iven flag blong tempol i mekem mitufala i stap tingbaot blong stap fetful. Hem i moa bitim ol kala ia nomo. Hem i gat moto Dios, patria, libertad [God, kantri, fridom] mo i soemaot wan Kristin kros mo Ol Ten Komanmen. Hem i mekem mifala i tingbaot se ol pipol we oli bin biliv long God nao oli bin stanemap kantri blong mifala, mo se God i stil impoten long ples ia.”
Tufala i bin wokbaot pasem ples long fored blong go insaed long tempol tu, ples ia we ol toktok ia Santidad al Señor, la Casa del Señor (Holines long Lod, Haos blong Lod) oli bin raetem antap long doa, olsem we oli raetem long evri tempol.
“Evri taem mi ridim ol toktok ia, mi stap fulap wetem wan strong witnes se ol toktok ia oli tru,” Dilsia i talem. “Mi tingbaot wan taem we mi bin kam long ples ia wetem grup blong Miutuol blong mi long wan naet, blong wokbaot nomo long yad blong tempol. Afta we mifala i finis, bisop i askem mifala se mifala i bin filim wanem long ples ia. Mifala i bin toktok raon long hemia mo kam antap wetem wan toktok olsem ansa: pis.”
Mo Kelsia mo Dilsia, tufala i bin wokbaot i go mo stap tingting long wan stret toktok ia olsem ansa … we i stret from tempol hem i stret ples blong pis.
Ol foto i kam long Rijad M. Romni